പ്രധാനമന്ത്രി ശ്രീ നരേന്ദ്ര മോദി ഇന്ന് ആന്ധ്രാപ്രദേശിലെ പുട്ടപർത്തിയിൽ ഭഗവാൻ ശ്രീ സത്യസായി ബാബയുടെ ജന്മശതാബ്ദി ആഘോഷങ്ങളെ അഭിസംബോധന ചെയ്തു. പ്രധാനമന്ത്രി തന്റെ പ്രസംഗം "സായി റാം" എന്ന് പറഞ്ഞുകൊണ്ട് ആരംഭിച്ചു, പുട്ടപർത്തിയുടെ പുണ്യഭൂമിയിൽ എല്ലാവരുടെയും ഇടയിൽ സന്നിഹിതനായിരിക്കുന്നത് ഒരു വൈകാരികവും ആത്മീയവുമായ അനുഭവമായിരുന്നുവെന്ന് അദ്ദേഹം പറഞ്ഞു. കുറച്ചു മുൻപ് ബാബയുടെ സമാധിയിൽ പുഷ്പാർച്ചന നടത്താൻ തനിക്ക് അവസരം ലഭിച്ച കാര്യം അദ്ദേഹം പങ്കുവെച്ചു. ബാബയുടെ കാൽക്കൽ വണങ്ങുന്നതും അനുഗ്രഹം സ്വീകരിക്കുന്നതും എപ്പോഴും ഹൃദയത്തെ ആഴത്തിലുള്ള വികാരത്താൽ നിറയ്ക്കുന്നുവെന്ന് ശ്രീ മോദി എടുത്തുപറഞ്ഞു.

ശ്രീ സത്യസായി ബാബയുടെ ജന്മശതാബ്ദി വർഷം ഈ തലമുറയ്ക്ക് വെറുമൊരു ആഘോഷമല്ല, മറിച്ച് ഒരു ദിവ്യാനുഗ്രഹമാണെന്ന് അടിവരയിട്ട ശ്രീ മോദി, ബാബ ഇപ്പോൾ ഭൗതിക രൂപത്തിൽ ഇല്ലെങ്കിലും, അദ്ദേഹത്തിന്റെ തത്വസംഹിതകൾ, സ്നേഹം, സേവന മനോഭാവം എന്നിവ ലോകമെമ്പാടുമുള്ള കോടിക്കണക്കിന് ആളുകളെ നയിക്കുന്നുണ്ടെന്ന് ചൂണ്ടിക്കാട്ടി. 140-ലധികം രാജ്യങ്ങളിൽ, എണ്ണമറ്റ ജീവിതങ്ങൾ പുതിയ വെളിച്ചം, ദിശ, ദൃഢനിശ്ചയം എന്നിവയോടെ മുന്നോട്ട് പോകുകയാണെന്ന് പ്രധാനമന്ത്രി എടുത്തുപറഞ്ഞു.

ശ്രീ സത്യസായി ബാബയുടെ ജീവിതം വസുധൈവ കുടുംബകം എന്ന ആദർശത്തിന്റെ ജീവസ്സുറ്റ രൂപമായിരുന്നുവെന്ന് എടുത്തുകാണിച്ചുകൊണ്ട്, "അതിനാൽ, ഈ ജന്മശതാബ്ദി വർഷം സാർവത്രിക സ്നേഹത്തിന്റെയും സമാധാനത്തിന്റെയും സേവനത്തിന്റെയും ഒരു മഹത്തായ ഉത്സവമായി മാറിയിരിക്കുന്നു" എന്ന് പ്രധാനമന്ത്രി പറഞ്ഞു. ഈ അവസരത്തിൽ 100 ​​രൂപയുടെ സ്മാരക നാണയവും തപാൽ സ്റ്റാമ്പും പുറത്തിറക്കിയത് ​ഗവൺമെന്റിന്റെ ഭാഗ്യമാണെന്ന് അദ്ദേഹം പറഞ്ഞു, രണ്ടും ബാബയുടെ സേവന പാരമ്പര്യത്തെ പ്രതിഫലിപ്പിക്കുന്നു. ലോകമെമ്പാടുമുള്ള ബാബയുടെ ഭക്തർക്കും സന്നദ്ധപ്രവർത്തകർക്കും അനുയായികൾക്കും അദ്ദേഹം ഹൃദയംഗമമായ ആശംസകളും ഭാവുകങ്ങളും നേർന്നു.

