#IFFIWood, 22 नोव्‍हेंबर 2025

56व्या भारतीय आंतरराष्ट्रीय चित्रपट महोत्सवांत, 'एन युरेशियन फेस्टिवल फ्रंटियर: एआयच्या संवसारांत सिनेमाची नवी व्याख्या करपाची गरज आसा काय ?' ह्या विशयावेल्या द इन कन्वर्सेशन सत्रात संवसारांतली दोन प्रतिष्ठित महोत्सव व्यक्तिमत्त्व एकठांय आयली : ट्रिशिया टटल, बर्लिन आंतरराष्ट्रीय चित्रपट महोत्सवाची महोत्सव संचालक आनी शेखर कपूर, इफ्फी महोत्सव संचालक. शेखर कपूरान ह्या सत्राचें  सूत्रसंचालन केलें तरी आदान-प्रदान एका द्विपक्षीय संवादा सारके जाले जांतूत  एआय, सृजनशीलताय आनी चित्रपट महोत्सवांच्या विकसीत जावपी फुडाराचेर चर्चा जाली.

हे सत्र उर्बेभरीत, वैयक्तीक टिप्पणीन सुरू जालें जंय शेखर कपूरान महोत्सवात प्लास्टीक बाटल्यांचो वापर जावंक नाशिल्ल्याखातीर परबीं भेटयली, जाल्यार ट्रिशिया टटल हांणी 1998 वर्साचो एक खीण याद केलो, जेन्ना तिणें एक तरणाटी फिल्म स्कूल पदवीधर म्हणून शेखर कपूराच्या एलिझाबेथ फिल्मावेल्या त्यांच्या  मास्टरक्लासात वांटो घेतलेलो. हे पुराय वर्तुळात घडटा अशे म्हणत तांणी भूतकाळातल्या अणभवांविशी आनी सिनेमाच्या येवपी फुडाराचेर मत मांडले.  

डिजिटल साधनां आसूं वा एआय खंयचेंय तंत्रगिन्यान आयलें तरी मनशाची कल्पनाशक्त तिगून उरता म्हणून सिनेमा तिगून उरता अशें पुराय सत्रांत शेखर कपूर हांणी परत परत भर दिलो. निमाणें खंयचेंय नवें साधन दिग्दर्शन करपी निर्मातोच आसता, अशें तांणी म्हळें. खंयचोच नवनिर्माण ताचो वापर करपी लोकांच्या सृजनशीलते परस वयर वचूंक शकना अशे तांणी सांगले.

डिजिटल फिल्म निर्मितीच्या आगमनाक लागून सिनेमा गायब जावपाचो भंय एका काळात कसो निर्माण जालो हाचो उगडास करून ट्रिशिया टटल हांणी तंत्रगिन्यानाच्या बदलांविशी आशिल्ल्या आदल्या तणावांचेर विचार उक्तायले. पूण जें तिगून उरता तें म्हळ्यार कल्पना, कारागिरी आनी मनीसपण अशें तिणें सांगलें. एआय कितलोय प्रगत जालो तरी एक व्हड अभिनेतो फ्रेमांत हाडटा ती नाजूक भावनीक सूक्ष्म विभिन्नताय , खास करून दोळ्यांतली सूक्ष्म विभिन्नताय  एआय समजूंक शकना अशें शेखर कपूरान सांगलें. “एआय दोळ्यातल्या भावनांक समजूंक शकना” अशें तांणी नदरेक हाडलें आनी भावनीक स्पार्क हेच खऱ्या अर्थान प्रेक्षकांक एका काणयेकडेन बांदता अशेंय तांणी  सांगलें.

शेखर कपूरान आपल्या एआय वापरून तयार केल्ल्या वॉर लॉर्ड मालिकेचो टीझरय हे वेळार शेअर केलो, जांतूत ते नव्यान सृजनशील साधनांचो सोद घेवपी व्यक्ती बशीन उमेदीन उलयताले. तंत्रगिन्यान कथाकाराची नवी व्याख्या करना जाल्यार कथाकार तंत्रगिन्यानाक  नवो आकार दिता अशेंय तांणी  म्हळें.

