ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಇಂದು ಗುಜರಾತ್‌ನ ಕಚ್‌ನ ಸರ್ ಕ್ರೀಕ್ ಪ್ರದೇಶದ ಲಕ್ಕಿ ನಾಲಾದಲ್ಲಿ ಭಾರತ-ಪಾಕ್ ಗಡಿಯ ಬಳಿಯ ಗಡಿ ಭದ್ರತಾ ಪಡೆ (ಬಿಎಸ್‌ಎಫ್), ಸೇನೆ, ನೌಕಾಪಡೆ ಮತ್ತು ವಾಯುಪಡೆಯ ಸಿಬ್ಬಂದಿಯೊಂದಿಗೆ ದೀಪಾವಳಿ ಆಚರಿಸಿದರು. ಪ್ರಧಾನಮಂತ್ರಿಯವರು ಭಾರತದ ಸಶಸ್ತ್ರ ಪಡೆಗಳೊಂದಿಗೆ ಹಬ್ಬವನ್ನು ಆಚರಿಸುವ ತಮ್ಮ ಸಂಪ್ರದಾಯವನ್ನು ಮುಂದುವರೆಸಿದರು. ಪ್ರಧಾನಮಂತ್ರಿಯವರು ಕ್ರೀಕ್ ಪ್ರದೇಶದ ಬಿಒಪಿಗಳಲ್ಲಿ ಒಂದನ್ನು ಭೇಟಿ ಮಾಡಿ ಧೈರ್ಯಶಾಲಿ ಭದ್ರತಾ ಸಿಬ್ಬಂದಿಗೆ ಸಿಹಿತಿಂಡಿಗಳನ್ನು ವಿತರಿಸಿದರು.

ಪ್ರಧಾನಮಂತ್ರಿಯವರು ಭದ್ರತಾ ಸಿಬ್ಬಂದಿಯೊಂದಿಗೆ ಸರ್ ಕ್ರೀಕ್‌ನಲ್ಲಿ ದೀಪಾವಳಿಯನ್ನು ಆಚರಿಸುತ್ತಿರುವು ನಮ್ಮ ಅದೃಷ್ಟ ಎಂದು ಹರ್ಷ ವ್ಯಕ್ತಪಡಿಸಿದರು, ದೀಪಾವಳಿ ಹಬ್ಬದ ಶುಭಾಶಯ ಕೋರಿದರು. 500 ವರ್ಷಗಳ ನಂತರ ಅಯೋಧ್ಯೆಯ ಭವ್ಯ ದೇವಾಲಯದಲ್ಲಿ ಶ್ರೀರಾಮನ ಪ್ರತಿಷ್ಠಾಪನೆಯಿಂದಾಗಿ ಈ ವರ್ಷದ ಆಚರಣೆಯು ವಿಶೇಷವಾಗಿ ಮಹತ್ವದ್ದಾಗಿದೆ ಎಂದು ಶ್ರೀ ನರೇಂದ್ರ ಮೋದಿ ಹೇಳಿದರು. ಪ್ರಧಾನಮಂತ್ರಿಯವರು ಹಾಜರಿದ್ದ ಸೈನಿಕರಿಗೆ ಮಾತ್ರವಲ್ಲದೆ ದೇಶಾದ್ಯಂತದ ಎಲ್ಲಾ ಸೈನಿಕರಿಗೂ ಶುಭಾಶಯಗಳನ್ನು ತಿಳಿಸಿದರು, ರಾಷ್ಟ್ರ ಸೇವೆಯಲ್ಲಿ ಭದ್ರತಾ ಸಿಬ್ಬಂದಿಯ ಸಮರ್ಪಣೆ ಮತ್ತು ತ್ಯಾಗಕ್ಕಾಗಿ 1.4 ಶತಕೋಟಿ ನಾಗರಿಕರ ಪರವಾಗಿ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು.

