• ଆସାମରେ ପ୍ରାୟ ୧୫,୬୦୦ କୋଟି ଟଙ୍କାର ପ୍ରକଳ୍ପର ଉଦ୍‌ଘାଟନ ଏବଂ ଶିଳାନ୍ୟାସ କରିବେ ପ୍ରଧାନମନ୍ତ୍ରୀ
• ଗୌହାଟୀରେ ଲୋକପ୍ରିୟ ଗୋପୀନାଥ ବରଦୋଲୋଇ ଅର୍ନ୍ତଜାତୀୟ ବିମାନବନ୍ଦରର ନୂଆ ଟର୍ମିନାଲ ଭବନ ଉଦ୍‌ଘାଟନ କରିବେ ପ୍ରଧାନମନ୍ତ୍ରୀ
• ପ୍ରାୟ ୧.୪ ଲକ୍ଷ ବର୍ଗ ମିଟରରୁ ଅଧିକ ପରିବ୍ୟାପ୍ତ ଏହି ନୂତନ ଟର୍ମିନାଲ କୋଠାର ଯାତ୍ରୀ ପରିଚାଳନା କ୍ଷମତା ବାର୍ଷିକ ୧.୩ କୋଟି ରହିବ
• ନୂତନ ଟର୍ମିନାଲ କୋଠା “ବାଉଁଶ ଅର୍‌କିଡ୍‌” ଥିମ୍ ଅନ୍ତର୍ଗତ ଆସାମର ଜୈବ ବିବିଧତା ଏବଂ ସାଂସ୍କୃତିକ ଐତିହ୍ୟରୁ ପ୍ରେରିତ
• ଦିବ୍ରୁଗଡର ନାମରୂପରେ ଆସାମ ଭ୍ୟାଲି ଫର୍ଟିଲାଇଜର ଆଣ୍ଡ କେମିକାଲ କମ୍ପାନୀ ଲିମିଟେଡର ଆମୋନିଆ-ୟୁରିଆ ସାର ପ୍ରକଳ୍ପର ଭୂମିପୂଜନ କରିବେ ପ୍ରଧାନମନ୍ତ୍ରୀ
• ୧୦,୬୦୦ କୋଟିରୁ ଅଧିକ ନିବେଶ ସହିତ ନିର୍ମିତ ଏହି ପ୍ରକଳ୍ପ ଆସାମ ଏବଂ ପଡୋଶୀ ରାଜ୍ୟଗୁଡିକର ସାର ଆବଶ୍ୟକତା ପୂରଣ କରିବାରେ ସାହାଯ୍ୟ କରିବ ଏବଂ ଆମଦାନୀ ନିର୍ଭରଶୀଳତା କମାଇବ
• ଗୌହାଟୀର ବୋରାଗାଓଁରେ ଶହୀଦ ସ୍ମାରକ କ୍ଷେତ୍ରରେ ଶହୀଦମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଡିସେମ୍ବର ୨୦-୨୧ରେ ଆସାମ ଗସ୍ତ କରିବେ । ଡିସେମ୍ବର ୨୦, ପ୍ରାୟ ୩ଟା ସମୟରେ, ପ୍ରଧାନମନ୍ତ୍ରୀ ଗୌହାଟୀରେ ପହଞ୍ଚିବା ପରେ ଲୋକପ୍ରିୟ ଗୋପୀନାଥ ବରଦୋଲୋଇ ଅନ୍ତର୍ଜାତୀୟ ବିମାନ ବନ୍ଦରର ନୂତନ ର୍ଟମିନାଲ କୋଠାର ପରିଦର୍ଶନ ଏବଂ ଉଦ୍‌ଘାଟନ କରିବେ । ଏହି ଅବସରରେ ଉପସ୍ଥିତ ସମାବେଶକୁ ମଧ୍ୟ ସେ ସମ୍ବୋଧିତ କରିବେ।

ଡିସେମ୍ବର ୨୧, ସକାଳ ୯:୪୫ ସମୟରେ, ପ୍ରଧାନମନ୍ତ୍ରୀ ଗୌହାଟୀର ବୋରାଗାଓଁ ସ୍ଥିତ ଶହୀଦ ସ୍ମାରକ କ୍ଷେତ୍ରରେ ଶହୀଦମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବେ । ଏହା ପରେ, ସେ ଆସାମର ଦିବ୍ରୁଗଡ ଜିଲ୍ଲାର ନାମରୂପ ଯାତ୍ରା କରିବେ, ଯେଉଁଠାରେ ଆସାମ ଭ୍ୟାଲି ଫର୍ଟିଲାଇଜର ଆଣ୍ଡ କେମିକାଲ କମ୍ପାନୀ ଲିମିଟେଡର ଆମୋନିଆ-ୟୁରିଆ ପ୍ରକଳ୍ପ ପାଇଁ ଭୂମି ପୂଜନ ସହ ଉପସ୍ଥିତ ସମାବେଶକୁ ମଧ୍ୟ ସେ ସମ୍ବାଧିତ କରିବେ ।

