প্ৰধানমন্ত্ৰী শ্ৰী নৰেন্দ্ৰ মোদীৰ অধ্যক্ষতাত কেন্দ্ৰীয় কেবিনেটে ভাৰতৰ ৰপ্তানি প্ৰতিযোগিতামূলক ক্ষমতা শক্তিশালী কৰাৰ বাবে – বিশেষকৈ এম এছ এম ই, প্ৰথমবাৰৰ বাবে ৰপ্তানিকাৰক আৰু শ্ৰমভিত্তিক খণ্ডৰ বাবে ২০২৫-২৬ৰ কেন্দ্ৰীয় বাজেটত ঘোষণা কৰা এক প্ৰধান পদক্ষেপ ৰপ্তানি প্ৰসাৰ মিচন (ইপিএম)ত অনুমোদন জনাইছে।

এই মিছনে ২০২৫-২৬ বিত্তীয় বৰ্ষৰ পৰা ২০৩০-৩১ বিত্তীয় বৰ্ষলৈকে মুঠ ব্যয় ২৫,০৬০ কোটি টকাৰ সৈতে ৰপ্তানি প্ৰসাৰৰ বাবে এক বিস্তৃত, নমনীয় আৰু ডিজিটেলী পৰিচালিত কাঠামো প্ৰদান কৰিব। ইপিএম-এ একাধিক খণ্ডিত আঁচনিৰ পৰা একক, ফলাফলভিত্তিক আৰু সমাযোজিতক ব্যৱস্থালৈ কৌশলগত পৰিৱৰ্তন চিহ্নিত কৰে যিয়ে বিশ্ব বাণিজ্যিক প্ৰত্যাহ্বান আৰু ৰপ্তানিকাৰকসকলৰ বিকশিত প্ৰয়োজনীয়তাৰ প্ৰতি দ্ৰুত সঁহাৰি হ’ব পাৰে।

ইপিএমৰ ভিত্তি হৈছে বাণিজ্য বিভাগ, এমএছএমই মন্ত্ৰালয়, বিত্ত মন্ত্ৰালয় আৰু বিত্তীয় প্ৰতিষ্ঠান, ৰপ্তানি প্ৰসাৰ পৰিষদ, পণ্য ব’ৰ্ড, উদ্যোগ সংস্থা আৰু ৰাজ্য চৰকাৰকে ধৰি অন্যান্য মূল অংশীদাৰসকলক জড়িত কৰা এক সহযোগিতামূলক কাঠামো।

মিছনে দুটা সংহত উপ-আঁচনিৰ জৰিয়তে কাম কৰিব:.

The Mission will operate through two integrated sub-schemes:

• নিৰ্যাত প্ৰোৎসাহন – সুতৰ ৰাজসাহায্য, ৰপ্তানি গ্ৰহণযোগ্য ক্ৰয় (ফেক্টৰিং), জামিন নিশ্চয়তা, ই-কমাৰ্চ ৰপ্তানিকাৰকৰ বাবে ক্ৰেডিট কাৰ্ড, আৰু নতুন বজাৰত বৈচিত্ৰ্যৰ বাবে ক্ৰেডিট বৃদ্ধি সমৰ্থনৰ দৰে একাধিক যন্ত্ৰৰ জৰিয়তে এমএছএমইসমূহৰ বাবে সুলভ বাণিজ্যিক বিত্তীয় সাহায্যৰ প্ৰৱেশ উন্নত কৰাত গুৰুত্ব আৰোপ কৰে।
• নিৰ্যাত দিশা– বজাৰৰ প্ৰস্তুতি আৰু প্ৰতিযোগিতামূলক ক্ষমতা বৃদ্ধি কৰা অনা-বিত্তীয় সক্ষমকাৰীৰ ওপৰত গুৰুত্ব আৰোপ কৰে। ইয়াৰ ভিতৰত ৰপ্তানিৰ মানদণ্ড আৰু অনুসৰণ সহায়, আন্তঃৰাষ্ট্ৰীয় ব্ৰেণ্ডিং, পেকেজিং সমৰ্থন আৰু বাণিজ্য মেলাত অংশগ্ৰহণ, ৰপ্তানি গুদাম আৰু লজিষ্টিক, আভ্যন্তৰীণ পৰিবহণৰ পৰিশোধ আৰু বাণিজ্যিক চোৰাংচোৱা আৰু সামৰ্থ্য বিকাশৰ পদক্ষেপ আদি অন্তৰ্ভুক্ত।

ইপিএম-এ সুদ সমতা আঁচনি (আইইএছ) আৰু বজাৰ প্ৰৱেশ পদক্ষেপ (এমএআই)ৰ দৰে মূল ৰপ্তানি সমৰ্থন আঁচনিসমূহক একত্ৰিত কৰে আৰু সমসাময়িক বাণিজ্যিক প্ৰয়োজনীয়তাৰ সৈতে ইয়াক একত্ৰিত কৰে।

ভাৰতীয় ৰপ্তানিত বাধাৰ সৃষ্টি কৰা গাঁথনিগত প্ৰত্যাহ্বানসমূহ প্ৰত্যক্ষভাৱে মোকাবিলা কৰিবলৈ এই মিচন হাতত লোৱা হৈছে। ইয়াৰ ভিতৰত আছে:

• বাণিজ্যিক বিত্তীয় সাহায্যৰ সীমিত আৰু ব্যয়বহুল সুবিধা,
• আন্তঃৰাষ্ট্ৰীয় ৰপ্তানি মানদণ্ড মানি চলাৰ উচ্চ ব্যয়,
• অপৰ্যাপ্ত ৰপ্তানি ব্ৰেণ্ডিং আৰু খণ্ডিত বজাৰ প্ৰৱেশ আৰু
• আভ্যন্তৰীণ আৰু কম ৰপ্তানি তীব্ৰতা থকা খণ্ডৰ ৰপ্তানিকাৰকৰ বাবে লজিষ্টিক সম্পৰ্কীয় অসুবিধা।

ইপিএমৰ অধীনত শেহতীয়াকৈ বিশ্বজুৰি শুল্ক বৃদ্ধিৰ ফলত ক্ষতিগ্ৰস্ত খণ্ড যেনে বস্ত্ৰ, চামৰা, ৰত্ন আৰু গহনা, অভিযান্ত্ৰিক সামগ্ৰী আৰু সাগৰীয় সামগ্ৰী আদিক অগ্ৰাধিকাৰভিত্তিক সাহায্য প্ৰদান কৰা হ’ব। এই ব্যৱস্থাসমূহে ৰপ্তানিৰ অৰ্ডাৰ ধৰি ৰখাত সহায় কৰিব, চাকৰি সুৰক্ষিত কৰিব আৰু নতুন ভৌগোলিক বৈচিত্ৰ্যতাক প্ৰসাৰিত কৰিব। বৈদেশিক বাণিজ্য সঞ্চালকালয়ে কাৰ্যকৰী সংস্থা হিচাপে কাম কৰিব, বৰ্তমানৰ বাণিজ্য ব্যৱস্থাৰ সৈতে সংযুক্ত এক নিৰ্দিষ্ট ডিজিটেল প্লেটফৰ্মৰ জৰিয়তে আবেদনৰ পৰা বিতৰণলৈকে সকলো প্ৰক্ৰিয়া পৰিচালনা কৰিব। মিছনৰ জৰিয়তে আশা কৰা হৈছে যে:

• এম এছ এম ইসমূহৰ বাবে সুলভ মূল্যৰ বাণিজ্যিক বিত্তীয় সাহায্যৰ সুবিধা প্ৰদান কৰা,
• অনুসৰণ আৰু প্ৰমাণীকৰণ সমৰ্থনৰ জৰিয়তে ৰপ্তানিৰ প্ৰস্তুতি বৃদ্ধি কৰা,
• ভাৰতীয় সামগ্ৰীৰ বজাৰ প্ৰৱেশ আৰু দৃশ্যমানতা উন্নত কৰা,
• অগতানুগতিক জিলা আৰু খণ্ডৰ পৰা ৰপ্তানি প্ৰসাৰ কৰা আৰু
• উৎপাদন, লজিষ্টিক আৰু সংশ্লিষ্ট সেৱাত নিয়োগ সৃষ্টি কৰা।

বিকশিত ভাৰত @ ২০৪৭ৰ দৃষ্টিভংগীৰ সৈতে সংগতি ৰাখি ইপিএম-এ ভাৰতৰ ৰপ্তানি আন্তঃগাঁথনিক অধিক সমাৱেশী, প্ৰযুক্তি-সক্ষম আৰু বিশ্বজুৰি প্ৰতিযোগিতামূলক কৰি তোলাৰ এক দূৰদৰ্শী প্ৰচেষ্টাক প্ৰতিনিধিত্ব কৰে।

*****

MJPS/BM/DB