കേന്ദ്ര ധനകാര്യ, കോർപ്പറേറ്റ് കാര്യ മന്ത്രി ശ്രീമതി നിർമല സീതാരാമൻ ഇന്ന് പാർലമെൻ്റിൽ അവതരിപ്പിച്ച 2025-26 ലെ സാമ്പത്തിക സർവേയിൽ, വ്യാപാര നയങ്ങളിലെ തുടർച്ചയായ മാറ്റങ്ങൾക്കും വർദ്ധിച്ചുവരുന്ന ഭൂരാഷ്ട്രീയ അനിശ്ചിതത്വങ്ങൾക്കുമിടയിൽ, ഇന്ത്യയുടെ ഓഹരി വിപണികൾ അളക്കാവുന്നതും എന്നാൽ പ്രതിരോധശേഷിയുള്ളതുമായ പ്രകടനം കാഴ്ചവെച്ചതായി പറയുന്നു.ഇത് പിന്തുണയ്ക്കുന്ന നയങ്ങളുടെയും സ്ഥൂല സാമ്പത്തിക സാഹചര്യങ്ങളുടെയും സുസ്ഥിരമായ ആഭ്യന്തര നിക്ഷേപക പങ്കാളിത്തത്തിൻ്റെയും പരസ്പരബന്ധത്തെ പ്രതിഫലിപ്പിക്കുന്നു. വ്യക്തിഗത ആദായനികുതി കുറയ്ക്കൽ, ജിഎസ്ടി പരിഷ്കരണം, ധനനയത്തിലെ ലഘൂകരണം, പണപ്പെരുപ്പം കുറയ്ക്കൽ, 2026 സാമ്പത്തിക വർഷത്തെ രണ്ടാം പാദത്തിലെ കോർപ്പറേറ്റ് പ്രകടനം എന്നിവയുൾപ്പെടെയുള്ള നിരവധി നടപടികൾ 2025-26 സാമ്പത്തിക വർഷത്തിൽ വിപണിയെ പിന്തുണച്ചതായി സർവേ പറയുന്നു.

 ഇന്ത്യയുടെ സാമ്പത്തിക ആവാസവ്യവസ്ഥയുടെ ശക്തി

2025 ഏപ്രിൽ-ഡിസംബർ കാലയളവിൽ നിഫ്റ്റി 50, ബിഎസ്ഇ സെൻസെക്സ് എന്നിവ യഥാക്രമം ഏകദേശം 11.1% ഉം 10.1% ഉം നേട്ടങ്ങൾ രേഖപ്പെടുത്തി. 2025 ഡിസംബർ വരെ സാമ്പത്തിക വർഷത്തിലെ പ്രാഥമിക വിപണികൾ സ്ഥിരതയുള്ളതും ഊർജ്ജസ്വലവുമായി തുടർന്നു, പ്രാരംഭ ഓഹരി വില്പനയിലേക്ക് (ഐപിഒ) നയിച്ചു. 2025 സാമ്പത്തിക വർഷത്തിലെ (2025 ഡിസംബർ വരെ) ഐപിഒ കളുടെ അളവ് 2025 സാമ്പത്തിക വർഷത്തേക്കാൾ 20% കൂടുതലാണ്. കൂടാതെ സമാഹരിച്ച തുക 2025 സാമ്പത്തിക വർഷത്തിലെ ഇതേ കാലയളവിനേക്കാൾ 10 ശതമാനം കൂടുതലായിരുന്നു. 2025 സാമ്പത്തിക വർഷത്തിലെ (2025 ഡിസംബർ വരെ) ഐപിഒ പ്രവർത്തനത്തിലെ ഒരു ശ്രദ്ധേയമായ സവിശേഷത ഓഫർ ഫോർ സെയിൽ (OFS) ഘടകങ്ങളായിരുന്നു. അവിടെ കമ്പനികൾ പുതിയ ഓഹരികൾ പുറപ്പെടുവിക്കുന്നതിനേക്കാൾ,നിലവിലുള്ള ഓഹരി ഉടമകൾ അവരുടെ ഓഹരികൾ വിൽക്കുന്നതിന് മുൻ‌തൂക്കം നൽകുന്നു.

