Ka jingïalang Iaphylliew jingmut - ‘'An Eurasian Festival Frontier: Do We Need to Redefine Cinema in the World of AI?' ha ka International Film Festival of India ba 56 ka la pynïasoh lang ïa arngut ki riew pawkhmat ha ka pyrthei ha ki kam tamasa: ka Tricia Tuttle, Festival Director jong ka Berlin International Film Festival, bad u Shekhar Kapur, Festival Director jong ka IFFI. Wat la ïa ka jingïalang la pynïaid da u Kapur, ka jingïakren ka la long kum ka jingïakren kaba arliang mamla, kaba wad bniah ïa ka jingïakynduh kaba nang kiew jong ka AI, ka jingsaindur, bad ka lawei jong ki film festival.

Ka jingïalang ka la sdang da kaba u Shekhar Kapur u ai khublei ïa ka tamasa na ka bynta ban sangeh ban pyndonkam ïa ki bilor plastic, katba ka Tricia Tuttle ka la pynkynmaw ïa kawei ka khyllipmat naduh u snem 1998 ha kaba, kum ka samla ba la pyndep ïa ka jingpule shaphang ka kam shna phlim, ka la leit iashim bynta ha ka masterclass jong u Shekhar Kapur halor ka phlim Elizabeth jong u. “Ka sngew kumba ka la wan pura,” ka la ong, da kaba buh ia ka sur kaba pyniasoh lang ia ki jingshem ba la leit noh bad ka lawei kaba dang iaid jong ka kam shna phlim.

Ha baroh kawei ka jingïalang, u Shekhar Kapur u la ban jur bunsien ba kam pher kano kano ka teknoloji kaba wan, la ka long ki tiar digital ne ka AI, ka cinema ka im namar ka jingmut jingpyrkhat jong u briew ka im. U la ban jur ba dei u nongsaindur uba pyniaid ia kano kano ka tiar kaba thymmai, da kaba pynkynmaw ia ki nongsngap ba ym don kano kano ka jingsaindur kaba lah ban palat ia ka jingstad jong ki briew kiba pyndonkam ia ka.

Ka Tricia Tuttle ka la kren shaphang ki jingsngewkhia kiba kham mynshwa ha kylleng ki jingkylla ha ka teknoloji, da kaba pynkynmaw kumno ka jingwan jong ka jingshna phlim digital shisien ka la pynmih ïa ka jingtieng ba ka kam shna phlim kan jah noh. “Hynrei kaba neh ka long ka jingmut, ka sap, ka jinglong briew”, ka la ong. U Shekhar Kapur u la bynrap ba watla ka AI ka la nang kiew katno katno ruh, kam lah ban sngewthuh ïa ki jingkylla barit ha ka jingsngew ba u aktor u wanrah, khamtam eh ïa ki jingkylla barit ha ki khmat. “Ka AI kam sngewthuh ïa ki khynnah pule,” u la ong, da kaba bynrap ba ka jingshai ba kynja mynsiem ka dei kaba tehsong ïa ki nongpeitkai ha ka jingïathuhkhana.

U Shekhar Kapur, u la iasam ruh ia ka teaser jong ka series ba la shna da ka AI, ka War Lord, ha kaba u la kren da ka jingsngewtynnat shaphang u briew uba wad ia ki atiar saindur kiba thymmai. Wat haba u dang pdiang ia kine ki lad, u la pynshong nongrim ia ka jingiakren ha ka jingngeit jong u ba ka teknoloji kam pynkylla dur ia u nongiathuh khana; hynrei, u nongiathuh khana u pynwandur thymmai ia ka teknoloji.

Ha ka khyllipmat kaba pynkmen ïa ki nongpeitkai, u Kapur u la ïathuh ïa kawei ka khana ba sngewtynnad shaphang u nongshet jong u uba pyndonkam ïa ka ChatGPT ban thoh ïa ka script na ka bynta ka Mr India 2. “U la wan sha nga da ka jingsngewtynnat kaba khraw,” la pynkynmaw u Shekhar Kapur. “Nga shisha ngam tip ia kaei kaba dei ban sngewnguh nyngkong, ia ka jingbam kaba u la shet ne ia ka script kaba u la thoh.” Ka jingiathuhkhana ka la pynpaw kumno ki atiar saindur ki la long kiba lah ban ioh bad kumno ka teknoloji ka lah ban pynkupbor ia ka jingmutdur ha ki jaka bym shym la khmih lynti.

