ঙসি দিশেম্বর ১২,২০২৫ দা, মনিপুরগী সেনাপতিদা পাংথোকপা মীয়ামগী থৌরম অমদা ভারতকী রাষ্ট্রপতি শ্রীমতি দ্রৌপতি মুর্মু শরুক য়াখ্রে। মহাক্না থৌরম অদুদা তোঙান তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং শঙ্গাখ্রে।

থৌরম অদুদা তিনখিবা মীয়ামদা ৱা ঙাংবদা, রাষ্ট্রপতিনা হায়খি মদুদি মনিপুরগী ত্রাইবেল ফুরুপশিংগী ইকায়খুম্নবা, সেকুরিতি অমসুং চাউখৎনবগী খুদোংচাবশিং ফংহনবা অমসুং লৈবাক অসিগী চাউখৎপদা মখোয় মপুংফানা শরুক য়াহনবা হায়বসি লৈবাক্কী মরুওইবা অমনি। মনিপুরদা চাউখৎ-থৌরাংগী থবক অসিনা মীওই খুদিংমক কোনশিন্নবা অমসুং তুংকোইনা চৎনবা য়ানবা ভারত সরকারনা লুচিংবশিং, সিবিল সোসাইতি অমসুং ফুরুপশিংগা নকশিন্ননা থবক তৌমিন্নরি।

রাষ্ট্রপতিনা হায়খি মদুদি লৈবাক অসিগী কাচিন-কোয়া শীনবা থুংনা চাউখৎনবা ভারত সরকারনা থবক পায়খৎলে। মনুং হুঞ্জিনবা ত্রাইবেলগী মফমশিং চাউখৎনবা সরকারনা অখন্নবা মীৎয়েং চঙলে। হৌখিবা চহি খর অসিদা, নেসনেল হায়ৱেশিং অমসুং খুঙ্গংগী লম্বীশিং, অনা-লায়য়েং, লাইরিক-লাইশু, থক্নবা ঈশিং অমসুং মৈ ফংহনবা য়াওনা, লম্বী অমসুং থোঙগুম্বা হিরমশিংদা শেন থাদবদগী মনিপুরগী চীঙগী জিলাশিং কান্নবশিং ফংলে। হিংনবগী লম্বী পীনবা থৌরমশিং হায়বদি স্কিল ত্রেনিং, সেল্ফ হেল্প গ্রুপশিং অমসুং বন ধনগুম্বা থৌরমশিংনা মীয়ামগী পুন্সিগী থাক ৱাংখৎহল্লে। মখোয়গী তোপ-তোপ্পা শক্তম অমসুং চৎনবীশিং ইকায়খুম্নবগা লোয়ননা ত্রাইবেল ফুরুপশিং চাউখৎনবা সরকারনা পায়খৎলিবা থবকশিংগী মমি অমা হায়রিবা থবকশিং অসিদা তারে।

রাষ্ট্রপতিনা হায়খি রাজ্য অসিগী খেন্নবশিং, রাজ্য অসিগী নাৎ, লোল অমসুং চৎনবীশিংনা মনিপুরগী মপাঙ্গলনি। ফজরবা লমদম অমগী নাকল অনিগুম্না, চীঙ অমসুং তম্পাক মতম পুম্নমক্ত অমনা অমগী মতেং পাংনরি। শান্তি লৈনবা, ৱাখল তানবা অমসুং মহৌশাগী ফিবমদা অমুক হঞ্জিল্লক্নবা থবকশিংদা মখা তানা ফুরুপ খুদিংমক্না শৌগৎকদবনি। মনিপুর মীয়ামগী অপাম্বশিং ভারত সরকারনা খঙলে। লমদম অসিগী মীয়াম য়াওনা, মনিপুরগী মীয়াম চাউখৎনবা অমসুং নুংঙাই-য়াইফনবা ভারত সরকারনা থবক পায়খৎলে। শান্তি লৈবা অমসুং নুংঙাই-য়াইফবা মনিপুর অমগীদমক ঐখোয় মখা তানা পুন্না থবক তৌমিন্নগদবনি।

থৌরম অসিগী মমাঙদা, ইম্ফালগী নুপী লাল কমপ্লেক্সতা মনিপুরগী থৌনা ফরবী নুপীশিংদা রাষ্ট্রপতিনা ইকায়খুম্নবা উৎখ্রে। অকনবা থৌনাগা লোয়ননা বৃতিস অমসুং ফম্নাইবশিংগী লৈঙাক মায়োক্নখিবা মনিপুরগী নুপীশিংগী কৎথোকপা ইকায়খুম্নবা উৎপা ওইনা নুপী লাল কমপ্লেক্স লৈরি।

***