প্রধান মন্ত্রী শ্রী নরেন্দ্র মোদীনা ঙসি নই দিল্লীদা ইন্দিয়ন এগ্রিকলচরেল রিসর্চ ইন্সতিত্যুৎতা পাংথোকপা কৃষি প্রোগ্রাম অমদা লৌমীশিংগা ৱারী শাখ্রে। থৌরম অসিনা লৌমীশিংগী য়াইফনবা, লৌউ-শিংউদা মীপাল তাংদবা ওইহন্নবা অমসুং রুরেল ইনফ্রাস্ত্রকচর মপাঙ্গল কনখৎহন্নবা প্রধান মন্ত্রীগী লেংদ্রবা ফিরেপ অদু উৎলি। প্রধান মন্ত্রীনা মীয়ামগী ওইবা থৌরম অদুদা শরুক য়াদ্রিঙৈ মমাংদা প্রধান মন্ত্রীনা লৌমীশিংগা ৱারী শাখি, থৌরম অসিদা শ্রী মোদীনা লৌউ-শিংউগী সেক্তরদা লুপা করোর 35,440গী আউৎলেগা লোয়ননা অচৌবা স্কিম অনি হৌদোকখি। মহাক্না লুপা করোর 24,000গী আউৎলে ওইবা পি.এম. ধন ধান্য কৃষি য়োজনা হৌদোকখি। মহাক্না লুপা করোর 11,440গী আউৎলেগা লোয়ননা মিসন ফোর আত্মনির্ভর ইন পলজেস হৌদোকখি। প্রধান মন্ত্রীনা লৌউ-শিংউ, শা-ষন য়োকপা, ঙা য়োকপা অমসুং ফুদ প্রোসেসিং সেক্তরদা লুপা করোর 5,450গী প্রোজেক্তশিং লৈবাক মীয়ামদা কত্থোকখি। মহাক্না লুপা করোর 815গী অহেনবা প্রোজেক্তশিংগী উরেপ উয়ুংসু তমখি।

কাবুলী চানা (চিকপী) থাদুনা মহাক্কী লৌউ-শিংউগী খোঙচৎ হৌরকখিবা হরিয়ানাগী হিসার জিলাগী লৌমী অমনা মহাক্কী এক্সপরিয়েন্স অমসুং ইনসাইৎশিং প্রধান মন্ত্রীদা শেয়র তৌখি। লৌমী অদুনা হায়খি মদুদি মহাক্না চহি মরিগী মমাংদা কাবুলী চানা থাবগী থবক হৌখি অমসুং হৌজিক একর অমদা চাউরাক্না ক্বিন্তেল 10গী মহৈ-মরোং পুথোক্লি। প্রধান মন্ত্রীনা ইন্তরক্রোপিং প্রাক্তিসশিং, মরুওইনা লেগুমিনস ক্রোপশিং অসি লৌউ-শিংউগী পথাপ অসিদা পুনশিন্নদুনা লৈহাও ফবা হেনগৎহনবা অমসুং অহেনবা শেন্দোং পুথোকপা ঙমগদ্রা হায়না হংখি।

মদুগী পাউখুম ওইনা, লৌমী অদুনা অসিগুম্বা মহৈ-মরোংশিং অসি য়াওহনবনা কান্নবা ফংই হায়না ফোংদোকখি। মহাক্না শন্দোক্না হায়খি মদুদি চানাগুম্বা পলসশিং থাবনা থাজবা য়াবা মহৈ-মরোং ফংবা ঙমহনবতা নত্তনা নাইত্রোজেননা লৈহাও ফগৎহনবগা লোয়ননা তুংগী মহৈ-মরোংশিংগী পোত্থোক ফগৎহল্লি। মতৌ করম্না অসিগুম্বা তুং কোইনা চৎনবা য়াবা থৌওং অসি লৌমীশিংগী মরক্তা সোইল হেল্থপু অমুক হন্না হিংগৎনবা অমসুং ঙাক শেনবগী পাম্বৈ অমা ওইনা পুক্নিং থৌগৎপগে হায়বা অদু মহাক্না ফোংদোকখি।

প্রধান মন্ত্রীনা হোৎনরিবশিং অদু থাগৎপা ফোংদোকখি। মহাক্না হায়খি মদুদি মসিগী থবকশিং অসিনা লৈবাক অসিগী অতোপ্পা লৌমীশিংগীদমক মোদেল অমা ওইগনি। তৌবীমল খঙবা উৎলদুনা, লৌমী অদুনা হায়খি, "ঐহাক্কী পুন্সিদা অহানবা ওইনা প্রধান মন্ত্রীগা উনবগী খুদোংচাবা অসি ফংলি। মহাক অসি লৌমীশিং অমসুং মীচম প্রজাশিংগা কন্নেক্ত তৌরিবা তশেংনা অফবা লুচিংবা অমনি”।

