ঐগী নুংশিরবা ইরৈচাশিং, খুরুমজরি।

মসিনা ২০২৬ গী অহানবা ‘মন কি বাত’ নি। হয়েং, জনুৱারিদা ২৬ দা, ঐখোয়না গনতন্ত্র দিবস থৌরম পাংথোক্কনি। নুমিৎ অসিদগী ঐখোয়গী সংবিধান চৎনবা হৌখি। জনুৱারি ২৬, নুমিৎ অসিদা, ঐখোয়গী সংবিধানগী শেমখিবা ইপা-ইপুশিংদা ইকায়খুম্নবা উৎনবগী খুদোংচাবা অমা ঐখোয়দা পীরে। ঙসি, জনুৱারি ২৫, নুমিৎ অসিসু য়াম্না মরুওইবা নুমিৎ অমনি। ঙসি নেসনেল ভোত্তরস দেনি,… মতাদাতা দিবস। ভোত্তর অমনা গনতন্ত্রগী থৱায়নি।

মরুপশিং,

মহৌশানা, কনাগুম্বা অমা চহি ১৮ শুরকপদা, ভোত্তর অমা ওইরে, মসি পুন্সিগী খুমাঙচাউশিনবা অমনি হায়না খন্নৈ। অদুবু, থৌরম অসি তশেংনা ভারতমচা অমগী পুন্সিদা অচৌবা খুমাঙচাউশিনবা অমনি। মরম অদুনা, ঐখোয়গী লৈবাক্কী ভোত্তর অমা ওইরকপদা ঐখোয়না হরাওবা ফোঙদোকপা অসি য়াম্না মরুওই। ঐখোয়না মপোক নুমিৎশিংগী য়াইফ পাউজেল পীনবা অমসুং থৌরম পাংথোকপগুম্না, নহা অমনা অহানবা ওইনা ভোত্তর অমা ওইরকপদা, লৈকায়, খুঙ্গং নত্ত্রগা সহর শীনবা থুংনা পুন্দুনা মখোয়দা হরাওবা ফোঙদোক্কদবনি অমসুং অথুম-অহাও য়েন্থোক্কদবনি। মসিনা ভোৎ থাদবগী মরমদা খঙবা হেনগৎহনগনি অমসুং ভোত্তর অমা ওইবা হায়বসি কয়া য়াম্না মরুওইবগে হায়বগী ৱাখল্লোন মপাঙ্গল কনখৎহনগনি।

মরুপশিং,

মীখলশিংগী থবকশিংদা শরুক য়ারিবা অমসুং ঐখোয়গী গনতন্ত্র মপাঙ্গল কন্না থম্নবা মখোঙদগী হৌনা থবক তৌরিবা লৈবাক অসিগী মীওইশিং ঐনা থাগৎপা ফোঙদোকচরি। ঙসি, ভোত্তরস দে’ অসিদা, ঐগী নহা ওইরিবা মরুপশিং মখোয় চহি ১৮ শুরকপদা মখোয় মশামক রেজিষ্টার তৌনবা ঐনা অমুক হন্না হায়জরি। সংবিধানগী থৌদাং পাংথোকপা অসিনা ভারতকী গনতন্ত্র মপাঙ্গল কনখৎহনগনি।

ঐগী নুংশিরবা ইরৈচাশিং,

নুমিৎ খরনি অসিদা য়াম্না নুংঙাইবা অমা ঐনা সোসিএল মেদিয়াদা উবা ফংলে। মীয়াম্না ২০১৬ গী মখোয়গী নিংশিংবশিং অমুক হিঙ্গৎহল্লে। মসিগা চপ মান্ননা, ঙসি ঐনা অদোমদা ঐগী নিংশিংবা খর শরুক য়াবা পাম্মী। চহি ১০ গী মমাঙদা, ২০১৬ দা, ঐখোয়না য়াম্না থাজবা থম্বা খোঙচৎ অমা হৌখি। মতম অদুদা ঐখোয়না খঙখি, মসি করিগুম্বা অপীকপা অমা ওইরবসু, মসি লৈবাক অসিগী নহারোলশিংগী তুংগীদমক য়াম্না মরুওইবা অমনি। মতম অদুদা, মীওই খরনা মসি করিনো হায়বা খঙখিদে। ঐনা পল্লিবা খোঙজৎ অসি ষ্টার্দঅপ ইন্দিয়াগী খোঙচৎনি। অঙকপা খোঙচৎ অসিগী হিরোশিং ঐখোয়গী নহারোলশিংনি। মখোয়গী নুংঙাইবা মফমশিং থাদোক্তুনা মখোয়না পায়খৎখিবা অনৌবা থবকশিং পুৱারিদা য়াওরে।