"ഇന്ത്യൻ സാംസ്കാരിക മൂല്യങ്ങളുടെ കേന്ദ്ര മൂല്യം സേവ അല്ലെങ്കിൽ സേവനമാണ്", ഇന്ത്യയുടെ വൈവിധ്യമാർന്ന ആത്മീയവും ദാർശനികവുമായ പാരമ്പര്യങ്ങളെല്ലാം ആത്യന്തികമായി ഈ ഒരു ആദർശത്തിലേക്ക് നയിക്കുന്നു എന്ന് എടുത്തുകാണിച്ചുകൊണ്ട് പ്രധാനമന്ത്രി ഉദ്‌ഘോഷിച്ചു. ഭക്തി, ജ്ഞാനം, കർമ്മം എന്നിവയുടെ പാതയിൽ ഒരാൾ നടന്നാലും, ഓരോന്നും സേവയുമായി ബന്ധപ്പെട്ടിരിക്കുന്നു. എല്ലാ ജീവികളിലുമുള്ള ദിവ്യ സാന്നിധ്യത്തെ സേവിക്കാതെ ഭക്തി എന്താണ്, മറ്റുള്ളവരോട് അനുകമ്പ ഉണർത്തുന്നില്ലെങ്കിൽ ജ്ഞാനം എന്താണ്, സമൂഹത്തിന് സേവനമായി സ്വന്തം പ്രവൃത്തി അർപ്പിക്കുന്നതിന്റെ ആത്മാവല്ലെങ്കിൽ കർമ്മം എന്താണ് എന്ന് അദ്ദേഹം ചോദിച്ചു. "നൂറ്റാണ്ടുകളായി ഇന്ത്യയെ മാറ്റങ്ങളിലൂടെയും വെല്ലുവിളികളിലൂടെയും നിലനിർത്തിയതും, നമ്മുടെ സംസ്കാരത്തിന് അതിന്റെ ആന്തരിക ശക്തി നൽകുന്നതുമായ ധാർമ്മികതയാണ് 'സേവാ പർമോ ധർമ്മ", നിരവധി മഹാനായ സന്യാസിമാരും പരിഷ്കർത്താക്കളും ഈ കാലാതീതമായ സന്ദേശം അവരുടെ കാലത്തിന് അനുയോജ്യമായ രീതിയിൽ മുന്നോട്ട് കൊണ്ടുപോയിട്ടുണ്ടെന്ന് ശ്രീ മോദി ഊന്നിപ്പറഞ്ഞു. മനുഷ്യജീവിതത്തിന്റെ ഹൃദയഭാഗത്ത് ശ്രീ സത്യസായി ബാബ സേവയെ പ്രതിഷ്ഠിച്ചുവെന്ന് പ്രധാനമന്ത്രി ഊന്നിപ്പറഞ്ഞു. "എല്ലാവരെയും സ്നേഹിക്കുക, എല്ലാവരെയും സേവിക്കുക" എന്ന ബാബയുടെ വാക്കുകൾ അദ്ദേഹം ഓർമ്മിക്കുകയും ബാബയെ സംബന്ധിച്ചിടത്തോളം സേവ എന്നത് സ്നേഹത്തിന്റെ പ്രവൃത്തിയാണെന്ന് സ്ഥിരീകരിക്കുകയും ചെയ്തു. വിദ്യാഭ്യാസം, ആരോഗ്യ സംരക്ഷണം, ഗ്രാമവികസനം തുടങ്ങി നിരവധി മേഖലകളിലെ ബാബയുടെ സ്ഥാപനങ്ങൾ ഈ തത്ത്വചിന്തയുടെ ജീവിക്കുന്ന തെളിവായി നിലകൊള്ളുന്നുവെന്ന് പ്രധാനമന്ത്രി പറഞ്ഞു. ആത്മീയതയും സേവനവും വേർപിരിയുന്നതല്ല, മറിച്ച് ഒരേ സത്യത്തിന്റെ വ്യത്യസ്ത പ്രകടനങ്ങളാണെന്ന് ഈ സ്ഥാപനങ്ങൾ കാണിക്കുന്നുവെന്ന് അദ്ദേഹം അടിവരയിട്ടു. ഒരാളുടെ ശാരീരിക സാന്നിധ്യത്തിൽ ആളുകളെ പ്രചോദിപ്പിക്കുന്നത് അസാധാരണമല്ലെങ്കിലും, ബാബയുടെ സ്ഥാപനങ്ങളുടെ സേവന പ്രവർത്തനങ്ങൾ അദ്ദേഹത്തിന്റെ ശാരീരിക അഭാവത്തിൽ പോലും അനുദിനം വളർന്നുകൊണ്ടിരിക്കുകയാണെന്ന് ശ്രീ മോദി കൂട്ടിച്ചേർത്തു. യഥാർത്ഥത്തിൽ മഹാത്മാക്കളുടെ സ്വാധീനം കാലത്തിനനുസരിച്ച് കുറയുന്നില്ല - അത് യഥാർത്ഥത്തിൽ വളരുന്നു എന്നാണ് ഇത് കാണിക്കുന്നതെന്ന് അദ്ദേഹം പറഞ്ഞു.

