#IFFIWood, 23 नोव्‍हेंबर 2025

भारतीय आंतरराष्ट्रीय चित्रपट महोत्सवांत आयज वेगवेगळ्या संस्कृताय आनी जॉनरा विशीं उलोवप जालें जंय तीन आकर्शक चित्रपटांचे कलाकार आनी वांगड्यांनी एकठांय येवन परिचय, भावना आनी विनोदान भरिल्ल्या पत्रकार परिशदेत संवाद सादलो . एके आकर्शक आदान-प्रदानांत ‘निलगिरीस: अ शेअर्ड वाइल्डरनेस्,’ ‘मुक्काम पोस्ट बोंबिलवाडी,’ आनी ‘सिकार’ ह्या सिनेमाचे निर्मात्यांनी तांच्या चित्रपटांत विणलेले गिरेस्त आनी विंगड विंगड विशयांचेर भाष्य केले. 

‘सिकार’:  श्रद्धांजली, एक प्रवास, आनी आसाम खातीर पयलोच सिनेमा

‘सिकार’ दिग्दर्शक देबांगकर बोरगोहेन हांणी हालींच संवसाराक अंतरल्ल्या ह्या सिनेमाचो मुखेल अभिनेतो संगीतकार जुबीन गर्ग हाची याद करून सत्राची सुरवात भावनीक पद्धतीन केली. सुमार दोन दशकां मेरेन जुबीन गर्ग वांगडा काम केल्ल्या देबांगकरान मुळांतूच फकत संगीता खातीर जुबीना कडेन कसो संपर्क सादलो हाचो उगडास केलो. “जुबीनान ही काणी आयकली आनी आपल्याक अभिनय करपाची इत्सा' आसा अशे  म्हळें,” अशे ताणें हांसून सांगलें.  “आमच्या सांगाता आसतना प्रदर्शीत जाल्लो हो ताचो निमाणो सिनेमा, अशेंय तांणी सांगले. तो गेल्याक 64 दीस जाले. आयज हांगा आसल्यार ताका खोशी जातली आसली अशेंय तांणी म्हळें.”

तशेंच देबांगकरान ‘सिकार’ ह्या पयल्या आसामी चित्रपटाच्या असामान्य निर्मिती प्रवासाचेरय विचार मांडले, जाचे परदेशांत व्हड प्रमाणांत शुटींग जाला आनी सुमार 70% चित्रपट लंडनांत चित्रीत जाला. चडशी टीम प्रवास करूंक शकनाशिल्ल्यान दिग्दर्शक गुवाहाटी सावन पयसुल्ल्यान काम करतालो, चड करून “मच्छरदाणी खाला बसून” लायव्हस्ट्रीमांतल्यान शूटिंगाक मार्गदर्शन करतालो, अशे तांणी सांगल्यार सगळ्यांकच हासपाक आयले.

इफ्फींत ह्या सिनेमाक मेळिल्ल्या व्हड रिस्पॉन्स तांणी अधोरेखीत केलो. "हाऊसफुल शो आनी देशांतल्या वेगवेगळ्या वाठारांतले लोक ताची तारीफ़ करतात तें पळोवन म्हाका खोशी जाली. म्हाका स्वबळ आनी स्वाभिमानान भरिल्ल्या आसामाचें खरे चित्रण करपाची इत्सा आसा अशें तांणी सांगलें.

प्रादेशिक चित्रपटां खातीर ओटीटी दृश्टीकोन संबंदींच्या हुस्क्याचेर देबांगकर हांणी नदरेक हाडलें की ह्या प्लॅटफॉर्मांनी संवसारीक पावंड्याचेर प्रवेश वाडयला, पूण चडशे फावट  प्रादेशिक सिनेमाक फावो तो स्पॉटलाइट दिवपाक ते अपेसी थारतात.

‘निलगिरीस: अ शेअर्ड वाइल्डरनेस्’ हो चित्रपट जिवंत, श्वास घेणापी जैवमंडळाचो वेध घेता 

‘सिकार’ चित्रपटान इमोशन दाखयले जाल्यार ‘निलगिरीस – अ शेअर्ड वाइल्डरनेस्’ ह्या पंगडान इमोशनआश्चर्य दाखयले. सहाय्यक निर्मातो आदर्श एन सी,  अब्ज वर्स लागून आकार घेतिल्ल्या प्रदेशांतल्या दुर्लक्षीत जातींचेर आदारून 8K आनी 12Kत चित्रीत केल्ली वाइल्डलाइफ डॉक्यूमेंट्री तयार करपाक जाय आशिल्ल्या संयमाविशी उलयलो. "आमच्या सिनेमाचे कलाकार म्हळ्यार वन्यजीव. ते वेळार पावना. रिटेक नात," अशें सांगून तांणी केन्ना केन्ना एकूच शॉट घेवपाक तीन म्हयने कशे लागतात  हाचेर भर दिलो.

