ભારતીય રેલવે તેના 100 સમર્પિત કર્મચારીઓ અને અધિકારીઓને તેમની અનુકરણીય સેવા અને સંસ્થામાં ઉત્કૃષ્ટ યોગદાનની માન્યતા બદલ પ્રતિષ્ઠિત 70મા અતિ વિશિષ્ટ રેલવે સેવા પુરસ્કાર 2025થી સન્માનિત કરવા જઈ રહી છે. આ એવોર્ડ સમારોહ 9 જાન્યુઆરી, 2026 ના રોજ ઇન્ડિયા ઇન્ટરનેશનલ કન્વેન્શન એન્ડ એક્સ્પો સેન્ટર (યશોભૂમિ), દ્વારકા, નવી દિલ્હી ખાતે યોજાશે.

કેન્દ્રીય રેલવે, માહિતી અને પ્રસારણ, અને ઇલેક્ટ્રોનિક્સ અને માહિતી ટેકનોલોજી મંત્રી શ્રી અશ્વિની વૈષ્ણવ, પસંદ કરાયેલા રેલવે કર્મચારીઓને 70મો અતિ વિશિષ્ટ રેલવે સેવા પુરસ્કાર એનાયત કરશે. આ સમારોહમાં રેલવે અને જલ શક્તિ રાજ્ય મંત્રી શ્રી વી. સોમન્ના, રેલવે અને ફૂડ પ્રોસેસિંગ ઉદ્યોગ રાજ્ય મંત્રી શ્રી રવનીત સિંહ, રેલવે બોર્ડના ચેરમેન અને CEO શ્રી સતીશ કુમાર, રેલવે બોર્ડના સભ્યો અને વિવિધ રેલવે ઝોન તથા ઉત્પાદન એકમોના જનરલ મેનેજરો હાજર રહેશે.

અતિ વિશિષ્ટ રેલવે સેવા પુરસ્કાર-2025 માટે કુલ 100 વિજેતાઓની પસંદગી કરવામાં આવી છે, જેમાં નવીનતા, ઓપરેશનલ કાર્યક્ષમતા, સુરક્ષા, સલામતી, મહેસૂલ વૃદ્ધિ, પ્રોજેક્ટ્સનું સમયસર કામ પૂર્ણ કરવું, રમતોમાં ઉત્કૃષ્ટતા અને સેવાની અન્ય વિશિષ્ટ ક્ષેત્રોમાં યોગદાનનો સમાવેશ થાય છે.

નવીનતા અને કાર્યક્ષમતાને પ્રોત્સાહન

17 અધિકારીઓ અને કર્મચારીઓને નવીનતા, પ્રક્રિયાઓ અને પદ્ધતિઓ રજૂ કરવા બદલ સન્માનિત કરવામાં આવશે, જેનાથી ઉત્પાદકતામાં સુધારો થયો છે, ખર્ચમાં કરકસર થઈ છે, આયાત અવેજીકરણ થયું છે અને સંસાધનોનો વધુ અસરકારક ઉપયોગ થયો છે, જેનાથી ભારતીય રેલવેની એકંદર કાર્યક્ષમતા મજબૂત થઈ છે.

બહાદુરી અને નિઃસ્વાર્થ સેવાનું સન્માન

22 રેલવે કર્મચારીઓ અને અધિકારીઓને વ્યક્તિગત સુરક્ષાની પરવા કર્યા વિના કરેલા પ્રશંસનીય કાર્યો માટે ઓળખવામાં આવશે, જેના પરિણામે જીવન અને રેલવે મિલકતનું રક્ષણ થયું છે અને જાહેર સેવા પ્રત્યે અસાધારણ હિંમત, પ્રતિબદ્ધતા અને સમર્પણનું ઉદાહરણ પૂરું પાડ્યું છે.

મહેસૂલ વૃદ્ધિ અને તકેદારી

14 અધિકારીઓ અને સ્ટાફ સભ્યોને રેલવેની આવકમાં વધારો કરવા અને ટિકિટ વગરની મુસાફરી, ચોરી અને અન્ય ગેરરીતિઓ સામે અસરકારક રીતે લડવા માટે પુરસ્કાર આપવામાં આવશે, જેનાથી નાણાકીય શિસ્ત મજબૂત થશે અને મહેસૂલનું રક્ષણ થશે.

ઓપરેશનલ એક્સેલન્સ અને સંપત્તિનું રક્ષણ

19 કર્મચારીઓ અને અધિકારીઓને કામગીરીમાં સુધારો કરવા, સુરક્ષા અને સલામતી વધારવા, વધુ સારી જાળવણી પદ્ધતિઓ સુનિશ્ચિત કરવા અને રેલવે અસ્કયામતોના મહત્તમ ઉપયોગ અને રક્ષણને પ્રોત્સાહન આપવા બદલ સન્માનિત કરવામાં આવશે.

ઐતિહાસિક પ્રોજેક્ટ્સનું સમયસર સમાપન

રેકોર્ડ સમયમર્યાદામાં મહત્વપૂર્ણ રેલવે પ્રોજેક્ટ્સ પૂર્ણ કરવા બદલ 16 અધિકારીઓ અને કર્મચારીઓને સન્માનિત કરવામાં આવશે, જે ઈન્ફ્રાસ્ટ્રક્ચર વિસ્તરણ, ક્ષમતા વૃદ્ધિ અને સુધારેલી ઓપરેશનલ કામગીરીમાં નોંધપાત્ર યોગદાન આપશે.

અન્ય ક્ષેત્રોમાં ઉત્કૃષ્ટ પ્રદર્શન

10 અધિકારીઓ અને કર્મચારીઓને નિર્ધારિત શ્રેણીઓ સિવાયના ક્ષેત્રોમાં તેમના ઉત્કૃષ્ટ પ્રદર્શન માટે ઓળખવામાં આવશે, જે વ્યવસાયિક શ્રેષ્ઠતા, સમર્પણ અને ભારતીય રેલવેના વિવિધ કાર્યકારી ક્ષેત્રોમાં પ્રભાવશાળી યોગદાનને પ્રતિબિંબિત કરે છે.

રમતગમતની ઉત્કૃષ્ટતાની ઉજવણી

રમતોમાં રાષ્ટ્રીય અને આંતરરાષ્ટ્રીય સ્તરે ઓળખ મેળવનાર અને ભારતીય રેલવેનું ગૌરવ વધારનાર 2 ખેલાડીઓને પણ અતિ વિશિષ્ટ રેલવે સેવા પુરસ્કાર-2025 એનાયત કરવામાં આવશે.

વ્યક્તિગત સન્માનથી આગળ

વ્યક્તિગત સન્માન ઉપરાંત, વિવિધ શ્રેણીઓમાં શ્રેષ્ઠ દેખાવ કરનાર રેલવે ઝોનને તેમની ઉત્કૃષ્ટ સિદ્ધિઓ અને એકંદર શ્રેષ્ઠતા બદલ 26 શીલ્ડ એનાયત કરવામાં આવશે.

એવોર્ડ મેળવનારાઓમાં એવા કર્મચારીઓનો સમાવેશ થાય છે જેમણે મહાકુંભ જેવી મોટા પાયાની ઘટનાઓ દરમિયાન સુરક્ષિત અને સીમલેસ રેલવે કામગીરી સુનિશ્ચિત કરવામાં મહત્વની ભૂમિકા ભજવી હતી. વિજેતાઓમાં એવા અધિકારીઓનો પણ સમાવેશ થાય છે જેમના યોગદાનથી ઓપરેશન સિંદૂર દરમિયાન પડકારજનક પરિસ્થિતિઓમાં અવિરત રેલવે કામગીરી અને જાહેર રાહત સુનિશ્ચિત થઈ હતી, તેમજ જેમણે મુશ્કેલ વિભાગોમાં અદ્યતન 'બેલાસ્ટ ક્લીનિંગ મશીન' રજૂ કર્યા હતા, જેનાથી ટ્રેક સલામતી અને જાળવણી કાર્યક્ષમતામાં નોંધપાત્ર સુધારો થયો છે.

આ એવોર્ડ સમારોહ રેલવે સિસ્ટમને વધુ સુરક્ષિત, વધુ કાર્યક્ષમ અને મુસાફર-કેન્દ્રીત બનાવવા માટે તેના કર્મચારીઓના સામૂહિક પ્રયાસોની ઉજવણી સાથે સમર્પણ અને વ્યાવસાયિકતાને માન્યતા આપવા માટે ભારતીય રેલવેની પ્રતિબદ્ધતાને રેખાંકિત કરે છે.

SM/BS/GP/JD