Ka bynta ba nyngkong jong ka World Audio Visual and Entertainment Summit (WAVES 2025) ka la kut ha ka jingsawa kaba khraw mynta ka sngi ha Mumbai, da kaba ïohi ïa ka jingiashim bynta shitrhem na ki nongpyni, ki nongïalam ha ka kam, ki startup, ki nongthaw polisi, ki riewshemphang, bad ki paidbah nongshong shnong. Ka jingialang ka la mih kum ka jaka iakynduh kaba kongsan na ka bynta ka kam media bad ka jingpynbyrngia, kaba la khring ia ka jingiashim bynta na man la ka bynta jong ka kam — naduh ki barikor nongrwai ba pawnam bad ki nongpynmih prokram haduh ki nongsaindur ha ka teknoloji bad ki nongialam jong ki kompeni. Da ka jingïakhleh lang kaba shitrhem jong ki jingpyni, ki jingïakren, bad ki jingïatreilang B2B, kane ka jingïalang ka la sakhi ïa ka jingwan iashim bynta kaba phylla bad ka la pynskhem biang ïa ka kyrdan jong ka India kum ka Bor kaba dang kiew ha ka pyrthei ha ka kam media bad jingpynbyrngia.

Ka jingrakhe ia ka jingsaindur, ka teknoloji, bad ka jingiathuh khana ka la sdang da ka jingplie paidbah ia ka bynta ba nyngkong jong ka da u Myntri Rangbah duh ka ri u Narendra Modi ha ka jingialang kaba la pynlong ha Jio World Convention Centre. Ha ka jingai jingkren jong u ha ka jingialang plie, u Myntri Rangbah duh Modi u la ong ba ka WAVES kam dei tang ka kyrteng lyngkot, ka dei ka jingkylla jong ka kolshor, ka jingpynwandur bad ka jingpyniasoh ia ka pyrthei baroh kawei. U Myntri Rangbah duh u la ong ba ka India ka dang kiew kum ka jaka pdeng ha ka pyrthei na ka bynta ka jingpynmih phlim, digital content, gaming, ka riam ka beit, ka put ka tem bad ki live concert. U la kyntu ia ki nongsaindur kylleng ka pyrthei ban don don ka jingthrang kaba khraw bad ban iathuh ia ki jingiathuhkhana jong ki; sha ki nongbei tyngka ban bei tyngka ym tang ha ki rynsan, hynrei ha ki briew; bad sha ki samla jong ka India - ban iathuh ia ki jingiathuhkhana jong ki kiba shi billion ki bym pat lah ban iathuh sha ka pyrthei. Da kaba pynbna ïa ka WAVES kum ka jingsdang jong ka ïoh ka kot jong ka ri India, u la kyntu ïa ki samla ban ïalam ïa kane ka jingkiew stet bad ban pynlong ïa ka India kum ka jaka saindur ha ka pyrthei.

Ki jingiamir jingmut kiba kongsan bha

Da kaba rah shakhmat ia ka jingthmu jong u Myntri Rangbah duh, ka WAVES 2025, ha kine ki saw sngi ba la dep, ka la long kum ka rynsan ban iasam jingmut, ki sap, bad ki jingshemphang ha ki bynta bapher bapher. Ka jingïalang jong ka WAVES 2025 ka la long kum ka jaka ba kongsan na ka bynta ka jingïakren bad ka jingïatreilang, kaba la pynïasoh lang ïa ki nongïalam, ki nongsdang ha ka kam, ki nongthaw polisi, bad ki riew shemphang na kylleng ka pyrthei. Lyngba ki jingïalang plenary, ki jingiamir jingmut, bad ki masterclass, ka jingïalang ka la wad bniah ïa ki jingpynwandur ba thymmai bad ki buit ba dang mih kiba pynwandur ïa ka lawei jong ka kam Media & Pynbyrngia. Ki jingïalang ki la pynlah ïa ka jingïasam jingmut kaba don jingmut, kaba ïaid lyngba ki bynta bad ki jingstad ba kyrpang.

Ia a bynta ba nyngkong jong ka WAVES yn tip namar ki jingïamir jingmut kiba kongsan bha bad ka jingïakren kaba kynthup ïa ki phang kiba bun jait, kynthup ïa Broadcasting and Infotainment, ka AVGC-XR, Digital Media, bad ki phlim. Da palat 140 tylli ki jingïalang kiba la don palat 100 ngut ki nongkren nabar ri, kiba la pynphriang ha ki lai tylli ki hall ba kongsan (kawei pa kawei ka lah ban rung palat 1,000 ngut ki nongïashim bynta) bad sa san tylli ki hall kiba lah ban rung naduh 75 haduh 150 ngut, ka Summit ka la pynbiang ia ki kyrdan jong ki nongwan- ha kaba bun ki session ki dap smam.

Ki Plenary Session ki la don palat 50 tylli ki jingkren ba kongsan da ki riew pawkhmat kum u Mukesh Ambani, Ted Sarandos, Kiran Mazumdar-Shaw, Neal Mohan, Shantanu Narayen, Mark Read, Adam Mosseri, bad ka Nita Ambani. Ki jingshemphang jong ki, ki la ai ki jingïohi kiba pynhun shaphang ka kam pynbyrngia kaba nang kiew, ka jinglong jingman ka kam pynbna, bad ka jingpynkylla digital. Ki riewpawkhmat na ka kam phlim kynthup ia u Chiranjeevi, Mohanlal, Hema Malini, Akshay Kumar, Nagarjuna, Shah Rukh Khan, Deepika Padukone, Allu Arjun, bad Shekhar Kapur, bun na ki, kidei ruh ki dkhot jong ka WAVES Advisory Board, ki la iashim bynta ha ki jingiakren halor ka lawei jong ka kam cinema bad ka jingshna prokram ha ka juk jong ka virtual production bad artificial intelligence.

Ia ki 40 tylli ki masterclass ha ka WAVES 2025 la saindur khnang ban ai jinghikai bad ka jingwad bniah ba thymmai. Ki nongiashim bynta ki la iohi markhmat ia ki buit treikam jong ka karkhana lyngba ki session kum ka The Art of Acting da u Aamir Khan, ka Craft of Direction da u Farhan Akhtar, bad ka Insights into Filmmaking da u Michael Lehmann. Kiwei pat ki jingïalang ki la wad bniah ïa ki jingïathuhkhana kiba don ha lyndet kum ka jingshna ïa ka Panchayat da ka Amazon Prime, ka jingsaindur ïa ki AR lens, ka jingshna ïa ki AI avatar, bad ka jingshna ïa ki games da kaba pyndonkam ïa ka AI. Kine ki jingïalang ki pynbiang ïa ki riew shemphang bad ki nongsaindur da ka jingtip bad ki atiar ban long kiba la pynkhreh ha ka ïoh ka kot ba thymmai kaba nang kiew stet.

Ka WAVES ka don ruh 55 tylli ki breakout session, kiba ai ka rynsan ban ïakren sani halor ki phang pdeng ba kyrpang kum ka jingpynbna paidbah, digital media, OTT, AI, ka put ka tem, ki Khubor, ki jingpyni live im, Animation, Gaming, Virtual production, Comics, bad ka jingshna phlim. Kine ki jingïakren ki la wanrah lang ïa ki riew shemphang kiba la kham rangbah na ki kompeni ba pawnam kynthup ïa ka Meta, Google, Amazon, X, Snap, Spotify, DNEG, Netflix, bad NVIDIA, ryngkat bad ki nongmihkhmat na ki kynhun karkhana kum ka FICCI, CII, bad IMI. La saindur khnang ban pynshlur ia ki jingshemphang bad jingiatreilang kiba iadei bad ki bynta, ki jingiamir jingmut kiba pynbeit ia ki jingeh kiba kongsan bad peit bniah ia ki lynti ba thymmai na ka bynta ka jingkiew shaphrang bad jingsaindur thymmai.

