প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা উরিসাগী ঝারসুগুরাদা লুপা করোর ৫০,০০০ হেনবগী তোঙান তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং শঙ্গাখ্রে
কেন্দ্র অমসুং রাজ্যাদা লৈরিবা ঐখোয়গী সরকারশিংনা উরিসাদা চাউখৎ-থৌরাংগী খোঙজেল য়াংখৎনবা থবক পায়খৎলে: প্রধান মন্ত্রী
লায়রবা, দলিতশিং, শোৎথরবা কাংলুপশিং অমসুং ত্রাইবেলশিংদা তঙাইফদ্রবা খুদোংচাবশিং পীনবা ঐখোয়না অকনবা মীৎয়েং চঙলে: প্রধান মন্ত্রী
কেন্দ্র সরকারনা উরিসাগীদমক সেমিকন্দক্তর য়ুনিত অনি মাংজৌননা অয়াবা পীখ্রে: প্রধান মন্ত্রী
অত্মনির্ভরগী মাইকৈদা থাংজিনবা অচৌবা খোঙথাং অমদা, বি.এস.এন.এলনা মপুংফানা লৈবাক অসিগী মশাগী ওইবা ৪-জি তেক্নোলোজি শেমগৎতুনা মালেমগী মকোক থোঙবা লৈবাক মঙাগী মনুংদা ভারত য়াওহনবগা লোয়ননা লৈবাক অসিনা শেমগৎচবা ৪-জি সর্বিস হৌদোক্কনি: প্রধান মন্ত্রীনা
Posted On:
27 SEP 2025 1:54PM by PIB Imphal
প্রধান মন্ত্রী শ্রী নরেন্দ্র মোদীনা উরিসাগী ঝারসুগুরাদা লুপা করোর ৫০,০০০ হেনবগী তোঙান তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং শঙ্গাখ্রে। থৌরম অদুদা শরুক য়াখিবা শক্নাইরবা মীওইশিংদা ইকায়খুম্নবা উৎলদুনা, প্রধান মন্ত্রীনা হায়খি শেংলবা নবরাত্রি কুহ্মৈ মনুংদা ইমা সমালৈ অমসুং ইমা রামাচান্দিগী শেংলবা লমদমদা লাকপা অমসুং মফম অসিদা তিল্লিবা মীয়ামগা উনবা অসি মহাক্কী লাইবক ফবনি। থৌরম অসিদা তিল্লিবা মশিং য়াম্লবা ইমাশিং অমসুং ইচলশিংগী থৌজালনা পাঙ্গলগী অশেংবা হৌরকফমনি।
প্রধান মন্ত্রীনা হায়খি চহি ১.৫ গী মমাঙদা এশেমব্লি মীখল মনুংদা, বিকসিত উরিসা অমগী মাইকৈদা চঙশিন্নবা উরিসাগী মীয়াম্না ৱাশক লৌখি। ঙসিদি, কেন্দ্র অমসুং রাজ্যদা মখোয়গী সরকারশিং লৈদুনা উরিসা য়াংনা চাউখৎলক্লি। উরিসা অমসুং লৈবাক্কী চাউখৎ-থৌরাংগীদমক লুপা করোর লিশিং কয়াগী প্রোজেকশিং হৌদোক্লে। বি.এস.এন.এলগী মশানা শেমগৎচবা ৪-জি সর্বিস হৌদোকপা ওইনা বি.এস.এন.এলগী অনৌবা শক্লোন অমা প্রধান মন্ত্রীনা মাইখুম হাংদোকখ্রে। ঙসি রাজ্য কয়াদা আই.আই.