SME ലിസ്റ്റിംഗുകൾ: 2025 സാമ്പത്തിക വർഷത്തിൽ (2024 ഡിസംബർ വരെ) 190 ആയിരുന്ന SME ലിസ്റ്റിംഗുകളുടെ എണ്ണം 2026 സാമ്പത്തിക വർഷത്തിൽ (2025 ഡിസംബർ വരെ) 217 ആയി വർദ്ധിച്ചു. സമാഹരിച്ച തുക ₹7,453 കോടിയിൽ നിന്ന് ₹9,635 കോടിയായി വർദ്ധിച്ചു. തുടക്കം മുതൽ, 1,380-ലധികം കമ്പനികൾ BSE, NSE എന്നിവയുടെ SME പ്ലാറ്റ്‌ഫോമുകളിൽ ലിസ്റ്റ് ചെയ്തിട്ടുണ്ട്. പ്രാഥമിക വിപണികളിലൂടെ വിഭവങ്ങളുടെ സുസ്ഥിരമായ സമാഹരണവും SME പ്ലാറ്റ്‌ഫോമുകളിലൂടെ വളർന്നുവരുന്ന സംരംഭങ്ങളുടെ പങ്കാളിത്തം വർദ്ധിക്കുന്നതും ഇന്ത്യയുടെ മൂലധന വിപണികളുടെ ഉയരുന്ന വ്യാപ്തിയും സങ്കീർണ്ണതയും സൂചിപ്പിക്കുന്നു.

  സെക്യൂരിറ്റീസ് മാർക്കറ്റ്സ് കോഡ് (SMC): സെക്യൂരിറ്റീസ് മാർക്കറ്റ്സ് കോഡ്, 2025, നിയമപരമായ ചട്ടക്കൂട് ഏകീകരിക്കുന്നതിനും ഓഹരി വിപണി നിയന്ത്രണത്തിൻ്റെ അടിത്തറ ശക്തിപ്പെടുത്തുന്നതിനുമുള്ള ഒരു പ്രധാന ചുവടുവയ്പ്പിനെ പ്രതിനിധീകരിക്കുന്നു. ബോർഡ് ഘടന, സ്വാതന്ത്ര്യം, പ്രതിസന്ധി നേരിടൽ, സുതാര്യത, നിയന്ത്രണ ചട്ടക്കൂടുകൾ, നിക്ഷേപക സംരക്ഷണം,വിപണി അടിസ്ഥാന സ്ഥാപനങ്ങളുടെ (MIIs) ഭരണം, ബിസിനസ്സ് ചെയ്യുന്നതിനുള്ള എളുപ്പം തുടങ്ങിയ വിഷയങ്ങൾ കോഡിൽ ഉൾക്കൊള്ളുന്നുവെന്ന് സാമ്പത്തിക സർവേ എടുത്തുകാണിക്കുന്നു. ആദ്യമായി, ഈ കോഡ് എംഐഐകൾ, സ്റ്റോക്ക് എക്സ്ചേഞ്ചുകൾ, ക്ലിയറിങ് കോർപ്പറേഷനുകൾ, ഡിപ്പോസിറ്ററികൾ, മറ്റുള്ളവ എന്നിവയെ വ്യക്തമായ ഒരു നിയമ സംവിധാനത്തിലേക്ക് കൊണ്ടുവരുന്നു.അവയെ സുപ്രധാന പൊതു പ്രവർത്തനങ്ങൾ നിർവഹിക്കുന്ന സ്ഥാപനങ്ങളായി ഔദ്യോഗികമായി അംഗീകരിക്കുന്നു.