तशेंच ही  डॉक्युमेंटरी सहअस्तित्वाचोय सोद आसा अशें तांणी सांगलें. “आमी आमच्याच आंगणांत वन्यजीव कशे सामायिक करतात हे विशी डॉक्युमेंटरी आसा. आमी लोकांच्या घरां रावून, शेजारी रावपी  प्रजाती सोदल्यो अशेंय तांणी सांगले. 

पंगड वांगडी श्री हर्ष हांणी अशा तरेच्या सिनेमा निर्मितीच्या अप्रत्याशित स्वरुपाचें वर्णन केलें: "आमी कितें चित्रीत करपाचे आसात हाचो आमकां कसलोच तर्क नाशिल्लो. जनावरां खंय आसात तें आमकां खबर नाशिल्लें. कॅमेऱ्या फाटल्यान एक व्हडलो संशोधन पंगड आसा जो आमकां रानवटी जनावरांच्या हालचाली विशीं अपडेट करता. निमाणें तुमी तयार करतात त्या काणयेची जाणविकाय जाता" अशे तांणी आपले अणभव उक्तायले. 

जागतीक डॉक्युमेंटरी दिग्गजांनी ह्या सिनेमाचेर प्रभाव घालो काय अशें विचारतकच आदर्शान म्हणलें: “’निलगिरीस’ हो मेक इन इंडिया फिल्म.ताचे फाटलो दरेक मनीस भारतीय.” हर्ष हांणी  म्हणलें, "आमी जागतीक तंत्रगिन्यान आनी प्रतिभेंतल्यान शिकतात, आनी तें आमी भारतीय वेवस्थेंत हाडटात. केन्ना तरी आमी जागतीक उद्देगा खातीर आदर्श जावपाची आस्त बाळगितात."

ओटीटीचेर ह्या चित्रपटाची बरीच तारीफ जाल्या तरी प्रेक्षकांनी  व्हडल्या पडद्याचेर ‘निलगिरीस ’चो अणभव घेवचो अशें पंगडाक दिसता अशेंय आदर्श हांणी सांगलें. “बरीच डॉक्युमेंटरी सिनेमाघरांनी पावना, पूण ‘निलगिरी’ची धांव बरी आशिल्ली, ओटीटी म्हत्वाची, पूण उपरांत,” अशे तांणी सांगलें.

‘मुक्काम पोस्ट बोंबिलवाडी’: कॉमेडी आनी कॉलोनीयल -युग अराजकतेचो संगम 

‘‘मुक्काम पोस्ट बोंबिलवाडी' ह्या पंगडान आपल्या विनोद आनी इतिहास मेळाच्या काणयेंन पुराय सभाघराक हासयले . दिग्दर्शक परेश मोकाशी आनी निर्मातो भारत शितोले हांणी आपल्या मूळ रंगमंचावेल्या नाटकाचे १९४२ वर्सा घडिल्ल्या चित्रपटांत रुपांतर करपाचें आव्हान आनी खोस हांचेर भासाभास केली, जंय दर्यादेगेवेलो एक शांत महाराष्ट्रीय  गांव दुसऱ्या म्हाझुजाच्या स्वातंत्र्य संघर्शांत आनी अराजकांत गुंथिल्लो दिसता.

गंभीर आनी विनोदी पार्श्वभूमी मिश्रणा विशीं परेशान म्हणलें, “गरिबी सारकिल्ल्या विशयांचेर व्हड व्हड विनोदी चित्रपट जाल्यांत.” विनोद सत्याक दुबळे करिना, जाल्यार तें चड बरें तरेन उक्तें करता अशे ताणें फुडें सांगलें.”

प्रादेशिक सिनेमाक आकार दिवपी ओटीटीचेर प्रस्न विचारतना परेशान हो प्रवास घरांतल्यान सुरू जाता अशें स्पष्ट केले. “प्रादेशिक चित्रपटांक जागतीक जावचे पयलीं थळाव्या प्रेक्षकां कडल्यान आदार मेळपाक जाय.” निर्मातो भारत शितोले हांणी ही भावना प्रतिध्वनीत करून ओटीटीन संद वाडयल्या तरी प्रादेशिक चित्रपटांक अजूनय ह्या प्लॅटफॉर्मांचेर चड समान दृश्टीकोन मेळपाक जाय अशें सांगलें.

नीलगिरीच्या नैसर्गिक परिसंस्थांसावन बोंबिलवाडीच्या उमेदीच्या उल्लासांतल्यान, खंडांतल्यान पातळिल्ल्या आसामी जिविताच्या भावनीक प्रवाहामेरेन भारताच्या सिनेमा विविधतायेचो व्यापक दृष्टिकोन ह्या पत्रकार परिशदेंत दिश्टी पडलो. दरेका पंगडान संवादांत प्रामाणीकपण, आपलेपण आनी सृजनशील स्पश्टताय हाडून, इफ्फी कितें मनयता हाची याद करून दिवपी सत्र उबें केले: एक सिनेमा परिसंस्था जंय दरेक कथा म्हत्वाची, दरेक प्रदेशाक आवाज मेळटा आनी दरेक फिल्म निर्मात्याक आपलो स्वताचो संवसार मेळटा.

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel:  https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/उत्कर्षा भुस्कुटे/दर्शना राणे | IFFI 56