Ka Tnad Civil Aviation ka la shim ïa ki lad ki lynti kiba kyrkieh ban weng ïa ka jingthut kaba dang ïai bteng ha kaba iadei bad ka jingpynher ia ki liengsuiñ, khamtam eh ïa ki liengsuiñ jong ka Indigo Airlines. Ia ki hukum Flight Duty Time Limitations (FDTL) jong ka DGCA la pynsangeh noh bad kane kan treikam mardor. Khlem da pynthut ia ka jingshngain ha ka liengsuin, ia kane ka rai la shim tang na ka bynta ka jingmyntoi jong ki nongleit nongwan, khamtam ki riew tymmen, ki samla pule, ki nongpang, bad kiwei kiwei kiba shaniah ha ka jingleit jingwan da ka liengsuin ha ka por kaba biang na ka bynta ki jingdonkam ba kongsan.

Nalor kane, la bthah katto katne ki lad treikam ban pynthikna ba ïa ki jingshakri kaba iadei bad ka jingpynher liengsuiñ ba man ka sngi yn bteng biang kloi bad ba ka jingeh kaba wanrah ïa ki nongleit nongwan kan duna shibun. Katkum ka jingpyntreikam mardor ïa kine ki jingbthah, ngi khmih lynti ba ki jingpynher liengsuin kin sdang ban ryntih biang bad kan long biang kumba ju long naduh lashai ka sngi. Ngi khmih lynti ba ka jingpynbha pura ia ki jingshakri kan sa urlong hapoh ki lai sngi ban wan.

Ban kyrshan ïa ki nongleit nongwan ha kane ka por, la bthah ïa ki kompeni liengsuiñ ban ai ïa ki jingpynbna ba man ka por bad kiba thikna lyngba ki lad ai jingtip online, kaba iarap ïa ki nongleit nongwan ban peit bniah ïa ka jinglong jingman jong ka jingpynher liengsuiñ na ki ïing ki sem jong ki. Lada don kano kano ka jingpynsangeh ïa ki liengsuiñ, ki kompeni liengsuiñ kin pynphai biang ïa ka pisa baroh, khlem da donkam ïa ki nongleit nongwan ban pan kano kano ka jingkyrpad. Ki nongleit nongwan kiba sahkut namar ka jingpynslem kin ioh ia ka jaka sah ha ki hotel ba la pynbeit da ki kompeni liengsuiñ.

Yn phaikhmat kyrpang ia ki riew tymmen bad kiba don jingduna ha ki dkhot met. Kin ioh pyndonkam ia ki lounge bad kin ioh baroh ki jingiarap ban pynthikna ba ka jingleit jingwan jong ki kan long kaba suk. Shuh shuh, yn ai ia ki jingbam bad ki jingshakri ba kongsan sha baroh ki nongleit nongwan kiba shah ktah na ka jingslem ki liengsuiñ.

Ka Tnad Civil Aviation ka la buh ïa ka Control Room kaba treikam baroh arphew saw kynta (011-24610843, 011-24693963, 011-24693963, 096503-91859) kaba buddien ïa ka jinglong jingman kaba ha ka por ban pynthikna ka jingpynbeit sted ïa ki jingeh, ka jingiatreilang, bad ka jingpynbeit kloi ia ki jingeh haba ki mih.

Yn pynlong ia ka jingtohkit ha ka kyrdan ba ha khlieh duh

Ka sorkar India ka la rai ban thung ia ka jingtohkit kaba ha khlieh duh halor kane ka jingpynthut. Ka jingtohkit kan bishar bniah ia kaei kaba la jia ha Indigo, mano ba dei ban shim ia ka jingbahkhlieh bad lada dei ban pynshitom, bad kan ai jingmut ia ki lad ki lynti ban iada na ki jingpynthut kiba kum kine ha ki por ban wan, ban pynthikna ba ki nongleit nongwan kin ym iakynduh biang ia kum kine ki jingeh.

Ka Jingpynskhem jong ngi sha ka ri

Ka Sorkar Pdeng ka long kaba husiar bha ia ki jingeh kiba ki nongleit nongwan da ki liengsuin ki iakynduh bad ka dang iai bteng ban iamir jingmut bad ki kompeni liengsuin bad baroh kiba don bynta ha kane ka kam. Ia kawei pa kawei ka sienjam kaba donkam, kynthup ia ki jingpynjem ia ki kyndon katkum ba la shah da ka DGCA, la shim ban pynbeit ia ka jingtreikam jong ki liengsuin bad ban pynduna ia ka jingeh jong ki paidbah ha ka por kaba kloi tam.

Ka jingpynbiang ia ki nongleit nongwan, ka jingshngain, bad ka jingsuk ka dang iai bteng ban long ka jingthmu ba kongsan tam jong ka Sorkar India.

*****