ପ୍ରଧାନମନ୍ତ୍ରୀ ଗୌହାଟୀରେ ଲୋକପ୍ରିୟ ଗୋପୀନାଥ ବରଦୋଲୋଇ ଅର୍ନ୍ତଜାତୀୟ ବିମାନବନ୍ଦରର ନୂତନ ଟର୍ମିନାଲ ଭବନର ଉଦ୍‌ଘାଟନ କରିବେ, ଯାହା ଆସାମର ଯୋଗାଯୋଗ, ଆର୍ଥିକ ବିସ୍ତାର ଏବଂ ବିଶ୍ୱସ୍ତରୀୟ ସଂଯୋଗୀକରଣରେ ଏକ ପରିବର୍ତ୍ତନକାରୀ ଉପଲବ୍ଧି ହେବ ।

ପ୍ରାୟ ୧.୪ ଲକ୍ଷ ବର୍ଗ ମିଟର ଅଞ୍ଚଳରେ ବିସ୍ତାରିତ ନବନିର୍ମିତ ସମନ୍ୱିତ ନୂତନ ଟର୍ମିନାଲ ବିଲ୍ଡିଂକୁ ବାର୍ଷିକ ୧.୩ କୋଟି ଯାତ୍ରୀ ପରିଚାଳନା କ୍ଷମତା ଅନୁଯାୟୀ ଡିଜାଇନ କରାଯାଇଛି, ଯେଉଁଥିରେ ରନୱେ, ଏୟାରଫିଲ୍ଡ ସିଷ୍ଟମ, ଆପରନ ଏବଂ ଟ୍ୟାକ୍ସିୱେରେ ପ୍ରମୁଖ ଉନ୍ନତି ସାମିଲ ରହିଛି ।

ଭାରତର ପ୍ରଥମ ପ୍ରକୃତି-ବିଷୟ ସହିତ ଜଡିତ ଥିବା ଏହି ବିମାନବନ୍ଦର ଟର୍ମିନାଲ, ଆସାମର ଜୈବ ବିବିଧତା ଏବଂ ସାଂସ୍କୃତିକ ଐତିହ୍ୟ ଦ୍ୱାରା ପ୍ରେରିତ, ଯାହାର ଡିଜାଇନ “ବାଉଁଶ ଅର୍‌କିଡ” ଥିମ୍ ରହିଛି । ଏହି ଟର୍ମିନାଲରେ ଉତ୍ତର-ପୂର୍ବାଞ୍ଚଳରେ ଉତ୍ପନ୍ନ ହେଉଥିବା ପ୍ରାୟ ୧୪୦ ମେଟ୍ରିକ ଟନ ବାଉଁଶର ଅଗ୍ରଣୀ ଅଦ୍ଭୁତ ବ୍ୟବହାର କରାଯାଇଛି । ଏହା କାଜିରଙ୍ଗାରୁ ପ୍ରେରିତ ସବୁଜ ଭୂଦୃଶ୍ୟ, ଜାପି ମୋଟିଫ, ପ୍ରତିଷ୍ଠିତ ଗଣ୍ଡା ପ୍ରତୀକ ଏବଂ କୋପୋ ଫୁଲକୁ ପ୍ରତିଫଳିତ କରୁଥିବା ୫୭ ଅର୍‌କିଡ-ପ୍ରେରିତ ସ୍ତମ୍ଭ ଦ୍ୱାରା ପରିପୂର୍ଣ୍ଣ । ଏକ ଅନନ୍ୟ “ଆକାଶ ବନ” ଯାହା ପ୍ରାୟ ଏକ ଲକ୍ଷ ସ୍ଥାନୀୟ ଆଦିବାସୀ ପ୍ରଜାତିର ଗଛକୁ ନେଇ ନିର୍ମିତ, ଆଗମନକାରୀ ଯାତ୍ରୀମାନଙ୍କୁ ଏକ ଜଙ୍ଗଲ ପରି ଅଭିଜ୍ଞତା ପ୍ରଦାନ କରିଥାଏ ।

