Ka phlim Shape of Momos, kaba dei ka phlim kaba pyni nyngkong eh jong ka nongshna phlim na Sikkim, ka Tribeny Rai, la pyni hapoh ka bynta jong ka Indian Panorama, ha ka International Film Festival of India (IFFI) kaba 56 ha ka sngi Palei, 27 tarik u Naiwieng, 2025. Hadien ka jingpyni ia ka phlim, ka Director Tribeny Rai, Producer bad Co-writer Kislay, bad ka actor Gaumaya Gurung ki la iakren ha ka jingialang bad ki lad pathai khubor kaba la pynlong ha ka IFFI.

Ka samla pule barim jong ka Satyajit Ray Film and Television Institute (SRFTI), Kolkata, ka Tribeny Rai ka pawnam na ka bynta ka jingwad bniah jong ka ïa ki jingshem jong ki kynthei hapoh ki bynta jong ka kolshor bad ka jinglong ka jaka jong ki lum Himalaya shaphang Mihngi. Ka Shape of Momos, ka phlim ba nyngkong jong ka, kaba dei ka khana kaba don tynrai ha ka kolshor jong ka Sikkim, ka bteng ïa kane ka jingïaid lynti kaba don jingmut.

Haba kren shaphang ka jingshna ia ka phlim ba nyngkong jong ka, ka Tribeny ka la batai ba ka rukom shna ka long kaba eh bad kaba pynhun bha. Ha ka por ba ka kam shna phlim ha Sikkim ka dang don ha ka kyrdan kaba dang sdang, ka jingshna phlim ha kane ka thaiñ ka wan ryngkat bad ki jingduna ha ka liang ka jingdon jingem — wat ki jingpynbeit ïa ki camera ba khlain donkam ban wanrah na ki nongbah kum ka Kolkata, Kathmandu ne Guwahati. Wat hapdeng kine ki jingeh, ka Shape of Momos ka la poi sha ki tamasa ba bun jong ka pyrthei, kynthup ïa ka Busan, ka jingïshem kaba ka la batai kum ka “jingsngewhun”.

Ka Tribeny Rai ka la ïathuh ba ia ka kyrteng jong ka phlim la shim na ka jingdon jong ki momo ha baroh ki bynta jong ka kolshor ha Sikkim — ka jingbam ba la ïasam ha baroh ki por, naduh ki jingkhawai shongkurim haduh ki jingjia iap briew. “Ka pyni ia ka jingim bad jingsngew ba man ka sngi jong ki briew jong nga,” ka la ong.

Ki Sur shimet, ka jingthmu ba iasam lang

U Producer bad co-writer u Kislay, uba la pyndep ruh ïa ka jingpule na ka skul phlim, u la ïaroh ïa ka jingshisha kaba la buh ha ka jingthoh ba nyngkong jong ka Tribeny, kaba la pynshong nongrim ha ki jingshem shimet jong ka. U la ban jur ba ki phlim na ki thain kum ka Sikkim ki dang duna bha ka jingmihkhmat, lane la pyni lyngba ki jingmut kiba rit ha ki phlim ba pawnam jong ka ri India. “Ki khana kum kine ki donkam ban paw shabar,” u la ong, da kaba bynrap ba ka jingshah jied jong ki ha IFFI ka sngew kaba “pynhun shisha” — ka jingangnud kaba la don naduh ki sngi ba ki dang long ki samla pule ha ka kam shna phlim.

Ka jingpeit jong ki kynthei ha ka phlim ktien Nepali

Ka aktor lamkhmat ka Gaumaya Gurung ka la pynpaw ïa ka jingkmen jong ka ban long shi bynta jong ka phlim ba la ïathuh na ka liang jong ki kynthei — kaei kaei kaba ka shem ba ka long kaba duna bha ha ka kam ak phlim ha Nepal, wat la ka la don san snem ka jingshemphang. Ka la ai khublei ïa ka jingpynïasoh jong ka phlim bad ki rukom treikam kiba ïadei bad ka jingmut jingpyrkhat ha kaba pyni ïa ka nongrim jong u nongak.