লৌমী অসিনা মহাক্না কিসান পদাক সনস্থান (ফার্মর মেদল ওর্গনাইজেসন)গা মরী লৈনৈ অমসুং মহাক চার্তর একাউন্তেন্ত প্রেক্তিস তৌরি অমসুং এক্তিব ওইবা লৌমী অমনি হায়নসু ফোংদোকখি। ফেমিলীগী লম বিঘা 16 লৈদুনা, মহাক্না পলস থাবা মখা চত্থরি অমসুং মহাক্কী খুঙ্গংদা নুপী 20গী সেল্ফ-হেল্প গ্রুপশিং ওর্গানাইজ তৌদুনা মখা তানা খোঙথাং লৌখৎলি। হায়রিবা গ্রুপশিং অসি চানা-বেজ প্রদক্তশিং, চনম, অমসুং ত্রেদিস্নেল পাপদ পুথোকপা অসিনচিংবা ভেল্যু এদেদ ওইবা থবকশিং পায়খৎলি, মসিনা নুপীশিংগী এম্পাৱরমেন্ত অমসুং খুঙ্গংগী ওন্তপ্রিন্যুওরশিপতা মতেং পাংলি। ঐখোয়না ঐখোয়গী ব্রান্দ অসি ঐখোয়গী খুঙ্গংগী মতুং ইন্না 'দুগারি ৱালে' হায়না মিংথোনখি, সর। ঐখোয়না দুগারি ৱালে চানা, চনম, অমসুং পাপদ য়োল্লি। ঐখোয়না GeM পোর্তেলদা রেজিস্তর তৌখ্রে। মহাক্না মখা তানা হায়খি মদুদি মখোয়গী পোৎথোকশিং অসি রাজস্থান খক্তদা য়োনবা নত্তনা ভারত শিনবা থুংনা মমিং চৎলি অমসুং তোঙান তোঙানবা মফমশিংদগী দিমান্দ হেনগৎলক্লি।

ৱারী শানবা অদুগী মনুংদা, হরিয়ানাগী হিসার জিলাগী অতোপ্পা লৌমী অমনা 2013-14দগী কাবুলী চানা (চিকপী) থাবগী মহাক্কী খোঙচৎ অদু শন্দোক্না তাকখি। একর অমা খক্তদগী হৌরগা মহাক্না একর 13-14 ফাওবা পাকথোক চাউথোকহনখ্রে, মহাক্না মহাক্কী মাইপাকপা অসি ক্বালিতী লৈবা মরু খনগৎপা অমসুং লেপ্পা লৈতনা পোত্থোক ফগৎহনবদগীনি হায়খি। “ইনকমদা মশক থোক্না হেনগৎলকখি। চহি খুদিংগী ঐখোয়না হেন্না ক্বালিতী লৈবা মরুশিং খনখি, অমসুং পোত্থোক পুথোকপা হেনগৎলকখি," হাবনা লৌমী অদুনা ফোংদোকখি।

প্রধান মন্ত্রীনা মরু ওইনা ভেজিতরিয়নশিংগীদমক পলসকী ন্যুত্রিসনেল ভেল্যুগী মরুওইবা অদু ফোংদোকখি অমসুং মহাক্না পলসেস ফার্মিংনা লৌমীশিংগী শেন্থোক হেনগৎহনবতা নত্তনা লৈবাক অসিগী ন্যুত্রিসনেল সেক্যুরিতীদা মতেং পাংলি হায়নসু ফোংদোকখি। শ্রী মোদীনা অপীকপা অমসুং মর্জিনেল ফার্মরশিংনা পুন্না চৎমিন্নবা, মখোয়গী লম পুনশিন্নবা অমসুং পোত্থোক হেনগৎনবা, মমল হন্থহন্নবা অমসুং কৈথেলদা হেন্না ফবা খুদোংচাবা ফংহন্নবা হায়-ভেল্যু ক্রোপশিং খনবদা মীৎয়েং থম্বা গ্রুপ ফার্মিংগী ৱাখল্লোন অসিবু পুক্নিং থৌগৎখি।

লৌমী অমনা মসিগী মোদেল অসিগী মাই পাকপা খুদম অমা শেয়র তৌখি। মহাক্না হায়খি মদুদি একর ১২০০ রোমদা হৌজিক রেসিদ্যু-ফ্রী কাবুলী চানা থাবগী থবক পায়খৎলি, মসিনা মার্কেৎ এক্সেস হেন্না ফগৎহল্লগনি অমসুং কাংলুপ পুম্নমক্কী শেন্থোক ফগৎহল্লগনি।