ശ്രീ സത്യസായി ബാബയുടെ സന്ദേശം പുസ്തകങ്ങളിലോ പ്രഭാഷണങ്ങളിലോ ആശ്രമത്തിന്റെ അതിരുകളിലോ മാത്രമായി ഒതുങ്ങി നിൽക്കുന്നില്ലെന്ന് എടുത്തുപറഞ്ഞ ശ്രീ മോദി, ബാബയുടെ തത്വസംഹിതകളുടെ സ്വാധീനം ജനങ്ങൾക്കിടയിൽ ദൃശ്യമാണെന്ന് അഭിപ്രായപ്പെട്ടു. നഗരങ്ങൾ മുതൽ വിദൂര ഗ്രാമങ്ങൾ വരെയും സ്കൂളുകൾ മുതൽ ആദിവാസി വാസസ്ഥലങ്ങൾ വരെയും ഇന്ത്യയിലുടനീളം സംസ്കാരം, വിദ്യാഭ്യാസം, വൈദ്യസേവനം എന്നിവയുടെ ശ്രദ്ധേയമായ ഒഴുക്ക് കാണപ്പെടുന്നു. ദശലക്ഷക്കണക്കിന് ബാബയുടെ അനുയായികൾ നിസ്വാർത്ഥമായി ഈ കർത്തവ്യത്തിൽ ഏർപ്പെട്ടിരിക്കുന്നുണ്ടെന്ന് പ്രധാനമന്ത്രി എടുത്തുപറഞ്ഞു. ബാബയുടെ ഭക്തർക്ക് "മാനവ് സേവാ ഹി മാധവ് സേവ" എന്നതാണ് ഏറ്റവും ഉയർന്ന ആദർശമെന്ന് അദ്ദേഹം ചൂണ്ടിക്കാട്ടി. അനുകമ്പ, കടമ, അച്ചടക്കം, ജീവിത തത്ത്വചിന്തയുടെ സത്ത എന്നിവ ഉൾക്കൊള്ളുന്ന നിരവധി ചിന്തകൾ ബാബ പകർന്നു നൽകിയിട്ടുണ്ടെന്ന് പ്രധാനമന്ത്രി കൂട്ടിച്ചേർത്തു. "എപ്പോഴും സഹായിക്കുക, ഒരിക്കലും വേദനിപ്പിക്കരുത്", "കുറച്ചു സംസാരിക്കുക, കൂടുതൽ പ്രവർത്തിക്കുക" എന്നീ ബാബയുടെ മാർഗ്ഗനിർദ്ദേശ തത്വങ്ങൾ അദ്ദേഹം അനുസ്മരിച്ചു, ശ്രീ സത്യസായി ബാബയുടെ അത്തരം ജീവിത മന്ത്രങ്ങൾ ഇന്നും എല്ലാവരുടെയും ഹൃദയങ്ങളിൽ പ്രതിധ്വനിക്കുന്നുണ്ടെന്ന് അദ്ദേഹം സ്ഥിരീകരിച്ചു.

ശ്രീ സത്യസായി ബാബ ആത്മീയത സമൂഹത്തിന്റെയും ജനങ്ങളുടെയും ക്ഷേമത്തിനായി ഉപയോഗിച്ചുവെന്ന് അടിവരയിട്ടുകൊണ്ട്, പ്രധാനമന്ത്രി അതിനെ നിസ്വാർത്ഥ സേവനം, സ്വഭാവ രൂപീകരണം, മൂല്യാധിഷ്ഠിത വിദ്യാഭ്യാസം എന്നിവയുമായി ബന്ധിപ്പിച്ചു. ഒരു സിദ്ധാന്തമോ പ്രത്യയശാസ്ത്രമോ ബാബ അടിച്ചേൽപ്പിച്ചിട്ടില്ലെന്നും ദരിദ്രരെ സഹായിക്കാനും അവരുടെ ദുരിതങ്ങൾ ലഘൂകരിക്കാനുമാണ് പ്രവർത്തിച്ചതെന്നും അദ്ദേഹം എടുത്തുപറഞ്ഞു. ഗുജറാത്ത് ഭൂകമ്പത്തിനുശേഷമുള്ള ദുരിതാശ്വാസ പ്രവർത്തനങ്ങളിൽ ബാബയുടെ സേവാദൾ മുൻപന്തിയിൽ നിന്നിരുന്നുവെന്ന് ശ്രീ മോദി അനുസ്മരിച്ചു. നിരവധി ദിവസങ്ങൾ പൂർണ്ണ സമർപ്പണത്തോടെ അദ്ദേഹത്തിന്റെ അനുയായികൾ സേവനമനുഷ്ഠിച്ചു, ദുരിതബാധിത കുടുംബങ്ങൾക്ക് സഹായം എത്തിക്കുന്നതിലും അവശ്യവസ്തുക്കൾ നൽകുന്നതിലും മാനസിക പിന്തുണ നൽകുന്നതിലും ഗണ്യമായ സംഭാവന നൽകി.

ഒരൊറ്റ കൂടിക്കാഴ്ചയിലൂടെ ഒരാളുടെ ഹൃദയം ഉരുകാനോ അവരുടെ ജീവിതത്തിന്റെ ദിശ മാറ്റാനോ കഴിയുമ്പോൾ, അത് ആ വ്യക്തിയുടെ മഹത്വത്തെ പ്രതിഫലിപ്പിക്കുന്നുവെന്ന് പ്രധാനമന്ത്രി അഭിപ്രായപ്പെട്ടു. ഇന്നത്തെ പരിപാടിയിൽ പോലും, ബാബയുടെ സന്ദേശത്താൽ ആഴത്തിൽ പരിവർത്തനം ചെയ്യപ്പെട്ട നിരവധി വ്യക്തികളുണ്ടെന്ന് അദ്ദേഹം ചൂണ്ടിക്കാട്ടി.

ശ്രീ സത്യസായി ബാബയിൽ നിന്ന് പ്രചോദനം ഉൾക്കൊണ്ട്, ശ്രീ സത്യസായി സെൻട്രൽ ട്രസ്റ്റും അതിന്റെ അനുബന്ധ സംഘടനകളും സംഘടിതവും സ്ഥാപനപരവും ദീർഘകാലവുമായ രീതിയിൽ സേവനം മുന്നോട്ട് കൊണ്ടുപോകുന്നതിൽ സംതൃപ്തി പ്രകടിപ്പിച്ച ശ്രീ മോദി, ഇന്ന് ഇത് ഒരു പ്രായോഗിക മാതൃകയായി നമ്മുടെ മുന്നിൽ നിൽക്കുന്നുണ്ടെന്ന് പറഞ്ഞു. വെള്ളം, പാർപ്പിടം, ആരോഗ്യ സംരക്ഷണം, പോഷകാഹാരം, ദുരന്ത സഹായം, ശുദ്ധമായ ഊർജ്ജം തുടങ്ങിയ മേഖലകളിൽ നടക്കുന്ന ശ്രദ്ധേയമായ പ്രവർത്തനങ്ങളെ അദ്ദേഹം അഭിനന്ദിച്ചു. റായലസീമയിലെ രൂക്ഷമായ കുടിവെള്ള പ്രതിസന്ധി പരിഹരിക്കുന്നതിനായി 3,000 കിലോമീറ്ററിലധികം പൈപ്പ്‌ലൈൻ ട്രസ്റ്റ് സ്ഥാപിച്ചു; ഒഡീഷയിലെ വെള്ളപ്പൊക്ക ബാധിത കുടുംബങ്ങൾക്ക് 1,000 വീടുകൾ നിർമ്മിച്ചു; പാവപ്പെട്ട കുടുംബങ്ങൾ ബില്ലിംഗ് കൗണ്ടർ ഇല്ലെന്ന് കണ്ട് അത്ഭുതപ്പെടുന്ന ആശുപത്രികൾ നടത്തുന്നു. ചികിത്സ സൗജന്യമാണെങ്കിലും, രോഗികൾക്കും അവരുടെ കുടുംബങ്ങൾക്കും ഒരു അസൗകര്യവും നേരിടുന്നില്ലെന്ന് അദ്ദേഹം ചൂണ്ടിക്കാട്ടി. ഇന്ന്, പെൺമക്കളുടെ പേരിൽ 20,000-ത്തിലധികം സുകന്യ സമൃദ്ധി യോജന അക്കൗണ്ടുകൾ തുറന്നിട്ടുണ്ടെന്നും അത് അവരുടെ വിദ്യാഭ്യാസവും ഭാവിയും ഉറപ്പാക്കുമെന്നും പ്രധാനമന്ത്രി കൂട്ടിച്ചേർത്തു.