 മൂലധന വിപണികളിലെ ചില്ലറ വ്യാപാര പങ്കാളിത്തം വിപുലീകരിക്കൽ

2026 സാമ്പത്തിക വർഷത്തിൽ (ഡിസംബർ 2025 വരെ) 235 ലക്ഷം ഡീമാറ്റ് അക്കൗണ്ടുകൾ കൂടി കൂട്ടിച്ചേർക്കപ്പെട്ടു. ഇതോടെ അവയുടെ മൊത്തം എണ്ണം 21.6 കോടി കവിഞ്ഞു. 2025 സെപ്റ്റംബറിൽ 12 കോടി നിക്ഷേപകർ എന്ന നേട്ടം കൈവരിച്ചതാണ് ഒരു പ്രധാന നാഴികക്കല്ല്. അതിൽ ഏകദേശം നാലിലൊന്ന് സ്ത്രീകളാണ്. മ്യൂച്വൽ ഫണ്ട് വ്യവസായവും വികസിച്ചു.2025 ഡിസംബർ അവസാനത്തോടെ 5.9 കോടി നിക്ഷേപകർ ഉണ്ടായിരുന്നു, അതിൽ 3.5 കോടി (2025 നവംബർ വരെ) പേർ ഒന്നാം നിര, രണ്ടാംനിര നഗരങ്ങളിൽ നിന്നുള്ളവരായിരുന്നു.

ഒരുകാലത്ത് ഗാർഹിക ബാലൻസ് ഷീറ്റുകൾക്ക് അനുബന്ധമായിരുന്ന ഓഹരി നിക്ഷേപങ്ങൾ, വിശാലമായ പങ്കാളിത്തത്തിൻ്റെയും കൂടുതൽ വൈവിധ്യമാർന്ന പ്രവേശന മാർഗ്ഗങ്ങളുടെയും പിന്തുണയോടെ സാമ്പത്തിക ശക്തിയുടെ ഒരു പ്രധാന ഘടകമായി വർദ്ധിച്ചുവരുന്നുവെന്ന് സാമ്പത്തിക സർവേ എടുത്തുകാണിക്കുന്നു. ഓഹരി വിപണികളിലെ വ്യക്തികളുടെ നേരിട്ടുള്ള വിഹിതം ക്രമേണ വർദ്ധിച്ചു. FY14-ൽ 8 ശതമാനത്തിൽ താഴെയായിരുന്നത് 2025 സെപ്റ്റംബറിൽ ഏകദേശം 9.6 ശതമാനമായി ഉയർന്നു.അതേ കാലയളവിൽ പരോക്ഷ വിഹിതം ഏകദേശം മൂന്നിരട്ടിയായി വർദ്ധിച്ച് 9.2 ശതമാനത്തിലെത്തി.

വാർഷിക ഗാർഹിക സാമ്പത്തിക സമ്പാദ്യത്തിൽ ഓഹരിയുടെയും മ്യൂച്വൽ ഫണ്ടുകളുടെയും വിഹിതം FY12-ലെ 2 ശതമാനത്തിൽ നിന്ന് FY25-ൽ 15.2 ശതമാനത്തിലധികമായി വർദ്ധിച്ചു. SIP വിഹിതത്തിലുണ്ടായ സ്ഥിരമായ വർദ്ധന ഈ മാറ്റവുമായി പൊരുത്തപ്പെട്ടു. ശരാശരി പ്രതിമാസ SIP പ്രവാഹം FY17-ൽ ₹4,000 കോടിയിൽ താഴെയായിരുന്നത് FY26-ൽ (ഏപ്രിൽ-നവംബർ) ഏഴ് മടങ്ങ് വർദ്ധിച്ച് 28,000 കോടിയിലധികമായി. മഹാമാരിയെ തുടർന്നുള്ള ആദ്യ വർഷങ്ങളിൽ അതുല്യമായ നിക്ഷേപക അടിത്തറ കുത്തനെ വർധിച്ചു. FY20-ലെ ഏകദേശം 3.1 കോടിയിൽ നിന്ന് FY25-ൽ 11 കോടിയിലധികമായി.

