ప్రతిష్ఠాత్మక వార్షిక సంగీతోత్సవం 67వ ఆకాశవాణి సంగీత సమ్మేళనాన్ని దేశవ్యాప్తంగా 24 కేంద్రాల్లో నవంబరు 2 నుంచి 29 వరకూ నిర్వహిస్తారు. కేంద్ర సాంస్కృతిక మంత్రిత్వ శాఖ సహకారంతో ఈ కార్యక్రమాన్ని నిర్వహిస్తున్నట్లు ప్రసార భారతి సంస్థ ఇవాళ సహర్షంగా ప్రకటించింది.

దేశంలో అత్యంత నిత్యనూతన, గౌరవనీయ సాంస్కృతిక సంప్రదాయాల్లో ఒకటిగా నిలిచిన ఆకాశవాణి సంగీత సమ్మేళనం తొలుత 1954లో ప్రారంభమైంది. అప్పటినుంచీ ఈ కార్యక్రమం హిందూస్థానీ, కర్ణాటక, లలిత, జానపద సంగీత అత్యుత్తమ స్రవంతిని జాతీయస్థాయిలో ప్రజానీకానికి చేరువ చేస్తోంది. భారతీయ మహత్తర సంగీత వారసత్వ పరిరక్షణతోపాటు ప్రోత్సహించడం, ప్రాచుర్యం కల్పించడంలో ఈ ఉత్సవం కీలక పాత్ర పోషించింది. అందుకే ఇది అటు కళాకారులు, ఇటు శ్రోతలు ఏటా ఉత్సుకతతో ఎదురుచూసే ప్రతిష్టాత్మక సంప్రదాయంగా రూపుదాల్చింది. అలాగే ప్రసిద్ధ, వర్ధమాన సంగీత కళాకారులకు జాతీయ గుర్తింపు, గౌరవం లభించే ప్రతిష్ఠాత్మక వేదికగా కొనసాగుతోంది.

ఈ నేపథ్యంలో ప్రసార భారతి ముఖ్య కార్యనిర్వహణాధికారి (సీఈవో) గౌరవ్ ద్వివేది సంగీత సమ్మేళనం వివరాలను వెల్లడించారు. కోవిడ్‌-19 మహమ్మారి కారణంగా కొంత అంతరాయం ఏర్పడిందని, ఈ మహత్తర సంగీతోత్సవం ఇప్పుడు 2025లో సరికొత్త ఉత్తేజంతో పునఃప్రారంభం అవుతున్నదని ఆయన తెలిపారు. దేశంలోని 24 కేంద్రాల్లో ప్రతి వేదికపై రెండు కచేరీల వంతున నిర్వహిస్తామని చెప్పారు. వీటిలో ఒకటి శాస్త్రీయ సంగీతానికి (గాత్ర, వాద్య), మరొకటి లలిత, జానపద సంగీతానికి సంబంధించినవిగా ఉంటాయి. అయితే- పనాజి, షిల్లాంగ్ నగరాల్లో ప్రత్యేకించి పాశ్చాత్య శాస్త్రీయ సంగీత ప్రదర్శనలుంటాయని, భారత ప్రాంతీయ సంగీత వైవిధ్యాన్ని ఇవన్నీ ప్రతిబింబిస్తాయని ఆయన పేర్కొన్నారు.

సంగీత సమ్మేళనం తొలి రోజు కచేరీలను నవంబరు 2న ఢిల్లీ, ముంబయి, చెన్నై నగరాల్లో ఆహ్వానిత శ్రోతల సమక్షాన నిర్వహిస్తారు. తదుపరి నవంబరు 8న ఉదయపూర్, తిరువనంతపురం, కటక్‌లలో ప్రారంభమై నవంబరు 29 వరకూ ధార్వాడ్, హైదరాబాద్, జలంధర్‌లలో కొనసాగుతాయి.

అన్ని కచేరీలకూ ఎలాంటి ప్రవేశ రుసుము లేకుండా ప్రజలు హాజరు కావచ్చునని, సంబంధిత ఆకాశవాణి స్టేషన్లలో ‘ముందు వచ్చిన వారికి ముందు’ ప్రాతిపదికన ఆహ్వాన కార్డులు అందజేస్తామని ప్రకటించారు.

సమ్మేళనం ముఖ్యాంశాలు:

·         నిత్యనూతన సంప్రదాయ 67 వార్షికోత్సవం- 1954 నుంచి కొనసాగుతున్న ప్రతిష్ఠాత్మక సంగీత నైపుణ్య వారసత్వం.

·         ద్వంద్వ కచేరీ రూపం- ప్రతి కేంద్రంలో శాస్త్రీయ, లలిత లేదా జానపద ప్రదర్శనలు

·         ప్రసిద్ధ కళాకారుల ప్రదర్శనలు

·         కచేరీలన్నీ ముగిశాక ఆకాశవాణి నెట్‌వర్క్‌ ద్వారా డిసెంబరు 26 నుంచి 2026 జనవరి 23 వరకు నిత్యం రాత్రి 10:00 నుంచి 11:00 గంటల వరకు ప్రసారమవుతాయి.

ఇవన్నీ కింది వేదికలలో అందుబాటులో ఉంటాయి:

o   రాగం ఛానల్ (డీటీహెచ్‌)

o   డీడీ భారతి

o   రాగం యూట్యూబ్‌ ఛానల్

o   వేవ్స్‌ ఓటీటీ వేదిక

o   న్యూస్‌ ఆన్‌ ఎయిర్‌ యాప్‌

ఆకాశవాణి సంగీత సమ్మేళనం-2025

ప్రదర్శన ఇవ్వబోయే కళాకారులు- తేదీల వారీగా కార్యక్రమాలు

2025 నవంబరు 2

·         ఢిల్లీ: పండిట్ రాకేష్ చౌరాసియా (వేణువు), శ్రీ నందీష్ ఉమాప్ (జానపద)

·         ముంబయి: పండిట్ వెంకటేష్ కుమార్ (గాత్రం), శ్రీ హమీద్ అమీన్‌భాయ్ సయ్యద్ అండ్‌ పార్టీ (భరూద్)

·         చెన్నై: పుష్పవనం శ్రీ కుప్పుస్వామి (జానపదం), ఉదయలూరు శ్రీ కె.కల్యాణరామన్ (భక్తి)

2025 నవంబరు 8

·         ఉదయ్‌పూర్‌: మొహమ్మద్‌అమన్ ఖాన్ (గాత్రం), డాక్టర్‌ విజయేంద్ర గౌతమ్ (లలిత సంగీతం)

·         తిరువనంతపురం: కుడమలూరు మురళీధర మారార్ (పంచవాద్యం), విదుషీ డాక్టర్‌ ఎన్.జె.నందిని (కర్ణాటక గాత్ర సంగీతం), అజిత్ జి.కృష్ణన్ అండ్‌ ఎస్.ఆర్.శ్రీకుట్టి (లలిత సంగీతం)