કેન્દ્રીય શિક્ષણ મંત્રી શ્રી ધર્મેન્દ્ર પ્રધાને આજે નવી દિલ્હીમાં શાસ્ત્રીય ભારતીય ભાષાઓમાં 55 સાહિત્યિક કૃતિઓનું વિમોચન કર્યું હતું. આ વિમોચનમાં સેન્ટ્રલ ઇન્સ્ટિટ્યૂટ ઓફ ઇન્ડિયન લેંગ્વેજિસ (CIIL) હેઠળના સેન્ટર્સ ઓફ એક્સેલન્સ ફોર ક્લાસિકલ લેંગ્વેજિસ દ્વારા તૈયાર કરાયેલા 41 પુસ્તકો, તેમજ સેન્ટ્રલ ઇન્સ્ટિટ્યૂટ ઓફ ક્લાસિકલ તમિલ (CICT) દ્વારા બહાર પાડવામાં આવેલા 13 પુસ્તકો અને 'તિરુક્કુરલ સાઇન લેંગ્વેજ' શ્રેણીનો સમાવેશ થાય છે.

આ સંગ્રહમાં કન્નડ, તેલુગુ, મલયાલમ, ઓડિયા અને તમિલ ભાષાઓમાં મહત્વપૂર્ણ શૈક્ષણિક કૃતિઓ તેમજ ઇન્ડિયન સાઇન લેંગ્વેજ (ભારતીય સાંકેતિક ભાષા) માં 'તિરુક્કુરલ' ના અર્થઘટનનો સમાવેશ થાય છે. આ પ્રકાશનો ભારતની ભાષાકીય વારને શિક્ષણ અને સંશોધનના કેન્દ્રમાં રાખવા અને સાંસ્કૃતિક ગૌરવ વધારવા માટેના વ્યાપક રાષ્ટ્રીય પ્રયાસોનો એક ભાગ છે, જ્યારે શાસ્ત્રીય જ્ઞાન પરંપરાઓ સાથેના જોડાણને મજબૂત બનાવે છે.

આ પ્રસંગે બોલતા શ્રી ધર્મેન્દ્ર પ્રધાને કહ્યું કે પ્રધાનમંત્રી શ્રી નરેન્દ્ર મોદીના નેતૃત્વમાં, સરકારે તમામ ભારતીય ભાષાઓને મજબૂત કરવા અને પ્રોત્સાહન આપવા માટે વ્યાપક કામ કર્યું છે, જેમાં અનુસૂચિત યાદીમાં વધુ ભાષાઓનો સમાવેશ કરવાથી લઈને શાસ્ત્રીય ગ્રંથોનો ભારતીય ભાષાઓમાં અનુવાદ કરવા અને ભારતીય ભાષાઓમાં શિક્ષણને પ્રોત્સાહિત કરવાનો સમાવેશ થાય છે. તેમણે ઉમેર્યું હતું કે ભારતીય ભાષાઓને નષ્ટ કરવાના પ્રયાસો છતાં તે સમયની કસોટી પર ખરી ઉતરી છે.

તેમણે વધુમાં જણાવ્યું હતું કે ભારત લોકશાહીની જનની છે અને અત્યંત ભાષાકીય વિવિધતા ધરાવતો દેશ છે, અને રાષ્ટ્રની ઐતિહાસિક, સાંસ્કૃતિક અને સાહિત્યિક સંપત્તિ જળવાઈ રહે અને ભવિષ્યની પેઢીઓને તેનાથી માહિતગાર કરવામાં આવે તે સુનિશ્ચિત કરવાની જવાબદારી સમાજની છે. તેમણે જણાવ્યું કે ભાષાઓ એક જોડનારું બળ છે અને નોંધ્યું કે પ્રધાનમંત્રી શ્રી નરેન્દ્ર મોદીએ હંમેશા ભાર મૂક્યો છે કે તમામ ભારતીય ભાષાઓ રાષ્ટ્રીય ભાષાઓ છે.

શ્રી પ્રધાને એમ પણ કહ્યું કે સાઇન લેંગ્વેજમાં 'તિરુક્કુરલ' ના સારનો સમાવેશ એક સમાવેશી ભારતના વિઝનને સશક્ત બનાવે છે, જ્યાં તમામ માટે જ્ઞાનની સુલભતા સુનિશ્ચિત કરવામાં આવે છે, અને ઉમેર્યું કે આ વિમોચન ભારતના બૌદ્ધિક સાહિત્યમાં એક મૂલ્યવાન યોગદાન છે.

તેમણે વધુમાં જણાવ્યું કે રાષ્ટ્રીય શિક્ષણ નીતિ 2020 ભારતીય ભાષાઓમાં શિક્ષણના વિઝનને આગળ ધપાવે છે, અને ભારત વિવિધતામાં એકતાનું એક જીવંત ઉદાહરણ છે, જ્યાં ભાષા સમાજને જોડવા માટેના માધ્યમ તરીકે કામ કરે છે. તેમણે કહ્યું કે, વસાહતી યુગની મેકોલે માનસિકતાથી વિપરીત, ભારતીય સભ્યતાએ હંમેશા ભાષાઓને સંવાદ અને સાંસ્કૃતિક સંવાદિતા માટેના સેતુ તરીકે ગણી છે.

શ્રી પ્રધાને ભારતીય ભાષાઓ પરની ભારતીય ભાષા સમિતિ, સેન્ટર્સ ઓફ એક્સેલન્સ, સેન્ટ્રલ ઇન્સ્ટિટ્યૂટ ઓફ ઇન્ડિયન લેંગ્વેજિસ (CIIL) અને સેન્ટ્રલ ઇન્સ્ટિટ્યૂટ ઓફ ક્લાસિકલ તમિલ (CICT) ને ભારતીય ભાષાઓને પ્રોત્સાહન આપવાના તેમના પ્રયાસો બદલ અભિનંદન અને શુભેચ્છાઓ પાઠવી હતી.

આ કાર્યક્રમમાં શ્રી વિનીત જોશી, સચિવ (ઉચ્ચ શિક્ષણ), શિક્ષણ મંત્રાલય; શ્રી ચામુ કૃષ્ણ શાસ્ત્રી, અધ્યક્ષ, ભારતીય ભાષા સમિતિ; પ્રો. શૈલેન્દ્ર મોહન, નિયામક, CIIL; પ્રો. આર. ચંદ્રશેખરન, નિયામક, CICT; કુમારી મનમોહન કૌર, સલાહકાર (ખર્ચ), તેમજ શિક્ષણ મંત્રાલયના વરિષ્ઠ અધિકારીઓ ઉપસ્થિત રહ્યા હતા.

SM/IJ/GP/JD