Ka Waves Bazaar ka kamai T.1328 klur ha ki jingïateh kular ha ka kam khaii; iasoi ka sorkar Mahrashtra ia ki MoU ba shongdor T. 8000 klur ha ka kam M&E

Ka bynta ba nyngkong jong ka WAVES Bazaar, kaba la pynlong hapoh WAVES, ka la long ka jingjop kaba khraw namar ka la pynskhem ïalade kum ka rynsan kaba kongsan tam na ka bynta ka jingïatreilang ha ki kam saindur kylleng ka pyrthei. Ka la don ki jingiateh ha ka kam khaii lane ki kam ba shongdor T. 1328 klur ha ki bynta jong ka phlim, ka jingrwai, ka radio, VFX, bad kam shna animation. Na ka jingmih baroh kaba la antad, T. 971 klur ka la long tang na ki jingialang B2B. Ka bynta kaba kongsan jong ka Bazaar ka dei ka Iew jong ki nongthied-nongdie kaba la sakhi palat 3,000 tylli ki jingïalang B2B. Ha ka jingjop kaba khraw hapoh ka jingiatreilang jong ki ri ka pyrthei, ka Film India Screen Collective bad ka Screen Canterbury NZ na New Zealand ki la pynbna ia ka jingtyrwa iatreilang ban sdang ia ka Indian Film Festival kaba nyngkong eh ha New Zealand. U CEO jong ka Only Much Louder u Tushar Kumar bad u Alexander Zharov, CEO jong ka kompeni na Russia ka Gazprom Media ki la pynbna ïa ki jingïakren halor ka MoU ban ïatreilang ha ki tamasa bapher bapher bad ban pynmih lang ïa ki prokram comedy bad jingrwai ha Russia bad India ka la long sa kawei pat ka jingjop. Ka jingpynbna ïa ka jingïatreilang bun snem jong ka Prime Video & CJ ENM ka dei kawei pat ka bynta jong ka Bazaar namar la pynpaw ïa ka jingïatreilang kaba thmu ban sam ïa ki prokram ba pawnam jong ka ri Korea ha ka pyrthei baroh kawei. Kiwei pat ki mawmer ki kynthup ïa ka jingpynbna ïa ka phlim ‘Devi Chowdhurani,’ kaba la long ka phlim ba nyngkong eh jong ka India kaba la pynmih da ka Indo-UK, bad ka phlim ‘Violated’ ka ban long ka jingpynmih lang jong ka Fusion Flicks na UK bad ka JVD Films.

Ka sorkar Maharashtra ka la kyntiew ruh ia ka dor jong ka kam khaii ha kane ka jingialang da kaba soi ia ki MoU kiba shongdor T. 8,000 klur ha ka WAVES. Katba ïa ki MoU ba shongdor T.1,500 klur la ïasoi mar kawei bad ka University of York bad ka University of Western Australia, ka tnad karkhana jong ka jylla ka la ïasoi ïa ki MoU ba shongdor T. 3,000 klur bad T. 2,000 klur bad ka Prime Focus bad ka Godrej.

Ki Ri kiba long dkhot ki pdiang ïa ka ‘WAVES Declaration’ ha ka Global Media Dialogue 2025

Ka Global Media Dialogue 2025, kaba la pynlong ha ka World Audio Visual and Entertainment Summit (WAVES 2025) ha Mumbai, ka la long ka jingïalang kaba kongsan bha ha kaba la ïashim bynta na 77 tylli ki ri, kaba pynpaw ïa ka bynta ba kongsan jong ka India ha ka kam media bad ki jingpynbyrngia ha ka pyrthei. Ka jingiakren ka la pynpaw ia ka bor jong ki jingiatreilang hapdeng ki ri ha kaba kyntiew ia ka jingsaindur katba dang burom ia ki jingsngewthuh jong ka kolshor. Ki ri kiba long dkhot ki la pdiang lang ïa ka ‘WAVES Declaration’, kaba ban jur ïa ka jingdonkam kyrkieh ban pyndap ïa ka jingïapher ha ka digital bad ban pyndonkam ïa ka media ban kyntiew ïa ka jingsuk bad jingïatylli ha ka pyrthei. Ki jingiakren ki la pynpaw ia ka bynta kaba jylliew jong ki phlim ha kaba pyniatylli ia ki kolshor bapher bapher bad ka jingkiew ka jingdonkam jong ki khana shimet ha ka ioh ka kot jong ki nongsaindur, kaba la pynkhraw da ki jingkiew ha ka teknoloji.