സെബിയുടെ സമീപകാല സംരംഭങ്ങൾ

നിയന്ത്രണ സമഗ്രത ശക്തിപ്പെടുത്തുന്നതിനും വിപണി പ്രവർത്തനങ്ങൾ കാര്യക്ഷമമാക്കുന്നതിനും നിക്ഷേപക സംരക്ഷണം വർദ്ധിപ്പിക്കുന്നതിനും ലക്ഷ്യമിട്ടുള്ള സമഗ്രമായ ഒരു കൂട്ടം സംരംഭങ്ങൾ സെബി ഏറ്റെടുത്തതായി സാമ്പത്തിക സർവേ പറയുന്നു. മൊത്തത്തിൽ, ഈ നടപടികൾ ഇന്ത്യയിൽ സുതാര്യവും, സ്ഥിരതയുള്ളതും, ഉൾക്കൊള്ളുന്നതുമായ ഒരു മൂലധന വിപണി വളർത്തിയെടുക്കുന്നതിനുള്ള സെബിയുടെ പ്രതിജ്ഞാബദ്ധതയെ അടിവരയിടുന്നു. അതേസമയം സെക്യൂരിറ്റീസ് മാർക്കറ്റിൻ്റെ  പ്രധാന മേഖലകളിൽ ഉടനീളം മെച്ചപ്പെട്ട പരിശോധന, വെളിപ്പെടുത്തൽ, പ്രവേശനക്ഷമത, അപകട സാധ്യത നിരീക്ഷണം എന്നിവയിലൂടെ വിപണി ആത്മവിശ്വാസം ശക്തിപ്പെടുത്തുന്നു.

നിക്ഷേപക സംരക്ഷണവും ശാക്തീകരണവും: നിക്ഷേപകരിൽ നിന്ന് ഫണ്ട് ശേഖരിക്കുന്ന സെബി-രജിസ്റ്റർ ചെയ്ത എല്ലാ ഇടനിലക്കാർക്കും സെബി ഒരു പുതിയ യുപിഐ വിലാസ ഘടന നിർബന്ധമാക്കിയിട്ടുണ്ട്.2025 ഒക്ടോബർ 1 മുതൽ പ്രാബല്യത്തിൽ വരുന്ന തരത്തിലാണ്.

 നിയന്ത്രണ ചട്ടക്കൂട് ശക്തിപ്പെടുത്തുകയും പ്രവർത്തന കാര്യക്ഷമത മെച്ചപ്പെടുത്തുകയും ചെയ്യുക: ഒരു പ്രത്യേക ബിസിനസ് യൂണിറ്റിന് കീഴിൽ GIFT-IFSC-യിൽ ഓഹരി വിപണിയുമായി ബന്ധപ്പെട്ട പ്രവർത്തനങ്ങൾ നടത്തുന്നതിന് സെബി-രജിസ്റ്റർ ചെയ്ത സ്റ്റോക്ക് ബ്രോക്കർമാരെ സഹായിക്കുന്നതിന്, നിർദ്ദിഷ്ട സെബി അംഗീകാരം നേടേണ്ടതിന്റെ ആവശ്യകത നീക്കം ചെയ്തു.

കടം വിപണി

ഇന്ത്യയുടെ കോർപ്പറേറ്റ് ബോണ്ട് വിപണി ശ്രദ്ധേയമായ വളർച്ച പ്രകടമാക്കി. പുറത്തിറക്കിയ ബോണ്ടുകൾ FY15-ലെ ₹17.5 ട്രില്യണിൽ നിന്ന് FY25-ൽ ₹53.6 ട്രില്യണായി വർദ്ധിച്ചു,. ഇത് ഏകദേശം 12 ശതമാനം വാർഷിക നിരക്കിൽ വളർന്നു. FY25-ൽ, ഇതുവരെയുള്ളതിൽ വച്ച് ഏറ്റവും ഉയർന്ന പുതിയ നിരക്ക് - ആകെ ₹9.9 ട്രില്യൺ രേഖപ്പെടുത്തി.

 2025 മാർച്ച് വരെ, രാജ്യത്തിൻ്റെ  ജിഡിപിയുടെ 15-16 ശതമാനം കോർപ്പറേറ്റ് ബോണ്ട് വിപണിയാണ് വഹിക്കുന്നത്,.ഇപ്പോൾ ബാങ്ക് വായ്പയാണ് കോർപ്പറേറ്റ് ബോണ്ട് ഫണ്ട് സമാഹരണം പൂർത്തിയാക്കുന്നത്. 2026 സാമ്പത്തിക വർഷത്തിൽ, 2025 ഏപ്രിൽ-ഡിസംബർ മാസങ്ങളിൽ പ്രാഥമിക വിപണിയിൽ നിന്നുള്ള മൊത്തം വിഭവ സമാഹരണത്തിൻ്റെ  63 ശതമാനത്തിലധികവും കടം വിപണിയായിരുന്നു. ബോണ്ട് മാർക്കറ്റിൻ്റെ  വികസനത്തിനായി റെഗുലേറ്ററി അതോറിറ്റികൾ ഗണ്യമായ പരിഷ്കാരങ്ങൾ ഏറ്റെടുത്തിട്ടുണ്ട്. ചില്ലറ വിപണി ലഭ്യത സുഗമമാക്കുന്നതിനും ക്രെഡിറ്റ് റേറ്റിംഗ് ഏജൻസികൾക്കുള്ള ഭരണ മാനദണ്ഡങ്ങൾ ശക്തിപ്പെടുത്തുന്നതിനും പുറപ്പെടുവിക്കൽ മാനദണ്ഡങ്ങൾ ലളിതമാക്കുന്നതിനും സെബി, റിക്വസ്റ്റ് ഫോർ ക്വോട്ട് പ്ലാറ്റ്‌ഫോം അവതരിപ്പിച്ചു.

വിദേശ പോർട്ട്‌ഫോളിയോ നിക്ഷേപം

2025-26 സാമ്പത്തിക വർഷത്തിലെ ഇന്ത്യയിലെ വിദേശ പോർട്ട്‌ഫോളിയോ നിക്ഷേപ പ്രവണതകൾ അസ്ഥിരത പ്രകടിപ്പിക്കുന്നു. 2025-26 സാമ്പത്തിക വർഷത്തിൻ്റെ  ഒന്നാം പാദത്തിൽ (Q1), വിദേശ നിക്ഷേപകർ ഇന്ത്യൻ ഓഹരികളിൽ വലിയ തോതിൽ നിക്ഷേപം നടത്തുകയും എന്നാൽ കടപ്പത്രങ്ങളിൽ നിന്ന് നിക്ഷേപം പിൻവലിക്കുകയും ചെയ്തു. എന്നാൽ രണ്ടാമത്തെയും മൂന്നാമത്തെയും പാദങ്ങളിൽ (Q2 & Q3), അവർ ഓഹരികൾ വിറ്റൊഴിയുകയും കടപ്പത്രങ്ങളിൽ നിക്ഷേപം നടത്തുകയും ചെയ്യുന്ന രീതിയിലേക്ക് മാറി. മൊത്തത്തിൽ നോക്കിയാൽ, 2025 ഏപ്രിൽ മുതൽ ഡിസംബർ വരെയുള്ള കാലയളവിൽ വിദേശ നിക്ഷേപകർ ഇന്ത്യൻ സെക്യൂരിറ്റികളിൽ നിന്ന് പണം പിൻവലിക്കുകയാണുണ്ടായത്. എങ്കിലും, സെബിയുടെ (SEBI) ലഘൂകരിച്ച നിക്ഷേപ മാനദണ്ഡങ്ങളും ഇന്ത്യ-അ‌മേരിക്ക വ്യാപാര ചർച്ചകളും കടപ്പത്ര വിപണിയിലേക്കുള്ള വിദേശ നിക്ഷേപത്തിൻ്റെ  ഭാവി ശുഭകരമാക്കുന്നു. 2025 ഡിസംബർ 31-ലെ കണക്കനുസരിച്ച്, വിദേശ നിക്ഷേപകരുടെ ആകെ ആസ്തി മൂല്യം 81.4 ലക്ഷം കോടി രൂപയാണ്. ഇത് 2025 മാർച്ച് 31-നെ അപേക്ഷിച്ച് 10.4 ശതമാനം വർദ്ധന രേഖപ്പെടുത്തുന്നു.