പത്ത് വർഷം മുമ്പ്, പെൺകുട്ടികളുടെ വിദ്യാഭ്യാസത്തിനും അവരുടെ ശോഭനമായ ഭാവിക്കും ഊന്നൽ നൽകി ഇന്ത്യാ ഗവൺമെന്റ് സുകന്യ സമൃദ്ധി യോജന ആരംഭിച്ച കാര്യം ചൂണ്ടിക്കാട്ടി, നമ്മുടെ പെൺമക്കൾക്ക് 8.2 ശതമാനം എന്ന ഉയർന്ന പലിശ നിരക്ക് വാഗ്ദാനം ചെയ്യുന്ന രാജ്യത്തെ ചുരുക്കം ചില പദ്ധതികളിൽ ഒന്നാണിതെന്ന് ശ്രീ മോദി എടുത്തുപറഞ്ഞു. ഇന്ത്യയിലുടനീളം പെൺകുട്ടികൾക്കായി ഈ പദ്ധതി പ്രകാരം 4 കോടിയിലധികം അക്കൗണ്ടുകൾ തുറന്നിട്ടുണ്ടെന്നും ഇതുവരെ 3.25 ലക്ഷം കോടിയിലധികം രൂപ ഈ അക്കൗണ്ടുകളിൽ നിക്ഷേപിച്ചിട്ടുണ്ടെന്നും അദ്ദേഹം പങ്കുവെച്ചു. 20,000 സുകന്യ സമൃദ്ധി അക്കൗണ്ടുകൾ തുറക്കുന്നതിൽ ശ്രീ സത്യസായി കുടുംബം നടത്തിയ മഹത്തായ സംരംഭത്തെ പ്രധാനമന്ത്രി അഭിനന്ദിച്ചു. കഴിഞ്ഞ വർഷം ഫെബ്രുവരിയിൽ വാരാണസിയിലെ പെൺമക്കൾക്കായി 27,000 സുകന്യ സമൃദ്ധി അക്കൗണ്ടുകൾ തുറന്നതായും ഓരോ അക്കൗണ്ടിലേക്കും 300 രൂപ ട്രാൻസ്ഫർ ചെയ്തതായും അദ്ദേഹം പരാമർശിച്ചു. പെൺമക്കളുടെ വിദ്യാഭ്യാസവും സുരക്ഷിതമായ ഭാവിയും ഉറപ്പാക്കുന്നതിൽ സുകന്യ സമൃദ്ധി യോജന ഒരു പ്രധാന പങ്ക് വഹിക്കുന്നുണ്ടെന്ന് അദ്ദേഹം സ്ഥിരീകരിച്ചു.