ಸವಾಲಿನ ವಾತಾವರಣದಲ್ಲಿ ಸೈನಿಕರು ಮಾಡುವ ತ್ಯಾಗಗಳನ್ನು ಗುರುತಿಸಿ, ಸೈನಿಕರು ರಾಷ್ಟ್ರಕ್ಕೆ ಸಲ್ಲಿಸುವ ಸೇವೆಗೆ ಪ್ರಧಾನಿಯವರು ತಮ್ಮ ಮೆಚ್ಚುಗೆಯನ್ನು ವ್ಯಕ್ತಪಡಿಸಿದರು. ತಮ್ಮ ಧೈರ್ಯ ಮತ್ತು ಸ್ಥಿತಿಸ್ಥಾಪಕತ್ವವನ್ನು ಎತ್ತಿ ತೋರಿಸಿದ ಪ್ರಧಾನಿ, ಸೈನಿಕರು ಭಾರತದ ಶಕ್ತಿ ಮತ್ತು ಭದ್ರತೆಯ ಖಾತರಿಯನ್ನು ಪ್ರತಿನಿಧಿಸುತ್ತಾರೆ ಎಂದು ಪ್ರತಿಪಾದಿಸಿದರು, ಇದು ಎದುರಾಳಿಗಳಲ್ಲಿ ಭಯವನ್ನು ಹುಟ್ಟುಹಾಕುತ್ತದೆ. "ಜಗತ್ತು ನಿಮ್ಮನ್ನು ನೋಡಿದಾಗ, ಅದು ಭಾರತದ ಶಕ್ತಿಯನ್ನು ನೋಡುತ್ತದೆ ಮತ್ತು ಶತ್ರು ನಿಮ್ಮನ್ನು ನೋಡಿದಾಗ, ಅದು ದುಷ್ಟ ಉದ್ದೇಶಗಳ ಅಂತ್ಯವನ್ನು ನೋಡುತ್ತದೆ. ನೀವು ಉತ್ಸಾಹದಿಂದ ಘರ್ಜಿಸಿದಾಗ, ಭಯೋತ್ಪಾದನೆಯನ್ನು ಹುಟ್ಟು ಹಾಕುವವರು ನಡುಗುತ್ತಾರೆ. ಇದು ನನ್ನ ಸೈನ್ಯದ, ನನ್ನ ಭದ್ರತಾ ಪಡೆಗಳ ಶೌರ್ಯ. ನಮ್ಮ ಸೈನಿಕರು ಪ್ರತಿಯೊಂದು ಕಠಿಣ ಪರಿಸ್ಥಿತಿಯಲ್ಲೂ ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದಾರೆ ಎಂದು ನನಗೆ ಹೆಮ್ಮೆ ಇದೆ" ಎಂದು ಪ್ರಧಾನಿ ಹೇಳಿದರು.

ಭಾರತ ವಿರೋಧಿ ಬೆದರಿಕೆಗಳನ್ನು ಎದುರಿಸುತ್ತಿರುವ ಕಚ್‌ನ ಕಾರ್ಯತಂತ್ರದ ಪ್ರದೇಶವನ್ನು, ವಿಶೇಷವಾಗಿ ಅದರ ಕರಾವಳಿಯನ್ನು ಭದ್ರಪಡಿಸುವಲ್ಲಿ ನೌಕಾಪಡೆಯ ಪಾತ್ರವನ್ನು ಪ್ರಧಾನಿ ಗುರುತಿಸಿದರು. ಭಾರತದ ಸಮಗ್ರತೆಯ ಸಂಕೇತವಾದ ಸರ್ ಕ್ರೀಕ್, ಹಿಂದೆ ಸಂಘರ್ಷವನ್ನು ಪ್ರಚೋದಿಸಲು ಶತ್ರುಗಳ ಪ್ರಯತ್ನಗಳಿಗೆ ಕೇಂದ್ರಬಿಂದುವಾಗಿದೆ. ನೌಕಾಪಡೆ ಸೇರಿದಂತೆ ಸಶಸ್ತ್ರ ಪಡೆಗಳ ಉಪಸ್ಥಿತಿ ಮತ್ತು ಜಾಗರೂಕತೆಯು ರಾಷ್ಟ್ರಕ್ಕೆ ಧೈರ್ಯವನ್ನು ನೀಡುತ್ತದೆ ಎಂದು ಶ್ರೀ ಮೋದಿ ಹೇಳಿದರು, ಅದೇ ಸಮಯದಲ್ಲಿ 1971 ರ ಯುದ್ಧದ ಸಮಯದಲ್ಲಿ ಶತ್ರುಗಳಿಗೆ ನೀಡಿದ ಸೂಕ್ತ ಉತ್ತರವನ್ನು ನೆನಪಿಸಿಕೊಂಡರು.

ಪ್ರಸ್ತುತ ಸರ್ಕಾರವು ದೇಶದ ಗಡಿಗಳನ್ನು ಕಾಪಾಡುವ ಬದ್ಧತೆಯಲ್ಲಿ ಅಚಲವಾಗಿದೆ ಎಂದು ಪ್ರಧಾನಿ ಒತ್ತಿ ಹೇಳಿದರು. "ಇಂದು ದೇಶದಲ್ಲಿ ದೇಶದ ಗಡಿಯ ಒಂದು ಇಂಚು ಕೂಡ ರಾಜಿ ಮಾಡಿಕೊಳ್ಳಲು ಸಾಧ್ಯವಾಗದ ಸರ್ಕಾರವಿದೆ. ರಾಜತಾಂತ್ರಿಕತೆಯ ಹೆಸರಿನಲ್ಲಿ, ಸರ್ ಕ್ರೀಕ್ ಅನ್ನು ವಂಚನೆಯಿಂದ ವಶಪಡಿಸಿಕೊಳ್ಳಲು ಒಂದು ನೀತಿಯನ್ನು ರೂಪಿಸಲಾಗುತ್ತಿತ್ತು. ನಾನು ಗುಜರಾತ್ ಮುಖ್ಯಮಂತ್ರಿಯಾಗಿ ದೇಶದ ಧ್ವನಿ ಎತ್ತಿದ್ದೆ ಮತ್ತು ನಾನು ಈ ಪ್ರದೇಶಕ್ಕೆ ಬಂದಿರುವುದು ಇದೇ ಮೊದಲಲ್ಲ" ಎಂದು ಪ್ರಧಾನಿ ಹೇಳಿದರು. ಸರ್ಕಾರದ ಪ್ರಸ್ತುತ ನೀತಿಗಳು ಸಶಸ್ತ್ರ ಪಡೆಗಳ ದೃಢಸಂಕಲ್ಪದೊಂದಿಗೆ ಹೊಂದಿಕೆಯಾಗುತ್ತವೆ ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು. ಶತ್ರುಗಳ ಮಾತುಗಳಲ್ಲಿ ನಂಬಿಕೆ ಇಡಲಾಗಿಲ್ಲ, ಬದಲಾಗಿ ಭಾರತದ ಸಶಸ್ತ್ರ ಪಡೆಗಳ ದೃಢ ಸಂಕಲ್ಪದಲ್ಲಿ ನಂಬಿಕೆ ಇಡಲಾಗಿದೆ.

ರಕ್ಷಣೆಯಲ್ಲಿ ಸ್ವಾವಲಂಬನೆಯ ಮೇಲೆ ಗಮನ ಹರಿಸುವ ಬಗ್ಗೆ ತಿಳಿಸಿದ ಪ್ರಧಾನಿ ಶ್ರೀ ನರೇಂದ್ರ ಮೋದಿ, 21ನೇ ಶತಮಾನದ ಬೇಡಿಕೆಗಳನ್ನು ಪೂರೈಸಲು ಭಾರತದ ಸಶಸ್ತ್ರ ಪಡೆಗಳನ್ನು ಆಧುನೀಕರಿಸುವ ಸರ್ಕಾರದ ಪ್ರಯತ್ನಗಳನ್ನು ಎತ್ತಿ ತೋರಿಸಿದರು. ಇತ್ತೀಚಿನ ಪ್ರಗತಿಗಳಲ್ಲಿ ವಡೋದರಾದಲ್ಲಿ ಸಿ 295 ವಿಮಾನ ಕಾರ್ಖಾನೆ ಉದ್ಘಾಟನೆ ಮತ್ತು ವಿಮಾನವಾಹಕ ನೌಕೆ ವಿಕ್ರಾಂತ್, ಜಲಾಂತರ್ಗಾಮಿ ನೌಕೆಗಳು ಮತ್ತು ತೇಜಸ್ ಫೈಟರ್ ಜೆಟ್‌ನಂತಹ ಸ್ಥಳೀಯ ಮಿಲಿಟರಿ ಸ್ವತ್ತುಗಳ ಅಭಿವೃದ್ಧಿ ಸೇರಿವೆ. ಭಾರತವು ಪ್ರಮುಖವಾಗಿ ಆಮದು ಮಾಡಿಕೊಳ್ಳುವ ರಾಷ್ಟ್ರದಿಂದ ರಕ್ಷಣಾ ಉಪಕರಣಗಳ ಗಮನಾರ್ಹ ರಫ್ತುದಾರನಾಗಿ ಪರಿವರ್ತನೆಗೊಳ್ಳುತ್ತಿದೆ, ಕಳೆದ ದಶಕದಲ್ಲಿ ರಕ್ಷಣಾ ರಫ್ತು ಮೂವತ್ತು ಪಟ್ಟು ಹೆಚ್ಚಾಗಿದೆ ಎಂದು ಪ್ರಧಾನಿ ಮಾಹಿತಿ ನೀಡಿದರು.