U Dr. S. Jaishankar, Myntri kam bar ri jong ka sorkar pdeng, u la ban jur ia ka jingdonkam ban don ka jingiatreilang hapdeng ka teknoloji bad ka riti dustur, da kaba kyrshan ia ka jingpynkupbor ia ki samla lyngba ka jingkyntiew ia ki sap bad ka jingsaindur thymmai. U Ashwini Vaishnaw, Myntri jong ka sorkar pdeng ba dei khmih ia ka tnad Information & Broadcasting, u la pynpaw ïa ka jingktah kaba pynkylla ïa ka teknoloji ha ka jingshna prokram bad ka jingdonkam ban kyntiew ïa ki prokram ha ka thaiñ, ki jingïateh kular ban pynmih lang, bad ki sienjam ban bei tyngka lang. Ki jingiakop "Create ha India" jong ka India, kiba la lah ban ithuh ia palat 700 ngut ki nongsaindur kylleng ka pyrthei, ryngkat bad ka jingthmu ban pyniar ia ki sha ki 25 tylli ki ktien ha ka bynta ban wan. Kane ka jingialang ka la buh ia ka nongrim kaba skhem na ka bynta ka jingiatreilang ha ka pyrthei ha ka lawei jong ka kam media bad ki jingpynbyrngia, da kaba ban jur ia ka jingtbit ha ka jingthaw bad ka jingpynmih ia ki prokram.

WAVEX: Ka jingkyntiew ia ki Start-up kiba don ki jingthmu ha ki kam M&E

Ka WAVES Start-Up Accelerator ka la la jied ïa ki 30 tylli ki M&E Start-Up ban pyni ïa ki kam ba kyrpang jong ki sha ka kynhun jong ki nongbei tyngka kiba heh kum ka Lumikai, ka Jio, ka CABIL, ka WarmUp Ventures – napdeng ki 45 ngut ki nongbei tyngka ba kongsan kiba iadon bynta. Da ka jingpynrung kyrteng palat 1000 ngut, kane ka sienjam ka la wanrah ïa ki jingïakren ban bei tyngka kiba shongdor T. 50 klur kiba dang don ha ka jingpynkhreh. Lait na kane, palat 100 tylli ki Start-Up ki la pyni ia ki kam bad ki mar jong ki sha ki nongbei tyngka kiba lah ban wan bei tyngka ha ka jaka ba la pynkhreh kyrpang na ka bynta ki Start-Up. Ka WAVEX kum ka sienjam ka thmu ban thaw ïa ka rukom bei tyngka na ka bynta ki start up ba kin roi bad kiew da kaba thaw ïa ka kynhun jong ki nongbei tyngka kiba pynleit jingmut kyrpang ha ka liang ka Media bad ka kam pynbyrngia. Ki startup na ka Tier 1 bad Tier 2 ki la paw bha ha ka WAVEX bad ki nongseng jong ki ki la don ia ka bynta kaba pdeng. Ban pynsuk shuh shuh ia kum kine ki nongsaindur, ka WAVEX kan buh ia ka rynsan jong ki jaka pynroi ryngkat bad ki nonghikai ba aiti lut na ka bynta ka jingialam lynti bad ki nongbei tyngka na ka bynta ka jingbei tyngka ban sdang ia ki kam. Ka WAVEX ka long kaba kyrpang namar ka pynsuk ia ki jingmut ki bym pat don ia ka jingmih kaba lah ban iohi haduh mynta, hynrei ki don ia ka lad.

Pyllait ia ki kaiphod ba kongsan ha ka WAVES 2025

U Dr. L. Murugan, Myntri Khynnah ka tnad Information & Broadcasting and Parliamentary Affairs, u la pyllait paidbah ïa ki san tylli ki kaiphod ba kongsan ha ka jingïalang jong ka WAVES 2025 ha Mumbai. Kine ki kaiphod ki ai ka jingtip ba bniah shaphang ka kam media bad ka kam pynbyrngia jong ka India, kaba kynthup ïa ki bynta ba kongsan kum ka jingpynmih ïa ki prokram, ki polisi treikam, bad ki prokram live.