মরুপশিং,

ঙসি, মালেমদা ভারত অহুমশুবা খ্বাইদগী চাউবা ষ্টার্দ-অপ ইকোসিষ্টেম লৈবা লৈবাক অমা ওইরে। হায়রিবা ষ্টার্দ-অপশিং অসি অনৌবনি; চহি ১০ গী মমাঙদা ৱাখলদা ফাওবা খন্দবা হিরমশিংদা মখোয়না থবক পায়খৎলি।

এ.আই. স্পেস, ন্যুক্লিয়ার ইনর্জি, সেমিকন্দক্তরশিং, মোবিলিতি, গ্রিন হায়দ্রোজেন, বাইওতেক্নোলোজি… অদোমনা মমিং অমা হায়বদা অমসুং অদোম্না হায়রিবা হিরম অদুদা ভারতকী ষ্টার্দ-অপ অমা নত্ত্রগা অতোপ্পনা থবক তৌবা অদোম থেংনগনি। ষ্টার্দ-অপ অমা নত্ত্রগা অতোপ্পা নত্ত্রগা মখোয় মশাগী অমা লিংখৎপা পাম্লিবা ঐগী নহারোল মরুপশিংদা ঐনা ইকায়খুম্নবা উৎচরি।

মরুপশিং,

ঙসি মন কি বাতকী খুৎথাংদা, ঐগী ইরৈচাশিংদা ঐনা তকশিনবা পাম্মী; মরুওইনা উদ্যোগ অমসুং ষ্টার্দ-অপশিংদা থবক তৌরিবা নহারোলশিংদা। ভারতকী শেন-থুম য়াংনা চাউখৎলক্লি। মালেম্না ভারত্ত য়েংলি। অসিগুম্বা তাঞ্জা অমদা, ঐখোয়না অচৌবা থৌদাং অমা লৌগদবনি। মদুগী থৌদাং অদু মগুন লৈহনবা ওইগদবনি। ‘অমা হেক্ত তৌশিল্লো.. মসি য়ারনি… মসি শোইদনা য়াগনি’ হায়বা মতম অদু হেনখ্রে। লাক্লো, চহি অসিদা ঐখোয়গী লৈজবা শীজিন্নদুনা মগুন লৈহনবদা ঐখোয় পুক্নিং চঙলসি। ঐখোয়গী অমতা ঙাইরবা লাইৱা মগুন লৈবা ওইহনগদবনি। ঙরাং লৈখিবা অফবা অদুদগী ঙসিনা হেন্না মগুন লৈহনগদবনি। ঐখোয়না পুথোকপা পোৎথোক খুদিংমক মগুন হেনগৎহন্নবা ঐখোয় ৱাশক লৌরসি। মসি ঐখোয়গী তেক্সতাইলশিং, তেক্নোলোজি নত্ত্রগা ইলেক্ত্রোনিক্সশিং ওইবা য়াই… পেকেজিং ফাওবদা; ভারতকী পোৎথোক অমা হেক্ত অৱাংবা থাক্কী মগুন লৈহনগদবনি। ঐখোয়গী মগুন লৈবা পোৎথোকশিংদা ঐখোয় মাঙজিল থারসি। মগুন লৈহনবদা থরেক্নবগী থবক লৈতনবা ঐখোয় ৱাশক লৌরসি, মগুন লৈহনবদা শন্তাইনবা অমতা তৌরোইদবনি। ঐনা লাল কিলাদগী- ‘জিরো দিফেক্ত জিরো ইফেক্ত’ লাউথোকখ্রে। মসি পাংথোকপা খক্তনা বিকসিত ভারত অমগী মাইকৈ অমদা ঐখোয়গী খোঙচৎ য়াংখৎহনগনি।

