జాతీయ రహదారుల వెంబడి అనేక చోట్ల, ముఖ్యంగా కొత్తగా నిర్మిస్తున్న (గ్రీన్ ఫీల్డ్), మారుమూల ప్రాంతాల్లో మొబైల్ నెట్‌వర్క్ సమస్యలను గుర్తించిన ఎన్‌హెచ్ఏఐ... ఈ విషయమై జోక్యం చేసుకోవాల్సిందిగా టెలికాం శాఖ, భారత టెలికాం నియంత్రణ సంస్థ (ట్రాయ్)లను కోరింది. ఈ మేరకు సమస్యను పరిష్కరించేలా టెలికాం సేవా సంస్థలకు ఆదేశాలు జారీ చేయాలని విజ్ఞప్తి చేసింది. జాతీయ రహదారుల వ్యూహాత్మక ప్రాధాన్యాన్నీ, ప్రయాణికుల భద్రతనూ దృష్టిలో ఉంచుకుని.. దేశవ్యాప్తంగా హైవే కారిడార్లలో మొబైల్ కనెక్టివిటీని మెరుగుపరచడం కోసం సమన్వయంతో కూడిన వేగవంతమైన చర్యలు చేపట్టాలని ఎన్‌హెచ్ఏఐ సూచించింది.

జాతీయ రహదారులపై దాదాపు 1,750 కిలోమీటర్ల పరిధిలోని 424 ప్రాంతాలు.. మొబైల్ నెట్‌వర్క్ కనెక్టివిటీ అందుబాటులో లేకపోవడం వల్ల సమస్యలున్నట్లు ఎన్‌హెచ్‌ఏఐ సమగ్ర అంచనా ద్వారా గుర్తించింది. ఈ ప్రదేశాలకు సంబంధించిన వివరణాత్మక సమాచారం మొత్తాన్నీ ఒక్కచోట చేర్చి.. అవసరమైన చర్యల కోసం టెలికాం శాఖ, ట్రాయ్‌లకు అధికారికంగా అందించింది.

జాతీయ రహదారులు మారుమూల, గ్రామీణ ప్రాంతాల మీదుగా వెళ్తున్నందున.. ఆయా మార్గాల్లో పటిష్టమైన మొబైల్ నెట్‌వర్క్ లేకపోవడంతో హైవే కార్యకలాపాలు, అత్యవసర సహాయక చర్యలు, సాంకేతికతపై ఆధారపడిన ప్రజా సేవల పంపిణీపై తీవ్ర ప్రభావం పడుతోంది.

పశు సంచారం ఎక్కువగా ఉన్న ప్రాంతాలు, ప్రమాదకర ప్రదేశాలతోపాటు భౌగోళిక మ్యాపింగ్‌తో గుర్తించిన ప్రమాద ప్రభావిత ప్రాంతాల్లో.. ఎప్పటికప్పుడు ఎస్ఎంఎస్‌లు లేదా ఫ్లాష్ ఎస్ఎంఎస్ హెచ్చరికలను జారీ చేసేలా టెలికాం ఆపరేటర్లకు అవసరమైన ఆదేశాలు జారీ చేయాలని ట్రాయ్‌ను ఎన్‌హెచ్ఏఐ కోరింది. ఆ ప్రదేశాలకు చేరుకోవడానికి ముందే ప్రయాణికులకు ఈ హెచ్చరికలు అందేలా చూడాలని సూచించింది. తద్వారా సకాలంలో భద్రతా చర్యలు తీసుకోవడానికి, సురక్షిత ప్రయాణానికీ వీలవుతుంది. పశు సంచారం ఎక్కువగా ఉండడం వల్ల తరచూ ప్రమాదాలు జరుగుతున్న రహదారి మార్గాల జాబితాను కూడా ట్రాయ్ కు ఎన్‌హెచ్ఏఐ అందించింది.

నెట్‌వర్క్ అవాంతరాలను తొలగించడం, జాతీయ రహదారులపై భద్రతను మెరుగుపరిచేందుకు చొరవ తీసుకోవడం ద్వారా.. ఎన్‌హెచ్ఏఐ తన నిబద్ధతను పునరుద్ఘాటించింది. సంబంధిత భాగస్వాములందరితో సమన్వయంతో పనిచేస్తూ.. దేశవ్యాప్తంగా రహదారి వ్యవస్థను అనుసంధానించడం మాత్రమే కాకుండా, డిజిటల్ పరంగానూ అత్యున్నత స్థాయికి తీసుకెళ్లేందుకు సిద్ధంగా ఉన్నట్టు స్పష్టం చేసింది. దేశవ్యాప్తంగా పౌరులకు సురక్షితమైన, సమర్థమైన, ప్రయాణికుల అవసరాలకు అనుగుణమైన జాతీయ రహదారి మౌలిక సదుపాయాలను అందించాలన్న ఎన్‌హెచ్ఏఐ విస్తృత లక్ష్యానికి అనుగుణంగా ఈ ప్రయత్నాలు సాగుతున్నాయి.

***