Ka skhim shna tiar elektrik ka la ioh ia ka jingiashim bynta shitrhem na ki nongialam jong ki karkhana hapoh ka ri bad nabar ri. Kane ka pyni ia ka jingkiew jong ka kyrdan jong ka India ha ka pyrthei bad ka jingshaniah kaba nang kiew jong ki karkhana hapoh ka ri, kynthup ia ki MSME, kiba la pyni ia ka jingthrang ban pynlong ia ka ri kaba lah ban kyrshan dalade ha ka kam shna tiar elektrik.

La antad ba kane ka skhim kan plie 1,42,000 tylli ki kam kaba long palat ia ka thong kaba 91,600 bad kham bun shah kiwei ki kam kiba iadei bad kane, kaba pyni ia ka lad jong ka lad ioh kam kaba heh.

Haba pynpaw ka jingkmen halor ka jingiashim bynta shitrhem, u Myntri Sorkar Pdeng u Ashwini Vaishnaw u la kyntu ïa ki jylla ban shim ïa kane ka kabu ksiar bad ban thaw ïa ka rukom treikam kaba biang na ka bynta ban shna ïa ki tiar elektronik ha ki thaiñ jong ki. Haba ai jingkren ha ka jingialang bad ki nongthoh khubor ha Electronics Niketan, New Delhi, u la ban jur ba ka kam shna tiar elektronik ka pynmih ia ki lad ioh kam kiba kongsan na ka bynta ki samla.

Kane ka skhim, kaba la mynjur da ka Kynhun Myntri ha ka 1 tarik Jymmang 2025 da ka jingpynlut pisa kaba T. 22,919 klur, ka la pdiang 249 tylli ki aplikeshon ryngkat bad ka jingkular ban bei tyngka kaba la khmih lynti ban long T.1,15,351 Klur. Ka jingiashim bynta ka long jan ar shah ia kaba la thmu ban siew T.59,350 klur hapoh kane ka skhim. Ka jingantad ba ka jingpynmih ia ki tiar elektrik hapoh kane ka skhim ha ki hynriew snem ban wan kan long kumba T. 10,34,700 Klur. Ka jingiashim bynta ka long 2.2 sien ia ka jingthmu ba la buh thong T. 4,56,000 klur ka jingpynmih tiar hapoh kane ka skhim.

Ka jingiashim bynta kaba khraw kan pynkylla ruh sha ka jingioh kam shuh shuh ki briew jong ka ri. La plie ia ka por ban aplai na ka bynta ka samoi ba nyngkong kaba 3 bnai, kaba sdang naduh ka 1 tarik u Jymmang 2025, bad hadien kata la pynjlan haduh ka 30 tarik u Nailur 2025.

La pynkhlain ia ka rukom shna tiar elektrik jong ka India

U Ashwini Vaishnaw u la ban jur ba ka jingpyntreikam kaba jop ïa ka skhim ECMS kan kyntiew ïa ka ri ban pynurlong ïa ka jingthmu jong u Myntri Rangbahduh ba donburom ban seng ïa ka rukom shna tiar hapoh ka ri kaba shongdor $500 billion shuwa u snem 2030-31. Da kaba tei halor ka bor ba la mih na ki skhim kum ka EMC, SPECS bad ka Skhim Production Linked Incentive (PLI) na ka bynta ki mobile phone bad ki tiar IT, ka ECMS ka pyni ia ka jingkiew stet jong ka jingthmu ba kongsan jong ka Sorkar.

U la ong ba kawei pa kawei ka skhim kaba bud ka la pynkhlain ia ka rukom shna tiar elektrik jong ka India, bad ka ECMS mynta ka khreh ban pyndep ia ka jingpyniasoh ia ka jingkyntiew ia ki kam kaba lah ban kyntiew ia ka India kum ka jaka shna tiar ba pura ha ka pyrthei.

Ka jingpyniar ia ki jingkyntiew kam hapoh ka ri

U Secretary jong ka Tnad Electronics and Information Technology u S. Krishnan u la pynpaw ba ka jingmut ba kongsan ka long ban kyntiew ia ki kam shna mar elektrik ha India bad ban pynthikna ba ka jingkyntiew kam ha ka ri ka kiew bha. Hadien kata ka jingpyniasoh bad ki kam pynbiang mar jong ka pyrthei kan long ka bynta ba kongsan.

Ka Tnad Electronics & Information Technology ka la ai khublei ruh ïa baroh ki nongïashim bynta ha ka kam karkhana hapoh ka ri bad ha ka pyrthei namar ka jingshaniah kaba khraw jong ki ha ka rukom shna tiar elektrik jong ka India. Kane ka jingbun jong ki jingbei tyngka ka bym pat ju iohi ka pyni ia ka jingshaniah kaba nangroi jong ki nongkhaii ha ka jingtbit jong ka India ha ka kam shna tiar, ka jingskhem ki polisi, bad ka jinglah ban iakhun ha kaba iadei bad ka dor. Kane ka jingjop ka pyni ia ka jingangnud jong ki nongiatreilang jong ngi ha ka kam karkhana ban tei ia ka jaka shna tiar elektrik kaba khlain, kaba lah ban kyrshan dalade, bad ki kam shna mar elektrik ha India kiba lah ban iakhun ha ki iew ha kylleng ka pyrthei ha kaba idei bad ka dor. Ka tnad ka la dep ban sdang ia ka rukom ai jingmynjur ia ki nongaplai kiba dei hok.

*****