Baroh arngut ki nongkren ki la iakren kumno ka cinema ka dang long ka jingshem lang ha ka imlang sahlang wat hapdeng ka jingkylla stet ka juk teknoloji. U Shekhar Kapur u la batai ïa ka jingleit peit cinema kum ka jingïakynduh ha ka imlang sahlang kaba ym lah ban bujli da ki atiar AI ne ki jingmlien ban peit ha ïing, da kaba ong, “Watla ka jingpynpoi sha ïing, ki briew ki dang leit sha ki jaka bam.” Ka Tricia Tuttle ka la ban jur ia ka jingdonkam ban pynneh pynsah ia ki jaka ha kaba lah ban mad ia ki phlim kiba shna shimet bad kiba sngewtynnad, ka jingkitkhlieh kaba ki film festival ki dei ban iai bteng ban pynneh pynsah.

Ka jingiakren ka la ktah ruh ia ki jingsngewkhia shaphang ka jingpynduna ia ki nongtrei bad ka lawei jong ki nongtrei ha ki jaka shna phlim. Ka Tricia Tuttle ka la pynpaw ïa ka dor jong ka jingdon tang ha ka jaka shna phlim, da kaba ïasam ba u khun jong ka shisien u la pynpaw ïa ka jingkwah ban trei kum shi bynta jong ka kynhun, ym ban direk ne thoh, hynrei ban sngewthuh bad mad ïa ka jinglong ka kam shna phlim. U Shekhar Kapur u la bynrap ba u sheptieng ban duh noh ïa ka jinglah ban ong “action” bad “cut,” da kaba kdew ba ïa ki jingïadei para briew ba la tei ha kawei ka jaka shna phlim ym lah ban thaw biang da kano kano ka atiar AI.

Ha ka jingïakren jong ki nongwan iashim bynta, ki jingkylli shaphang ka jingbud ia ki jingthoh jong kiwei, ka akor, bad ka jinglong hok jong ka AI ka la wanrah ïa kawei na ki jingkren ba shongkor tam jong u Shekhar Kapur: “Ka AI kam dei ka bor jadu. Kam dei ka jingkulmar. Ka dei ka jingkylla. Hynrei ia ka jingïathuhkhana ba shisha ym lah ban tip lypa. Ka AI kam lah ban batai lypa ia ka lawei; ka lah tang ban pyni nuksa ia kiei kiei kiba la leit noh.” U la bynrap ba ka jingbud ia ki jingthoh jong kiwei, ryngkat ne khlem ka AI, ka wan na ka jinglong jaituh ban saindur, bad ba ka jingïathuhkhana kaba pynsngewtynnat kan pynpaw beit ïa u briew uba don ha lyndet jong ka kam.

Ka jingïalang ka la kut da kaba baroh arngut ki nongkren ki la mynjur ba ka cinema kan dang ïai bteng ban kiew, hynrei ka jinglong jong ka — ka jingmutdur jong u briew, ka jingshisha kaba kynja mynsiem, bad ka bor jong ki khanatang ki ban neh hadien man la ka jingkylla ha ka teknoloji. La pynkut ïa kane ka jingïalang da ka jingpynkup burom na u Additional Secretary ka Tnad Information and Broadcasting, u Prabhat.

Shaphang ka IFFI

La sdang ha u snem 1952, ka International Film Festival of India (IFFI) ka ieng skhem kum ka jingrakhe kaba la rim bad kaba heh tam ha South Asia ha ka kam ba iadei bad ki phlim. La pynlong lang da ka National Film Development Corporation (NFDC), ka Tnad Information and Broadcasting, Sorkar india bad ka Entertainment Society of Goa (ESG), ka Sorkar Jylla Goa,kane ka tamasa ka la nangroi sha ka jaka ba don bor ha ka pyrthei ha ka kam pynmih phlim—ha kaba ki phlim hyndai ba la pynthymmai ki ïakynduh ïa ki jingpyrshang ba shlur bad ki briew kiba la pynskhem ialade ha kane ka kam ki iakynduh ia kito kiba dang sdang ha kane ka kam. Kaba pynlong ïa ka IFFI ban tyngshaiñ shisha ka dei ka jingbun ki bynta—ki jingïakob ha kylleng ka pyrthei, ki jingpyni ïa ka kolshor, ki masterclass, ki jingai burom, bad ka WAVES Film Bazaar ba shitrhem bha, ha kaba ki jingmut, ki jingïateh bad ki jingïatreilang ki kiew shaphrang. Ha ka jingpynlong ha rud duriaw jong ka Goa naduh ka 20–28 tarik u Naiwieng, ka bynta kaba 56 kan don ki bynta jong ki ktien bapher bapher , ki jait phlim bapher bapher, ki jingsaindur thymmai, bad ki sur—ka jingrakhe ïa ka jingtbit ka India ha ka kam saindur jong ka pyrthei.

Ban ioh jingtip shuh shuh, shon ha ka:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *