মরূপশিংগী মফমদা য়াইফ পাউজেল পীজরি,

ঙরাং, ইকাই খুম্নরবা রাস্ত্রপতিগী ৱারোল অসি ভারত মচা করোর ১৪০গী মশা-মরোমদোম থাজবগী মতৌ, ভারত মচা করোর ১৪০গী অপুনবা হোৎনবগী ৱারোল অমসুং ভারত মচা করোর ১৪০গী মরুওইনা নহারোলশিংগী অপাম্বশিংগী অচুম্বা ৱারোলনি। মসিদা পার্লিয়ামেন্তকী মীহুৎ পুম্নমক্কীদমক লমজিং-লমতাকপীবা ৱাখল্লোন কয়া অমসু থমখি। সেসন অসিগী হৌরকপদা, অমসুং ২০২৬কী হৌরকপদা, লৈবাক অসিগী মকোক থোংবা অমা ওইনা, ইকাই খুম্নরবা রাস্ত্রপতিনা হাউস অসিগী মমাংদা ফোঙদোকখিবা অপাম্বশিং অসি, য়াম্না লায়রবা ৱাহৈদা ময়েক শেংনা উৎলি। ঐহাক্না থাজবা থম্লি মদুদি পার্লিয়ামেন্তকী ইকায় খুম্নরবা মেম্বর পুম্নমক্না মখোয়বু য়াম্না মরুওইনা লৌখি। মসিগী সেসন অসি মশামক্না য়াম্না মরু ওই। মসি বজেৎ সেসননি।

২১শুবা চহি চাগী ক্বার্তর অমা লোইখ্রে; হৌজিক ঐখোয়না অনিশুবা ক্বার্তর হৌরে। মসিনা ২০৪৭ ফাওবদা চাউখৎলবা ভারত অমগী পান্দম ফংনবগীদমক মরুওইবা চহি ২৫গী মতম অমা হৌরকপনি। মসি চহি-চা অসিগী অনিশুবা ক্বার্টরগী অহানবা বজেৎনি। অমসুং শেল-থুম মন্ত্রী নির্মলাজীনা পার্লিয়ামেন্ততা মথং-মনাও নাইনা চহি মাপনশুবা ওইনা বজেৎ পুথোরক্লি। মসিগী তাঙ্কক অসি ভারতকী পার্লিয়ামেন্তকী পুৱারীদা চাউথোকচনীংঙাই ওইবা তাঙ্কক অমা ওইনা ইরি।

মরুপশিং,

চহী অসি য়াম্না পোজিতিব ওইবা মওংদা হৌখ্রে। মশাদা থাজবা লৈরবা ভারত অসি ঙসিদি মালেমগীদমক আশাগী মঙাল অমা ওইরে অমসুং মসিদা পুক্নিং চিংশিনবগী মফম অমা ওইরে। হায়রিবা ক্বাতর অসিগী হৌরকপদা, ভারত অমসুং য়ুরোপিয়ন য়ুনিয়নগী মরক্তা ফ্রী ত্রেদ এগ্রীমেন্ত অসি লাক্কদৌরিবা মায়কৈ কয়া য়াম্না শিংথানীংঙাই ওইবগে অমসুং ভারতকী নহারোলশিংগী তুংলমচৎ কয়া য়াম্না থাজনিংঙাই ওইবগে হায়বদু উৎলি। মসি এম্বিসিয়স ভারতকীদমক্তা ফ্রী ত্রেদনি, এস্পিরেস্নেল য়ুথকীদমক্তা ফ্রী ত্রেদনি, অমসুং আত্মনির্ভর ভারতকীদমক্তা ফ্রী ত্রেদনি। ভারতকী মেনুফেকচররশিংনা মসিগী খুদোংচাবা অসি মখোয়গী তৌবা ঙম্বশিং হেনগৎহন্নবা শীজিন্নগনি হায়না ঐনা থাজবা থম্লি।

ঐনা পোত্থোক পুথোক্লিবশিং পুম্নমক্তা হায়জনীংই মদুদি ভারত অমসুং য়ুরোপিয়ন য়ুনিয়নগী মরক্তা 'অপুনবা য়ানচে পুম্নমক্কী মমা' হায়না কৌনবা অসিগুম্বা য়ানচে অমা শেম্লবা মতুংদা, ঐখোয়গী ইন্দস্ত্রিএলস্তশিং অমসুং মেনুফেকচররশিংনা অচৌবা কৈথেল অমা হাংলে অমসুং পোৎলমশিং অসি হৌজিক্তি মমল হোংনা থারকপা ঙম্লে হায়না খল্লদুনা মশা মথন্তা লেপহৌরোইদবনি। মসি খুদোংচাবা অমনি, অমসুং খুদোংচাবা অসিবু লৌশিনবগী খ্বাইদগী মরুওইবা মন্ত্রদি মগুনদা মীৎয়েং থম্বা অসিনি। হৌজিক মার্কেত অসি হাংদোকখ্রবনিনা, ঐখোয়না খ্বাইদগী ফবা ক্বালিতীগা লোয়ননা মসিদা চঙশিনগদবনি। করিগুম্বা ঐখোয়না অৱাংবা থাক্কী ক্বালিতীগা লোয়ননা চৎলবদি, ঐখোয়না য়ুরোপিয়ন য়ুনিয়নগী লৈবাক ২৭ শিনবা থুংনা লৈবা ক্রেয়রশিংদগী শেন্দোং ফংবা খক নত্তনা, ঐখোয়না মখোয়গী থম্মোয়সু ফংলগনি। মসিগী ইম্পেক্ত অসি মতম শাংনা, চহী তরাগী খুজিং কয়া ফাওবা চৎলি। কম্পেনীগী ব্রান্দশিংগা লোইননা লৈবাক্কী ব্রান্দনা অনৌবা চাউথোকচবা অমা লৈহল্লি।

মরম অদুনা, লৈবাক ২৭কা লোইননা খুৎয়েক পীনখিবা অসিনা ঐখোয়গী ঙামীশিং, ঐখোয়গী লৌমীশিং, ঐখোয়গী নহাশিং অমসুং মালেমগী মফম কয়াদা থবক তৌনবা পাম্লিবা সর্ভিস সেক্তরদা লৈরিবা মীওইশিংগীদমক অচৌবা খুদোংচাবশিং পুরক্লি। মসি থাজবা লৈরবা, কম্পিতিতিব ওইবা অমসুং প্রদক্তিব ওইবা ভারত অমগী মায়কৈদা য়াম্না মরু ওইবা খোংথাং অমনি হায়না ঐনা মপুং ফানা থাজবা থম্লি।

মরুপশিং,

লৈবাক অসিগী মীৎয়েং অসি বজেত্তা চংবা অসি মহৌশানা চুম্মি। অদুবু মসিগী সরকার অসি রিফোর্ম, পর্ফোর্ম, অমসুং ত্রান্সফোর্ম হায়না মশক তাক্লি। হৌজিক ঐখোয়না রিফোর্ম এক্সপ্রেসতা য়াম্না থুনা চংশিল্লি। ঐহাক্না পার্লিয়ামেন্তকী মরূপ পুম্নমক্কী মফমদসু ঐহাক্কী থাগৎপা ফোংদোকচরি। মখোয়না মসিগী রিফোর্ম এক্সপ্রেস অসি খোংজেল য়াংশিনহন্নবগীদমক মখোয়গী পোজিতিব ইনর্জী থাদরি।

লৈবাক অসিনা হৌজিক মতম শাংনা লেপ্পা লৈতবা সমস্যাশিং অসিদগী থোরক্লি অমসুং মতম শাংনা চত্থগদবা সোলুসনশিংগী লম্বীদা লেপ্পা লৈতনা চংশিল্লি। অশাংবা মতমগী ওইবা সোলুসনশিং লৈরকপা মতমদা, মাংজৌননা উবা ঙম্বা ওইরকই, মসিনা মালেম শিনবা থুংনা থাজবা লৈহল্লি। ঐখোয়না লৌরিবা ৱারেপ খুদিংমক্তা, নেস্নেল প্রোগ্রেস অসি ঐখোয়গী পান্দম ওইরি, অদুবু ঐখোয়গী ৱারেপ খুদিংমক মীওইবা-সেন্ত্রিক ওই। ঐখোয়গী থৌদাং অমসুং ঐখোয়গী থৌরাংশিং অসি মীওইবদা য়ুম্ফম ওই। ঐখোয়না তেক্নোলোজীগা চাংদম্নগনি, তেক্নোলোজী শিজিন্নগনি, অমসুং মদুগী পোতেন্সিএলবু য়াগনি, অদুবু মতম অমত্তদা, ঐখোয়না হ্যুমেন-সেন্ত্রিক সিস্তেম অসি মওং অমত্তদা হন্থহল্লোই। সেন্সিতিবিতীশিংগী মরুওইবা অদু খঙলদুনা, ঐখোয়না তেক্নোলোজী অমসুং মীওইবা জাতিগী মরক্তা শোই-ঙামদবা ইন্তিগ্রেসনগা লোইননা মাংলোমদা চংশিনগনি।

ঐখোয়গী মায়োক্তা পামজবা নৎত্রগা পামজদবা য়াবা মীওইশিংনা ঐখোয়বু ক্রিতিক তৌই। মসি দেমোক্রেসী অমদা মহৌশানা থোকই। অদুবু মীপুম খুদিংমক্না খঙমিন্নবা ৱাফম অমনা লৈঙাক অসিনা অরোইবা মাইলগী দেলিভরীদা মিৎয়েং থম্লি। স্কিমশিং অসি ফাইলশিংদা য়ুম্ফম ওইদুনা লৈহন্দনবা লেপ্পা লৈতনা হোৎনরি, অদুবু মসিনা মীওইশিংগী পুন্সিদা য়ৌহন্নবা হোৎনরি। মসিগী চৎনবী অসি লাক্কদৌরিবা নুমিৎশিংদা রিফোর্ম এক্সপ্রেসকী মথংগী জেনরেসনগী রিফোর্মশিংগী খুত্থাংদা মখা চত্থখিগনি।

ঙসি ভারতকী দেমোক্রেসী অমসুং ভারতকী দেমোগ্রাফীনা মালেমগীদমক অচৌবা আশা অমা উৎলি। দেমোক্রে সিগী লাইশঙ অসিদগী ঐখোয়না মালেমগী মীয়ামদা ঐখোয়গী তৌবা ঙম্বশিং, দেমোক্রে সিগীদমক ঐখোয়গী অচেৎপা ফিরেপ অমসুং দেমোক্রে সিগী থৌওংনা লৌরিবা ৱারেপশিংবু ইকায় খুম্নবা উৎলি। মালেমনা মসি তরাম্না ওক্লি অমসুং য়াওই।

লৈবাক অসিনা মাংলোমদা চংশিল্লিবা মতম অসিদা, মসি অথিংবা থম্বগী মতম নত্তে, মসি সোলুসনগী মতমনি। ঙসিদি, মরুওইবা অসি থিংজিনবা নত্তে, অদুবু ৱারোইশিন পীবনি। ঙসি অসি লাপ্না লৈদুনা অৱাবা ফোংদোক্নবগী মতম নত্তে; মসি থৌনা ফরবা, সোলুসন ওরিএন্তেদ ওইবা ৱারেপশিং লৌবা মথৌ তাবা মতম অমনি। ঐহাক্না পার্লিয়ামেন্তকী ইকায় খুম্নরবা মেম্বর পুম্নমকপু মাংলোমদা চংশিন্নবা, লৈবাক অসিগীদমক মরুওইবা সোলুসনগী ফেজ অসি য়াংশিনবা, ৱারেপশিং লৌবদা শক্তি পীনবা অমসুং অরোইবা মাইলদা মায় পাক্না মাংলোমদা চংশিন্নবা হায়জরি।

ঐহাক্কী ইচিল-ইনাওশিং, য়াম্না থাগৎচরি। ময়াম পুম্নমকপু ঐহাক্না য়াইফ-পাউজেল পীজরি।

***