ঐগী নুংশিরবা ইরৈচাশিং,

ঐখোয়গী লৈবাক্কী মীওইশিং অনৌবা থবক য়াম্না পাংথোকই। খুদোংচাদবশিং কোকহন্নবা পাম্বৈশিং পুথোকপা অসি ঐখোয়গী মীয়ামগী মহৌশানি। মসিগী থবক খর ষ্টার্দ-অপশিংগী খুৎথাংদা পাংথোক্লি; অদুগা খরনা খুন্নাইগী অপুনবা পাঙ্গলগী খুৎথাংদা পাম্বৈ অমা থিরি। অসিগুম্বা থবক অমা উত্তর প্রদেসেকী অজামগরদা লৈরে। মফম অসিদা ফাওদুনা চেল্লিবা তামসা তুরেল মীয়াম্না অমুক হিঙ্গৎহল্লে। তামসা অসি শুপ্নগী তুরেল অমা খক নত্তে; মসি ঐখোয়গী নাৎ অমসুং অধ্যতিক্কী অরিবা লিক্লমগী মখা তারকপা অমনি। তুরেল অসিনা অয়োধ্যা ফাওদুনা লাক্লগা গঙ্গাদা তিনখি, মতম অমদা লমদম অসিগী মীয়ামগী পুন্সিগী ময়োল অমা ওইরমখি। অদুবু, পোল্লুসন্না মরম ওইদুনা, মসিগী ঈচেল লেপখি। লৈঙাং, অমোৎপা অমসুং ফত্তবশিংনা তুরেল অসিগী ঈচেল থিংখি। তুংদা, মীয়াম্না তুরেল অসি অমুক হিঙ্গৎহন্নবা খোঙজং অমা হৌরকখি। তুরেল অসি শেংদোক্লে অমশুং মসিগী মপানশিংদা উহৈ পানবা পাম্বীশিং থারে। মখোয়গী থৌদাং অমনি হায়বগী ৱাখলগা লোয়ননা লৈকায়গী মীয়াম শরুক য়াখি অমসুং মীওই খুদিংমক্না হোৎনবদগী তুরেল অসি অমুক হিঙ্গৎলে।

মরুপশিং,

মীয়াম শরুক য়াবগী মান্নবা থবক অমসু অন্ধ্র প্রদেসকী অনন্তপুরদা উবা ফংলে। লমদম অসি শাথিরবা ইকং মায়োক্নদুনা লাকখি। মফম অসিগী লৈবাক-লৈহাও অঙাংবা অমসুং লৈঙোইনি, মসিদগী মীয়াম্না ঈশিং ফংদবগী অৱাবা থেংনরিবনি। মফম কয়া চহি কয়া নোং চুখিদে। করিগুম্বা মতমদা মীয়াম্না অনন্তপুরদা লৈকংলাগী ইকং থোকপনি হায়না চাংদম্নখি।

মরুপশিং,

অৱাবা অসি কোকহন্নবা, মীয়াম্না ঈশিং লৈবা মফমশিং শেংদোকখি। মসিগী মতুংদা, লৈঙাক্কী মতেংগা লোয়ননা, ‘অনন্ত নীরু 'সংরক্ষনম প্রোজেক’ হৌদোকখি। থবক অসিগী মখাদা, ঈশিং থম্নবা মফম ১০ হেন্না অমুক শেমগৎখি। হায়রিবা ইকোনশিং অদু হৌজিক ঈশিং লৈরে। মসিগা লোয়ননা, উ পাম্বী ৭০০০ হেন্না থাখি। মসিনা তাক্লিবদি ঈশিং য়োকশিনবগা লোয়ননা, অনন্তপুরদা উমংগী শরুকসু হেনগৎলে। হৌজিক অঙাংশিং মফম অদুদা ইরোইদুনা শান্নরে। মওং অমদা, মফম অদুগী মহৌশাগী অকোয়বগী ফিবম অমুক হিঙ্গৎলে।

মরুপশিং,

মসি অনন্তপুর, অজামগর নত্ত্রগা লৈবাক অসিগী মফম অমা হেক্ত ওইবা য়াই। মথৌ পাংথোকপগী ৱাখল অমগা লোয়ননা মীয়াম্না অমতা ওইনা পুনবা অমসুং অচৌবা থবকশিং পাংথোকপা উবদা অপেনবা ফাওই। মসিগী মীয়াম শরুক য়াবা অমসুং পুন্না থবক তৌমিন্নবগী ৱাখল্লোন অসি ঐখোয়গী লৈবাক্কী খ্বাইদগী কনবা মপাঙ্গলনি।

ঐগী নুংশিরবা ইরৈচাশিং,

ঐখোয়গী লৈবাক্ত, লাইশোন ঈশৈশিং অমসুং কির্তনশিং চহি চা কয়া ঐখোয়গী নাৎকী থৱায় ওইদুনা লাক্লি। ঐখোয়না লাইশঙশিংদা লাইশোন ঈশৈশিং তারে, কথাশিং মনুংদা অমসুং মতম মতমগী মতুংইন্না যুগ খুদিং ভক্তিনা য়োমখি। ঙসিগী মীরোলদা করিগুম্বা ফজবা অমা উবা ফংলে। ঙসিগী নহারোলশিংনা চঙজবগী ৱাখল্লোন মখোয়গী থবকশিং অমসুং পুন্সি মহিংদা পুনশিল্লক্লে। মসিগী ৱাখল্লোন অসিনা অনৌবা চৎনবী অমা লাকপা উরে। অসিগুম্বা ভিদিওশিং অদোম সোসিএল মেদিয়াদা উবা ফংগনি।

মশিং য়াম্লবা নহারোলশিং লৈবাক্কী তোঙান তোঙানবা সহরশিংদা পুল্লে। ফম্বাক ফজনা লৈতেংলে… মৈ থাল্লে, ঈশৈ খোঙলে… ফজরবা সো উৎলে অমসুং থৌরম অসি কন্সর্ত অমদগী তাদ্রে। মসি কন্সর্ত অমগুম্না ফাওই, অদুবু শক্লিবা ঈশৈশিং অদু লাইশোন ঈশৈশিংনি, পুক্নিং চংনা, কৎথোকপগা লোয়ননা অমসুং তান চানা। ক্লবগুম্বা মফমশিংদা লাইশোন ঈশৈগা রোক ঈশৈগা পুনশিনবা অনৌবা মীরোলশিংগী মরক্ত য়াম্না পাম্নরে।

ইকায়খুম্নবা অমসুং লাইশোন ঈশৈগী অশেংবা শক্তমশিং ঙাকপা হায়রিবা থৌরমশিং অসিদা উবদা অপেনবা ফাওই। চঙজবা হায়বসি লাইনা লৌদে; ৱাহৈশিংগী থকশি-খাসি নত্ত্রগা পুক্নিংগী ইহুলদা শন্তাইনবা অমতা লৈতে। ফম্বাক অদু অনৌবা মতমগী ওইবা য়াই, ঈশৈশিং তোঙানবা য়াই, অদুবু মরুওইবা ৱাখল্লোন্দি চপ মান্নৈ; অধ্যতিক্কী লেপ্তবা ইচেল অমা মফম অসিদা চেল্লি।

ঐগী নুংশিরবা ইরৈচাশিং,

ঙসি ঐখোয়গী নাৎ অমসুং কুহ্মৈশিং মালেম শীনবা থুংনা খঙনরে। মালেমগী মফম খুদিংমক্ত ভারতকী কুহ্মৈশিং য়াম্না থৱায় য়াওনা অমসুং হরাওনা পাংথোক্নরে। ভারত্তগী হৌখিবা ঐখোয়গী ভারতমচাশিংনা মখল খুদিংমক্কী নাৎকী ফজবা ঙাকপদা মরুওইবা থৌদাং অমা লৌরি। মখোয়না লৈরুবা মফম খুদিংমক্ত, মখোয়না মখোয়গী নাৎকী ফজবা ঙাক-শেনখি অমসুং য়োকখৎখি। হিরম অসিগী মতাংদা মালেসিয়াদা লৈবা ঐখোয়গী ভারতমচাশিংসু শিংথানিঙাই ওইরবা থবক পায়খৎলে।

মালেসিয়াদা তামিল স্কুল ৫০০ হেন্না লৈ হায়বা খঙবদা অদোম অঙকপা পোক্কনি। তামিল লোল তম্বগী মথক্ত, তামিলদা অতোপ্পা সবজেক্তশিংসু তম্লি। মখা তানা, তেলুগু অমসুং পঞ্জাবীগী মথক্ত ভারতকী অতোপ্পা লোলশিংসু মীৎয়েং চঙলি।

মরুপশিং,

ভারত অমসুং মালেসিয়াগী মরক্ত পুৱারি অমসুং নাৎকী মরীশিং মপাঙ্গল কনখৎহনবদা ঐখোয়গী খুন্নাইনা মরুওইবা থৌদাং অমনা লৌরি। মসিগী মমিং ‘মালেসিয়া ইন্দিয়া হেরিতেচ সোসাইতি’ কৌই। তোঙান তোঙানবা থৌরমশিংগী মথক্ত, লুপ অসিনা হেরিতেচ ৱাল্ক অমসু পাংথোক্লে। থৌরম অসিনা লৈবাক অনিগী নাৎকী মফমশিং কোনশিল্লি। হৌখিবা থাদা মালেসিয়াদা “লাল পার সারি’ খোঙচৎ পাংথোকখ্রে। মসিগী সারি অসি বেঙ্গলগী ঐখোয়গী নাৎকা অখন্নবা মরী অমা লৈনরি। থৌরম অসিদা সারি শেৎপা মীওই মশিং য়াম্না শরুক য়াবগী রেকোর্দ অমা থমদুনা মালেসিয়া বুক ওফ রেকোর্দসতা য়াওরে। থৌরম অসিদা, ওদিসি জগোয় অমসুং বাউল ঈশৈনা মীয়ামগী পুক্নিং চিংশিনখি। ঐনা হায়রি:

সায়া বারবাঙ্গা /ডেঙ্গান প্রবাসী ভারত /মালয়েশিয়া //

মেরেকা মাম্বাওয়া / ভারত দান মালয়েশিয়া / সেমাকিন রাপা //

“মালেসিয়াদা লৈরিবা ভারতমচাশিংগীদমক ঐনা চাউথোকচৈ; মখোয়না ভারত অমসুং মালেসিয়া হেন্না নকশিন্নহল্লে”।

মালেসিয়াদা লৈরিবা ভারতমচাশিংদা ঐনা ঐগী য়াইফ পাউজেল পীজরি।

ঐগী নুংশিরবা ইরৈচাশিং,

ঐখোয়না ভারতকী মফম খুদিংমক্ত চৎপদা, ঐখোয়না তোপ-তোপ্প খর অমসুং মমাঙদা অমুক্ত উখিদ্রিবা খর উবা ফংই। হায়রিবা থৌরমশিং অসি মেদিয়ানা পাউদমদে। অদুবু মখোয়না ঐখোয়গী খুন্নাইগী অশেংবা মপাঙ্গল উৎলি। মখোয়না ঐখোয়গী গুনশিংগী থবকশিংগী শক্তম অমা উৎলি, অমতা ওইবগী ৱাখল্লোন অসি য়াম্না মরুওই। গুজরাতকী বেহারাজিদা লৈবা চান্দানকি খুঙ্গংগী চৎনবী অঙকপনি। মফম অসিগী অহলশিং মখোয়গী য়ুমশিংদা চাক থোঙদে হায়বা তাবদা অদোম অঙকপা ফাওগনি। মসিগী মরমদি খুঙ্গং অসিগী মীয়ামগী ফজরবা চাকশঙ লৈবগীনি। খুঙ্গং শীনবা থুংবগী চাক খুনগী চাকশঙ অসিদা থোঙই অমসুং মীয়াম পুন্না ফমদুনা চাই।

মসিগী চৎনবী অসি হৌখিবা চহি ১৫ দগী চৎনদুনা লাক্লি। করিগুম্বা কনাগুম্বা অমা মশা ঙমদ্রবদি, তিফিন্দা চাক থিনবগী খুদোংচাবা পীরি, হায়বদি-য়ুমদা থিনবগী খুদোংচাবসু লৈরি। মীয়ামগী চাকশঙদা থোকপা চাক হরাওনা চাই। থবক অসিনা মীয়াম পুনহনবা খক নত্তনা; মসিনা ইমুং অমগী ৱাখল্লোনসু লৈহল্লে। ভারতকী ইমুংগী মরী অসি ঐখোয়গী খুন্নাইগী তৎন-থানবা য়াদ্রবা শরুক অমনি। মসি মালেম শীনবা থুংবগী লৈবাক কয়ানা য়াম্না ঙক্না য়েংনরি। লৈবাক কয়াদা, অসিগুম্বা ইমুং-মনুংগী মওংশিং অসি য়াম্না ইকায়খুম্নৈ। নুমিৎ খরগী মমাংদা, ঐগী ইনাও, য়ু.এ.ইগী রাষ্ট্রপতি, সৈখ মোহমদ বিন জয়েদ অল নাহয়ান ভারত্ত লাক্লম্লে।  য়ু.এ.ইনা ২০২৬ অসি ইমুং-মনুংগী চহি হায়না থৌরম পাংথোক্লে হায়না মহাক্না পাউদমখি। মসিগী পান্দমদি লৈবাক অসিগী মীয়াম মরক্ত নুংশিন্না হিংমিন্নবা অমসুং খুন্নাইগী ৱাখল্লোন মপাঙ্গল কনখৎহন্নবা পান্দমনি- তশেংনা মসি থাগৎনিঙাই ওইরবা থবক অমনি।

মরুপশিং,

ইমুং-মনুংগী মপাঙ্গল অমসুং খুন্নাই পুনশিনবা মতমদা, খ্বাইদগী চাউবা শিংনবশিং ফাওবা ঐখোয়না মায়োক্নবা ঙমগনি। ঐ অনন্তনাগকী সৈখগুন্দ খুঙ্গংগী মরমদা তারে। মফম অদুদা দ্রগশিং, হিদাকমনা, চুরুদশিং অমসুং য়ুগা মরী লৈনবা অৱাবশিং হেনগৎলক্লে। মসি উবদা, মফম অদুগী মির জাফার জি অসুক্কী মতিক নিংবা কাইখি অমসুং অৱাবা অসি কোকহন্নবা মহাক্না ৱাশকখি। মহাক্না খুঙ্গং অসিগী মীওই খুদিংমক অমতা ওইনা পুনহনখি। মহাক্কী থবক অসিগী ফল ওইনা দুকানশিংদা হিদাকমনাগী পোৎথোকশিং য়োনবা লেপখি। থবক অসিনা মীয়ামদা দ্রগশিংগী অমাঙবশিংগী মরমদা খঙবা হেনগৎহল্লে।