• Ka Statistical Handbook on Media & Entertainment 2024-25: Ka Statistical Handbook, ba la pynkhreh da ka tnad Information & Broadcasting, ka ai ïa ki jingshem kiba kordor kiba la pynshong nongrim ha ki jingtip shaphang ka kam media jong ka ri India. Ka pynpaw ia ki jinglong jingman jong ka jingroi ha ka kam pynbna paidbah, ka digital media, ki jingai syrnot ia ki phlim, bad ki jingshakri paidbah jong ki media, kaba pynbiang ia ki jingtip kaba kongsan na ka bynta ka jingthaw ia ki polisi ha ki por ban wan bad ki buit treikam ha kane ka kam kiba la pynshong nongrim ha ki sakhi.
• ‘From Content to Commerce’ da ka BCG: Ka Kaiphod jong ka Boston Consulting Group ka pyni ia ka jingkiew ka kam shna prokram jong ka India ha kaba la antad ba ki don 2 haduh 2.5 million ngut ki briew kiba shna prokram digital. Kine ki nongthaw prokram ki don bynta ha kumba $350 klur ka jingpynlut man la u snem, ryngkat bad ka jingkhein ba kan palat ia ka $1 trillion ha u snem 2030. Ka ban jur ia ka jingtei ia ki jingiatreilang kiba jrong samoi, ki jingiatreilang kiba neh ha ka jaka jong ki jingiakut bad ki nongsaindur kiba sahkut ha tang ki kam kamai.
• ‘A Studio Called India’ da ka Ernst & Young: Ka kaiphod jong ka Ernst & Young ka iohi ia ka India kum ka jaka pdeng jong ka jingshna prokram ha ka pyrthei, kaba pyndonkam ia ka jingpher jong ki ktien, ka kolshor kaba riewspah, bad ka jingstad ha ka liang ka teknoloji. Ka pynpaw ia ka jingmyntoi jong ka India kaba 40%-60% ha ka jinglut jingsep ha ki jingshakri jong ka jingpynwandur bad VFX bad ka jingdawa kaba nang kiew ha ka pyrthei na ka bynta ki prokram OTT jong ka ri India, kaba pynkhlain ia ka bynta jong ka India ha ka jingiadei jong ka kolshor ha ka pyrthei.
• Ka Legal Currents bad kaiphod Live Events Industry: Ka Legal Handbook jong ka Khaitan & Co. ka kynthup ïa ki mat kiba kongsan kum ka jingpynïaid iew bad ka jingbud ia ki kyndon da ki influencer, kaba ïarap ïa ki nongïashim bynta ha ki kam media ban bud ia ka rukom pynïaid kam jong ka India. Nalor kata, ka White Paper halor ka kam pynlong ia ki prokram live ha India ka batai bniah ïa ka jingkiew jong kane ka kam 15%, kaba wanrah ia ka jingdonkam ban kyntiew ia ki jingdon jingem bad ka jingpynsuk ia ka rukom ban ioh license ban kyrshan ia kane ka kam kaba dang kiew sted bha

Ka Indian Institute of Creative Technology: Ka National Centre of Excellence

Ka Indian Institute of Creative Technology (IICT)—  ka National Centre of Excellence kaba dang seng ha Mumbai ka la pynkhreh ban long u mawmer ha ka jingpynroi ia ka bor treikam na ka bynta ka ioh ka kot na ka kam shna prokram. La peit bniah ia ka kam AVGC-XR, bad ka jingseng ïa kane ka jaka pule la dei kaba la pynskhem ha ka sngi ba lai jong ka WAVES 2025. Ka WAVES ka la sakhi ruh ïa ka jingsoi ïa ki MoU ba kongsan bad ki kynhun kiba don bynta ha kane ka kam ban pynkylla ïa ka IICT sha ka jaka pule kaba pawnam ha ka pyrthei ha ka kam M&E. U Myntri ka sorkar pdeng, u Ashwini Vaishnaw, uba la pyllait paidbah ia kine ki jingiakut ba kongsan, u la ban jur halor ka jinglah jong ka India ban long nongïalam ha ka pyrthei ha ka liang ki ka media bad ki kam pynbyrngia, da kaba pynpaw ba ka IICT ka don ha ka lynti ban kiew sha ka jaka pule ba pawnam ha ka liang jong kane ka kam, kumba long ki IIT bad ki IIM kiba la kylla long ki nuksa ha ka liang ka teknoloji bad ki jinghikai ha ka jingpyniaid ia ki kam. Katto katne ki kompeni kiba la mih shakhmat na ka bynta ka jingïatreilang kaba jrong samoi ki long ka JioStar, ka Adobe, ka Google & YouTube, ka Meta, ka Wacom, ka Microsoft bad ka NVIDIA.