ಸರ್ಕಾರದ ಸ್ವಾವಲಂಬನೆಯ ದೃಷ್ಟಿಕೋನವನ್ನು ಸಾಕಾರಗೊಳಿಸುವಲ್ಲಿ ಸಶಸ್ತ್ರ ಪಡೆಗಳ ನಿರ್ಣಾಯಕ ಪಾತ್ರವನ್ನು ಒತ್ತಿ ಹೇಳಿದ ಪ್ರಧಾನಿ, "ದೇಶದ ಭದ್ರತಾ ಪಡೆಗಳು 5000 ಕ್ಕೂ ಹೆಚ್ಚು ಮಿಲಿಟರಿ ಉಪಕರಣಗಳ ಪಟ್ಟಿಯನ್ನು ತಯಾರಿಸಿದ್ದಕ್ಕಾಗಿ ನಾನು ಅವರನ್ನು ಅಭಿನಂದಿಸುತ್ತೇನೆ, ಅವುಗಳನ್ನು ಇನ್ನು ಮುಂದೆ ವಿದೇಶದಿಂದ ಖರೀದಿಸುವುದಿಲ್ಲ. ಇದು ಮಿಲಿಟರಿ ವಲಯದಲ್ಲಿ ಆತ್ಮನಿರ್ಭರ ಭಾರತ ಅಭಿಯಾನಕ್ಕೆ ಹೊಸ ವೇಗವನ್ನು ನೀಡಿದೆ" ಎಂದು ಹೇಳಿದರು.

ಆಧುನಿಕ ಯುದ್ಧದಲ್ಲಿ ಡ್ರೋನ್ ತಂತ್ರಜ್ಞಾನದ ಮಹತ್ವವನ್ನು ಎತ್ತಿ ತೋರಿಸಿದ ಪ್ರಧಾನಿ, ಡ್ರೋನ್‌ಗಳು ಸಾಂಪ್ರದಾಯಿಕ ವಾಯು ರಕ್ಷಣಾ ವ್ಯವಸ್ಥೆಗಳಿಗೆ ಹೊಸ ಸವಾಲುಗಳನ್ನು ಒಡ್ಡುತ್ತಿವೆ ಎಂದು ಹೇಳಿದರು. ಇದಕ್ಕೆ ಪ್ರತಿಕ್ರಿಯೆಯಾಗಿ, ಪ್ರಿಡೇಟರ್ ಡ್ರೋನ್‌ಗಳ ಸ್ವಾಧೀನ ಸೇರಿದಂತೆ ಡ್ರೋನ್ ತಂತ್ರಜ್ಞಾನದ ಮೂಲಕ ಭಾರತ ತನ್ನ ಮಿಲಿಟರಿ ಸಾಮರ್ಥ್ಯಗಳನ್ನು ಹೆಚ್ಚಿಸುತ್ತಿದೆ. ಡ್ರೋನ್ ಬಳಕೆಗೆ ಕಾರ್ಯತಂತ್ರದ ಯೋಜನೆಯನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ ಮತ್ತು ಸ್ಥಳೀಯ ಡ್ರೋನ್ ಪರಿಹಾರಗಳನ್ನು ರಚಿಸುವಲ್ಲಿ ಭಾರತೀಯ ಕಂಪನಿಗಳು ಮತ್ತು ನವೋದ್ಯಮಗಳ ಒಳಗೊಳ್ಳುವಿಕೆಯ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸಿದರು ಎಂದು ಅವರು ಹೇಳಿದರು.