കഴിഞ്ഞ പതിനൊന്ന് വർഷമായി, പൗരന്മാരുടെ സാമൂഹിക സുരക്ഷാ ചട്ടക്കൂടിനെ ഗണ്യമായി ശക്തിപ്പെടുത്തുന്ന നിരവധി പദ്ധതികൾ ഇന്ത്യയിൽ ആരംഭിച്ചിട്ടുണ്ടെന്ന് പ്രധാനമന്ത്രി പറഞ്ഞു. ദരിദ്രരെയും പിന്നോക്ക വിഭാഗക്കാരെയും സാമൂഹിക സുരക്ഷയുടെ പരിധിയിൽ കൊണ്ടുവരുന്നത് വർധിച്ചിട്ടുണ്ടെന്ന് അദ്ദേഹം എടുത്തുപറഞ്ഞു. 2014-ൽ 25 കോടി പേർക്ക് മാത്രമേ പരിരക്ഷ ലഭിച്ചിരുന്നുള്ളൂ, എന്നാൽ ഇന്ന് ഈ സംഖ്യ ഏകദേശം 100 കോടിയിലെത്തിയിരിക്കുന്നു. ഇന്ത്യയുടെ ക്ഷേമ, സാമൂഹിക സുരക്ഷാ പദ്ധതികൾ അന്താരാഷ്ട്രതലത്തിൽ ചർച്ച ചെയ്യപ്പെടുന്നുണ്ടെന്നും ശ്രീ മോദി കൂട്ടിച്ചേർത്തു.

ഈ ദിവസം, ദരിദ്ര കർഷക കുടുംബങ്ങൾക്ക് ട്രസ്റ്റ് 100 പശുക്കളെ ദാനം ചെയ്യുന്ന ​ഗൗ ദാൻ പരിപാടിയിൽ പങ്കെടുക്കാനുള്ള അവസരം ലഭിച്ചതായും ശ്രീ മോദി പങ്കുവെച്ചു. ഇന്ത്യൻ പാരമ്പര്യത്തിൽ പശുവിനെ ജീവിതത്തിന്റെയും സമൃദ്ധിയുടെയും കാരുണ്യത്തിന്റെയും പ്രതീകമായി കണക്കാക്കുന്നുവെന്ന് അദ്ദേഹം ഊന്നിപ്പറഞ്ഞു. ഈ പശുക്കൾ സ്വീകർത്താക്കളുടെ കുടുംബങ്ങളുടെ സാമ്പത്തിക, പോഷകാഹാര, സാമൂഹിക സ്ഥിരതയെ പിന്തുണയ്ക്കും. പശു സംരക്ഷണത്തിലൂടെയുള്ള സമൃദ്ധിയുടെ സന്ദേശം ലോകമെമ്പാടും ദൃശ്യമാണെന്ന് പ്രധാനമന്ത്രി അഭിപ്രായപ്പെട്ടു. രാഷ്ട്രീയ ഗോകുൽ മിഷന്റെ കീഴിൽ, കുറച്ച് വർഷങ്ങൾക്ക് മുമ്പ് വാരണാസിയിൽ 480-ലധികം ഗീർ പശുക്കളെ വിതരണം ചെയ്തതായും ഇന്ന് അവിടെ ഗീർ പശുക്കളുടെയും കന്നുകിടാവുകളുടെയും എണ്ണം ഏകദേശം 1,700 ആയി വർധിച്ചതായും അദ്ദേഹം ഓർമ്മിപ്പിച്ചു. വിതരണം ചെയ്ത പശുവിൽ നിന്ന് ജനിക്കുന്ന പശുക്കിടാവിനെ മറ്റ് പ്രദേശങ്ങളിലെ കർഷകർക്ക് സൗജന്യമായി നൽകുകയും അതുവഴി പശുക്കളുടെ എണ്ണം വർദ്ധിപ്പിക്കുകയും ചെയ്യുന്ന ഒരു പുതിയ പാരമ്പര്യം വാരാണസിയിൽ ആരംഭിച്ചിട്ടുണ്ടെന്നും അദ്ദേഹം പങ്കുവെച്ചു. 7-8 വർഷങ്ങൾക്ക് മുമ്പ് ആഫ്രിക്കയിലെ റുവാണ്ട സന്ദർശിച്ചപ്പോൾ 200 ഗീർ പശുക്കളെ ഇന്ത്യ സമ്മാനമായി നൽകിയതായും ശ്രീ മോദി ഓർമ്മിപ്പിച്ചു. റുവാണ്ടയിൽ "നിങ്ങൾക്ക് ഒരു പശുവിനെ ലഭിക്കട്ടെ" എന്നർത്ഥം വരുന്ന "ഗിരിങ്ക" എന്ന സമാനമായ ഒരു പാരമ്പര്യം ഉണ്ടെന്നും അദ്ദേഹം ചൂണ്ടിക്കാട്ടി, ആദ്യമായി ജനിക്കുന്ന പശുക്കിടാവിനെ അയൽപക്ക കുടുംബത്തിന് നൽകുന്ന രീതിയാണിത്. ഈ രീതി റുവാണ്ടയിൽ പോഷകാഹാരം, പാൽ ഉൽപാദനം, വരുമാനം, സാമൂഹിക ഐക്യം എന്നിവ വർദ്ധിപ്പിച്ചു.