ആഭ്യന്തര സ്ഥാപന നിക്ഷേപകർ: വിദേശ നിക്ഷേപ അസ്ഥിരതയ്ക്കുള്ള പ്രതിരോധം

വിദേശ മൂലധന ഒഴുക്കിലെ അസ്ഥിരതയ്ക്കിടയിൽ, ആഭ്യന്തര സ്ഥാപന നിക്ഷേപകർ (DIIs) — പ്രത്യേകിച്ച് മ്യൂച്വൽ ഫണ്ടുകളും ഇൻഷുറൻസ് കമ്പനികളും — വിദേശ നിക്ഷേപകർ പണം പിൻവലിക്കുന്നത് മൂലമുണ്ടാകുന്ന ആഘാതങ്ങളെ ഫലപ്രദമായി പ്രതിരോധിക്കുകയും വിപണിക്ക് ആവശ്യമായ പിന്തുണ നൽകുകയും ചെയ്യുന്നു. തുടർച്ചയായ നിക്ഷേപങ്ങളിലൂടെ, 2025 സെപ്റ്റംബർ 30-ലെ കണക്കനുസരിച്ച്, എൻഎസ്ഇയിൽ ലിസ്റ്റ് ചെയ്തിട്ടുള്ള ഓഹരികളിലെ ആഭ്യന്തര നിക്ഷേപകരുടെ ഓഹരി പങ്കാളിത്തം 18.7 ശതമാനമാണ്.

ആഭ്യന്തര സ്ഥാപന നിക്ഷേപകർ (DIIs) ഇന്ത്യൻ ഓഹരികളിൽ തുടർച്ചയായി 'നെറ്റ് ബയേഴ്‌സ്' (വാങ്ങുന്നവർ) എന്ന നില നിലനിർത്തുന്നു. ഇത് വിദേശ നിക്ഷേപകർ (FPI) ഓഹരികൾ വിറ്റൊഴിയുന്നതിനെ ഫലപ്രദമായി പ്രതിരോധിക്കുകയും ആഭ്യന്തര വിപണിയുടെ കരുത്ത് വർദ്ധിപ്പിക്കുകയും ചെയ്യുന്നു. 2024-25 സാമ്പത്തിക വർഷത്തിൻ്റെ  നാലാം പാദത്തിൽ (Q4 FY25), നിക്ഷേപ മൂല്യത്തിൻ്റെ  അടിസ്ഥാനത്തിൽ ആഭ്യന്തര നിക്ഷേപകരുടെ പങ്ക് ഇതാദ്യമായി വിദേശ സ്ഥാപന നിക്ഷേപകരുടെ (FII) പങ്കിനെ മറികടന്നു. 2025-26 സാമ്പത്തിക വർഷത്തിന്റെ രണ്ടാം പാദത്തിൽ (Q2 FY26) ഇത് സർവ്വകാല റെക്കോർഡിൽ എത്തിനിൽക്കുകയാണ്.

2025-26 സാമ്പത്തിക വർഷത്തിൻ്റെ  രണ്ടാം പാദത്തിൽ (Q2 FY26), നിക്ഷേപ മൂല്യത്തിൻ്റെ  അടിസ്ഥാനത്തിൽ മ്യൂച്വൽ ഫണ്ടുകളുടെ പങ്ക് 10.9 ശതമാനം എന്ന സർവ്വകാല റെക്കോർഡിൽ എത്തി. അതിനാൽ, ഇന്ത്യൻ മൂലധന വിപണിയിൽ വിദേശ സ്ഥാപന നിക്ഷേപകർ (FIIs) ഇപ്പോഴും പ്രധാന പങ്കാളികളായി തുടരുന്നുണ്ടെങ്കിലും, വിദേശ നിക്ഷേപകരുടെ വിപണി തീരുമാനങ്ങളെ ഫലപ്രദമായി പ്രതിരോധിക്കുന്നതിൽ ആഭ്യന്തര നിക്ഷേപകരും ചില്ലറ നിക്ഷേപകരും ഉയർന്ന ആസ്തിയുള്ള വ്യക്തികളും ശക്തമായ പങ്കുവഹിക്കുന്നു.