ಯುದ್ಧದ ವಿಕಸನಗೊಳ್ಳುತ್ತಿರುವ ಸ್ವರೂಪ ಮತ್ತು ಹೊಸ ಭದ್ರತಾ ಸವಾಲುಗಳ ಹೊರಹೊಮ್ಮುವಿಕೆಯಿಂದಾಗಿ ಭಾರತೀಯ ಸಶಸ್ತ್ರ ಪಡೆಗಳ ಮೂರು ಶಾಖೆಗಳ ನಡುವೆ ಉತ್ತಮ ಏಕೀಕರಣದ ಅಗತ್ಯವನ್ನು ಪ್ರಧಾನಿ ಒತ್ತಿ ಹೇಳಿದರು. ಈ ಏಕೀಕರಣವು ಅವುಗಳ ಸಾಮೂಹಿಕ ಪರಿಣಾಮಕಾರಿತ್ವವನ್ನು ಗಮನಾರ್ಹವಾಗಿ ಹೆಚ್ಚಿಸುತ್ತದೆ ಎಂದು ಅವರು ಹೇಳಿದರು. ರಕ್ಷಣಾ ಸಿಬ್ಬಂದಿ ಮುಖ್ಯಸ್ಥರ (CDS) ಸ್ಥಾಪನೆಯು ಸಶಸ್ತ್ರ ಪಡೆಗಳನ್ನು ಬಲಪಡಿಸುವ ಮತ್ತು ಆಧುನೀಕರಿಸುವಲ್ಲಿ ಪ್ರಮುಖ ಬೆಳವಣಿಗೆಯಾಗಿದೆ. ಹೆಚ್ಚುವರಿಯಾಗಿ, ಇಂಟಿಗ್ರೇಟೆಡ್ ಥಿಯೇಟರ್ ಕಮಾಂಡ್ ಕಡೆಗೆ ಸಾಗುವಿಕೆಯು ಮೂರು ಸೇವೆಗಳ ನಡುವೆ ಸಮನ್ವಯ ಮತ್ತು ಸಹಯೋಗವನ್ನು ಸುಧಾರಿಸುವ ಗುರಿಯನ್ನು ಹೊಂದಿದೆ.

"ನಮ್ಮ ಸಂಕಲ್ಪ ದೇಶ ಮೊದಲು. ರಾಷ್ಟ್ರವು ತನ್ನ ಗಡಿಗಳಿಂದ ಪ್ರಾರಂಭವಾಗುತ್ತದೆ. ಆದ್ದರಿಂದ, ಗಡಿ ಮೂಲಸೌಕರ್ಯದ ಅಭಿವೃದ್ಧಿಯು ದೇಶದ ಪ್ರಮುಖ ಆದ್ಯತೆಗಳಲ್ಲಿ ಒಂದಾಗಿದೆ" ಎಂದು ಪ್ರಧಾನಿ ಹೇಳಿದರು. ಗಡಿ ರಸ್ತೆಗಳ ಸಂಘಟನೆ (BRO)ಯ ಸಾಧನೆಯನ್ನು ಎತ್ತಿ ತೋರಿಸಿದ ಪ್ರಧಾನಿ, ಲಡಾಖ್ ಮತ್ತು ಅರುಣಾಚಲ ಪ್ರದೇಶದಲ್ಲಿ ಕಾರ್ಯತಂತ್ರದ ಪ್ರಮುಖ ಮಾರ್ಗಗಳನ್ನು ಒಳಗೊಂಡಂತೆ 80,000 ಕಿಲೋಮೀಟರ್‌ಗಳಿಗೂ ಹೆಚ್ಚು ರಸ್ತೆಗಳನ್ನು ನಿರ್ಮಿಸಲಾಗಿದೆ ಎಂದು ತಿಳಿಸಿದರು. ಕಳೆದ ದಶಕದಲ್ಲಿ, ದೂರದ ಪ್ರದೇಶಗಳಲ್ಲಿ ಎಲ್ಲಾ ಹವಾಮಾನ ಸಂಪರ್ಕಕ್ಕೆ ಪ್ರಮುಖವಾದ ಅಟಲ್ ಮತ್ತು ಸೆಲಾ ಸುರಂಗಗಳಂತಹ ಪ್ರಮುಖ ಸುರಂಗಗಳ ಜೊತೆಗೆ ಸುಮಾರು 400 ಮಹತ್ವದ ಸೇತುವೆಗಳನ್ನು ನಿರ್ಮಿಸಲಾಗಿದೆ. ಕಾರ್ಯತಂತ್ರದ ಪ್ರವೇಶವನ್ನು ಹೆಚ್ಚಿಸಲು ಮತ್ತು ಸಶಸ್ತ್ರ ಪಡೆಗಳನ್ನು ಬೆಂಬಲಿಸಲು BRO ದೇಶಾದ್ಯಂತ ಹೆಚ್ಚಿನ ಸುರಂಗಗಳ ನಿರ್ಮಾಣವನ್ನು ಸಕ್ರಿಯವಾಗಿ ಮುನ್ನಡೆಸುತ್ತಿದೆ ಎಂದು ಶ್ರೀ ಮೋದಿ ಹೇಳಿದರು.