তি কয়া পাকথোক-চাউথোকপগী থবকশিং হৌদোক্লে। উরিসাদা লাইরিক-লাইশু, স্কিল হেনগৎহনবা অমসুং লম্বী-থোঙগা মরী লৈনবা প্রোজেক কয়া উরেপ-উয়ুং তম্লে অমসুং শঙ্গারে। মহাক্না বেরহাম্পুরদগী সুরত ফাওবগী অনৌবা অমৃত ভারত ত্রেন লমথাখ্রে। থৌরম অসি গুজরাতকী সুরত্তগী রেলৱেজ, ইনফোর্মেসন অমসুং ব্রোদকাষ্টিং, ইলেক্ত্রোনিক্স অমসুং আই.তিগী য়ুনিয়ন মিনিষ্টর শ্রী অশ্বিনি বৈষ্ণব ভর্চুএল ওইনা শরুক য়াখি। চাউখৎ-থৌরাংগী থবকশিং অসিগীদমক প্রধান মন্ত্রীনা উরিসাগী মীয়ামদা হরাওবা ফোঙদোকখি।
প্রধান মন্ত্রীনা হায়খি লায়রবা, দলিতশিং, শোৎথরবা কাংলুপশিং অমসুং ত্রাইবেলশিংদা তঙাইফদ্রবা খুদোংচাবশিং পীনবা ঐখোয়না অকনবা মীৎয়েং চঙলে। ঙসিগী থৌরম অসি থাজবা পীখিবা অদুগী খুদম অমনি। অন্তয়োদয়া গ্রিহ য়োজনাগী মখাদা এপ্রুবেল লেত্তরশিং বেনিফিসরিশিংদা য়েন্থোকপগী খুদোংচাবা ফংলে। লায়রবা ইমুং অমনা পাক্কাগী য়ুম অমা ফংবা মতমদা, মসিনা মখোয়গী হৌজিক্কী ফিবম অওনবা পুরকপা খক নত্তনা তুংগী মীরোলশিংগীসু অওনবা পুরকখি। মখোয়গী সরকারনা লৈবাক শীনবা থুংনা লায়রবা ইমুংশিংদা য়ুম করোর ৪ হেন্না ফংহনখ্রে। উরিসাদা য়ুম লিশিং কয়া য়াংনা শাগৎলি অমসুং মসিগীদমক প্রধান মন্ত্রীনা চীফ মিনিষ্টর শ্রী মোহন মাঝি অমসুং মহাক্কী কাংবু থাগৎপা ফোঙদোকখি। প্রধান মন্ত্রীনা হায়খি ঙসি ইমুং লিশিং ৫০ রোম অনৌবা য়ুমশিংগী অয়াবা ফংলে। পি.এম জনমন য়োজনাগী মখাদা, উরিসাদা ত্রাইবেল ইমুংশিংগী য়ুম লিশিং ৪০ হেন্না সেঙ্কসন তৌরে। কান্নবা ফংলবা ইমুংশিংদা প্রধান মন্ত্রীনা মহাক্কী য়াইফ পাউজেল পীখি।
উরিসাগী মীয়ামগী তৌবা ঙম্বা অমসুং হৈথোই-শিংথোইবদা থম্লিবা মহাক্কী থাজবা ফোঙদোক্লদুনা, প্রধান মন্ত্রীনা হায়খি মহৌশানা উরিসাদা থৌজাল মরাংকাইনা পীরে। চহি কয়া উরিসা লায়রবা মায়োক্নদুনা লাকখি, লাক্লিবা চহি ১০ অসিদা রাজ্য অসিগী মীয়ামগী য়াইফনবা থবক পায়খৎকনি। পান্দম অসি ফংনবগীদমক, সরকারনা রাজ্য অসিদা অচৌবা প্রোজেকশিং পায়খৎলিবনি। কেন্দ্র সরকারনা উরিসাগীদমক সেমিকন্দক্তর য়ুনিত অনি অয়াবা পীখ্রে অমসুং সেমিকন্দক্তর পার্ক অমসু লিংখৎলগনি। মসি উরিসাগী নহারোলশিংগী মপাঙ্গল অমসুং তৌবা ঙম্বদগী ওইরকপনি। লাক্কদৌরিবা মতমদা ফোনশিং, তেলিবিজনশিং, রেফ্রিজিরেতরশিং, কম্পুতরশিং, কারশিং অমসুং অতোপ্পা দিভাইসশিংদা উরিসাদা শাবা চিপশিং শীজিন্নরগনি।
প্রধান মন্ত্রীনা হায়খি চিপশিংদগী হৌরগা জহাজশিং ফাওবদা-হিরম খুদিংমক্ত অত্মনির্ভর ওইবা ঙম্নবা সরকারনা থবক পায়খৎলে। পারাদিপতগী ঝারসুগুরা ফাওবদা পাক-চাউরবা ইন্দষ্ট্রিয়েল কোরিদোর অমা শেমগৎলে। জহাজ শাবা অসি য়াম্না মরুওই। শেন-থুমগী ফিবম ফগৎনবা হোৎনরিবা লৈবাক খুদিংমক্না হিরম অসিদা শেন থাগদবনি, মসিনা ললোন-ইতিক, তেক্নোলোজি অমসুং লৈবাক্কী সেকুরিতিদা কান্নবা পী। লৈবাক অসিদা শাজবা জহাজশিং লৈবনা মালেমগী খুদোংচাদবা মনুংদা অপনবা লৈতনা পুশিল্লকপা-থাদোকপা ঙমহল্লি। ভারত্ত জহাজ শানবা লুপা করোর ৭০,০০০ গী পেকেজ অমা মখোয়গী সরকারনা পায়খৎলে। মসিদা লুপা করোর লাখ ৪.৫ থাদরক্কনি, ষ্টিল, মেছিন্নরি, ইলেক্ত্রোনিক্স অমসুং মেনুফেকচরিং সেক্তরশিং য়ৌহন্দুনা মরুওইনা অপীকপা অমসুং য়ুমগী উদ্যোগশিং কান্নবা ফংগনি। মসিনা অনৌবা থবক মিল্লিয়ন কয়া ফংহনগনি অমসুং উরিসাগী উদ্যোগশিং অমসুং নহারোলশিংদা খুদোংচাবা কয়া পীগনি।
প্রধান মন্ত্রীনা হায়খি অত্মনির্ভরগী মাইকৈদা ভারতনা মরুওইবা খোঙথাং অমা থাংজিল্লে। মালেমগী ওইনা ২-জি, ৩-জি অমসুং ৪-জিগুম্বা তেলিকোম সর্বিসশিং চৎনখ্রবদা, ভারতনা মনিংদা লৈহৌখি অমসুং হায়রিবা থবকশিং অসিগীদমক মপান লৈবাক্কী তেক্নোলোজিগী মখা পোনখি। অসিগুম্বা ফিবম অসি লৈবাক অসিগী ওইনা চুনদে, মসিনা লৈবাক অসিদা মশানা তঙাইফদবা তেলিকোম তেক্নোলোজি শেমগৎনবা লৈবাক্কী ৱারেপ অমা লৌহল্লে। বি.এস.এন.এলনা লৈবাক অসিদা মাইপাক্না ৪-জি তেক্নোলোজি মপুংফানা শেমগৎলে। খুমাঙচাউশিনবা অসিগীদমক বি.এস.এন.এলগী কৎথোকপা, খাংবা কনবা অমসুং হৈথোই-শিংথোইবা থাগৎলি। অত্মনির্ভরগী মাইকৈদা থাংজিনবা অচৌবা খোঙথাং অমদা, বি.এস.এন.এলনা মপুংফানা লৈবাক অসিগী মশাগী ওইবা ৪-জি তেক্নোলোজি শেমগৎতুনা মালেমগী মকোক থোঙবা লৈবাক মঙাগী মনুংদা ভারত য়াওহনবগা লোয়ননা লৈবাক অসিনা শেমগৎচবা ৪-জি সর্বিস হৌদোক্লে।
প্রধান মন্ত্রীনা হায়খি ঙসি বি.এস.এন.এলগী ২৫ শুবা মপোক কুমওনসু থোক্লে। পুৱারি ওইরবা থৌরম অসিদা, বি.এস.এন.এল অমসুং মসিগী খোঙলোয়শিংগী থবক্না, মালেমগী তেলিকোম মেনুফেকচরিং হব অমা ওইনবা মাইকৈদা ভারত চঙশিল্লি। ৪-জি তৱার লাখ ১ রোমদা, ঝারসুগুরাদগী বি.এস.এন.এলনা শেমগৎচবা ৪-জি নেতৱার্ক হৌদোকপা অসি উরিসাগী চাউথোক্নবা মচাক অমনি। হায়রিবা তৱারশিং অসিনা লৈবাক্কী মনুং-হুঞ্জিনবা মফমশিংদা নেতৱার্ক ফংহল্লগনি। ৪-জি তেক্নোলোজি পাকথোক-চাউথোকপা অসিনা লৈবাক শীনবা থুংবগী মীওই করোর অনি হেন্না কান্নবা ফংলগনি। অয়াংবা ইন্তরনেত ফংদ্রিবা খুঙ্গং লিশিং ৩০ রোম হৌজিক থবক অসিদগী অয়াংবা ইন্তরনেত ফংলগনি। পুৱারি ওইরবা নুমিৎ অসি য়েংনবা, তানবা অয়াংবা ইন্তরনেতকী খুৎথাংদা খুঙ্গং লিশিং কয়া ভর্চুএল ওইনা শম্নরে। কম্মুনিকেসনগী য়ুনিয়ন মিনিষ্টর শ্রী জয়তিরাদিত্য সিন্দিয়াসু অসামদগী শরুক য়ারি।
প্রধান মন্ত্রীনা হায়খি বি.এস.এন.এল মশানা শেমগৎচবা ৪-জি সর্বিসনা ত্রাইবেলগী লমদমশিং, অরাপ্পা খুঙ্গংশিং অমসুং চীংগী লমদমশিংদা কান্নবা পীগনি। হায়রিবা লমদমশিং অসিদা লৈরিবা মীওইশিং হৌজিক অফবা দিজিতেল সর্বিস ফংলগনি। খুঙ্গংগী অঙাংশিং ওনলাইন ক্লাস য়াওবা ঙম্লগনি, অথাপ্পা মফমশিংদা লৈরিবা লৌমীশিং মহৈ-মরোংগী মমল খঙবা ঙম্লগনি অমসুং তেলিমেদিসিনগী খুৎথাংদা অনাবশিং দোক্তরশিংগা ৱারি শানবা লাইহল্লগনি। থবক অসিনা ঐখোয়গী আমর্দ ফোর্স পর্সোনেলশিংদা অশোই-অঙাম লৈতনা পাউ ফাওনবা ঙমহল্লগনি। ভারতনা মাংজৌননা ৫-জি সর্বিসশিং হৌদোকখ্রে। ঙসি শঙ্গারিবা বি.এস.এন.এল তৱারশিং অসি ৫-জি সর্বিস য়ানবা থৌরাং তৌখ্রবনি। পুৱারি ওইরবা থৌরম অসিগীদমক বি.এস.এন.এল অমসুং লৈবাক অসিগী মীয়াম প্রধান মন্ত্রীনা হরাওবা ফোঙদোকখি।
প্রধান মন্ত্রীনা হায়খি অত্মনির্ভর ভারত অমা ওইহন্নবা হৈথোই-শিংথোইবা নহারোলশিং অমসুং অফবা থিজিনবগী থবকশিং পায়খৎপা অসি মখোয়গী সরকারগী মরুওইবা অমনি। উরিসা য়াওনা লৈবাক শীনবা থুংনা মমাঙদা অমুক্ত ওইখিদ্রিবা মওংদা লাইরিক-লাইশু অমসুং স্কিল দিবলপমেন্তদা শেন থাদরে। ইঞ্জিনিয়ারিং কোলেজশিং অমসুং পোলিতেক্নিকশিং মতমগা চুন্না শেমগৎলে অমসুং মখোয়গী থবকশিং মতেং পাংনবা মেরাইত কৌবা স্কিম অমা হৌদোক্লে। স্কিম অসিগী মখাদা, তেক্নিকেল ইজুকেসনগী মহৈলোয়শঙশিংদা লুপা করোর লিশিং কয়া থাদগনি। মসিনা নহারোলশিং অফবা তেক্নিকেল ইজুকেসন ফংনবা অচৌবা সহরশিংদা চৎখিবদগী কনবা ঙমগনি। মসিগী মহুত্ত, মখোয়না মশাগী সহরশিং মনুংদা অনৌবা লেবশিং, মালেমগী স্কিল ত্রেনিং অমসুং ষ্টার্দঅপকী খুদোংচাবশিং ফংগনি। খুদোংচাবশিং অদু লৈবাক অসিগী হিরম খুদিং, কাংলুপ খুদিং অমসুং মীওই খুদিং ফংনবা থবকশিং পায়খৎলে। মমাঙগী ফিবমশিং মীয়াম্না খঙলে অমসুং মীয়াম ওৎ-নৈনবা খুদোংচাবা অমা ওপোজিসন্না কৈদৌঙৈদা মাঙহনখিদে।