ഇന്ത്യയിലെ ഗീർ, കാങ്ക്രെജ് കന്നുകാലി ഇനങ്ങളെ ബ്രസീൽ ദത്തെടുത്തുവെന്നും ആധുനിക സാങ്കേതികവിദ്യയിലൂടെയും ശാസ്ത്രീയ മാനേജ്മെന്റിലൂടെയും അവയെ വികസിപ്പിച്ചുവെന്നും ഇത് അവയെ മികച്ച പാലുൽപ്പാദനക്ഷമതയുടെ ഉറവിടമാക്കി മാറ്റിയെന്നും പ്രധാനമന്ത്രി എടുത്തുപറഞ്ഞു. പാരമ്പര്യം, കാരുണ്യം, ശാസ്ത്രീയ ചിന്ത എന്നിവ ഒരുമിച്ച് പശുവിനെ വിശ്വാസത്തിന്റെയും ശാക്തീകരണത്തിന്റെയും പോഷകാഹാരത്തിന്റെയും സാമ്പത്തിക പുരോഗതിയുടെയും പ്രതീകമാക്കി മാറ്റുന്നത് എങ്ങനെയെന്ന് ഇത്തരം ഉദാഹരണങ്ങൾ കാണിക്കുന്നുവെന്ന് അദ്ദേഹം അഭിപ്രായപ്പെട്ടു. ഈ പാരമ്പര്യം ഇവിടെ ഉദാത്തമായ ഉദ്ദേശ്യത്തോടെ മുന്നോട്ട് കൊണ്ടുപോകുന്നതിൽ അദ്ദേഹം സന്തോഷം പ്രകടിപ്പിച്ചു.

വികസിത ഇന്ത്യയിലേക്കുള്ള "കർത്തവ്യ കാല"ത്തിന്റെ ആവേശത്തോടെയാണ് രാജ്യം മുന്നേറുന്നതെന്നും ഈ ലക്ഷ്യം കൈവരിക്കുന്നതിന് സജീവമായ പൗര പങ്കാളിത്തം ആവശ്യമാണെന്നും അടിവരയിട്ടുകൊണ്ട്, ശ്രീ സത്യസായി ബാബയുടെ ജന്മശതാബ്ദി വർഷം ഈ യാത്രയിൽ പ്രചോദനത്തിന്റെ ഒരു പ്രധാന സ്രോതസ്സാണെന്ന് ശ്രീ മോദി ഊന്നിപ്പറഞ്ഞു. ഈ സവിശേഷ വർഷത്തിൽ "വോക്കൽ ഫോർ ലോക്കൽ" എന്ന മന്ത്രം ശക്തിപ്പെടുത്താൻ അദ്ദേഹം എല്ലാവരോടും അഭ്യർത്ഥിച്ചു, വികസിത ഇന്ത്യ കെട്ടിപ്പടുക്കുന്നതിന് പ്രാദേശിക സമ്പദ്‌വ്യവസ്ഥയെ പ്രോത്സാഹിപ്പിക്കുന്നത് അത്യാവശ്യമാണെന്ന് അദ്ദേഹം ചൂണ്ടിക്കാട്ടി. പ്രാദേശിക ഉൽപ്പന്നങ്ങൾ വാങ്ങുന്നത് ഒരു കുടുംബത്തെയും ഒരു ചെറുകിട സംരംഭത്തെയും പ്രാദേശിക വിതരണ ശൃംഖലയെയും നേരിട്ട് ശാക്തീകരിക്കുകയും ഒരു ആത്മനിർഭർ ഭാരതിന് വഴിയൊരുക്കുകയും ചെയ്യുന്നുവെന്നും പ്രധാനമന്ത്രി ഓർമ്മിപ്പിച്ചു.

