U Myntri Sorkar Pdeng ba dei khmih ia ki tnad Kam Pohiing bad Cooperation, Amit Shah u la pynpaw ia ka jingsngewkmen haba la pynbna ba yn pynlong ia ka 2029 World Police and Fire Games ha India, bad u la ong ba kane ka dei ka burom ia baroh ki nongshong shnong jong ka ri.

Ha ka post ha ka rynsan X u Myntri Sorkar Pdeng ba dei khmih ia ki tnad Kam Pohiing bad Cooperation u la ong “Kane ka dei ka burom jong baroh ki nongshong shnong, ba la jied ia ka Bharat ban pynlong ia ka 2029 World Police and Fire Games. Ka jingjop ka Bharat ia ki jingtyrwa ban pynlong ia kane ka lympung ka dei ka jingithuh na ka pyrthei ia ki jingdon jingem jong ngi kiba iadei bad ki kam ialehkai ba la tei hapoh ka jingialam jong u Myntri Rangbah Duh Narendra Modi. La jied ia ka Ahmedabad ban pynlong ia kane ka lympung kaba wanrah lang ia ki pulit, ki nongpynlip ding bad ki nongai jingshakri ha ki kam ba sngewsih ba kin iakhun ha palat 50 jait ki jingialehkai bad kane ka dei ka dak jong ka jingkiew kyrdan kane ka nongbah kum ka jaka na ka bynta ki kam ialehkai.”

Ia kane ka World Police & Fire Games la pynlong shisien man ka ar snem naduh u snem 1985. Haduh mynta la pynlong 20 tylli ki bynta jong kane ka lympung ialehkai naduh ba la sdang ia kane ka lympung (USA-8 sien, Canada-5 sien, Europe-4 sien, UK-2 sien bad China-shisien). Kine ki jingialehkai ki long na ka bynta ki briew kiba dang shakri bad kiba la shongthait na ki kam Pulit / Kynhun Pynlip ding / Medical / Emergency / Disaster bad ki First responder, bad kiwei kiwei. Ka kynhun na India ka la ïashim bynta nyngkong eh ha kine ki jingïalehkai ha ka Adelaide World Police and Fire Games ha u snem 2007. Ia ka World Police & Fire Games kaba khatduh (ka sien kaba 20) la pynlong ha Winnipeg, Canada naduh ka 26 tarik u Naitung haduh ka 6 tarik u Nailar 2023, ha kaba 133 ngut ki nongïalehkai jong ki pulit India ki la jop 343 tylli ki takma kaba long ka rekod (Ksiar -224, Rupa -82, Rynnong-37).

Naduh ba ka la ïashim bynta ha u snem 2007, ka kynhun pulit ka India ka la ïoh ban khur palat 1400 tylli ki takma ha ki 8 tylli ki jingïalehkai. Ïa ka kynhun shipai jong ka ri India ban ïashim bynta ha ka World Police & Fire Games la jied katkum ka rukom lehkai jong ki ha ka All India Police Games kaba ju long man la u snem. Ka All India Police Sports Control Board, ka bor synshar ban pynlong ia ki jingialehkai jong ki pulit ha ka ri kaba don haduh 53 tylli ki seng dkhot naduh ki Central Armed Police Force (CAPF), ki tnad pulit jong ka jylla bad kiwei kiwei ki tnad pahara, ka ju pynlong 40 tylli ki lympung ialehkai jong ki pulit man la u snem. Ki nongjop takma ksiar ha ki jingialehkai bapher bapher ha ka All India Police Games ha u snem ki shah jied sha ka kynhun ka ban mihkhmat ia ka India ha ka World Police & Fire Games.

*****