Create in India Challenge & CreatoSphere: Ka Jingrakhe ia ka Jingtbit ban Saindur

Kawei na ki mat ba kongsan jong ka WAVES 2025 ka dei ka jingpynkut kaba i shongkhia ia ka Create in India Challenge (CIC) Season 1, kaba la khring haduh shi lak ngut ki nongpynrung kyrteng na palat 60 tylli ki ri. La sdang ia kane kum ka kam kaba kyrpang hapoh ka WAVES, bad ka CIC ka la pynïasoh lang ïa ki nongthaw kiba ha ka rta, ki jaka, bad ki jait jingpule bapher bapher, kiba kynthup ïa ki jingpynwandur, ka XR, ka gaming, ka AI, ka jingshna phlim, ka jingrwai digital, bad kiwei kiwei. Kane ka sienjam ka la pynkylla ia uwei pa uwei u nongsaindur uba la iashim bynta ban long kiba la pawnam.

Na ki 32 tylli ki jingiakhun la mih 750+ ngut ki nongïashimbynta kiba la poi sha ka bynta ba khatduh, kynthup ïa 1100+ ngut ki nongïashim bynta nabar ri. Kine ki briew kiba don sap ki la pyni ia ki kam jong ki ha Creatosphere, ka jaka ba la aiti kyrpang ha ka WAVES, ha kaba ki la pyni ia ki projek jong ki, ki lah ban iakynduh bad ki nongialam ha ka kam na ka bynta ki lad ban iatreilang ha ki por ban wan.

Kane kam dei tang ka jingïakop, ka Create in India ka la kylla sha ka jingïakhih kaba rakhe ïa ka jingiar ki kam, ka bor jong ki samla, bad ka jingïathuhkhana kaba don tynrai ha ka riti dustur bad ka teknoloji. Lyngba ki nongïashim bynta ba khatduh kiba don naduh ka rta kaba 12 haduh 66 snem, bad ka jingïashim bynta kaba khlaiñ na baroh ki jylla bad ki UT jong ka ri India, kane ka sienjam ka la pynpaw ïa ka jingïadon bynta lang bad ka jingangnud. Ka Creatosphere ka la long ruh ka jaka sdang ia ki phang kum ka jingsaindur thymmai, ka jingïathuhkhana, bad ki prokram kiba la pynkhreh na ka bynta ka lawei kiba pyni ka jingïohi jngai shaphang ka India kaba thymmai ha ki por ban wan. Kumba u myntri ka sorkar pdeng u Ashwini Vaishnaw u la ong ha ka por ba ai khusnam ha ka CIC, “Ka jingiaid lynti ka dang shu sdang.” Bad lyngba ki sienjam kum ka Indian Institute of Creative Technology ka ban wan, ka jingkiew shaphrang ka long kaba dang khlain shuh shuh.

8^th National Community Radio Sammelan bad ki Khusnam National Award na ka bynta ki CR

Ka ka pynlong kum shi bynta jong ka WAVES, ka National Community Radio Conference kaba 8 ha kaba u myntri sorkar pdeng u Dr. U Dr L. Murugan u la pynkup burom ia ki nongjop bad u la ong ba kane ka jingialang jong ka ri ka long ban pynkhlain ia ka kam media ha India lyngba ka jingpynwandur thymmai, ka jingai bynta lang, bad ka jingktah. Kane ka jingialang ka la lum lang ia ki nongmihkhmat na palat 400 tylli ki Community Radio (CR) Station ha kylleng ka ri ha kawei ka rynsan ban ai lad ia ka jingiakren bad ka jingiatreilang. Kumba ka long mynta ki don 531 tylli ki CR Station ha kylleng ka ri.