প্রধান মন্ত্রীনা হায়খি মীয়ামগী থবক তৌনবা ২০১৪ দা মীয়াম্না সরকারদা খুদোংচাবা পীবদগী, মখোয়গী লৈঙাক্না মাইপাক্না লৈবাক অসি ওপোজিসনগী মীওৎ-মীনৈদগী মনিংতমহল্লে। মখোয়গী সরকার মখাদা, শেন তুংশিনবা শরুক অনি হেনগৎপা অমসু শেন তানবা শরুক অনি হেনগৎপা যুগ অমা হৌরে। মমাঙগী সরকারশিংগী মতমদা সরকারগী থবক তৌবশিং অমসু ললোনবশিং লুপা লাখ ২ ফাওবা ইনকম তেক্স থিখি। মসিগী ওন্নবদা, ঙসিদি লনাই মীওইশিংনা চহি অমদা লুপা লাখ ১২ ফাওবা ইনকম তেক্স থিদ্রে।
প্রধান মন্ত্রীনা হায়খি উরিসা য়াওনা লৈবাক শীনবা থুংবদা সেপ্তেম্বর ২২, ২০২৫ দগী অনৌবা জি.এস.তি চৎনরে। মসিনা ইমাশিং অমসুং ইচলশিংদা চাকখুমগী চাদিং হন্থহল্লে। তঙাইফদবা পোৎলমশিংগী মমল হন্থরে। ২০১৪ গী মমাঙদা মতম অদুগী সরকারগী মখাদা, উরিসাদা ইমুং অমনা চহি অমদা অচা-অথকশিং লৈবদা লুপা লাখ ১ চাদিং তৌবদা, তেক্স ওইনা লুপা ২০,০০০ দগী লুপা ২৫,০০০ পীখি। ২০১৭ দা জি.এস.তি চৎনবদগী, তেক্সকী শেনফম অসি হন্থরে অমসুং হৌজিক ইমুংশিংনা চহি অমদা লুপা ৫,০০০-লুপা ৬,০০০ খক্ত পীরে। হৌজিক ইমুংশিংনা চহি অদমা লুপা ১৫,০০০-লুপা ২০,০০০ কনবা ঙম্লে।
প্রধান মন্ত্রীনা হায়খি লৌমীশিংগী লমদম অমা ওইরিবা উরিসাদা জি.এস.তি সেভিংস ফেষ্টিবেল য়াম্না কান্নরে। ওপোজিসনগী মতমদা ত্রেক্তর অমা লৈবদা লৌমীশিংনা লুপা ৭০,০০০ তেক্স ওইনা পীখি। জি.এস.তি চৎনবদগী তেক্স হন্থরে অমসুং অনৌবা জি.এস.তি চৎনবদগী হৌজিক লৌমীশিংনা ত্রেক্তর লৈবদা লুপা ৪০,০০০ কনবা ঙম্লে। হৌজিক লৌ লিংনবা মেছিন্দা লুপা ১৫,০০০, পৱার ত্রিল্লরশিংদা লুপা ১০,০০০ অমসুং লৌ য়ৈনবা মেছিন্দা লুপা ২৫,০০০ কনবা ঙম্লে। লৌউ-শিংউগী খুৎলায়শিংদা মখোয়গী সরকারনা তেক্সশিং মপুংফানা হন্থরে।
প্রধান মন্ত্রীনা হায়খি কেন্দু মনা খোম্বা উরিসাগী লৌমীশিংগীদমক সরকারনা থবক পায়খৎখ্রে অমসুং হৌজিক পোৎলম অসিদা জি.এস.তি হন্থবদগী লৌমীশিংনা মমল ওইজনা য়োনবা ফংলে। তেক্সকী অৱাবা লৈহন্দনবা অমসুং মীয়াম শেন তুংশিনবা হেনগৎহন্নবা মখোয়গী সরকারনা লেপ্তনা থবক পায়খৎলি। ওপোজিসন্না লুচিংবা সরকারশিংনা হৌজিক ফাওবা মীয়ামদগী শগুন তৌরি। অনৌবা জি.