ৱান্নকম! (খুরুমজরি)

অহানবদা অমসুং খ্বাইদগী মরুওইবদা, ঐহাক্না মফম অসিদা লাকপদা থেংখিবা অমসুং অদোমবু ঙাইহন্দুনা থমখিবদগী ময়াম পুম্নমক্কী মফমদা ঐহাক্না থম্মোয় শেংনা ঙাকপীনবা হায়জরি। ঐহাক ঙসি অয়ুক দিল্লীদগী মতম চানা লাকখি, অদুবু তোঙান তোঙানবা প্রোগ্রামশিং অসি মিনিত ৫ দগী ১০  হেন্না শাংনা পাংথোক্কনি, মরম অদুনা ঐহাক লাকপদা থেংখি। মরম অদুনা, ঐহাক্না থেংনা লাকপগীদমক ময়াম পুম্নমক্কী মফমদা ঙাকপীনবা হায়জরি।

মরুপশিং,

তেক্নোলোজী অমসুং ইন্নোবেসনগী লমদা ৱাখল্লোন কয়া অমগা লোয়ননা পুনবা অসি তশেংনা নুংঙাইবা অমনি। ঐহাক্না তুংলমচৎ শেমগৎলিবা লেবোরেতরী অমদা চঙলকপা অদুগুম্না ফাওই। তামিল নাদুনা তেক্নোলোজীদা মরুওইনা মালেমগী ওতোমোতিব ইন্দস্ত্রীদা মাগী শক্তি অদু উৎখ্রে। অদোম্না থৌরম অসিবু ‘ক্রিএতিং দি ফ্যুচর’ হায়না মমিং থোল্লিবা অসিদা ঐহাক নুংঙাইবা ফাওই। ‘ক্রিএতিং দি ফ্যুচর – দিজিতেল মোবিলিতী ফোর দি ওতোমোতিব এম.এস.এম.ই. ওন্তপ্রিন্যুওরস'! এম.এস.এম.ই.শিং কয়ামরুম অমসুং হৈ-শিংলবা নহাশিংবু প্লেৎফোর্ম অমদা পুলহনবগীদমক ঐহাক্না তি.ভি.এস. কম্পনীবু থাগৎপা ফোংদোকচরি। মসিগী খোঙথাং অসিনা ওতোমোতিব ইন্দস্ত্রী খক্তা খুমাং চাউশিলহল্লোই, অদুবু চাউখৎলবা ভারত অমা শেমগৎপদসু শরুক য়াগনি হায়না ঐনা থাজবা থম্লি। ঐহাক্না খঙই মদুদি সাইমল্তেনস ইন্তিপ্রিতেসনগী থৌরাং অসি পায়খৎলি।

মরুপশিং,

ঐখোয়গী অপুনবা জি.দি.পি.গী চাদা ৭, শেন্মিৎলোনগী অচৌবা শরুক অমা ওতোমোবাইল ইন্দস্ত্রীনা ওইরি হায়বসি অদোম্না খঙলমগনি। মসিগী তেংবাং অসিনা ত্রান্সপোর্ত তৌবদা মতেং পাংবদা নত্তনা লৈবাক অসিগী শেন্মিৎলোন অমসুং খুমাং চাউশিলহনবদা ওতোমোবাইলশিংনা লৌরিবা মরুওইবা থৌদাং অদু ময়েক শেংনা উৎলি। ওতোমোবাইল ইন্দস্ত্রীনা মেন্যুফেকচরিং অমসুং ইন্নোবেসন পুক্নিং থৌগৎপদা য়াম্না মরু ওইবা থৌদাং অমা লৌরি।

মরুপশিং,

লৈবাক অসিগী শেন্মিৎলোনগীদমক ওতোমোবাইল ইন্দস্ত্রীগী মরুওইবা অসি সেক্তর অসিদা এম.এস.এম.ই.শিংনা লৌরিবা থৌদাং অসিদা উৎলি। ভারতনা চহিগী ওইনা চাউরাক্না কার লাখ ৪৫, চাকা অনিগী পানবা গারী করোর ২, কম্মর্সিএল ভেহিকল লাখ ১০ অমসুং চাকা অহুমগী পানবা গারী ৮.৫ পুথোকই। অদোম্না খঙলি, পেসেঞ্জর ভেহিকল খুদিংমক্তা পার্ত ৩০০০দগী ৪০০০ ফাওবা য়াওরি। মসিনা তাক্লিবদি অসিগুম্বা ভেহিকলশিং অসি পুথোক্নবা নুমিৎ খুদিংগী পার্তশিং নৎত্রগা কম্পোনেন্ত লাখ কয়া মথৌ তাই। হায়রিবা কম্পোনেন্তশিং অসি অয়াম্বনা তিয়র-১ অমসুং তিয়র-২ শহরশিংদা লৈবা ভারতকী এম.এস.এম.ই.শিংনা সপ্লাই তৌরি। ঙসিদি, ভারতকী এম.এস.এম.ই.শিংনা পুথোকপা কম্পোনেন্তশিং অসি মালেমগী মফম কয়াদা লৈরিবা ভেহিকলশিংদা ইন্তিগ্রেৎ তৌরি। মসিনা মালেমগী ওইবা খুদোংচাবা কয়া ফংহল্লি।

মরুপশিং,

ঐখোয়গী এম.এস.এম.ই.শিংনা হৌজিক মালেমগী সপ্লাই চেনগী মরু ওইবা কম্পোনেন্ত অমা ওইনা মশাবু লিংখৎনবগী মরুওইবা খুদোংচাবা অমা লৈরে। অদুম ওইনমক, মসিগী খুদোংচাবা অসি ফংনবগীদমক্তা, ঐখোয়গী এম.এস.এম.ই.শিংনা মালেমগী থাক অদু য়ৌনবা মখোয়গী ক্বালিতী অমসুং দুরএবিলিতী হেনগৎহনবদা মরু ওইবা মীৎয়েং চংগদবনি। ঐহাক্না লাল কিলাগী লানবনদগী হায়খি মদুদি ভারতনা মালেমগী ফম্পাকতা কাখৎপা পাম্লবদি, মসিগী মরুওইবা ৱাখল্লোন অসি মপুং ফানা লৌগদবনি: জিরো দিফেক্ত, জিরো ইফেক্ত। জিরো দিফেক্ত হায়রগা, ঐহাক্না ক্বালিতী লৈতবা স্তেন্দর্দশিং মেন্তেন তৌবগী মরুওইবা অদু ফোংদোকচরি, অদুগা জিরো ইফেক্ত হায়রগনা প্রদক্সন প্রোসেসশিংনা অকোইবগী ফিভমদা অকায়বা অমত্তা লৈহন্দনবা থাজবা পীবগী তঙাই ফদবা অদু ফোংদোকই। মসিগী মরুওইবা মন্ত্র অসিবু ঙাক্না চৎপা অসি ঐখোয়গী মায় পাকপাগীদমক্তা তঙাইফদে।

মরুপশিং,

"ওতোমোতিব এম.এস.এম.ই. ওন্তপ্রিন্যুওরশিংগীদমক দিজিতেল মোবিলিতী" ইনিসিএতিব অসিনা লৈবাক অসিগী অপীকপা ইন্দস্ত্রীশিংগীদমক অনৌবা লম্বী অমা শেম্নবা অমসুং তুংলমচৎকীদমক মখোয়বু খুৎশিন্নবা শেম-শারি।

মরুপশিং,

কোবিদ-১৯গী লাইচৎ অসিনা থোকহনবা শিংনবশিংগী মরক্তা, ভারতকী অপীকপা ইন্দস্ত্রীশিংনা মখোয়গী রেসিলিয়েন্স অমসুং পোতেন্সিএল অদু উৎখি। ভারতনা লাইচৎ অসি মায়োক্নবদা মখোয়না লৌখিবা মরুওইবা থৌদাং অসিনা এম.এস.এম.ই. সেক্তর অসি লৈবাক অসিগী তুংলমচৎকী পান্দমদা মাংজিল থারি। এম.এস.এম.ই.শিংদা ফংলিবা রিসোর্সশিং, শেলগী তেংবাং অমসুং তেলেন্ত দিবেলপমেন্ত য়াওনা মপুং ফানা হেনগৎহন্নবা হোৎনবা য়াবা থবকশিং পায়খৎলি। পি.এম. মুদ্রা য়োজনা অমসুং পি.এম. বিশ্বকর্মা য়োজনাগুম্বা স্কিমশিং অসি মসিগী মতাংদা মরুওইবা অমনি। লাইচৎ অসিগী অৱাংবা থাক্তা, এম.এস.এম.ই. ক্রেদিৎ গেরেন্তী স্কিমনা লাখ কয়াগী থবক কনবা হোৎনবদা মরুওইবা থৌদাং লৌখি। মসিনা খুদোংচাদবা মতমদা সেক্তর অসিগী মরুওইবা অদু উৎখি।

মরুপশিং,

ঙসি, তোঙান তোঙানবা সেক্তরশিংদা এম.এস.এম.ই.শিংগীদমক শেল চংদবা লোন অমসুং ৱার্কিং কেপিতেল ফংহন্নবা হোৎনরি। মখোয়গী রিসোর্সশিং হেনগৎলকপগা লোয়ননা মখোয়গী ইন্নোবেসনগী কেপাসিতীসু হেনগৎলক্লি। ঐখোয়গী সরকারনা অপীকপা ইন্দস্ত্রীশিংদা মতেং পীনবা অমসুং অনৌবা সেক্তরশিংদা ইন্নোবেসন পুক্নিং থৌগৎপদা অহেনবা মীৎয়েং চঙলি। লেপ্পা লৈতনা ফগৎলকপা অমসুং ইন্নোবেসনদা পুক্নিং চংবা অসিনা ঐখোয়গী এম.এস.এম.ই. সেক্তরবু হেন্না মপাঙ্গল কনখৎহল্লগনি। মসিগী মথক্তা, এম.এস.এম.ই.শিংগী মনুংদা তেক্নোলোজীগী খুমাং চাউশিল্লকপা অমসুং স্কিল সেৎশিং শেমগৎলকপগী মরুওইবা অদু খঙলদুনা, ঐখোয়না অখন্নবা স্কিল দিবেলপমেন্ত প্রোগ্রামশিং অমসুং ত্রেনিং ইন্সতিত্যুৎশিং লিংখৎলে। মমাংদা রুতিন ওইনা লৌনরম্বা, স্কিল দিবেলপমেন্ত অসি হৌজিক কৎথোক্তুনা মীৎয়েং চংলি। মসি ঐহাক্কী মতমগী মখাদা তোঙানবা স্কিল দিবেলপমেন্ত মন্ত্রালয় অমা লিংখৎপদা উবা ফংলি। ঐহাক্না তুংগী মীরোল শেম্বদা স্কিলশিংনা লৌরিবা মরুওইবা থৌদাং অদু থম্মোয় শেংনা খঙই। অনৌবা, লেপ্পা লৈতনা অপগ্রেদ তৌবা স্কিল য়ুনিভর্সিতীশিংগী তঙাইফদবা অদু ঐহাক্না পুক্নিং থৌগৎলি।

মরুপশিং,

ইলেক্ত্রিক ভেহিকলশিং (ই.ভি.) গী সরকারগী হৌজিক্কী প্রমোসন অসিনা এম.এস.এম.ই. সেক্তরগীদমক অনৌবা লম্বীশিং হাংদোক্লি। ই.ভি.শিংগী হেনগৎলক্লিবা দিমান্দ অসিগা লোয়ননা মফম অসিদা লৈরিবা অপীকপা ওন্তপ্রিন্যুওর পুম্নমকপু মখোয়গী কেপাসিতী হেনগৎহন্নবা ঐনা পুক্নিং থৌগৎলি । অদোম্না খঙলম্বা য়াই, ভারত সরকারনা রুফ তোপ সোলরগা মরী লৈননা মরু ওইবা পোলিসী অমা হৌদোকখ্রে। ইনিসিএতিব অসিনা য়ুমথোং খুদিংদা অচৌবা শেলগী তেংবাং পীরি। মসিদা য়ুনিৎ ৩০০ ফাওবগী লেম্না ইলেক্ত্রিসিতী ফংহনবা অমসুং অহেনবা ইলেক্ত্রিসিতী লৈবগী ওপ্সন য়াওরি। অহানবদা, ঐখোয়না য়ুম করোর অমা শানবা পান্দম থম্লি। ঐখোয়না পান্দম থম্লি মদুদি পোলিসী অসিনা ই-ভেহিকলশিংগীদমক মীওই অমগী য়ুমদা সোলর ইনর্জীনা পাৱর তৌরিবা চার্জিং স্তেসনশিং লিংখৎপদা মতেং পাংগনি। মসিনা ত্রান্সপোর্তেসনগী শেনফম জিরো ওইহল্লগনি, মসিনা ময়াম পুম্নমক্তা অচৌবা খুদোংচাবা অমা পীগনি।

