এক্সেলেন্সী, ঐগী ইচিল ইনাও, ঐগী মরূপ,

ঐহাক ইথিওপিয়াদা লাকপা তশেংনা নুংঙাই। হন্দক্কী অসি ঐগীদি ইথিওপিয়াদা লাকপা অহানবনি, অদুবু ঐহাক্না মফমসিদা খোঙ থাংথরকপা মীৎকুপ্তা ঐঙোন্দা শকখঙ মায়খঙনবা অমদি অচেৎপা মরী লৈনবগী ইথিল অমা ফাওখি। ভারত অমসুং ইথিওপিয়াগী মরক্তা চহি লিশিং কয়া লেপ্তনা পাউ ফাওনবা, ৱারী শানবা, অমদি তাথোক তাশিন তৌনবগী পুৱারী অমা লৈ। অদুবু খেন্নবা লোল অমদি চৎনবী লৈবা ঐখোয়গী লৈবাক অনিমক খেন্নবশিংগী অমত্তা ওইবা শক্তমগী খুদমশিং ওইরি। দিমোক্রেসী চৎপা লৈবাক অনিমক্না ইং-তপ্পা অমদি মীয়ামগী য়াইফনবগীদমক লেপ্লি। ঐখোয় গ্লোবেল সাউথকী পুন্না চৎমিন্নরিবা খোঙবুশিংনি। ঐখোয়না মালেমগী ফম্পাকশিংদা পাম্বোম তিংমিন্নদুনা লেপমিন্নরি।

অফ্রিকান য়ুনিয়নগী হেদক্বার্তর ইথিওপিয়াদা লৈবা অসিনা ইথিওপিয়াবু অফ্রিকান দিপ্লোমেসীগী মীফম পাঙথোকফম ওইরি। পুম্নমক কোনশিনবা মালেম অমগী মান্নবা মঙলান্না পুক্নিং থৌগৎমিন্নদুনা, ভারতনা ২০২৩ দা অফ্রিকান য়ুনিয়নব G20 গী মেম্বর ওইহনখি। পুম্নমক অসি য়েংলগা, ঙসি ঐখোয়না ইন্দিয়া-ইথিওপিয়াগী মরীবু স্ত্রেতেজিক ওইবা খোঙবুগী থাক্তা থাঙ্গৎলি। খোঙথাং অসিনা ঐখোয়গী মরীদা অনৌবা ইনোৎ, খোঙজেল পুরকপগা লোয়ননা মরী অসিবু চেৎশিনহল্লগনি।

তুংলমচৎকী পাক চাউরবা ওইথোকপা য়াবশিংগীদমক শেম শাননবা তশেং তশেংবা লম্বী অমা য়াত্থোক্লগনি। ঙসি ঐখোয়না শেন্মিৎলোন, ইনোভেসন, তেক্নোলোজী, দিফেন্স, হকশেল, কেপাসিতী বিল্দিং, অমদি মায়কৈ কয়াগী তেংবাংনবনচিংবা ঐখোয়গী তেংবাংনবগী মরীগী মরুওইবা মায়কৈশিং খন্ননবা তাঞ্জা ফংলি। ঙসি ঐখোয়না ভারত্তা ইথিওপিয়াগী মহৈরোয়শিংগী স্কোলার্সিপ মশিং শরুক অনি হেনগৎহন্নবা ফিরেপ লৌরিবসি ঐগী থম্মোয়দা অপেনবা পোকই।

এক্সেলেন্সী,

পহলগামগী তেরোরিস্ত লান্দাগীদমক অৱাবা ফোঙদোকপিরকপা অমদি তেরোরিজমগী মায়োক্তা থেংনরিবা ঐখোয়গী লান্থেংদা অদোম্না ঙাক্লৌ পীবিবগীদমক অদোমবু থাগৎচরি। ঐখোয়গী তেরোরিস্তকী মায়োক্তা চত্থরিবা লান্থেং অসিদা মরূপ মপাং ওইবা লৈবাকশিংগী ঙাক্লৌ ফংবা অসি য়াম্না মরু ওই। ঐনা অমুক্কা হন্না অদোমগী মফমদা ঐহাক অমসুং ঐগী খোঙলোয়শিংবু তরাম তরাম ওকপিবগীদমক তৌবিমল খঙবা উৎচরি।

***