U Myntri Rangbahduh ka ri u Narendra Modi u la plie paidbah bad buh maw nongrim ia ki kam pynroi kiba shongdor palat T. 60,000 klur ha Jharsuguda, Odisha mynta ka sngi. Haba ai jingkren ha ka jingialang, u Myntri Rangbahduh u la ai khublei ïa baroh ki kynrem ki lyndan kiba la don lang ha kane ka jingïalang. Haba ban jur ba ka jinglehkmen Navratri ka dang iaid mynta, u Modi u la pynpaw ba ha kine ki sngi lehkmen, u long uba donbok ban leit jngoh ia ka jaka kyntang jong ka Maa Samalei bad ka Maa Ramachandi bad ban iakynduh ia ki briew kiba don hangtei. U la kren shaphang ka jingdon jong bun ki longkmie bad ki para kynthei ha katei ka jingialang, da kaba ong ba ki jingkyrkhu jong ki, ki dei ka tyllong jong ka bor, da kaba ai khublei ia ki paidbah.

Haba pynkynmaw ba ha ka por jong ka elekshon sha ka Ïingdorbar Thawaiñ shisnem shiteng mynshwa, ki paidbah jong ka Odisha ki la rai ban ïaid shakhmat da ka jingkular kaba thymmai—sha ka Odisha kaba la roi, u Modi u la ïohi ia kata mynta ka sngi, ka Odisha ka nang kiew stet bha namar ka jingtreikam jong ki sorkar jong ki ha ka Sorkar Pdeng bad ka Jylla. U la pynbna ban sdang ia ki projek kiba shongdor da ki hajar klur na ka bynta ka roi ka par jong ka Odisha bad ka ri. U Modi u la pynpaw ia ka dur ba thymmai jong ka BSNL, kaba la rakhe ia ka jingsdang ia ki jingshakri 4G ba la shna hi hapoh ri. U la ong ba ka jingpyniar ïa ki IIT ha ki jylla bapher bapher ruh ka la sdang mynta ka sngi. Nalor kata, u la kren shaphang ka jingbuh maw nongrim bad jingplie paidbah ïa ki katto katne ki projek ha Odisha kiba ïadei bad ka pule puthi, ka jingkyntiew ïa ki sap, bad ki lad jingpyniasoh. U la kaweh lama ia ka rel Amrit Bharat kaba katkum ka juk mynta na Berhampur sha Surat, da kaba ban jur ia ka jingmyntoi kaba khraw ia ki paidbah. U Modi u la ai khublei ruh ïa ka jingdon lang jong u Myntri ka Tnad Rel jong ka Sorkar Pdeng, u Ashwini Vaishnaw uba la pynïasoh lyngba ka bor internet na Surat, Gujarat. U la ai khublei kyrpang ia ki briew jong ka Odisha na ka bynta kine ki kam pynroi baroh.

“Ka sorkar jong ngi ka shimkhia ban shakri bad pynkupbor ïa kiba duk basuk, bad ka jingthmu jong ngi ka long ban pynpoi ïa ki jingdonkam ba kongsan sha ki briew kiba duna ka ioh ka kot, kynthup ïa ki Dalit, ki jaitbynriew kiba sahdien, bad ki jaitbynriew riewlum”, la ong u Myntri Rangbahduh. U la ong ba ka prokram mynta ka sngi ka long kum ka jingpynshisha ia kane ka jingkular. U Modi u la ïasam ba u la ïoh ïa ka lad ban aiti ïa ki shithi mynjur sha ki nongïoh jingmyntoi hapoh ka Antyodaya Griha Yojana. U la ong ba haba ka longïing kaba duk ka ïoh ïa ka ïing kaba paka, ka pynkylla dur ym tang ïa ka mynta jong ki hynrei wat ïa ki pateng ban wan ruh. Da kaba ban jur ba ka sorkar jong ki ka la dep ban pynbiang palat saw klur tylli ki iing kiba paka sha ki longiing kiba duk ha kylleng ka ri, u Myntri Rangbah duh u la ong ha Odisha, dang shna shaid shaid da ki hajar tylli ki iing, bad u la ai jingiaroh ia u Myntri Rangbah ka Jylla u Mohan Majhi bad ka kynhun jong u na ka bynta ka jingtrei shitom kaba dei ban ai jingiaroh. U Myntri Rangbahduh u la pynbna ba mynta ka sngi, la jan sanphew hajar tylli ki longïing ki la ïoh jingmynjur ban shna ia ki ïing ba thymmai. Hapoh ka PM Janman Yojana, palat sawphew hajar tylli ki iing la mynjur na ka bynta ki longiing riewlum ha Odisha, kaba pynurlong ia ka jingangnud jong ki briew kiba shah ieh bein tam. U la kitbok kitrwiang ia baroh ki longïing kiba ïoh jingmyntoi.

Haba pynpaw ïa ka jingngeit kaba ianeh jong u ha ki bor bad ka sap jong ki briew jong ka Odisha, u Myntri Rangbahduh u la ong ba ka mariang ka la kyrkhu shibun ïa ka Odisha. Haba kubur ba ka Odisha ka la mad ïa ka jingduk da ki phew snem, u la pynskhem ba ka phew snem ban wan kan wanrah ïa ka jingroi jingpar na ka bynta ki briew jong ka. Ban pynurlong ia kane, ka sorkar ka wanrah ia ki projek kiba heh sha kane ka jylla. U la pynbna ba ka sorkar pdeng dang shen ka la mynjur ar tylli ki Semiconductor Unit na ka bynta ka Odisha, bad la thmu ruh ban buh ia ka Semiconductor Park, da kaba iaroh ia ka bor bad ka lad jong ki samla jong ka Odisha. U Modi u la thmu ïa ka lawei ha kaba ïa u chip barit ba pyndonkam ha ki phone, ki telebishon, ki refrigerator, ki computer, ki kali, bad bun kiwei pat ki tiar yn shna ha Odisha.

U Myntri Rangbahduh u la pynskhem biang ïa ka jingkut jingmut jong ka sorkar ban kot sha ka jinglah ban kyrshan hi dalade ha man la ki bynta—naduh ki chip haduh ki lieng. U la ong ba la shna ïa ka industrial corridor kaba heh naduh Paradip shaduh Jharsuguda. Haba ban jur ia ka jingdonkam ba kongsan jong ka jingshna lieng, u la ong ba kano kano ka ri kaba kwah ban ioh bor ha ka ioh ka kot ka dei ban bei tyngka ha kane ka bynta, namar ka ai jingmyntoi ia ka khaii pateng, ka teknoloji, bad ka jingshngain jong ka ri. U Modi u la batai ba ka jingdon ia ki lieng ba shna hi hapoh ri ka pynthikna ia ka jingtreikam kaba khlem jingthut ban wanrah-shalan wat ha ki por ba don ki jingeh ha ka pyrthei. U Myntri Rangbahduh u la pynbna ia ka sienjam kaba kongsan jong ka sorkar jong ki— ka song pisa kaba T.70,000 klur na ka bynta ban shna lieng ha India. U la antad ba kane kan khring T.4.5 lak klur ha ki jingbei tyngka, ban poi sha ki kam kum ka steel, ki kor ki bor, ki tiar elektrik, bad ki karkhana shna tiar, khamtam eh ban ai jingmyntoi ïa ki karkhana barit. U la pynpaw ba kane kan pynmih da ki million ki lad ioh kam ba thymmai bad kan wanrah ïa ki jingmyntoi ba kongsan ïa ki karkhana bad ki samla jong ka Odisha.

“Ka India ka la shim ia ka sienjam kaba kongsan na ka bynta ka jinglah ban kyrshan dalade”, la ong u Modi, da kaba pynkynmaw ba haba la wanrah ia ki jingshakri telecom kum ka 2G, 3G, bad 4G ha ka pyrthei, ka India ka la sahdien bad ka dang shaniah ha ki teknoloji nabar ri na ka bynta kine ki jingshakri. U la ban jur ba kum kane ka jinglong kam long kaba iahap ia ka ri, kaba la pynlong ia ka jingkut jingmut jong ka ri ban shna hi hapoh ka ri ia ki teknoloji telecom ba kongsan. U Myntri Rangbahduh u la pynpaw ka jingsngew sarong ba ka BSNL ka la jop ban pynmih ïa ka 4G technology kaba pura hapoh India. U la iaroh ia ka jingaiti, jingtrei shitom, bad jingtbit jong ka BSNL ha kaba wanrah ia kane ka mawjam. U la pynpaw shuh shuh ba ki kompeni India mynta ki la buh ia ka India napdeng ki san tylli ki ri ba la jied ha ka pyrthei kiba don pura ia ka teknoloji ba shna hi hapoh ka ri ban sdang ia ki jingshakri 4G.

U Myntri Rangbahduh u la kren shaphang ka jingjia ryngkhat ba ka BSNL ka rakhe ia ka jingdap 25 snem jong ka mynta ka sngi. Ha kane ka sngi kaba kongsan, u la ban jur ba lyngba ki jingpyrshang ba aiti lut jong ka BSNL bad ki nongiatreilang jong ka, ka India ka nang kiew shaphrang ban long ka jaka pdeng ban shna ia ki tiar ba iadei bad ka telecom ha ka pyrthei. U la ong ba ka long ka jingsarong ïa ka Odisha ba ïa ka 4G network ba la shna hi hapoh ri jong ka BSNL la pyllait paidbah na Jharsuguda, kaba kynthup ïa jan shi lak tylli ki tower 4G. Kine ki tower ki long kiba la buh ban sdang ia ka juk ba thymmai jong ka jingpyniasoh ha ki jaka ba jngai jong ka ri. U Modi u la ban jur ba ka jingpyniar ia ka teknoloji 4G kan ai jingmyntoi beit beit ia palat ar klur ngut ki briew ha ka ri baroh kawei. U la bynrap ba kumba laiphew hajar tylli ki shnong, kiba mynshwa kim don ia ka internet kaba stet, mynta kin ioh ia ka jingpyniasoh lyngba kane ka sienjam.

U Myntri Rangbahduh u la pynpaw ba da ki hajar tylli ki shnong ki ïasoh lang lyngba ka bor internet ban sakhi ïa kane ka sngi ba kongsan, ban sngap bad peit lyngba ka internet kaba stet. U la ong ba u Myntri sorkar pdeng ba dei peit ia ka Tnad Communication, u Jyotiraditya Scindia ruh u la iasohlang bad kane ka prokram na Assam.

Da kaba pynpaw ba ki jingshakri 4G ba shna hi hapoh ri jong ka BSNL kin ai jingmyntoi ïa ki thaiñ riewlum, ki shnong ba jngai, bad ki jaka lum, u Modi u la pynthikna ba ki briew ha kine ki thaiñ mynta kin ïoh ïa ki jingshakri digital kiba bha. Ki khynnah ha ki thain nongkyndong kin ioh ban iashim bynta ha ki online class, ki nongrep ha ki jaka ba jngai kin ioh ban peit ia ki dor jong ki mar rep, bad ki nongpang kin kham suk ban leit wad jingmut na ki doktor lyngba ka telemedicine. U Myntri Rangbahduh u la bynrap ba kane ka sienjam kan ai jingmyntoi shibun ruh ïa ki shipai jong ngi, kaba iarap ïa ki ban ïakren da kaba suk lyngba ka jingpynbha ïa ka jingpyniasoh.

Da kaba pynpaw ba ka India ka la dep ban pyntreikam ïa ki jingshakri 5G kiba stet tam, u Myntri Rangbahduh u la ong ba ki tower jong ka BSNL ba la plie mynta ka sngi ki long kiba la pynkhreh bha ban kyrshan ïa ki jingshakri 5G ruh kumjuh. U la ai khublei kyrpang ïa ka BSNL bad ïa baroh ki nongshong shnong ka ri ha kane ka sngi ba kongsan.

Haba ban jur ba u samla uba tbit bad ka kam wadbniah kaba khlain ki long kiba donkam na ka bynta ban tei ia ka Atmanirbhar Bharat, u Modi u la pynpaw ba kane ka dei ka jingthmu ba kongsan jong ka sorkar jong ki. U la pynpaw ia ka jingbei tyngka ka bym pat ju jia mynno mynno ruh ha ka pule puthi bad ka jingkyntiew ia ki sap ha kylleng ka ri, kynthup ia ka Odisha. U Myntri Rangbahduh u la pynbna ka jingpynkylla katkum ka juk mynta ia ki Engineering College bad ki Polytechnics, bad u la pyllait paidbah ruh ïa ka skhim kaba thymmai kaba la ai kyrteng ka MERITE ban kyrshan ïa kane ka jingpyrshang. Hapoh kane ka skhim yn pynlut da ki hajar klur ha ki jaka pule technical. U la ong ba kane kan pynduh noh ia ka jingpynbor ia ki samla ban leit sah sha ki sorbah kiba heh na ka bynta ka jingpule technical kaba bha. Ha ka jaka kata, kin ioh ia ki Lab kiba katkum ka juk mynta, ki jinghikai ia ki jingtbit ha ka pyrthei, bad ki lad ban sdang ia ki kam hapoh la ki jong ki shnong.

U Myntri Rangbahduh u la ong ba ki jingpyrshang ki bym pat ju jia mynno mynno ruh ki dang ïaid shakhmat ban pynthikna ba ki jingdonkam kin poi sha man la ka kam, man la ka shnong, bad man la u nongshong shnong jong ka ri. U la pynpaw ba la pynlong ïa ka jingbei tyngka kaba heh bha ban pynurlong ïa kane. Haba pyrkhat ia ki por ba la leit noh, u la ong ba ki briew ki tip bha ia ka jinglong jingman kaba mynshuwa, da kaba pynskhem ba ka liang pyrshah kam ju pynlehnohei ia ka lad ban pyndonkam bakla ia ki paidbah.

U Modi u la ong ba ha u snem 2014, haba ki paidbah ki la shaniah ha ka sorkar ïa ka lad ban shakri, ka jingsynshar jong ki ka la jop ban pynlait ïa ka ri na ka rukom pyndonkam bakla jong ka liang pyrshah. U la ong ba hapoh ka sorkar jong ki, ka la sdang ka juk ba thymmai jong ka jingkynshew pisa arshah bad ka jingkamai arshah. U la pynïapher ïa ki por ba la leit noh, da kaba kdew ba ha ka por jong ka jingsynshar ba mynshuwa, ki nongtrei bad ki nongkhaii ki hap ban siew khajna wat ha ki jingkamai haduh T.2 lak. Ha ka jingïapher, u la pynpaw ba mynta, ki riew shimet kiba kamai haduh T.12 lak shisnem kim donkam ban siew wat tang shi tyngka ruh ha ka khajna kamai kajih.

Haba kdew ba la pyntreikam ïa ki jingpynkylla thymmai ïa ka GST ha baroh kawei ka ri, kynthup ha Odisha, naduh ka 22 tarik u Nailur 2025, u Myntri Rangbahduh u la batai ïa kine ki jingpynkylla kum ka jingai sngewbha jong ka jingpynlang pisa na ka bynta baroh, khamtam eh ban pynlong ïa ki jinglut jingsep ha kaba iadei bad ka bam kaba kham duna dor na ka bynta ki kmie bad ki para kynthei. U la ong ba ka dor jong kiba bun ki mar ba kongsan ka la hiar bha. Haba pynshai da ka nuksa, u la batai ba kawei ka longïing ha Odisha kaba pynlut T.1 lak man la u snem ha ki marbam bad kiwei kiwei ki jingdonkam ba kongsan ka ju siew T.20,000 –T.25,000 ha ki khajna hapoh ka sorkar kaba synshar ha kata ka por shwa u snem 2014. Hadien ka jingwanrah ia ka GST da ka sorkar jong ki ha u snem 2017, kane ka khajna ka la hiar bad mynta, ka jingban khia ha ka jingsiew khajna ka la hiarbha, ha kaba ki longiing ki siew tang T.5,000– T. 6,000 man la u snem. U la ban jur ba haba ïanujor bad ka juk jong ka liang pyrshah, ki longïing mynta ki pynlang T.15,000– T.20,000 shisnem ha kum kine ki jinglut jingsep.

Haba pynskhem ba ka Odisha ka dei ka jaka jong ki nongrep bad pynpaw ba ka GST Savings Festival ka la long ka jingmyntoi shibun ia ki, u Myntri Rangbahduh u la pynkynmaw ba ha ka por jong ka liang pyrshah, ki nongrep ki hap ban siew khajna T.70,000 haba thied traktor. Da ka jingwanrah ia ka GST, la pynduna ia ka khajna, bad hapoh ka rukom siew GST thymmai, ki nongrep mynta ki tyngkai kumba T.40,000 ha kajuh ka traktor. U la bynrap ba ki kor ki bor ba pyndonkam na ka bynta ban thung kba mynta ka plie lad ban tyngkai T.15,000, ki power tiller T.10,000, bad ki mashin ot haduh T. 25,000. U Modi u la ban jur ba ka sorkar jong ki ka la pynduna shibun ia ki khajna ha ki tiar rep kiba bun jait.

Haba kdew ba ka Odisha ka dei ka jaka jong ki riewlum kiba bun, kiba shaniah ha ki mar khlaw na ka bynta ka kamai kajih, u Myntri Rangbahduh u la ong ba ka sorkar ka la dep ban trei na ka bynta ki nonglum sla kendu bad mynta ka la pynduna shibun ia ka GST halor kane ka mar, kaba pynthikna ia ka dor kaba kham bha na ka bynta ki nonglum. U la ban jur ba ka sorkar jong ki ka dang ai beit ïa ka jingpynlait khajna bad pynbun ïa ka jingkynshew pisa na ka bynta ki nongshong shnong, katba u la kynnoh ïa ka liang pyrshah ba ki dang bteng ïa ki rukom pyndonkam bakla. U Modi u la kynnoh ba ki sorkar ba la ialam da ki liang pyrshah ki dang iai bteng ban lute ia ki paidbah. U la pynpaw ba haba la pyntreikam ïa ki dor thymmai jong ka GST, la pynduna ruh ïa ka khajna na ka bynta u dewbilat khnang ban pynlong ïa ka jingtei bad maramot ïing kaba duna dor. U la kdew ba hadien ka 22 tarik Nailur, ki dor na ka bynta u dewbilat ka la hiar wat ha Himachal Pradesh ruh. Hynrei u la kam ba ka sorkar synshar ha Himachal ka la buh khajna shuh shuh ia u dewbilat, kaba la pynduh ia ki briew ia ka jingmyntoi. U Myntri Rangbahduh u la maham ba hangno hangno ba ka seng pyrshah ka synshar, ka jingshah ieh bein ka bud, bad kyntu ia ki nongshong shnong ban long kiba husiar ia ka seng.

U Modi u la ong ba ka GST Savings Festival ka la wanrah ka jingkmen kaba khraw ïa ki longkmie bad ki para kynthei. U la ban jur ba ka jingshakri ia ki longkmie bad ki khun kynthei ka dei ka mat ba kongsan jong ka sorkar, da kaba pynleit jingmut bha ha ka koit ka khiah jong ki. U la kubur ia ka jingaiti lut jong ki kmie na ka bynta la ka iing ka sem, da kaba kdew kumno ki kit ia kawei pa kawei ka jingeh ban iada ia la ki khun bad bunsien ki buhrieh ia la ki jong ki jingpang khnang ban lait na ka jingban khia ka iing ka sem da ka jinglut jingsep ha ka jingsumar. U Myntri Rangbahduh u la pynpaw ba dei thik na kane ka daw ba la sdang ïa ka Ayushman Bharat Yojana, kaba la ai jingmyntoi shibun ïa ki longkmie da kaba ai jingsumar khlem jingsiew haduh T. 5 lak.

Haba ban jur ba ka kmie kaba koit ba khiah ka ïalam sha ka longïing kaba khlaiñ, u Modi u la pynpaw ïa ka jingsdang ha ka ri baroh kawei ïa ka campaign “Swasth Nari, Sashakt Parivar” naduh ka 17 tarik u Nailur 2025. U la pyntip ba la pynlong palat 8 lak tylli ki medical camp ha kylleng ka ri hapoh kane ka sienjam, ha kaba ki la don palat lai klur ngut ki longkmie kiba leit ban ioh ia ka jingpeit bniah ha ka koit ka khiah. Kine ki camp ki pynsuk ban wad ia ki jingpang kum ka jingpang shini, breast cancer, tuberculosis, bad ka sickle cell anemia. U la kyntu ia baroh ki kmie, ki para kynthei, bad ki khun kynthei ha Odisha ba kin pynthikna ba kin ioh ia ka jingpeit bniah ia ka koit ka khiah jong ki.

U Myntri Rangbahduh u la pynpaw biang ba ka sorkar jong ki ka dang ïai trei ban kyntiew ïa ka bor jong ka ri bad ki nongshong shnong jong ka—la ka long lyngba ka jingpynlait khajna ne ka jingpynïasoh kaba katkum ka juk mynta—da kaba plie lad ïa ka jingsuk bad ka roi ka par. U la ong ba ka Odisha ka ïoh ïa ki jingmyntoi kiba khraw na kine ki jingpyrshang, ha kaba hynriew tylli ki rel Vande Bharat ki dang treikam mynta ha ka jylla bad ka jingpynkylla thymmai ka dang ïaid shakhmat hajan hynriewphew tylli ki steshon rel. U la bynrap ruh ba ka kad liengsuiñ Veer Surendra Sai ha Jharsuguda mynta ka la ïasoh bad ki katto katne ki nongbah ba heh ha kylleng ka ri India. Ka Odisha ka ioh ruh ia ka khajna kaba kham heh na ki marpoh khyndew bad ka jingtih mar poh khyndew. U Modi u la ong ba ka Subhadra Yojana ka dang kyrshan beit ïa ki longkmie ka Odisha. U la pynthikna ba ka Odisha ka don ha ka lynti jong ka jingkiew shaphrang bad pynthikna shuh shuh ia ka jingstet jong ka roi ka par. U la pynkut da kaba ai khublei kitbok kitrwiang ia baroh.

U Lat ka jylla Odisha, Dr. Hari Babu Kambhampati, Myntri Rangbah ka jylla Odisha, Mohan Charan Majhi, u Myntri Sorkar pdeng Jual Oram ki la iadonlang nalor kiwei kiwei ki kynrem ki lyndan ha kane ka jingialang. Katto katne ngut ki Myntri Sorkar Pdeng bad ki Myntri Rangbah na kylleng ka ri ki la iasoh lang bad ka prokram kaba mynta ka sngi lyngba ka videoconferencing.

Ka Nongrim

U Myntri Rangbahduh ka ri u Narendra Modi u la buh maw nongrim bad plie ia ki kam pynroi kiba bun kiba shongdor palat T.60,000 klur ha Jharsuguda. Kine ki projek ki kynthup ia ki kam telecommunications, ki lynti rel, ka pule puthi, ka koit ka khiah, ka jingkyntiew ia ka sap, ki kam shna iing ha ki jaka nongkyndong, bad kiwei kiwei.

Ha ka liang ka jingpyniasoh telecom, u Myntri Rangbahduh u la plie paidbah palat 97,500 tylli ki mobile 4G Tower ba la shna ha ka jinglut kaba T.37,000 klur eiei da ka swadeshi technology. Kane ka kynthup ïa palat 92,600 tylli ki jaka pyndonkam 4G teknoloji ba la pyllait da ka BSNL. Palat 18,900 tylli ki jaka 4G la bei tyngka hapoh ka Digital Bharat Nidhi ka ban pynïasoh ïa kumba 26,700 tylli ki shnong ki bym pat pyniasoh kiba don kham jngai, sha khappud, bad ki jaka ba shah ktah ha ki kam lehnoh, kaba shakri ïa palat 20 lak ngut ki nongpyndonkam ba thymmai. Kine ki tower ki dei kiba pyndonkam da ka bor solar, kaba pynlong ïa ki kum ka kynhun ba heh tam jong ka India jong ki jaka pynïaid telecom ba khuid bad ka sienjam shakhmat ha ka jingtei ba lah ban iaineh.

U Myntri Rangbahduh u la buh ia u maw nongrim bad aiti sha ka ri ia ki projek rel kiba kongsan ki ban kyntiew ia ka jingpyniasoh bad ka jingroi jong ka thain. Kine ki kynthup ïa u maw nongrim na ka bynta ka Rail Flyover ha Sambalpur–Sarla, ka jingaiti sha ka ri ka doubling Koraput–Baiguda line, bad ka Manabar–Koraput–Gorapur line. Kine ki projek kin kyntiew shibun ia ka jingkit ia ki mar bad ki nongleit nongwan ha Odisha bad ki jylla ba marjan, ban pynkhlain ia ki karkhana bad ka kam khaii pateng ha ka thain. Ha kane ka sngi, u Myntri Rangbahduh un pynher lama ruh ïa ka Amrit Bharat Express hapdeng ka Berhampur bad Udhna (Surat), kaba plie lad ia ka jingpynïasoh kaba duna dor bad kaba suk ha kylleng ki jylla, ban kyrshan ïa ka kam jngohkai pyrthei, ban thaw ïa ki lad ïoh kam ïoh jam, bad ban pynïasoh ïa ki distrik ba kongsan ha ka liang ka ioh ka kot.

U Myntri Rangbah duh u la buh ia ki mawnongrim ban pyniar ia 8 tylli ki IIT—ka Tirupati, Palakkad, Bhilai, Jammu, Dharwad, Jodhpur, Patna, bad Indore—ha ka jingbei tyngka kaba T.11,000 klur. Ka jingpyniar kan plie lad na ka bynta 10,000 ngut ki samla pule ba thymmai ha ki saw snem ban wan bad kan plie 8 tylli ki jaka wad bniah kiba katkum ka juk mynta, da kaba pynkhlain ïa ka rukom saindur thymmai jong ka India bad kan ai ka jingkyrshan kaba khlaiñ ïa ka jingwad bniah bad ka roi ka par.

U Myntri Rangbahduh u la plie paidbah ia ka skhim MERITE kaba la shna khnang ban kyntiew ia ka jingbha, ka jinglong ryntih, ka jingwad bniah, bad ka jingsaindur thymmai ha ki 275 tylli ki jaka pule engineering bad polytechnic ha kylleng ka ri.

U Myntri Rangbahduh u la pyllait paidbah ruh ia ka Odisha Skill Development Project Phase II ka ban seng ia ki World Skill Centre ha Sambalpur bad Berhampur, kaba kynthup ia ki kam ba dang mih kum ka AgriTech, Renewable Energy, Retail, Marine, bad Hospitality. Shuh shuh, yn kyntiew kyrdan ia san tylli ki ITI sha ki ITI Utkarsh, 25 tylli ki ITI yn shna kum ki Centre of Excellence, bad kawei ka Precision Engineering Building kaba thymmai kan ai ia ki jinghikai ha ka liang ka teknical.

Ban kyntiew ia ka jingpule digital ha ka jylla, u Myntri Rangbahduh u la aiti ia ki jingdonkam Wi-Fi ha 130 tylli ki jaka pule ba kham shalor, kaba ai ia ka jinglah ban ioh ia ki data khlem jingsiew man ka sngi ban ai jingmyntoi ia palat 2.5 lak ngut ki samla pule.

Ki jingdon jingem ha kaba iadei bad ka koit ka khiah ha Odisha ruh kin ïoh ïa ka jingkyntiew kaba kongsan ha ka jingwan u Myntri Rangbahduh. U la buh ïa u maw nongrim ban kyntiew kyrdan ïa ka MKCG Medical College ha Berhampur bad ka VIMSAR ha Sambhalpur sha ki Hospital ba kyrpang kiba katkum ka juk mynta. Ki jingai jingshakri ba la pynbha shuh shuh kin kynthup ïa ka jingkyntiew ka jingdon ki jaka thiah, ki trauma care unit, ki dental college, ki jingai jingsumar ïa ki kmie bad ki khunlung, bad ka jingpyniar ïa ki lad pule puthi, ban pynthikna ïa ka jingshakri ba pura na ka bynta ki briew jong ka Odisha.

Nalor kane, u Myntri Rangbahduh u la sam ruh ïa ki sanction order sha 50 hajar ngut ki nongïoh jingmyntoi hapoh ka Antyodaya Gruha Yojana. Ka skhim ka pynbiang ki iing kiba paka bad ka jingiarap pisa sha ki longiing ha ki jaka nongkyndong kiba iakynduh jingeh, kynthup ia ki briew kiba don jingduna ha ki dkhot met, ki longkmie kiba la iap lok, ki riew shimet kiba pang ba shitom, bad kiba shah ktah ha ki jingjia lynshop ki bor ka mariang. Kane ka sienjam ka pyni ia ka jingangnud jong ka sorkar ban pynthikna ia ka bha ka miat bad ka burom jong ki briew kiba duna ka ioh ka kot ha ka imlang sahlang.

***