এস.তি রেতশিং চৎনবদগী বিলামাতিদা লৌবা তেক্স হন্থবদগী য়ুম শাবা অমসুং শেমজিনবা হোংলগনি। সেপ্তেম্বর ২২ গী মতুংদা, হিমাচল প্রদেসতা বিলামাতিগী মমল হন্থরে। ওপোজিসন দলনা পানবা খুদিংগী ওৎপা-নৈবা চৎথরকই অমসুং মীয়াম্না দল অসিদগী চেকশিনগদবনি। জি.এস.তি সেভিংস ফেষ্টিবেলনা ইমাশিং অমসুং ইচলশিং হরাওহল্লে। মখোয়গী হকশেলদা মীৎয়েং চঙদুনা নুপীশিংগী থবক পায়খৎপা অসি মখোয়গী সরকারগী মরুওইবনি। মমাশিংনা মখোয়গী ইমুংশিংগী কৎথোক্লি অমসুং মখোয়গী মচাশিং ঙাক-শেন্নবা অৱাবা কয়া মায়োক্নরি অমসুং লায়য়েংবদা শেন তিংদনবা মখোয় মশাগী অনাবা ফাওবা লোৎশিনখি। মরম অদুনা অয়ুস্মান ভারত য়োজনা হৌদোক্তুনা মসিনা লুপা লাখ ৫ ফাওবা লেম্না লায়য়েংবগী খুদোংচাবা পীদুনা নুপীশিংনা কান্নবা ফংলিবনি। মশা ফবা মমা অমনা মপাঙ্গল কনবা ইমুং অমা শেমগৎলি। সেপ্তেম্বর ১৭,২০২৫ দগী লৈবাক শীনবা থুংনা “শ্বস্থা নারী, সশক্ত পরিবার অভিয়ান” হৌদোকখ্রে। থবক অসিগী মখাদা লৈবাক শীনবা থুংনা হেল্থ কেম্প লাখ ৮ হেন্না পাংথোকখ্রে, নুপী করোর ৩ হেন্না হেল্থ চেক-অপ পাংথোকখ্রে। কেম্পশিং অসিনা দাইএবেতিস, ব্রিষ্ট কেন্সর, তি.বি অমসুং সিক্কল সেল এনেমিয়া লৈবরা হায়না খঙদোকপগী খুদোংচাবা পীরে। উরিসাগী ইমাশিং, ইচলশিং অমসুং ইচানুপীশিংনা মখোয়গী হকচাং চেক তৌগদবনি।
প্রধান মন্ত্রীনা হায়খি সরকারনা পায়খৎলিবা চাউখৎ-থৌরাংগী থবকশিংগী কান্নবশিং উরিসাগী মীয়াম ফংলে। রাজ্য অসিদা হৌজিক বন্দে ভারত ত্রেন তরুক চেল্লে অমসুং রেলৱে ষ্টেসন ৬০ রোম মতমগা চুন্না শেমগৎলি। ঝারসুগুরাদা লৈবা বীর সুরেন্দ্র সাই এয়রপোর্ত লৈবাক অসিগী সহর কয়াগা শম্নরে। উরিসানা মিনরেলশিং অমসুং মাইনিংদগী শেন য়াম্না ফংলে। সুভাদ্র য়োজননা হৌজিক উরিসাগী নুপীশিং শৌগৎলি। উরিসা চাউখৎপগী লম্বীদা চৎলি অমসুং চাউখৎপগী খোঙজেল মখা তানা য়াংখৎকনি। অরোইবদা মহাক্না মীয়ামদা মহাক্কী য়াইফ পাউজেল পীখি।
ঙসিগী থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা উরিসাগী রাজ্যপাল দোক্তর হরি বাবু কমভাম্পতি, উরিসাগী চীফ মিনিষ্টর শ্রী মোহন চরন মাঝি, য়ুনিয়ন মিনিষ্টর শ্রী জুয়াল ওরাম য়াওখি। ভিদিও কনফরেন্সকী খুৎথাংদা ঙসিগী থৌরম অসি লৈবাক্কী মফম কয়াদগী য়ুনিয়ন মিনিষ্টরশিং অমসুং চীফ মিনিষ্টরশিং শরুক য়াখি।
নুঙগীৱারোল
প্রধান মন্ত্রী শ্রী নরেন্দ্র মোদীনা উরিসাগী ঝারসুগুরাদা লুপা করোর ৫০,০০০ হেনবগী তোঙান তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং শঙ্গাখ্রে। প্রোজেকশিংগী মনুংদা তেলিকম্মুনিকেসন, রেলৱেজ, লাইরিক-লাইশু, অনা-লায়য়েং, স্কিল দিবলপমেন্ত অমসুং খুঙ্গংগী য়ুম শাবা য়াওরি।
তেলিকোম ফংহন্নবা হিরমদা, শ্বাদেসি তেক্নোলোজিনা লুপা করোর ৩৭,০০০ চঙনা শেমগৎপা মোবাইল 4G তৱার ৯৭,০০০ হেন্না প্রধান মন্ত্রীনা হৌদোকখ্রে। মসিগী মনুংদা বি.এস.এন.এলগী 4G তেক্নোলোজিগী মফম ৯২,৬০০ য়াওরি। দিজিতেল ভারত নিধিগী মখাদা শেমগৎপা 4G সাইত ১৮,৯০০ না মনুং-হুঞ্জিনবা, ঙমখৈ অমসুং লেফ-ৱিং এক্সত্রিজমনা শোকহল্লবা নেতৱার্ক ফংদ্রিবা খুঙ্গং ২৬,৭০০ হেন্না কন্নেক্সন ফংহনগনি অমসুং অনৌবা সবস্ক্রাইবর লাখ ২০ হেনবদা মোবাইল নেতৱার্ক ফংহনগনি। হায়রিবা তৱারশিং অদু সোলারনা মৈ পীবনি, মখোয় ভারতকী খ্বাইদগী চাউবা গ্রিন তেলিকোম সাইতশিংগী ক্লষ্টরনি অমসুং ষ্টেনেবল ইনফ্রাষ্ট্রকচরগী মাইকৈদা থাংজিনবা খোঙথাং অমনি।
প্রধান মন্ত্রীনা মরুওইবা রেলৱে প্রোজেকশিং উরেপ-উয়ুং তমখ্রে অমসুং মীয়ামদা কৎথোকখ্রে, মসিনা চৎথোক-চৎশিন নুংঙাইবা অমসুং লমদম অসি চাউখৎপা হেনগৎহনগনি। মখোয়গী মনুংদা সম্বলপুর-সরলাদা রেল ফ্লাইওভরগী উরেপ-উয়ুং তম্বা, কোরাতপুর-বাইগুদা লাইন অমসুং মনাবার-কোরাতপুর-গোরাপুর লাইন দবল ওইরবা মতুংদা মীয়ামদা কৎথোকপা য়াওরি। প্রোজেকশিং অসিনা উরিসা অমসুং থংনরিবা রাজ্যশিংদা পোৎ-চৈ অমসুং মী চৎথোক-চৎশিন ফগৎহনগনি, লমদম অসিগী উদ্যোগশিং অমসুং ললোন-ইতিক চাউখৎহনগনি। থৌরম অদুদা প্রধান মন্ত্রীনা বেরহাম্পুর অমসুং উধানা (সুরত) কী মরক্ত অমৃত ভারত এক্সপ্রেস লমথাখ্রে, মসিনা রাজ্য শীনবা থুংনা চৎথোক-চৎশিন নুংঙাইহনগনি, তুরিজম চাউখৎহনগনি, থবক ফংনবা খুদোংচাবশিং পীগনি অমসুং মরুওইবা শেন-থুমগী জিলাশিংগী শম্নহনগনি।
লুপা করোর ১১,০০০ রোম থাদদুনা ত্রিরুপতি, পালাক্কাদ, ভিলাই, জম্মু, ধরৱাদ, জোধপুর, পাত্না অমসুং ইন্দোরদা আই.আই.তি নিপান পাকথোক-চাউথোক্নবা প্রধান মন্ত্রীনা উরেপ-উয়ুং তমখ্রে। পাকথোক-চাউথোকপগী থবক অদুনা মথং চহি ৫ দা অনৌবা মহৈরোয় ১০,০০০ চনগনি অমসুং অনৌবা রিছার্স পার্ক নিপান লিংখৎকনি, মসিনা ভারতকী ইন্নোবেসনগী থবক ফগৎহনগনি অমসুং রিছার্স অমসুং দিবলপমেন্তগী লমদা অকনবা ইনোৎ পীগনি।
