എത്യോപ്യ സന്ദർശിക്കാൻ കഴിഞ്ഞതിൽ എനിക്ക് അതിയായ സന്തോഷം തോന്നുന്നു. എത്യോപ്യയിലേക്കുള്ള എന്റെ ആദ്യ സന്ദർശനമാണിത്. എന്നിരുന്നാലും, ഞാൻ ഇവിടെ കാലുകുത്തിയ നിമിഷം, സ്വന്തമെന്ന ആഴത്തിലുള്ള തോന്നലും ഊഷ്മളതയും എനിക്ക് അനുഭവപ്പെട്ടു. ആയിരക്കണക്കിന് വർഷങ്ങളായി ഇന്ത്യയും എത്യോപ്യയും തുടർച്ചയായ സമ്പർക്കം, സംഭാഷണം, കൈമാറ്റം എന്നിവ പങ്കിട്ടു. നിരവധി ഭാഷകളാലും പാരമ്പര്യങ്ങളാലും സമ്പന്നമായ നമ്മുടെ ഇരു രാഷ്ട്രങ്ങളും നാനാത്വത്തിൽ ഏകത്വത്തിന്റെ പ്രതീകങ്ങളായി നിലകൊള്ളുന്നു. സമാധാനത്തിനും മാനവികതയുടെ ക്ഷേമത്തിനും പ്രതിജ്ഞാബദ്ധരായ ജനാധിപത്യ ശക്തികളാണ് ഇരു രാജ്യങ്ങളും. ​ഗ്ലോബൽ സൗത്തിലെ സഹയാത്രികരും പങ്കാളികളുമാണ് ഞങ്ങൾ. അന്താരാഷ്ട്ര വേദികളിലും, നാം തോളോട് തോൾ ചേർന്ന് നിന്നു.

എത്യോപ്യയിലെ ആഫ്രിക്കൻ യൂണിയൻ ആസ്ഥാനത്തിന്റെ സാന്നിധ്യം ഈ രാജ്യത്തെ ആഫ്രിക്കൻ നയതന്ത്രത്തിന്റെ സംഗമസ്ഥാനമാക്കി മാറ്റുന്നു. എല്ലാം ഉൾക്കൊള്ളുന്ന ഒരു ലോകത്തെക്കുറിച്ചുള്ള ഞങ്ങളുടെ പരസ്പര കാഴ്ചപ്പാടിൽ നിന്ന് പ്രചോദനം ഉൾക്കൊണ്ട്, 2023 ൽ ആഫ്രിക്കൻ യൂണിയൻ ജി 20 ൽ അംഗമാണെന്ന് ഇന്ത്യ ഉറപ്പാക്കി. ഈ വശങ്ങളെല്ലാം മനസ്സിൽ വെച്ചുകൊണ്ട്, ഇന്ന് നമ്മൾ ഇന്ത്യ-എത്യോപ്യ ബന്ധങ്ങളെ ഒരു തന്ത്രപരമായ പങ്കാളിത്തത്തിന്റെ തലത്തിലേക്ക് ഉയർത്തുകയാണ്. ഈ നടപടി നമ്മുടെ ബന്ധങ്ങൾക്ക് പുതിയ ഊർജ്ജവും പുതിയ ആക്കം കൂട്ടും, പുതിയ ആഴവും നൽകും.

ഭാവിയിലെ അപാരമായ സാധ്യതകൾ സാക്ഷാത്കരിക്കുന്നതിന് വ്യക്തമായ ഒരു രൂപരേഖ തയ്യാറാക്കും. ഇന്ന്, സമ്പദ്‌വ്യവസ്ഥ, നവീകരണം, സാങ്കേതികവിദ്യ, പ്രതിരോധം, ആരോഗ്യം, ശേഷി വർദ്ധിപ്പിക്കൽ, ബഹുമുഖ സഹകരണം തുടങ്ങിയ നമ്മുടെ സഹകരണത്തിന്റെ പ്രധാന മാനങ്ങളെക്കുറിച്ച് ചർച്ച ചെയ്യാൻ ഞങ്ങൾക്ക് അവസരം ലഭിച്ചു. ഇന്ന് ഇന്ത്യയിൽ എത്യോപ്യയ്ക്കായുള്ള വിദ്യാർത്ഥി സ്കോളർഷിപ്പുകൾ ഇരട്ടിയാക്കാൻ നാം തീരുമാനിച്ചതിൽ എനിക്ക് സന്തോഷമുണ്ട്.

ആദരണീയ വ്യക്തിത്വമേ,

പഹൽഗാം ഭീകരാക്രമണത്തിൽ അനുശോചനം രേഖപ്പെടുത്തിയതിനും ഭീകരതയ്‌ക്കെതിരായ നമ്മുടെ പോരാട്ടത്തിൽ നിങ്ങൾ നൽകിയ പിന്തുണയ്ക്കും ഞാൻ ആത്മാർത്ഥമായി നന്ദി പറയുന്നു. ഭീകരതയ്‌ക്കെതിരായ ഈ പോരാട്ടത്തിൽ സൗഹൃദ രാജ്യങ്ങളുടെ ഐക്യദാർഢ്യം വളരെ അർത്ഥവത്താണ്. ഒരിക്കൽ കൂടി, എനിക്കും എന്റെ പ്രതിനിധി സംഘത്തിനും നൽകിയ മഹത്തായ സ്വീകരണത്തിന് ഞാൻ നിങ്ങളോട് എന്റെ ഹൃദയംഗമമായ നന്ദി അറിയിക്കുന്നു.

***