Ki jingeh ha ka jingsam bad ka jingtei ia ka imlang sahlang

Ka kynhun ka la pdiang ia ki jingeh ha kaba sam bad pyniaid iew ia ki phlim shimet na ka thain. La pynkhreh ban pyllait ia ka phlim Shape of Momos ha Sikkim, North Bengal, ki jaka jong ka Jylla Meghalaya bad Assam, bad ha Dehradun — ki jaka kiba bun ki nongpeitkai kiba kren da ka ktien Nepali. Nalor kata, ka Tribeny ka la pynpaw ba kane ka phlim kan ïoh ruh ïa ka jingpyllait ha Italy.

Ka la ban jur ruh ïa ka jingdonkam kaba dang mih na ka bynta ka kynhun ba kyrshan ia ki nongshna phlim shimet kiba don kajuh ka jingmut ha Sikkim, ban weng ïa ki jingeh ha ka jingsam bad ka jingïohi.

U Mawmer na ka bynta ka kolshor shna phlim ba dang kiew jong ka Sikkim

Ka Tribeny Rai, kaba ithuh kum ka nongshna phlim kynthei kaba nyngkong eh na Sikkim, ka la pyni ia ka jingmih suki jong ka kolshor shna phlim ha ka jylla. Da ka jingduna ka lad ban ioh, ki jingdon jingem, ka kam shna phlim ka dang long ka kam kaba eh. Hynrei, ka ïohi ïa ka jingkiew ka jingsngewtynnad hapdeng ki samla pule phlim jong ka Sikkim, kiba bun na ki, ki la pynkhihwin ïa ka jingpyni ïa ka jingim ba man la ka sngi ha ka Shape of Momos.

Ha ki phlim Hindi ba pawnam bad wat ha ki katto katne ki web series, ïa ka thaiñ Shatei Lammihngi la ju kyntait ne pyni lyngba ki jingïathuhkhana kiba ïadei bad u drok, ka Tribeny Rai ka la peit bniah bad bynrap, “Nga la kwah ban ïathuh ïa ka khana ha kaba ki briew ba man la ka sngi na Sikkim ki shim ïa ka jaka pdeng — ha kaba ngi long ki riewshlur jong la ki jong ki khana jong ngi.”

Peit ia ka jingialang ba pura bad ki lad pathai khubor:

Shaphang ka IFFI

La sdang ha u snem 1952, ka International Film Festival of India (IFFI) ka ieng skhem kum ka jingrakhe kaba la rim bad kaba heh tam ha South Asia ha ka kam ba iadei bad ki phlim. La pynlong lang da ka National Film Development Corporation (NFDC), ka Tnad Information and Broadcasting, Sorkar india bad ka Entertainment Society of Goa (ESG), ka Sorkar Jylla Goa,kane ka tamasa ka la nangroi sha ka jaka ba don bor ha ka pyrthei ha ka kam pynmih phlim—ha kaba ki phlim hyndai ba la pynthymmai ki ïakynduh ïa ki jingpyrshang ba shlur bad ki briew kiba la pynskhem ialade ha kane ka kam ki iakynduh ia kito kiba dang sdang ha kane ka kam. Kaba pynlong ïa ka IFFI ban tyngshaiñ shisha ka dei ka jingbun ki bynta—ki jingïakob ha kylleng ka pyrthei, ki jingpyni ïa ka kolshor, ki masterclass, ki jingai burom, bad ka WAVES Film Bazaar ba shitrhem bha, ha kaba ki jingmut, ki jingïateh bad ki jingïatreilang ki kiew shaphrang. Ha ka jingpynlong ha rud duriaw jong ka Goa naduh ka 20–28 tarik u Naiwieng, ka bynta kaba 56 kan don ki bynta jong ki ktien bapher bapher , ki jait phlim bapher bapher, ki jingsaindur thymmai, bad ki sur—ka jingrakhe ïa ka jingtbit ka India ha ka kam saindur jong ka pyrthei.

Ban ioh jingtip shuh shuh, shon ha ka:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel:  https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *