#IFFIWood, 24 नोव्‍हेंबर 2025

आज इफ्फीत दिवे मंदावले, मनां उगडलीं आनी सृजनशीलता वाऱ्यांत नाचली, कारण थंय गर्दी ज्या गजाली खातीर जमिल्ली ती सदच्या सारखी कार्यशाळा नासून एक सिनेमॅटिक पॉवर-बूस्टच आशिल्ली. राजू हिरानी भितर सरना फुडेच कला अकादमी सभाघरांत ब्लॉकबस्टर शुक्रारा आसता तसो उत्साह उफाळून आयलो. ताचें उलोवण जातकच  लेखक बेगी बेगीन  नोंदी घेताले, संपादक तकली हालयताले आनी सिनेमोगी प्रेरना आनी अजापांचे मजगती तरंगताले.

एका यशस्वी आनी नामनेच्या चित्रपट निर्मात्यापैकी एकाच्यो प्रभावी ओळी चित्रपट मोगींच्या मना काळजांत कोरांतल्यो. “लिखाण म्हळ्यार कल्पिलेली भावना, संपादन म्हळ्यार अणभवलेली भावना. पयलो मसुदो लेखकाचो, निमाणो संपादकाचो. विशय हो सिनेमाचो जीव, जाल्यार काणयेंतलो संघर्श जणू प्राणवायू.”

“अ फिल्म इज मेड ऑन टू टेबल्स-रायटिंग अँड एडिटिंग: अ पर्सपेक्टिव्ह” ह्या विशयाचेर मास्टरक्लास-कम-वर्कशॉपांत उलयतना हिराणीन बरोवपाच्या  प्रक्रियेची सोबीतकाय ह्या काव्यात्मक शैलीत मांडली:“बरप ही सपनां पळोवपाची सुवात.” लेखकाक अमर्यादित स्वातंत्र्य कशें मेळटा हाचें वर्णन ताणें केलें- अनंत आकाश,परिपूर्ण सुर्योदय,अचूक कलाकार, कसलीच बजेट मर्यादा ना, कसलेच बंधन ना. पूण हे कल्पित दृश्य संपादकाच्या मेजार पावतात त्याच खिणाक, वास्तव तांचें रुपांतर अपरिहार्यपणान करता. हिराणीन नदरेक हाडलें, "फिल्माची सुरवात, फकत पात्राक खरेंच कितें तरी जाय तेन्नाच जाता. ती इत्सा कथानकाचें काळीज जाता. “आनी संघर्श" ताणें म्हळें "जणू प्राणवायू-त्या  बगर कांयच उस्वास घेना."

ताणें लेखकांक आपल्यो कथा प्रत्यक्ष अणभवांचेर आदारून करपाक प्रोत्साहन दिलें. "एक बरो लेखक जिणेंतल्या घडणुकां वयल्यान प्रेरणा घेता. खऱ्या अणभवांक लागून कथा अविश्वसनीय, अद्वितीय आनी खोलायेन भावनीक जातात," अशें तांणी सांगलें.

आपल्या पयल्या मोगा विशीं-संपादना विशीं उमेदीन उलयतना हिरानीन संपादकाच्या खोल पूण लिपिल्ले सामर्थ्याची झलक दाखयली. “जेन्ना चित्रफीत संपादनाच्या टेबलाचेर पावता,” तांणी म्हळें, “तेन्ना सगळे बदलता. संपादक कथेक नव्यान आकार दिता. तो अनकथित नायक. ताचे काम अदृश्य आसता, पुण तेच चित्रपटाक एकठांय दवरता,” अशें तांणी नमूद केले.

संपादकाच्या साधनसामग्री विशीं उलयतना तांणी स्पश्ट केलें की संपादनाचो युनिट म्हळ्यार शॉट, आनी एक शॉट वेगळ्या संदर्भांत दवरल्यार ताचो अर्थ पुरायपणान बदलूं येता. “इतलें शक्तिशाली,” ताणें हांसून सांगलें, “एक संपादक एक कथा 180 अंश घुंवडावंक शकता.”

तशेंच विरोधकांची, मुखेल पात्रां इतलीच बळिश्ट भुमिका आसूंक जाय हाचेर हिराणीन भर दिलो. "दरेक पात्र आपलें मत बरोबर आसा अशें मानता. ताका लागून कथेक उर्जा मेळटा. सत्यांचो हो संघर्श, दृष्टीकोनांतलो हो ताण, हें काणयेक जिवीत दिता" अशें तांणी स्पश्ट केलें.

ह्या मनभुलोवपी संवादांत वाटेकार जावन नामनेचो पटकथा लेखक अभिजात जोशीन, कथाकथनांत वास्तव जिणेंतल्या यादींच्या असामान्य शक्तीचेर चिंतन केलें. कांय खीण-हास्यपूर्ण आसूं, धक्को दिवपी आसूं-दशकां सावन आमच्या मनांत कोरांतून उरतात, आनी तांची प्रामाणीकता सदांच कलात्मक कल्पनां परस चड प्रभावशाली आसता अशें ताणें स्पश्ट केलें.

उपरांत अश्यो जायत्यो यादीं 3 इडियट्सांत आस्पावित जाल्यो,जशें फामाद इलेक्ट्रीक-शॉक गॅग आनी जायते सूक्ष्म पात्र खाशेलपणा, जे ताणें वर्सांन वर्स  निरीक्षण केल्ल्या लोकां कडल्यान घेतिल्ले.

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, Click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel:  https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/मोनाली प्रभू/दर्शना राणे | IFFI 56