মরুপশিং,

মশাগী ওইজবা থিদনা চহি কয়া মীয়ামগী থবক তৌরক্লবা লুপ কয়া ঐখোয়গী লৈবাক্ত লৈরি। খুদম ওইনা, নোংচুপ বেঙ্গলগী ইষ্ট মেদিনিপুরগী ফরদপুরদা অসিগুম্বা লুপ অমা লৈরি। মসিগী মমিং ‘বিবেকানন্দা লোক সিক্ষ নিকেতন’ কৌই। লুপ অসিনা চহি ৪০ হেন্না অঙাংশিং অমসুং অহলশিং শেন্নবগী থবক তৌদুনা লাক্লি। গুরুকুলগী খুৎথাংদা লাইরিক তম্বীবা অমসুং ওজাশিং ত্রেনিং পীবগী মথক্ত, লুপ অসিনা খুন্নাইগী য়াইফনবা থবক কয়া পায়খৎখি। অসিগুম্বা মশাগী ওইজবা থিদনা থবক তৌবগী ৱাখল্লোন অসি লৈবাক মীয়াম মরক্ত মপাঙ্গল কনখৎহনগনি হায়না ঐনা থাজবা থম্লি।

ঐগী নুংশিরবা ইরৈচাশিং,

‘মন কি বাত্ত’, ঐখোয়না লু-নানবগী ৱাফমশিং পুখৎলি। ঐখোয়গী নহারোলশিংনা মখোয়গী অকোয়বা লু-নান্নবা থম্নবগী মতাংদা ৱাখল তাবা উবদা ঐ চাউথোকচৈ। অন্ধ্র প্রদেসতা অসিগুম্বা অঙকপা থবক অমগী মতাংদা ঐ খঙলে। 

অরুনাচল লৈবাক অসিদা অহানবা নুমিৎকী মঙাল ফংবা মফমনি। মফম অসিগী মীওইশিং অমনা অমদা “জয় হিন্দ” হায়না তরাম্না ওক্নৈ। ইতানগরদা, নহারোল কাংলুপ অমা মরুওইবা মফমশিং শেংদোক্নবা পুনখি। তোঙান তোঙানবা সহরশিংদা মীয়ামগী মফমশিং শেংদোক্নবা হায়রিবা নহারোলশিং অসিনা মখোয়গী পান্দম থমখি। মখা তারকপদা, মসিগী খোঙজং অসি ইতানগর, নাহরলাগুন, দোইমুখ, সেপ্পা, পালিন অমসুং পাসিঘাত্ত হৌদোকখি। নহারোলশিং অসিনা হৌজিক ফাওবদা কিলোগ্রাম লাখ ১১ হেনবগী অমোৎপা শেংদোকখ্রে। মরুপশিং খন্দুনা য়েংউ, নহারোলশিংনা পুন্দুনা অমোৎপা কিলোগ্রাম লাখ ১১ শেংদোকখ্রে।

মরুপশিং,

অতোপ্পা খুদমনা অসামনি। অসামগী নাগাউন্দা মফম অদুগী অরিবা লম্বীশিংগা মীয়ামগা অচেৎপা মরী লৈরি। মফম অদুগী মীওই খরনা মখোয়গী লম্বীশিং শেংদোক্নবা ৱারেপ লৌখি। তপ্ন তপ্না মীওই কয়া শরুক য়ারকখি। মতৌ অসুম্না, কাংবু অমা শেমদুনা লম্বীশিংগী অমোৎপশিং য়াম্না শেংদোকখি। অসিগুম্বা থবকশিং বেঙ্গালুরুদা পাংথোক্লি। বেঙ্গালুরুদা সোফাগী অমোৎপা অসি অচৌবা খুদোংচাদবা অমা ওইরে, মরম অদুনা মসিগী খুদোংচাদবা অসি কোকহন্নবা শীনফম খরগী মীওইশিং পুনখি।

মরুপশিং,

ঙসিদি, সহর কয়াদা অমোৎপশিং অমুক হন্না শীজিন্নবা য়াবা পোৎলমশিংদা ওন্থোক্নবা কাংবুশিংনা থবক পায়খৎলে। চেন্নাইদা অসিগুম্বা কাংবু অমনা অফবা থবক পাংথোক্লে। অসিগুম্বা খুদমশিং অসিনা থবক খুদিংমক লু-নানবগা মরী লৈনবগী মরুওইবা অদু উৎলে। লনাই নত্ত্রগা কাংলুপ অমা ওইনা ঐখোয়না ঐখোয়গী লু-নানবগী থবকশিং ফগৎহনগদবনি… মসি খক্তদা ঐখোয়গী সহরশিং হেন্না ফজবা ঙমগনি।