प्रेक्षकांकडेन खोशी व्यक्त करताना शेखर कपूरान आपल्या रांदप्या विशीं एक मजेशीर गजाल शेअर केली. “मिस्टर इंडिया 2 ची पटकथा बरोवपाक चॅटजीपीटीचो वापर करून, तो इतले उमेदीन म्हजे कडेन आयलो, “पयलीं कसले कौतुक करचे, ताणें शिजयल्लें जेवण वा ताणें बरयल्ली पटकथा हे विशीं म्हाका खऱ्या अर्थान कळ्ळें ना” असो आपलो अणभव तांणी सांगलो. सृजनशील साधनां कशीं सुलभ जाल्यांत आनी तंत्रगिन्यानान अनपेक्षीत सुवातेर कल्पनेक कशें सशक्त करपाक शकता हाचेर तांणी उजवाड घातलो.

दोनूय वक्त्यांनी हाचेर भर दिलो की तंत्रगिन्यानाचो नेटान बदल जालो तरी सिनेमा हो सामुहीक समाजीक अणभव आसा. शेखर कपूरान सिनेमा घरांनी वचून सिनेमां पळोवप हो  एक समाजीक अणभव अशें वर्णन केलें, जाची सुवात एआय साधनां वा घरांत पळोवपाची संवयी वरवीं घेवंक मेळना, अशें तांणी नोंद केले , “होम डिलिव्हरी आसतना लेगीत लोक रेस्टॉरंटांनी वतात.” स्वतंत्र आनी साहसी चित्रपट अणभवपाक मेळपी सुवाती सांबाळपाचें म्हत्व ट्रिशिया टटल हांणी अधोरेखीत केले, ही जापसालदारकी चित्रपट महोत्सवांनी तिगोवन दवरपाक जाय अशे आवाहन तांणी केले. 

 ह्या चर्चेंत क्रू ची संख्या उणी जावपा विशीं आनी फिल्म सेट लेबरांच्या फुडारा विशीं हुस्को उक्तायलो. ट्रिशिया टटल हांणी फिल्म सेटांर उपस्थित आसपाचें मोल उक्तायले आनी, तिच्या पुतान एक फावट दिग्दर्शन करपाची वा बरोवपाची न्हय, तर फिल्म निर्मितीच्या मळाक लागींच्यान समजून घेवपाखातीर आनी अणभवपाखातीर  क्रूचो भाग जावपाची इत्सा उक्तायली अशें सांगलें. शेखर कपूरान सांगले की, तांका  "अ‍ॅक्शन" आनी  "कट" म्हणपाची क्षमताय वगडावपाचो भंय दिसता. सेटाचेर तयार जाल्ली  मनीसपणाची नाती खंयच्याच एआय साधनान परतून तयार करपाक मेळनात अशेंय  तांणी म्हळें. 

प्रेक्षकांकडेन संवाद सादताना  साहित्यचोरी, नीतीशास्त्र आनी एआयच्या  कलात्मक वैधते विशीच्या प्रस्नांवेळार  शेखर कपूराचें एक खर विधान मुखार आयले : "एआय हो जादू न्हय. तो अराजक न्हय. तो बदल. पूण खरी कथा सांगप अदमासाक येना. एआय फुडाराचो अदमास करूंक शकना; तो फकत भूतकाळाचें अनुकरण करूंक शकता.” एआय आसल्यार वा नासतना साहित्य चोरप सृजनशील आळशीपणांतल्यान जाता आनी भावनीक कथा सांगल्यार कामा फाटल्यान आशिल्लो मनीस सदांच मुखार येता अशें तांणी सांगलें.

सिनेमाची उदरगत चालूच उरतली, पूण ताचें सार — मनशाची कल्पनाशक्त, भावनीक सत्य आनी कथांची शक्त दर एका तंत्रीक बदला भायर लेगीत तिगून उरतली हाचेर दोनूय वक्त्यांचे एकमत जाले आनी सत्राची सांगता जाली. म्हायती आनी प्रसारण मंत्रालयाचे अतिरिक्त सचीव श्री प्रभात हांणी केल्ल्या  सत्कारान कार्यावळ सोंपली. 

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel:  https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/उत्कर्षा भुस्कुटे/दर्शना राणे | IFFI 56