ଏହି ଟର୍ମିନାଲ ଯାତ୍ରୀମାନଙ୍କର ସୁବିଧା ଏବଂ ଡିଜିଟାଲ ନବାଚାରରେ ନୂତନ ମାନଦଣ୍ଡ ସ୍ଥାପନ କରେ । ଦ୍ରୁତ, ଅଣ-ଅନୁପ୍ରବେଶକାରୀ ସୁରକ୍ଷା ସ୍କ୍ରିନିଂ ପାଇଁ ଫୁଲ-ବଡି ସ୍କାନର, ଡିଜିଯାତ୍ରା-ସକ୍ଷମ ଯୋଗାଯୋଗବିହୀନ ଯାତ୍ରା, ସ୍ୱୟଂଚାଳିତ ବ୍ୟାଗେଜ ପରିଚାଳନା, ଦ୍ରୁତ-ଟ୍ରାକ ଇମିଗ୍ରେସନ ଏବଂ ଏଆଇ ଚାଳିତ ବିମାନବନ୍ଦର କାର୍ଯ୍ୟଗୁଡିକ ପରି ବୈଶିଷ୍ଟ୍ୟଗୁଡିକ ସୁଗମ, ସୁରକ୍ଷିତ ଏବଂ କୁଶଳ ଯାତ୍ରା ସୁନିଶ୍ଚିତ କରିଥାଏ ।

ନାମରୂପ ଅଭିମୁଖେ ଯାତ୍ରା କରିବା ପୂର୍ବରୁ ୨୧ ଡିସେମ୍ବର ସକାଳେ ପ୍ରଧାନମନ୍ତ୍ରୀ ଶହୀଦ ସ୍ମାରକ କ୍ଷେତ୍ର ମଧ୍ୟ ପରିଦର୍ଶନ କରିବେ ଏବଂ ଐତିହାସିକ ଆସାମ ଆନ୍ଦୋଳନର ଶହୀଦମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବେ । ଏହା ଛଅ ବର୍ଷ ଧରି ଚାଲିଆସିଥିବା ଏକ ଜନ ଆନ୍ଦୋଳନ ଥିଲା, ଯାହା ବିଦେଶୀମୁକ୍ତ ଆସାମ ଏବଂ ରାଜ୍ୟର ପରିଚୟର ସୁରକ୍ଷା ପାଇଁ ସାମୂହିକ ସଂକଳ୍ପକୁ ମୂର୍ତ୍ତିମନ୍ତ କରିଥିଲା ।

ଦିନରେ ପରେ, ପ୍ରଧାନମନ୍ତ୍ରୀ ଆସାମର ଦିବ୍ରୁଗଡ ସ୍ଥିତ ନାମରୂପରେ ବ୍ରହ୍ମପୁତ୍ର ଭ୍ୟାଲି ଫର୍ଟିଲାଇଜର କର୍ପୋରେସନ ଲିମିଟେଡ (ବିଭିଏଫସିଏଲ)ର ବର୍ତ୍ତମାନ ପରିସରରେ ନୂତନ ବ୍ରାଉନଫିଲ୍ଡ  ଆମୋନିଆ-ୟୁରିଆ ସାର ପ୍ରକଳ୍ପର ଭୂମିପୂଜନ କରିବେ ।

     ପ୍ରଧାନମନ୍ତ୍ରୀଙ୍କ କୃଷକ କଲ୍ୟାଣ ଦୃଷ୍ଟିକୋଣକୁ ଆଗକୁ ବଢ଼ାଇ, ୧୦,୬୦୦ କୋଟି ଟଙ୍କାରୁ ଅଧିକ ନିବେଶ ସହିତ ଏହି ପ୍ରକଳ୍ପ ଆସାମ ଏବଂ ପଡୋଶୀ ରାଜ୍ୟଗୁଡିକର ସାର ଆବଶ୍ୟକତା ପୂରଣ କରିବ। ଏହା ସହିତ ଆମଦାନୀ ନିର୍ଭରଶୀଳତା ହ୍ରାସ, ପର୍ଯ୍ୟାପ୍ତ ନିଯୁକ୍ତି ସୁଯୋଗ ସୃଷ୍ଟି ଏବଂ ଆଞ୍ଚଳିକ ଆର୍ଥିକ ବିକାଶକୁ ତ୍ୱରାନ୍ୱିତ କରିବ । ଏହା ଶିଳ୍ପ ପୁନରୁଦ୍ଧାର ଏବଂ କୃଷକ କଲ୍ୟାଣର ମୂଳଦୁଆ ଅଟେ ।

SR