ഗിഫ്റ്റ് സിറ്റി

2025 നവംബർ 30-ലെ കണക്കനുസരിച്ച്, ഗിഫ്റ്റ് സിറ്റി മികച്ച വളർച്ചാമുന്നേറ്റമാണ് കാഴ്ചവയ്ക്കുന്നത്. വിവിധ വിഭാഗങ്ങളിലായി 1,034-ലധികം ആഭ്യന്തര, അന്തർദേശീയ സ്ഥാപനങ്ങൾ ഇവിടെ രജിസ്റ്റർ ചെയ്തിട്ടുണ്ട്. ഒരു വർഷത്തിനുള്ളിൽ, ഗ്ലോബൽ ഫിനാൻഷ്യൽ സെന്റർ സൂചികയിൽ (GFCI) 120 സാമ്പത്തിക കേന്ദ്രങ്ങളിൽ 43-ാം സ്ഥാനത്തെത്തി, ഗിഫ്റ്റ് സിറ്റി ഒമ്പത് സ്ഥാനങ്ങൾ മെച്ചപ്പെടുത്തി. ഫിൻടെക് മേഖലയിലെ റാങ്കിങ്ങിൽ ഗിഫ്റ്റ് സിറ്റി പത്ത് സ്ഥാനങ്ങൾ മെച്ചപ്പെടുത്തി. ഫിൻടെക്കുകൾക്കായുള്ള പ്രത്യേക നിയന്ത്രണ ചട്ടക്കൂട്, അക്കാദമിക് പങ്കാളിത്തം, നൂതനാശയ കേന്ദ്രങ്ങൾ എന്നിവയിലൂടെ കൈവരിച്ച പുരോഗതിയാണ് ഇത് പ്രതിഫലിപ്പിക്കുന്നത്.

ഉപസംഹാരം

നൂറ്റാണ്ടിൻ്റെ  മധ്യത്തോടെ രാജ്യത്തെ 'വികസിത ഭാരതം' ആക്കി മാറ്റുക എന്ന ലക്ഷ്യം കൈവരിക്കാൻ സാമ്പത്തിക മേഖലയെ വെറും ധനസഹായം എന്നതിലുപരി സാമ്പത്തിക പരിവർത്തനത്തിൻ്റെ  അടിസ്ഥാന ശിലയായി പുനർനിർവചിക്കണമെന്ന് സാമ്പത്തിക സർവേ വ്യക്തമാക്കുന്നു. സുസ്ഥിരമായ വളർച്ച കൈവരിക്കുന്നതിന് ഇന്ത്യ അതിൻ്റെ  ദീർഘകാല മൂലധന വിപണികളെ കൂടുതൽ ശക്തിപ്പെടുത്തേണ്ടതുണ്ട്. നിയന്ത്രണ സംവിധാനങ്ങളുടെ ആധുനികവൽക്കരണത്തിലും നിക്ഷേപകരുടെ സംരക്ഷണത്തിലും സെബി (SEBI) മികച്ച പ്രതിജ്ഞാബദ്ധതയാണ് കാഴ്ചവയ്ക്കുന്നത്. നിയന്ത്രണ സംവിധാനങ്ങളുടെ ഗുണനിലവാരത്തിലുണ്ടായ ഈ വർദ്ധന, 2025-ൽ അന്താരാഷ്ട്ര നാണയ നിധിയും (IMF) ലോകബാങ്കും സംയുക്തമായി നടത്തിയ ധനകാര്യ മേഖലാ വിലയിരുത്തൽ പരിപാടിയിലൂടെ (FSAP) ആഗോളതലത്തിൽ അംഗീകരിക്കപ്പെട്ടു. 2017-ൽ ജിഡിപിയുടെ 144 ശതമാനമായിരുന്ന മൂലധന വിപണി 2024-ൽ 175 ശതമാനമായി വളർന്നുവെന്ന് രണ്ട് റിപ്പോർട്ടുകളും എടുത്തുപറയുന്നു.

***

(रिलीज़ आईडी: 2220180) आगंतुक पटल : 9