ಗಡಿ ಗ್ರಾಮಗಳನ್ನು ದೇಶದ "ಮೊದಲ ಹಳ್ಳಿಗಳು" ಎಂದು ಗುರುತಿಸುವವರೆಗೆ ದೂರದಲ್ಲಿರುವಂತೆ ನೋಡುವ ಬದಲಾದ ದೃಷ್ಟಿಕೋನವನ್ನು ಪ್ರಧಾನಿ ಹಂಚಿಕೊಂಡರು. ರೋಮಾಂಚಕ ಗ್ರಾಮ ಯೋಜನೆಯ ಮೂಲಕ, ಈ ಪ್ರದೇಶಗಳನ್ನು ಕ್ರಿಯಾತ್ಮಕ ಮತ್ತು ರೋಮಾಂಚಕ ಭಾರತವನ್ನು ಪ್ರತಿಬಿಂಬಿಸಲು ಅಭಿವೃದ್ಧಿಪಡಿಸಲಾಗುತ್ತಿದೆ. ಗಡಿ ಪ್ರವಾಸೋದ್ಯಮ ಮತ್ತು ಆರ್ಥಿಕ ಬೆಳವಣಿಗೆಗೆ ಅವುಗಳ ಸಾಮರ್ಥ್ಯದ ಬಗ್ಗೆ ಹೇಳಿದ ಪ್ರಧಾನಿ, ಅನೇಕ ಗಡಿ ಪ್ರದೇಶಗಳ ನೈಸರ್ಗಿಕ ಅನುಕೂಲಗಳ ಬಗ್ಗೆ ವಿವರಿಸಿದರು. ಸ್ಥಳೀಯ ಜೀವನೋಪಾಯ ಮತ್ತು ಪರಿಸರ ಆರೋಗ್ಯವನ್ನು ಹೆಚ್ಚಿಸಲು ಕಡಲಕಳೆ ಕೃಷಿ ಮತ್ತು ಮ್ಯಾಂಗ್ರೋವ್ ಪುನಃಸ್ಥಾಪನೆಯಂತಹ ಉಪಕ್ರಮಗಳನ್ನು ಉತ್ತೇಜಿಸಲಾಗುತ್ತಿದೆ. ಇದು ದೇಶದ ಪರಿಸರಕ್ಕೆ ಒಂದು ಸುವರ್ಣ ಅವಕಾಶವಾಗಿದೆ. ಕಚ್‌ನ ಗಡಿ ಗ್ರಾಮಗಳ ಉದ್ದಕ್ಕೂ ರಚಿಸಲಾಗುವ ಮ್ಯಾಂಗ್ರೋವ್‌ಗಳ ಕಾಡುಗಳು ಇಡೀ ದೇಶ ಮತ್ತು ಜಗತ್ತನ್ನು ಆಕರ್ಷಿಸಿದ ಧೋರ್ಡೋದ ರಾನ್ ಉತ್ಸವದಂತೆಯೇ ಪ್ರವಾಸಿಗರನ್ನು ಆಕರ್ಷಿಸುತ್ತವೆ ಎಂದು ಪ್ರಧಾನಿ ಒತ್ತಿ ಹೇಳಿದರು.

ಪ್ರಧಾನಮಂತ್ರಿಗಳು ರೋಮಾಂಚಕ ಹಳ್ಳಿಗಳಲ್ಲಿ ಸಮಯ ಕಳೆಯಲು ಪ್ರೋತ್ಸಾಹಿಸುವ ಮೂಲಕ ಗಡಿ ಪ್ರವಾಸೋದ್ಯಮವನ್ನು ಉತ್ತೇಜಿಸುವ ಸರ್ಕಾರದ ಉಪಕ್ರಮವನ್ನು ಪ್ರಧಾನಿ ಎತ್ತಿ ತೋರಿಸಿದರು ಪ್ರವಾಸೋದ್ಯಮ ತಾಣವಾಗಿ ಕಚ್‌ನ ಸಾಮರ್ಥ್ಯ ಹೆಚ್ಚಾಗಿದೆ. ಶ್ರೀಮಂತ ಪರಂಪರೆ, ಆಕರ್ಷಣೆಗಳು ಮತ್ತು ನೈಸರ್ಗಿಕ ಸೌಂದರ್ಯ ಹೋಂದಿದೆ. ಗುಜರಾತ್‌ನ ಕಚ್ ಮತ್ತು ಖಂಭತ್ ಕೊಲ್ಲಿಯ ಉದ್ದಕ್ಕೂ ಮ್ಯಾಂಗ್ರೋವ್ ಕಾಡುಗಳು ಮತ್ತು ಸಮುದ್ರ ಪರಿಸರ ವ್ಯವಸ್ಥೆಗಳು ಈ ಭೂದೃಶ್ಯದ ಪ್ರಮುಖ ಅಂಶಗಳಾಗಿವೆ. ಮಿಶ್ತಿ ಯೋಜನೆಯಂತಹ ಉಪಕ್ರಮಗಳ ಮೂಲಕ ಈ ಮ್ಯಾಂಗ್ರೋವ್ ಕಾಡುಗಳನ್ನು ವಿಸ್ತರಿಸಲು ಸರ್ಕಾರ ಸಕ್ರಿಯವಾಗಿ ಕೆಲಸ ಮಾಡುತ್ತಿದೆ ಎಂದು ಶ್ರೀ ಮೋದಿ ಹೇಳಿದರು.

ಯುನೆಸ್ಕೋ ವಿಶ್ವ ಪರಂಪರೆಯ ತಾಣವಾದ ಧೋಲವಿರದ ಮಹತ್ವವನ್ನು ಉಲ್ಲೇಖಿಸಿದ ಪ್ರಧಾನಿ, ಇದು ಭಾರತದ ಪ್ರಾಚೀನ ಶಕ್ತಿ ಮತ್ತು ಸಿಂಧೂ ಕಣಿವೆ ನಾಗರಿಕತೆಯ ಸಂಘಟಿತ ವಸಾಹತುವಿಗೆ ಸಾಕ್ಷಿಯಾಗಿದೆ. ಕಚ್‌ನಲ್ಲಿರುವ ಶ್ರೀಮಂತ ಸಾಂಸ್ಕೃತಿಕ ಮತ್ತು ಐತಿಹಾಸಿಕ ಆಕರ್ಷಣೆಗಳು ಜನಮನ್ನಣೆ ಗಳಿಸಿವೆ. “ಗುಜರಾತ್‌ನಲ್ಲಿ, ಸಮುದ್ರದಿಂದ ಸ್ವಲ್ಪ ದೂರದಲ್ಲಿರುವ ಲೋಥಲ್‌ನಂತಹ ವ್ಯಾಪಾರ ಕೇಂದ್ರಗಳು ಒಂದು ಕಾಲದಲ್ಲಿ ಭಾರತದ ಸಮೃದ್ಧಿಯ ಅಧ್ಯಾಯಗಳನ್ನು ಬರೆದಿವೆ. ಲಖ್‌ಪತ್‌ನಲ್ಲಿ ಗುರುನಾನಕ್ ದೇವ್‌ಜಿಯ ಹೆಜ್ಜೆಗುರುತು ಇದೆ. ಕಚ್‌ನಲ್ಲಿ ಕೋಟೇಶ್ವರ ಮಹಾದೇವ ದೇವಾಲಯವಿದೆ. ಅದು ಮಾತಾ ಆಶಾಪುರ ದೇವಾಲಯವಾಗಲಿ, ಅಥವಾ ಕಲಾ ಡುಂಗರ್ ಬೆಟ್ಟದ ಮೇಲೆ ಭಗವಾನ್ ದತ್ತಾತ್ರೇಯನ ದರ್ಶನವಾಗಲಿ, ಅಥವಾ ಕಚ್‌ನ ರಾನ್ ಉತ್ಸವವಾಗಲಿ, ಅಥವಾ ಸರ್ ಕ್ರೀಕ್ ಅನ್ನು ನೋಡುವ ಉತ್ಸಾಹವಾಗಲಿ, ಕಚ್‌ ಜಿಲ್ಲೆಯಲ್ಲಿ ಪ್ರವಾಸೋದ್ಯಮ ಸಾಮರ್ಥ್ಯವು ತುಂಬಾ ಹೆಚ್ಚಿದ್ದು, ಇದನ್ನು ಕಣ್ತುಂಬಿಕೊಳ್ಳಲು ಪ್ರವಾಸಿಗರಿಗೆ ಒಂದು ವಾರ ಪೂರ್ತಿ ಸಾಕಾಗುವುದಿಲ್ಲ” ಎಂದು ಗಡಿ ಪ್ರವಾಸೋದ್ಯಮದ ಯಶಸ್ಸನ್ನು ಪ್ರಧಾನಿ ಉಲ್ಲೇಖಿಸಿದರು. ಅದೇ ರೀತಿ, ಕಚ್ ಮತ್ತು ಇತರ ಗಡಿ ಪ್ರದೇಶಗಳನ್ನು ಅಭಿವೃದ್ಧಿಪಡಿಸುವುದರಿಂದ ನಿವಾಸಿಗಳು ಮತ್ತು ಸೈನಿಕರ ಜೀವನ ಸುಧಾರಿಸುತ್ತದೆ, ಅಂತಿಮವಾಗಿ ರಾಷ್ಟ್ರೀಯ ಭದ್ರತೆಯನ್ನು ಬಲಪಡಿಸುತ್ತದೆ ಮತ್ತು ದೇಶದ ವಿವಿಧ ಭಾಗಗಳನ್ನು ಸಂಪರ್ಕಿಸುತ್ತದೆ.

ಕಚ್‌ನಲ್ಲಿ ಭದ್ರತಾ ಸಿಬ್ಬಂದಿಯನ್ನುದ್ದೇಶಿಸಿ ಮಾಡಿದ ಭಾಷಣದ ಕೊನೆಯಲ್ಲಿ, ಪ್ರಧಾನಿ ಶ್ರೀ ನರೇಂದ್ರ ಮೋದಿ ಅವರು ರಾಷ್ಟ್ರವನ್ನು ಮಾ ಭಾರತಿ ಎಂದು ನಾವು ಪೂಜಿಸುವುದಕ್ಕೆ ಹೋಲಿಸಿದರು. ದೇಶದ ಪ್ರಗತಿಗೆ ಅಗತ್ಯವಾದ ರಾಷ್ಟ್ರೀಯ ಸುರಕ್ಷತೆಯನ್ನು ಖಾತ್ರಿಪಡಿಸುವಲ್ಲಿ ಸೈನಿಕರ ತ್ಯಾಗ ಮತ್ತು ಕಠಿಣ ಪರಿಶ್ರಮವನ್ನು ಪ್ರಧಾನಿ ಗುರುತಿಸಿದರು

"ಇಂದು ದೇಶದ ಪ್ರತಿಯೊಬ್ಬ ನಾಗರಿಕನು ನಿಮ್ಮ ಮೇಲೆ ನಂಬಿಕೆ ಇಟ್ಟಿದೆ. ಸೈನಿಕರು 100% ಕೊಡುಗೆ ನೀಡುವ ಮೂಲಕ ರಾಷ್ಟ್ರದ ಅಭಿವೃದ್ಧಿಗೆ ಕೊಡುಗೆ ನೀಡುತ್ತಿದ್ದಾನೆ. ನಿಮ್ಮ ಈ ಧೈರ್ಯವು ಭಾರತದ ಅಭಿವೃದ್ಧಿಯನ್ನು ಬಲಪಡಿಸುತ್ತದೆ ಎಂದು ನಾನು ನಂಬುತ್ತೇನೆ" ಎಂದು ಪ್ರಧಾನಿ ನರೇಂದ್ರ ಮೋದಿ ತಮ್ಮ ಭಾಷಣ ಮುಗಿಸಿದರು.

*****