ঐগী নুংশিরবা ইরৈচাশিং,

ঐখোয়না মহৌশাগী অকোয়বগী ফিবম ঙাক-শেনবগী মতাংদা ৱারি শানবা মতমদা, ঐখোয়না য়াম্না তোইনা অচৌবা থৌরাংশিং, অচৌবা খোঙজংশিং অমসুং অচৌবা লুপশিংগী খল্লি। অদুবু অহোংবা কয়া য়াম্না লাইবা লম্বী অমদগী হৌরকই। মীওই অমদগী, মফম অমদগী, খোঙথাং অমদগী অমসুং অপীকপা থবকশিংদগী অচৌবা অহোংবা পুরকপা ঙম্মী। নোংচুপ বেঙ্গলগী কোচ বিহারগী বেনোই দাসগী থবক, মসিগী খুদম অমনি। বেনোই দাস জিনা উ পাম্বী লিশিং কয়া থাখি। উ চারা লৈবা, থাবা অমসুং শেনবদা চঙবা শেনফমশিং মহাক্না পুথোকখি। দরকার ওইরকপা মতমদা, মহাক্না লৈকাইগী মীওইশিং, মহৈরোয়শিং অমসুং ম্যুনিসিপাল বোদিশিংগা পুন্না থবক তৌমিন্নখি। মহাক্কী থবকশিং অসিদগী লম্বী নাকলশিং অশং-অমান্না থনবা হেনগৎলক্লে।

মরুপশিং,

মধ্য প্রদেসকী পান্না জিলাগী জগদিস প্রসাদ অহিরৱার জিগী থবকসু য়াম্না থাগৎনিঙাইনি। মহাক উমংদা বিদ-গার্দ ওইনা থবক তৌখি। মতম অমদা, পেত্রোল মনুংদা, উমংদা হৌরিবা হিদাক কান্নবা পাম্বীশিংগী মতাংদা মওং-মরিল তানা ইশিনবা তৌদ্রি হায়বা মহাক খঙখি। মসিগী লৌশিং অসিগী তুংগী মীরোলশিংদা শীন্নরম্বা জগদিস জিনা পামখি। মরম অদুনা, মহাক্না হিদাক ওইনা শীজিন্নবা পাম্বীশিং মশক খঙদোকখি অমসুং ইশিনখি। মহাক্না হিদাক ওইনা শীজিন্নবা পাম্বী ১২৫ হেন্না মশক খঙদোকখি। মহাক্না ফোতোগ্রাফম অমসুং মখোয়গী মমিং, শীজিন্নফম অমসুং পাম্বী অমমমগী হৌফমশিং লৌশিনখি। 

ফোরেষ্ট দিপার্তমেন্তনা ই-পাউ অদু খোমজিনখি অমসুং মদু লাইরিক অমা ওইনা ফোঙখি। লাইরিক অদুদা য়াওরিবা ই-পাউ অদু হৌজিক থিজিল্লোয়শিং, মহৈরোয়শিং অমসুং ফোরেষ্ট ওফিসিএলশিংদা য়াম্না কান্নরে।

মরুপশিং,

ঙসিদি মহৌশাগী অকোয়বগী ফিবম ঙাক-শেন্নবগী ৱাখল্লোন পাক-শন্না উবা ফংলে। মসিগী ৱাখল অসি পুক্নিংদা লৈবগা লোয়ননা, লৈবাক শীনবা থুংনা ‘এক পের মা কে নাম’ খোঙজং হৌদোক্লে। ঙসিদি মীওই করোর কয়া খোঙজং অসিদা শরুক য়ারে। হৌজিক ফাওবদা লৈবাক অসিদা উ পাম্বী করোর ২০০ হেন্না থাখ্রে। হৌজিক মীয়াম মহৌশাগী অকোয়বগী ফিবম ঙাক-শেনবগী মতাংদা হেন্না ৱাখল তারে অমসুং মওং অমা নত্ত্রগা মওং অমদা মতেং পাংবা পাম্লে হায়বা মসিনা উৎলে।