মরুপশিং,

সরকারনা ওতো অমসুং ওতো কম্পোনেন্ত সেক্তরগীদমক চাউরাক্না লুপা করোর ২৬,০০০গী প্রোদক্সন-লিঙ্ক ইন্সেন্তিব (পি.এল.আই.) স্কিম অমা হৌদোকখ্রে। স্কিম অসিনা মেনুফেকচরিংদা মতেং পাংবতা নত্তনা হায়দ্রোজেন ভেহিকলশিংসু ইন্সেন্তিব পীরি। মসিনা এদভান্স ওতোমোতিব তেক্নোলোজী ১০০ হেনবগী প্রমোসন তৌবদা মতেং পাংলি। অনৌবা তেক্নোলোজীশিং হৌদোকপগা লোয়ননা, ঐখোয়গী এম.এস.এম.ই.শিংগীদমক অচৌবা খুদোংচাবশিং পীরিবা মরী লৈনবা লমশিংদা মালেমগী ওইবা ইনবেস্তমেন্তশিং লাক্কনি হায়না ঐখোয়না পানরি। মরম অদুনা, হৌজিক অসি ঐখোয়গী এম.এস.এম.ই.শিংগী তৌবা ঙম্বশিংবু পাকথোক চাউথোকহন্নবা অমসুং অনৌবা লমশিংদা চংশিনবগী মতম ওইরে।

মরুপশিং,

খুদোংচাবশিং লৈবগা লোয়ননা অৱাবা কয়া অমসু থোক্লকই। হৌজিক্তি, এম.এস.এম.ই.শিংনা দিজিতেলাইজেসন, ইলেক্ত্রিফিকেসন, অতোপ্পা ফ্যুএল ভেহিকলশিং শিজিন্নবা অমসুং কৈথেলগী দিমান্দ হোংলকপা অসিনচিংবা অৱাবা কয়া মায়োক্নরি। মতম চানা অমসুং স্ত্রেতেজিক ওইবা খোঙথাংশিং লৌখৎতুনা ঐখোয়না হায়রিবা শিংনবশিং অসি খুদোংচাবদা ওন্থোকপা ঙমগনি। অসিগুম্বা শিংনবশিং অসি মায়োক্ননবগীদমক মশা-মশানা ফগৎহনবগী তঙাইফদবা য়াম্না লৈ। মসিগী মথক্তা, এম.এস.এম.ই.শিংবু ফোর্মেলাইজেৎ তৌবা অসি অচৌবা শিংনবনি। মসিগী মতাংদা ঐখোয়গী সরকারনা এম.এস.এম.ই.গী ৱাহন্থোক শেমদোকপা য়াওনা খোংথাং কয়া অমা লৌখৎখ্রে। মসিগী ৱারেপ অসিনা এম.এস.এম.ই.শিং চাউখৎহনবদা লৈরিবা অথিংবশিং লৌথোক্তুনা মখোয়গী চাউখৎপগী লম্বী য়াৎলি।

মরুপশিং,

ভারত সরকারনা চাউখৎলবা লৈবাক অমা ওইনবা হোৎনবদা ইন্দস্ত্রী খুদিংমকপু লেপ্পা লৈতনা মতেং পাংলি। মমাংদা, মসি ইন্দস্ত্রী অমা নৎত্রগা মীওই অমা ওইরবসু, মী অমনা অপীকপা ৱাফমশিং ফাওবদা সরকারগী ওফিসশিংদা চৎকদবনি। অদুম ওইনমক, ঙসিদি, সরকারনা সেক্তর খুদিংমক্কী অৱাবা অদু কোকহল্লে। হৌখিবা চহি খরা অসিদা, ঐখোয়না কমপ্লাইন্স ৪০,০০০ হেন্না মুত্থৎখ্রে অমসুং বিজিনেসকা মরী লৈনবা অপীকপা অশোয়বা কয়া অমা দি-ক্রিমিনেলাইজ তৌখ্রে। ঐখোয়গী লৈবাক অসিদা থা তরুক খুদিংগী ফেক্তিরিগী তোইলেৎ অদু রং শংদনবনা মরম ওইরগা জেলদা থম্বা য়াই হায়বগী আইন লৈ হায়বা খঙবদা নখোয়না অঙকপা পোকপা য়াই। অসিগুম্বা মতমগা চুনদ্রবা কাংলোনশিং অসি শেমদোক্নবা লৈবাক অসিদা চহি ৭৫ চঙখি।

মরুপশিং,

অনৌবা লোজিস্তিক্স পোলিসী ওইগেরা নত্ত্রগা জি.এস.তি. ওইগেরা, মসিগী খোঙথাং পুম্নমক্না অপীকপা ইন্দস্ত্রীশিংদা, মরু ওইনা ওতোমোবাইল সেক্তরদা কান্নবা পীরি। সরকারনা পি.এম. গতিশক্তি নেস্নেল মাস্তর প্লানগী খুত্থাংদা ভারত্তা ইনফ্রাস্ত্রকচর দিবেলপমেন্তকীদমক খোঙথাং অমা শেম্লে। পি.এম.গীতিশক্তিগী মখাদা, মল্তি-মোদেল কনেক্তিবিতীদা মশক থোক্না হেনগৎহন্নবগী থাজবা পীরিবা, লেয়র ১৫০০ হেনবগী দেতা নৈনদুনা তুংলমচৎকী ইনফ্রাস্ত্রকচর শেমগৎলি। ঐখোয়না ইন্দস্ত্রী খুদিংমক্তা তেংবাং পীনবা মেকানিজমশিং শেমগৎপদসু অহেনবা মীৎয়েং থম্লি। ঐহাক্না ওতোমোবাইল এম.এস.এম.ই. সেক্তরদা মসিগী সপোর্ত সিস্তেমশিং অসি কেপিতেলাইজ তৌনবা অমসুং ইন্নোবেসন অমসুং কম্পিতিতিবনেসবু মাংলোমদা পুখৎনবা হায়জরি। সরকারনা অদোমগীদমক লেপ্পী। ঐহাক্না থাজবা থম্লি মদুদি তি.ভি.এস.না মসিগী মতাংদা পায়খৎলিবা খোঙথাং অসিনা অদোমদা য়াম্না কান্নবা পীগনি।

মরুপশিং,

ঐহাক্না অদোমদা অতোপ্পা ৱাফম খরা থমজবা পাম্মি। অদোম্না খঙলম্বা য়াই, ভারত সরকারনা ভেহিকল স্ক্রেপ তৌবগী মতাংদা পোলিসী অমা চৎনহল্লি। ঐখোয়গী পান্দমদি অরিবা ভেহিকল পুম্নমক লৌথোক্তুনা অনৌবা, মোদর্ন ভেহিকলশিং মার্কেত্তা পুথোকপনি। মসিনা হৌজিক্তি ইন্দস্ত্রী অসিগীদমক্তা অচৌবা খুদোংচাবা অমা পীরি। ইন্দস্ত্রীগী স্তেকহোল্দর পুম্নমকপু ঐহাক্না স্ত্রেপেজ পোলিসী অসি শিজিন্ননবা অমসুং স্ত্রেপেজ ইনিসিএতিব অসিদা মতেং পাংনবা পুক্নিং থৌগৎচরি। হৌজিক্তি ঐখোয়গী লৈবাক অসিনা মালেমগী ওইনা শিপ বিল্দিংগী লমদা মাংজিল থাখ্রে। শিপ বিল্দিংদগী রিসাইকল তৌরবা মেতরিএলশিংনা অচৌবা কৈথেল অমা শেমখ্রে। ঐহাক্না থাজৈ মদুদি করিগুম্বা ঐখোয়না অপুনবা থৌরাং অমা শেম্লবদি, ভেহিকল রিপ্লেসমেন্তদা খোঙজেল য়াংলিবা ঐখোয়গী য়ুম্লোন্নরিবা লৈবাকশিং অমসুং গল্ফকী লৈবাকশিংনা ভারত্তা স্ক্রেপকীদমক মীৎয়েং থমলক্কনি। মসিনা এম.এস.এম.ই.শিংদা তোঙান-তোঙানবা মওংশিংদা কান্নবা পীগদবা মরুওইবা ইন্দস্ত্রী অমা লিংখৎপা ঙমগনি। মসিগী খুদোংচাবশিং অসি ঐখোয়না মতৌ করম্না শিজিন্নবা য়াগনি?