ശ്രീ സത്യസായി ബാബയിൽ നിന്ന് പ്രചോദനം ഉൾക്കൊണ്ട് ഇവിടെ സന്നിഹിതരായ എല്ലാവരും രാഷ്ട്രനിർമ്മാണത്തിന് തുടർച്ചയായി സംഭാവന ചെയ്യുന്നുണ്ടെന്ന് അംഗീകരിച്ച ശ്രീ മോദി, ഈ പുണ്യഭൂമിക്ക് യഥാർത്ഥത്തിൽ ഒരു അതുല്യമായ ഊർജ്ജമുണ്ടെന്ന് നിരീക്ഷിച്ചു - ഓരോ സന്ദർശകന്റെയും സംസാരം അനുകമ്പയെ പ്രതിഫലിപ്പിക്കുന്നു, ചിന്തകൾ സമാധാനത്തെ പ്രതിഫലിപ്പിക്കുന്നു, പ്രവൃത്തികൾ സേവനത്തെ പ്രതിഫലിപ്പിക്കുന്നു. ദാരിദ്ര്യമോ കഷ്ടപ്പാടോ ഉള്ളിടത്തെല്ലാം ഭക്തർ പ്രതീക്ഷയുടെയും വെളിച്ചത്തിന്റെയും ഒരു ദീപസ്തംഭമായി നിലകൊള്ളുമെന്ന് പ്രധാനമന്ത്രി ആത്മവിശ്വാസം പ്രകടിപ്പിച്ചു. ഈ ഉത്സാഹത്തോടെ, സ്നേഹം, സമാധാനം, സേവനം എന്നീ പവിത്രമായ ദൗത്യം മുന്നോട്ട് കൊണ്ടുപോകുന്നതിന് ലോകമെമ്പാടുമുള്ള സത്യസായി കുടുംബത്തിനും സ്ഥാപനങ്ങൾക്കും സന്നദ്ധപ്രവർത്തകർക്കും ഭക്തർക്കും ഹൃദയംഗമമായ ആശംസകൾ നേർന്നുകൊണ്ട് അദ്ദേഹം ഉപസംഹരിച്ചു.

ആന്ധ്രാപ്രദേശ് മുഖ്യമന്ത്രി ശ്രീ എൻ ചന്ദ്രബാബു നായിഡു, കേന്ദ്രമന്ത്രിമാരായ ശ്രീ കെ റാംമോഹൻ നായിഡു, ശ്രീ ജി കിഷൻ റെഡ്ഡി, ശ്രീ ഭൂപതി രാജു ശ്രീനിവാസ വർമ്മ എന്നിവർ ചടങ്ങിൽ പങ്കെടുത്തു.

പശ്ചാത്തലം

പ്രധാനമന്ത്രി ആന്ധ്രാപ്രദേശിലെ പുട്ടപർത്തിയിലുള്ള ഭഗവാൻ ശ്രീ സത്യസായി ബാബയുടെ പുണ്യസ്ഥലവും മഹാസമാധിയും സന്ദർശിച്ച് പ്രണാമമർപ്പിക്കുകയും ശ്രദ്ധാഞ്ജലികൾ അർപ്പിക്കുകയും ചെയ്തു. ഭഗവാൻ ശ്രീ സത്യസായി ബാബയുടെ ശതാബ്ദി ആഘോഷങ്ങളിൽ പങ്കെടുത്ത ശ്രീ മോദി, ഭഗവാൻ ശ്രീ സത്യസായി ബാബയുടെ ജീവിതം, തത്വസംഹിതകൾ, നിലനിൽക്കുന്ന പാരമ്പര്യം എന്നിവയെ ആദരിക്കുന്ന ഒരു സ്മാരക നാണയവും ഒരു കൂട്ടം സ്റ്റാമ്പുകളും പുറത്തിറക്കി.

*****