ঐগী নুংশিরবা ইরৈচাশিং,

অতোপ্পা থবক অমগীদমক ঐনা অদোম ময়াম থাগৎনিংই। মরম অদুদি মিল্লেতশিংনি, হায়বদি লৈবাক অসিগী মীয়াম্না মখা তানা শ্রী অন্ন পাম্নবা হেনগৎলকপা উবদা ঐ হরাওই। ঐখোয়না ২০২৩ অসি মিল্লেত ইয়ার হায়না লাউথোক্লবসু, ঙসি ফাওবা; চহি অহুমগী মতুংদা, লৈবাক অসিদা অমসুং মালেমদা লৈরিবা পামজবা অমসুং থাজবা অসি য়াম্না পুক্নিং থৌগৎনিঙাইনি।

মরুপশিং,

তামিল নাদুগী কল্লা-কুরিচি জিলাগী লৌমী নুপী কাংবু অমা ইথিলগী হৌরকফম অমা ওইরে। মফম অসিগী পেরিয়াপালায়ম মিল্লেত এফ.পি.সিদা লৌমী নুপী ৮০০ রোম থবক তৌরি। মিল্লেতশিং পাম্নবা হেনগৎপা উবদা, নুপীশিং অদুনা মিল্লেত শেম-শানবা য়ুনিত অমা লিংখৎলে। হৌজিক মখোয়না মিল্লেতশিংদগী শাবা পোৎথোকশিং কৈথেলদা য়োল্লে।

মরুপশিং,

রাজস্থানগী রামসারগী লৌমীশিংসু শ্রী অন্নগী অনৌবা পোৎথোকশিং পুথোক্লি। রামসার ওর্গনিক ফার্মর প্রদুসর কম্পেনিদা লৌমী ৯০০ হেন্না থবক তৌরি। লৌমীশিং অসিনা মরুওইনা মিল্লেত থাই। মফম অসিদা শেম-শাবা পিরেল মিল্লেত অদুদগী খুদক্ত চাবা য়ারবা লদুশিং শেমখি। লদুশিং অদু কৈথেলদা য়াম্না শীৎলি। মরুপশিং, হৌজিক লাইশঙ কয়াদা মখোয়গী প্রসাদ ওইনা মিল্লেতশিং শীজিন্নরে হায়বা খঙবদা ঐ হরাওই। থবক অসিগীদমক লাইশঙগী ফম্নাইবশিং ঐনা থাগৎপা ফোঙদোকচরি।

মরুপশিং,

মিল্লেত শ্রী অন্ননা লৌমীশিং শেন্থোক হেনগৎহনবা খক নত্তনা মীয়ামগী হকশেলসু ফগৎহল্লে। মিল্লেতশিং য়াম্না মচি ওই অমসুং সুপরফুদ অমনি। ঐখোয়গী লৈবাক্ত, নিংথম থাদা অফবা চীঞ্জাক চাবা য়াম্না ফৈ হায়না খন্নৈ। মরম অদুনা, ঐখোয়না হায়রিবা মতম অসিদা শোইদনা শ্রী অন্ন চাগদবনি।

ঐগী নুংশিরবা ইরৈচাশিং,

‘মন কি বাত’ তা, অঙকপা হিরম কয়া খন্ননবা ঐখোয় অমুক হন্না খুদোংচাবা ফংলে। ঐখোয়গী লৈবাক্কী মাইপাকপশিং খঙনবা অমসুং হরাওবা ফোঙদোক্নবা খুদোংচাবা অমা থৌরম অসিনা ঐখোয়দা পীরে। অতোপ্পা অসিগুম্বা থৌরম অমা ফেব্রুৱারিদা পাংথোক্লগনি। মথং থাদা ইন্দিয়া এ.আই ইম্পেক্ত সম্মিৎ পাংথোক্লগনি। মরুওইনা তেক্নোলোজগী হিরমগী অখঙ-অহৈশিং য়াওনা, মালেম শীনবা থুংবগী অখঙ-অহৈশিং মীফম অসিগীদমক ভারত্ত লাক্কনি। মীফম অসিদা এ.আইগী লমদা ভারতকী মাইপাকপশিং উৎকনি।

মসিদা শরুক য়ারিবা মীওই খুদিংমক ঐনা থাগৎপা ফোঙদোকচরি। মথং থাগী মন কি বাত্ত ঐখোয়না ইন্দিয়া এ.আই ইম্পেক্ত সম্মিৎকী মতাংদা খন্নগনি। ঐখোয়না ইরৈচাশিংগী অতোপ্পা মাইপাকপা খরসু খন্নগনি। মতম অদু ফাওবা, হন্দক্কী মন কি বাত তাঙ্কক অসিদগী ঐনা অদোমগী বিদায় লৌজরে। হয়েং পাংথোক্কদৌরিবা গনতন্ত্র দিবস থৌরমগীদমক মীয়ামগী মফমদা ঐনা অমুক হন্না ঐগী য়াইফ পাউজেল পীজরি।

অদোম থাগৎচরি।

***