ঙসি প্রধান মন্ত্রী শ্রী নরেন্দ্র মোদীনা গুজরাতকী কুচ্ছতা সার গ্রিক লমদমদা লাক্কি নালাদা, ভারত-পাক ঙমখৈ ময়াদা বোর্দর সেকুরিতি ফোর্স (বি এস এফ), লান্মী, নেভি অমসুং এয়র ফোর্স পর্সোনেলশিংগা লোয়ননা দিৱালি পাংথোকখ্রে। ভারতকী আর্মদ ফোর্সশিংগা লোয়ননা কুহ্মৈ পাংথোকপগী মহাক্কী চৎনবী মখা চৎথবা ওইনা প্রধান মন্ত্রীনা থৌরম অসি শরুক য়াবনি। প্রধান মন্ত্রীনা গ্রিক এরিয়াদা বি,ও.পি অমদা চৎখি অমসুং থৌনা ফরবা সেকুরিতি পর্সোনেলশিংদা অথুম-অহাওশিং য়েন্থোকখি।

থৌরম অদুদা প্রধান মন্ত্রীনা হায়খি চহি অসিদা অদোমগা লোয়ননা দিপাৱালি পাংথোকপা অসিনা ঐঙোন্দা কুহ্মৈ অসিগী নুংঙাইবা হেনগৎহল্লে, মসি অখন্নবা অমনি। দিপাৱালি খুদিং মশাগী ৱাহন্থোক অমা লৈজৈ, অদুবু হন্দক্কী অসিনা অখন্নবা মফম অমা কল্লে: চহি ৫০০ গী মতুংদা হৌজিক ভগবান রাম মহাক্কী চাউরবা লাইশঙদা লেংশিল্লে। অদোমগী মফমদা ইমা ভারতকীদমক কৎথোক্লবা লান্মী খুদিংমক্কী মফমদা ঐগী দিপাৱালিগী য়াইফ-পাউজেল পীজরি।  অদোমগী থবক ইকায়খুম্নবা উৎলিবা অমসুং থাগৎপা ফোঙদোক্লিবা লৈবাক অসিগী মীওই করোর ১৪০ গী মফমদা তৌবীমল খঙবা উৎপগা লোয়ননা য়াইফ-পাউজেল পীজরি।

খুদোংচাদবা মফমশিংদা মখোয়না কৎথোক্লিবশিং খঙবগা লোয়ননা লৈবাক্কী থবক তৌনবা মখোয়গী কৎথোকপগীদমক সেকুরিতি পর্সোনেলশিং থাগৎপা ফোঙদোক্লদুনা, প্রধান মন্ত্রীনা হায়খি লান্মীশিংনা ভারতকী মপাঙ্গল অমসুং সেকুরিতিগী থাজবগী মহুৎশীল্লি, য়েক্নবশিংদা অকিবা ফাওহল্লি। য়েক্নবশিংনা অদোমদা য়েংলকপা মতমদা, অসিগুম্বা শাথিরবা ফিবমশিংদা অকিবা লৈতনা লৈরিবা লান্মীশিং কনা অমতনা মাইথিবা পীবা ঙম্লোই হায়বা মখোয় খঙলে। অদোমগী অচেৎপা ফিরেপ, থৌনা অমসুং অঙকপা ইচং থৌবা অসি ঐখোয়গী লৈবাক্কী সেকুরিতি অমসুং শান্তিগী খুদম অমনি। মালেমদা, অদোম ভারতকী শক্তিনি অমসুং ঐখোয়গী য়েক্নবশিংদা, মখোয়গী ফত্তবা থৌরাংশিং অদোম্না মাঙহল্লি। অদোম্না লাওরকপা মতমদা, অকিবা পোকহন্নবা লৈরিবা ফোর্সশিং কিবনা থক-থক নিকখি। সি ঐখোয়গী লান্মী, ঐখোয়গী আর্মদ ফোর্সশিংগী থৌনানি। অৱাবা ফিবম খুদিংমক্তা ঐখোয়গী লান্মীশিংনা মখোয়গী শক্তি উৎথোকপা অসিদা ঐ চাউথোকচৈ।

প্রধান মন্ত্রীনা হায়খি নেভিনা কুচ্ছগী সমুদ্র মপানশিংগী মরুওইবা মফমশিং ঙাক-শেল্লি। গুজরাতকী সমুদ্র মপান অসি লৈবাক অসিগী মমল য়াম্লবা লন অমনি, মসিগী সমুদ্রগী ঙমখৈ অসি ভারতকী মায়োক্তা থবক তৌরিবশিংগী মরুওইবা মফম অমনি। ভারতকী মনিংতম্বগী খুদম অমা ওইরিবা সার গ্রিক, কুচ্ছতা লৈরি। মমাংঙৈদা, মফম অসি লানফম অমা ওইহন্নবা হোৎনখি। য়েক্নবনা মতম শাংনা সার গ্রিক মীৎয়েং চঙদুনা লাকখিবনি হায়না ঐখোয় পুম্নমক্না খঙলে। অদুবু অদোম্না ঙাক্তুনা লৈবদগী ঐখোয়গী লৈবাক্না থাজবা ঙম্লে। ১৯৭১গী লান্দা অদোম্না পাউখুম পীখিবা অদু ঐখোয়না নিংশিংলি অমসুং মরম অদুনা, হৌজিক ঐখোয়গী নেভিগা লোয়ননা, কনা অমতনা সার গ্রিক অমসুং কুচ্ছতা ফত্তবা মীৎয়েং অমা য়েংবা ঙমদ্রে।

প্রধান মন্ত্রীনা হায়খি ঙসিদি ঐখোয়গী লৈবাক্তা ঐখোয়গী ঙমখৈগী ইঞ্চি অমা ফাওবদা পীথোক্লোইদবা সরকার অমা লৈরে। মতম অমদা দিপ্লোমেসিগী মিংদা সার গ্রিক লৌশিন্নবা হোৎনবা অমা লৈখি। গুজরাতকী চীফ মিনিস্তর ওইনা, ঐনা ঐখোয়গী লৈবাক্কীদমক লাউখি অমসুং লমদম অসিদা লাকপা অসি ঐগী অহানবা নত্তে। ঐ মফম অসি ফজনা খঙই অমসুং মফম অসিদা কয়ারক লাকখ্রে। ঐখোয়না ঐখোয়গী য়েক্নবশিংগী ৱাশক্তা থাজবা থমদে অমসুং ঐখোয়গী ফোর্সশিংদা থাজবা থম্লি।

দিফেন্সকী হিরমদা অত্মানির্ভর ভারতকী লমদা মীৎয়েং থম্লদুনা, প্রধান মন্ত্রীনা হায়খি ২১শুবা চহিচাগী দরকার ওইবশিং য়েংদুনা, ঐখোয়গী আর্মদ ফোর্সশিং অনৌবা খুৎলায়শিং লৈরে। ঐখোয়গী মিলিতরি অসি মালেমগী খ্বাইদগী ফবা ফোর্সশিংগী মরক্তা ঐখোয়না য়াওহল্লে। হায়রিবা থবকশিং অসিগী য়ুম্ফম অসি দিফেন্স সেক্তরদা অত্মনির্ভর ভারত অমা ওইহনবনি। হন্দক গুজরাতকী বদোদারাদা সি-২৯৫ ফেক্তরি শঙ্গাখ্রে। ঙসিদি ঐখোয়না মে ইন ইন্দিয়া বিক্রান্ত এয়রক্রাফ কেরিয়র শারে অমসুং ঐখোয়না ঐখোয়গী সব-মেরিন শাজরে। ঐখোয়গী তেজাস ফাইত্তর জেতশিংনা ঐখোয়গী এয়রফোর্স মপাঙ্গল কনখৎহল্লে অমসুং ৫শুবা জেনেরেসনগী ফাইত্তর এয়রক্রাফ শানবা থবক পায়খৎলে। মতম অমদা মপান লৈবাকশিংদগী লালগী খুৎলায়শিং লৈরম্বা ভারত ঙসিদি মালেমগী লৈবাক শীনবা থুংনা লালগী খুৎলায়শিং য়োল্লে। হৌখিবা চহি ১০ দা, ঐখোয়গী দিফেন্স এক্সপোর্ত শরুক ৩০ হেনগৎলে।

প্রধান মন্ত্রীনা হায়খি সরকারগী পান্দমশিং থবক ওইনা পাংথোকপদা ঐখোয়গী লান্মীশিংগী মতেং য়াম্না দরকার ওই। মখোয়না মখা তানা মিলিতরিগী পোৎলম ৫০০০ হেন্না মপান্দগী পুশিল্লক্তবদা  মখোয় থাগৎলি। মসিগী ৱারেপ অসিনা দিফেন্স সেক্তরদা অত্মানির্ভর ভারত অভিয়ানগী খোঙজেল য়াংখৎহনগনি।

প্রধান মন্ত্রীনা হায়খি ঙসিগী অনৌবা লাল্লোংদা দ্রোন তেক্নোলোজি অসি মরুওইবা অমা ওইরে। হৌজিক চৎথরিবা লালশিংদা কমদৌনা দ্রোন তেক্নোলোজি শীজিন্নবগে হায়বা ঐখোয় খঙলে। দ্রোনশিং অসি এয়র দিফেন্সকী অনৌবা শিংনবশিং ওইরক্লে। মসি খঙলদুনা, ভারতনা মসিগী আর্মদ ফোর্সশিংগী দ্রোন তেক্নোলোজি ফগৎহল্লে। সরকারনা ফোর্স অহুমগী প্রিদেতর দ্রোনশিং লৈরে অমসুং দ্রোন শীজিন্ননবা লাল্লোংশিং শেম্লে। সেক্তর অসিদা স্তার্দ অপ কয়া শরুক য়াদুনা লৈবাক অসিদা ভারতকী কম্পেনিশিংনা দ্রোন কয়া পুথোকপা উবদা অপেনবা ফাওই।

প্রধান মন্ত্রীনা হায়খি তুংদা লাক্কদবা লালশিং হেন্না অরুবা ওইগনি, মরম অদুনা ঐখোয়গী আর্মদ ফোর্সশিং অমসুং সেকুরিতি ফোর্সশিংগী থবকশিং পুনশিনবা অসি য়াম্না মরুওই। ঐখোয়গী ফোর্স অহুম পুনশিনবা অসিনা মখোয়গী থবক তৌবা ঙম্বগী শক্তি হেনগৎহনগনি। ঐখোয়গী লান্মী, ঐখোয়গী নেভি অমসুং ঐখোয়গী এয়র ফোর্স মখোয় পুন্না লাল তম্বা মতমদা, মখোয় তোঙান-তোঙানবা ওইনা উদে অদুবু অপুনবা ফোর্সশিং ওইনা উবা ফংই। মসিগী পান্দম অসিগা লোয়ননা, চীফ ওফ দিফেন্স স্তাফ (সি দি এস) হাপ্লে অমসুং ঐখোয়গী ফোর্সশিং ফগৎহনবদা মরুওইবা থৌদাং অমা লৌরে। ঐখোয়না হৌজিক ইন্তিগ্রেতেদ থিয়েতর কমান্দ শেমগৎনবা থবক পায়খৎলে।
 

প্রধান মন্ত্রীনা হায়খি ঐখোয়গী পান্দমদি লৈবাক্কী থবক্না হান্না পাংথোকপা হায়বনি। লৈবাক অসিনা মসিগী ঙমখৈগী শরুকশিং শেমগৎপা অহানবা ওইনা পাংথোক্লে। বি.আর.ওনা লাদাখ অমসুং অরুনাচল প্রদেসতা কিমি ৮০,০০০ হেন্না শাংবা লম্বীশিং শেমগৎলে। হৌখিবা চহি ১০ দা বি.আর.ওনা অচৌবা থোং ৪০০ হন্না শাখ্রে। চহি চুপ্পা শীজিন্নবা য়াবা লম্বী শেমগৎপদা ঐখোয়গী ফোর্সশিংনা লৌরিবা থৌদাং অদোম খঙলিবদুনি। হৌখিবা চহি ১০ দা, অতল তেন্নেল অমসুং সেলা তন্নেলগুম্বা কয়া শেমগৎলে। লৈবাক অসিগী মফম কয়াদা তন্নেলশিং শেমগৎপগী থবক বি.আর.ওনা পায়খৎলি।
 

প্রধান মন্ত্রীনা হায়খি ঙমখৈগী খুঙ্গংশিং মখোয় মনুং-হুঞ্জিনবা খুঙ্গংশিংনি হায়না উবগী মহুত্তা লৈবাক অসিগী ‘অহানবা খুঙ্গংশিংনি’ হায়না মশক খঙবগী অহোংবা অমা লৈরে। ঐখোয়গী ঙমখৈদা লৈবা খুঙ্গংশিং অরোইবা খুঙ্গংশিং ওইনা উরম্বা অদু হোংদোক্লে। ঙসিদি মখোয় লৈবাক অসিগী অহানবা খুঙ্গং ওইনা কৌনরে। ভাইব্রেন্ত ভিলেজ স্কিমগী মখাদা, হায়রিবা অহানবা খুঙ্গংশিং অসি কনাগুম্বা অমনা মশক থোকপা ভারত অমা ওইনা উনবা শেমগৎলে। ঐখোয়গী ঙমখৈগী লমদমশিং অসি তুরিজমগী খুদোংচাবা কয়া মরাংকাইনা ফংলি। ঐখোয়না মসি শেমগৎকদবনি অমসুং খুদোংচাবা হেনগৎহনগদবনি। মসিগী খুৎথাংদা, ঙমখৈদা লৈরিবা মীওইশিংগী পুন্সি মহিং ফগৎলক্কনি। মসিগী অওনবা অসিনা ঐখোয়না ভাইব্রেন্ত ভিলেজ কেম্পেন্দা উবা ফংলে। লমদম অসিগী মেঙগ্রোভ ঙাক-শেন্নবা ঐখোয়না শেন য়াম্না থাদরে। মফম অসিদা শেমগৎলিবা মেঙগ্রোভ উমং অসিনা লমকোয়বা মীওইশিং লাকহনগনি অমসুং ধোরদোগী রন উৎসব অসি লৈবাক অসিগী অমসুং মালেমগী লমকোয়বা মীওইশিংগী পুক্নিং চিংশিল্লে অমসুং লমকোয়বশিংগী লাইরৈবাক অমা ওইনবা থৌরাং তৌরে। মসি অদোমগী মীৎমাংদা উবা ফংলগনি।

প্রধান মন্ত্রীনা হায়খি ঙমখৈগী তুরিজম অসি লৈবাক অসিগী সেকুরিতিনা কয়া কন্না খন্নদবা ৱাফম অমনি। কুচ্ছতা তুরিজমগী খুদোংচাবা মরাংকাইনা লৈরি। কুচ্ছগী মেঙগ্রোভ উমংশিং অমসুং খামভাতকী গল্ফ অসি মরুওইবা মফমশিংনি। হায়রিবা মফমশিং অসি শেমগৎনবা হৌখিবা চহীদা মিস্থি য়োজনা হৌদোক্তুনা সরকারনা থবক য়াংনা পায়খৎলে।
প্রধান মন্ত্রীনা হায়খি ঐখোয়গী ধোলাবিরা অসি হৌজিক য়ুনেস্কো ৱার্ল্দ হেরিতেচ সাইত ওইরে। ধোলাবিরাদা লৈরিবা ইন্দস ভেল্লি সিবিলাইজেসনগী লেমহৌবশিং অসিনা চহি লিশিং কয়াগী মমাঙদা থৌরাং ফজনা তৌরম্বা অদু ঐখোয়দা উৎলে। লোথালগুম্বা ললোন-ইতিক্কী মফমশিংনা মতম অমদা ভারতনা নুংঙাই-য়াইফনা পানবদা অচৌবা থৌদাং লৌরমখি। লাখপাত্তা গুরু নানক দেব জিগী খোঙ্গুলগী মমিশিং তারি। কুচ্ছতা কোতেশ্বর মহাদেব লাইশঙ, কালা দুঙ্গর হিলদা মাতা অশাপুরা লাইশঙ, ভগবান ধাত্তাত্রেয়া লাইশঙ লৈরি, ফজরবা রন উৎসব অমসুং সার গ্রিক লৈরি। কুচ্ছ জিলা মথন্তদা তুরিজমগী খুদোংচাবা মরাংকাইনা লৈরি অমসুং লমকোয়বা মীওই অমনা চয়োল অমদা য়েংবা লোইবা ঙম্লোই। অৱাং গুজরাতকী নাদাবেত্তা ঙমখৈগী তুরিজমগী মফম কয়া ঐখোয়না উবা ফংলে। মসিগী খুদোংচাবশিং অসি ঐখোয়না কান্নবা লৌনবা থবক পায়খৎকদবনি। লমকোয়বা মীওইশিংনা ভারতকী তোঙান-তোঙানবা মফমশিংদা চৎপা মতমদা, মখোয় অমগা অমগা ভারতকা শম্নহল্লি। হায়রিবা লমকোয়বা মীওইশিং অসিনা লৈবাক্কী অপুনবগী শক্তম পুদুনা চৎলি অমসুং মসিনা এক ভারত শ্রেস্থা ভারতকী ফজনা হেনগৎহল্লি। মখোয়না মখোয়গী লমদা হল্লকপা মতমদা মখোয়না মসিগী ৱাখল্লোন অসি হিংদুনা লৈহল্লি অমসুং ঐখোয়গী লৈবাক্কী সেকুরিতিগী অকনবা য়ুম্ফম অমা থোল্লি। মরম অদুনা ঐখোয়না কুচ্ছ অমসুং অতোপ্পা ঙমখৈগী শরুকশিং শেমগৎকদবনি।

কুচ্ছতা সেকুরিতি পর্সোনেলশিংদা মহাক্না ৱা ঙাংবা লোইশিল্লকপদা, প্রধান মন্ত্রীনা হায়খি ঐখোয়গী লৈবাক অহিংবা অমনি, মা ভারতি ওইনা লাৎলি। ঙসিদি ঐখোয়গী লান্মীশিংনা কৎথোকপদগী ঐখোয়গী লৈবাক অশোই-অঙাম লৈত্রে। লৈবাক অসি চাউখৎলবা মতমদা ঐখোয়গী মীয়াম অশোই-অঙাম লৈতনা হিংগনি। ঐখোয় বিকসিত ভারত অমগী মাইকৈদা চঙশিনবগা লোয়ননা ঐখোয়না মসিগী মঙলান অসি ঙাক-শেল্লি। ঙসিদি লৈবাক  অসিগী মীওই খুদিংমক অদোমগী মফমদা থাজবা লৈবদগী লৈবাক্কী চাউখৎ-থৌরাংগী থবকশিংদা শরুক য়ারে। অদোমগী থৌনানা মখা তানা ভারতকী চাউখৎপা হেনগৎহনগনি হায়না ঐনা থাজবা থম্লি।

****