লৈবাক শীনবা থুংবগী ষ্টেৎ ইঞ্জিনিয়ারিং অমসুং পোলিতেক্নিক ইন্সতিতুৎশিং ফগৎনবা, মীওই খুদিংমক খুদোংচাবা ফংনবা, রিছার্স অমসুং ইন্নোবেনগীদমক প্রধান মন্ত্রীনা মেরাইত স্কিম হৌদোকখ্রে।
প্রধান মন্ত্রীনা উরিসা স্কিল দিবলপমেন্ত প্রোজেক ফেজ-২ হৌদোকখি, মসিনা এগ্রিতেক, রিন্যুএবল ইনর্জি, রিতেল, মেরিন অমসুং হোস্পিতেলিতিগুম্বা হিরমশিংদা সম্বলপুর অমসুং বেরহাম্পুরদা ৱার্ল্দ স্কিল সেন্তরশিং লিংখৎকনি। মখা তানা, আই.তি.আই মঙা উতকার্স আই.তি.আইদা ওনখৎকনি, আই.তি.আই ২৫ সেন্তরস ওফ এক্সলেন্স ওইনা শেমগৎকনি অমসু অনৌবা প্রিসিজন ইঞ্জিনিয়ারিং বিল্দিংনা অৱাংবা থাক্কী তেক্নিকেল ত্রেনিং পীগনি।
রাজ্য অসিদা তেক্নিকেল ইজুকেসন ফগৎনবা, প্রধান মন্ত্রীনা অৱাংবা থাক্কী মহৈলোয়শিং ১৩০ দা ৱাই.ফাই ফংহনবগী থবক হৌদোক্কনি, মসিনা মহৈরোয় লাখ ২.৫ দা লেম্না দেতা ফংহনখ্রে।
প্রধান মন্ত্রীগী খোঙচৎ মনুংদা উরিসাদা অনা-লায়য়েংগী ইনফ্রাষ্ট্রকচর শিংথাবা য়ানা ফগৎকনি। বেরহাম্পুরদা এম.কে.সি.জি মেদিকেল কোলেজ ফগৎনবা অমসুং সম্বলপুরদা বিমসার মালেম থাক্কী সুপর-স্পেসিলিতি হোস্পিতাল ওনখৎনবা প্রধান মন্ত্রীনা উরেপ-উয়ুং তমখ্রে। ফগৎহনগদৌরিবা খুদোংচাবশিং অদুগী মনুংদা ফমুং মশিং হেনগৎহনবা, ত্রোমা কিয়ার য়ুনিতশিং, দেন্তেল কোলেজশিং, মীরোনবীশিং অমসুং অঙাংশিংগী থবকশিং অমসুং একাদেমিক ইনফ্রাষ্ট্রকচর ফগৎহনবা য়াওরি। মসিনা উরিসাগী মীয়ামদা মপুংফাবা হকশেলগী থবকশিং ফংহনগনি।
মসিগী মথক্ত, প্রধান মন্ত্রীনা অন্তয়োদয়া গ্রুহা য়োজনাগী মখাদা বেনিফিসরি ৫০,০০০ দা সেঙ্কসন ওর্দরশিং য়েন্থোকখ্রে। স্কিম অসিনা হকচাংগী ফিবম চাদ্রবশিং, লুখ্রাবীশিং, য়াম্না কন্না নারবা মীওইশিং অমসুং মহৌশাগী ওইবা অমাং-অতানা শোকহল্লবা মীওইশিং য়াওনা খুঙ্গংগী লায়রবা ইমুংশিংদা পাক্কাগী য়ুমশিং অমসুং শেন্থং পীরি। খুন্নাইগী খ্বাইদগী তোল্লবা কাংলুপশিংগী য়াইফনবা অমসুং ইকায়খুম্নবা লৈনবা সরকারনা পায়খৎলিবা থবকশিংগী মমি থবক অসিদা তারে।
***
(Release ID: 2172195)
Visitor Counter : 9