Bharat Pavilion – ka jingiaid lynti ka India na ka Kala sha ka Code

Ka Bharat Pavilion, ka jaka peitkai kaba bun bynta ka la ai lad ïa ki nongwan jngohkai ban sakhi ia ka jingïaid lynti jong ki rukom ïathuhkhana jong ka ri India ha ka WAVES 2025, ka la ïoh ïa ka jingpdiang shit rhem na ki paidbah. Ka Pavilion, hapoh ka phang "Na ka Kala sha ka Code", ka la ai ia ka lad ban iohi ka jingkylla jong ka India ha ki kam media bad ki kam pynbyrngia—naduh ki rukom iathuh khana da ka ktien haduh ki teknoloji katkum ka juk mynta.

Ka Pavillion ka la pyni ia ka mynsiem jong ka ri India, da kaba pyniadei ia ka kolshor ba riewspah jong ngi bad ki jinglong jingman ba thymmai ha ka liang ka jingstad saian. Ha ka sngi plie ia ka WAVES 2025, u Myntri Rangbahduh ka ri u Narendra Modi u la leit jngoh ia kane ka Pavilion. U Myntri Rangbah ka Jylla Maharashtra, u Devendra Fadnavis, u Myntri kam bar ri u S. Jaishankar, u Myntri ka sorkar pdeng u Ashwini Vaishnaw bad bun kiwei kiwei ki kynrem ki lyndan ki la leit jngoh ïa kane ka pavilion bad ki la ïaroh ïa ka bynta jong ka ha kaba ïathuh khana shaphang ka Bharat. Ka pavilion ka la ioh ruh ia ki nongpeitkai kiba bun, ha kaba ki briew ki la dap da ka jinglyngoh haba ki sakhi ia ki spah kiba bun jong ka ri jong ngi.

Da kaba rakhe ïa ka jingïaid lynti jong ka kam saindur jong ka ri India, ka Bharat Pavilion kam shym la long tang ka jingpyni ïa ki jingdon jingem hynrei ka long ka jingpynpaw ba khlaiñ bor ïa ka ri India ha ka kam saindur. Ka la pyni ia ka jingjylliew jong ka kolshor jong ka India, ka jingtbit ha ka kam saindur, bad ka jingkhlain bor kaba dang kiew sted ha ki kam saindur jong ka pyrthei.

Kut ka WAVES da ka jingkular ba ka lawei jong ka ioh ka kot na ki kam saindur ka long kaba phyrnai

Ka WAVES 2025 ka la ai ia ka nuksa kum ka rynsan pyrthei kaba la wanrah lang ia ka jingsaindur, ka khaii pateng, bad ka jingiatreilang. Naduh ki jingpynbna ia ki polisi ba don jingthmu bad ki jingïateh bad ito kiba don bynta ha kane ka kam na kiwei kiwei ki ri haduh ki jingïateh kular ba khlaiñ ha ka kam khaii bad ki jingbei tyngka ba thymmai, ka jingïalang ka la long ka dak jong ka jingkiew jong ka India kum ka nongïalam ha ka pyrthei ha ka ïoh ka kot ba thymmai. Ka jingpdiang ia ka WAVES Declaration da ki 77 tylli ki ri kiba iashim bynta bad ka jingjop jong ka iew jong ka WAVES bad ka jingpynsted ia ka WAVEX ka pyni ia ka lawei kaba la pynshong nongrim ha ka jingpynmih jingmut thymmai, ka jingai bynta lang, bad ki jingiatreilang ha ka pyrthei. Katba kane ka bynta kaba nyngkong eh jong ka WAVES ka la kut, kane ka jingialang ka la pyni ïa ka jingtbit ka India ha ka kam saindur bad ka la wanrah ruh ïa ka jingïakhih kaba neh ha ka pyrthei — ka ban dang ïai bteng ban ai mynsiem, ban bei tyngka, bad ban kyntiew ïa ki sur jong ki nongsaindur ha kylleng ka pyrthei.

Ban ioh ia ki jingtip, sngewbha bud ia ngi:

Ha ka X :

https://x.com/WAVESummitIndia

https://x.com/MIB_India

https://x.com/PIB_India

https://x.com/PIBmumbai

Ha ka Instagram:

https://www.instagram.com/wavesummitindia

https://www.instagram.com/mib_india

https://www.instagram.com/pibindia

* * *