মসিগী মথক্তা, মফম অসিদা ত্রান্সপোর্ত সেক্তরগা মরী লৈনবা মীওইশিং লৈরে হায়নসু ঐঙোন্দা খঙহনখ্রে। ঐনা করিগুম্বা ৱাফম অমবু খল্লকপা মতমদা, ঐনা মদুবু অপুনবা ওইনা য়েংই। খুদম ওইনা হায়রবদা, দ্রাইভরশিংগী য়াইফ-থৌরাংগা মরী লৈনদনা মোবিলিতী অমসুং ত্রান্সপোর্তকী মতাংদা খন্ন-নৈনবদি মপুং ফাদবা ওইগনি। অদোম্না ঐখোয়গী থৌরাং অসিগী মতাংদা পাউচেদা পারম্বা য়াই। পাইলোৎ প্রোজেক্ত অমা ওইনা, ঐখোয়না মরুওইবা হাইৱেজশিংদা পোত্থানবা মফম ১০০০ লিংখৎনবা থৌরাং তৌরি। সেন্তরশিং অসিনা দ্রাইভরশিংগীদমক মপুং ফাবা খুদোংচাবশিং ফংহল্লগনি। মসিনা এক্সিদেন্তশিং হন্থহল্লগনি, অৱাংবা থাক্কী খুদোংচাবশিং ফংহল্লগনি অমসুং তঙাই ফদবা খুদোংচাবশিং ফংহল্লগনি। ঐখোয়না হায়রিবা সেন্তরশিং অসি মালেমগী থাক্তা শেমগৎপগী থৌওং হৌখ্রে। ত্রান্সপোর্তেসন সেক্তরদা লৈরিবা ঐহাক্কী ইচিল-ইনাওশিংদা হায়জরি মদুদি থৌরাংশিং অসিনা দ্রাইভরশিংগী সেক্যুরিতী হেনগৎহন্নবা, মখোয়গী অপেনবা হেনগৎহন্নবা অমসুং অনৌবা ললোন-ইতিক্কী খুদোংচাবশিং ফংহন্নবা পান্দম থম্লি। হীরম খুদিংমক অমগা অমগা মরী লৈনৈ।

মরুপশিং,

ময়াম পুম্নমক্কী মরক্তা লাকপা ফংজবা অসি য়াম্না নুংঙাইবা অমনি। অদোমগী অপাম্বশিং অমসুং মঙলানশিং লৈ, অমসুং ঐহাক্না মখোয়বু ঐহাক্কী ৱারেপশিং ওইনা লৌদুনা মখোয়বু তশেং তশেং ওইহন্নবা মপুং ফানা হোৎনরি। মথংগী চহি মঙাগীদমক অদোমগী থৌরাংশিং অদু থাজবগা লোয়ননা পাইখৎলু, ঐহাক্না অদোমগীদমক লেপ্পী, মতেং পাংলি, অমসুং পুন্না, ঐখোয়না লৈবাক অসিবু হেন্না চাউখৎহল্লগনি হায়বা খঙদুনা থাজবগা লোয়ননা চংশিল্লু। অমুক্কা হন্না, ময়াম পুম্নমক্তা ঐহাক্না নুংঙাইবা ফোংদোকচরি। অদোমসু মাইপাকপা ওইরসনু হায়না ঐহাক্না থৌনিজরি।

খঙহঞ্জবা: মসি পি.এম.গী ৱারোলগী চাউরাকপা ৱাহন্থোকনি। তশেংবা ৱারোলদি হিন্দীদা পীখি।

***