প্রধান মন্ত্রীনা বজরা (পর্ল মিল্লেৎ) অমসুং জোয়র (সোরগুম) অসিনচিংবা মরুওইনা ঈশিংগী অৱাৎপা লৈবা মফমশিংদা লৈঙাক্না প্রমোৎ তৌরিবা মিল্লেৎশিং (শ্রী অন্ন) গী মতাংদসু খন্নখি। কৈথেলগী দিমান্দ হেনগৎলকপা অমসুং হেল্থ এৱেরনেস হেনগৎলকপনা মরম ওইদুনা মিল্লেৎ ফার্মিং মখা চত্থবতা নত্তনা মীয়াম্না পাম্নবা হেনগৎলক্লি হায়না লৌমী অমনা ফোংদোকখি। “ঈশিং তাংবা মফমশিংদা, মিল্লেৎশিং অসি লাইফলাইন অমনি। মিল্লেৎশিংগী গ্লোবেল মার্কেৎ অসি য়াম্না থুনা হেনগৎলক্লি” হায়না শ্রী মোদীনা ফোংদোকখি।

খন্ন-নৈনবদা নেচরেল অমসুং কেমিকেল য়াওদবা লৌউ-শিংউগী মতাংদসু খন্নখি। প্রধান মন্ত্রীনা মরু ওইনা অপীকপা লৌমীশিংগীদমক অসিগুম্বা থৌওংশিং অসি তপ্না-তপ্না অমসুং থবক ওইনা পাংথোক্কদবনি হায়না অকনবা ৱাফম থমখি। মহাক্না তাঙ্কক নাইবা এপ্রোচ অমা সজেস্ত তৌখি: লম অদুগী শরুক অমদা নেচরেল ফার্মিং চাংয়েং তৌদুনা অমসুং লেমহৌরিবা শরুক অদুদা ত্রেদিস্নেল মেথদশিং মখা চত্থদুনা মতমগী মতুং ইন্না থাজবা হেনগৎহনগনি।

সেল্ফ হেল্প গ্রুপকী নুপী লৌমী অমনা মহাক্কী বিঘা 5গী লমদা 2023দা মুং (গ্রীন গ্রাম) থাবা হৌবগী মহাক্কী এক্সপরিয়েন্স অদু শেয়র তৌখি। মহাক্না পি.এম. কিসান সম্মান নিধি স্কিম অসি মরুওইবা মতেং অমনি হায়না শকখঙখি, মসিনা মহাক্না মরু লৈবা অমসুং লম শেম-শাবদা মতেং পাংখি। “চহিগী ওইনা লুপা 6000গী তেংবাং অসি থৌজাল অমা ওইখি। মসিনা ঐখোয়দা মরুশিং লৈবদা মতেং পাংই অমসুং মতম চানা মহৈ-মরোং থাবদা মতেং পাংই," হায়না মহাক্না ফোংদোকখি। অতোপ্পা লৌমী অমনা শুপ্নগী একর অনি খক্তগা লোয়ননা চানা, মাসুর (লেন্তিল), অমসুং গ্বারকুম্বা পলসশিং থাবনা মহাক্না দাইভর্সিফাই তৌবা অমসুং লেপ্পা লৈতনা শেন্দোং ফংবা ঙমখি, মসিনা স্মার্ত, স্মোল-স্কেল ফার্মিংগী পাঙ্গল উৎলি।

লৌমী অমনা 2010দা হোতেল অমদা রুম বোই অমা ওইনা থবক তৌবা হৌরকপদগী হৌরগা গির ষন 250 লৈবগা লোয়ননা গাউশালা (ষনগোন) অমগী মপু ওইরকপা ফাওবগী মহাক্কী অঙকপা খোঙচৎকী মতাংদা পাউদমখি। মহাক্না এনিমেল হসবেন্দ্রী মন্ত্রালয়বু মহাক্কী চাউখৎপদা মরুওইবা থৌদাং লৌখিবা 50%গী সবসিদী পীবগীদমক থাগৎপা ফোংদোকখি।

প্রধান মন্ত্রীনা খোঙথাং অসিবু থাগৎপা ফোংদোকখি অমসুং বরানসীদগী মান্নবা এক্সপরিমেন্ত অমা পাংথোকখিবগী মতাংদা পনখি, মসিনা ইমুংশিংদা অহানবা মচা অদু হল্লক্নবা কন্দিসন অমগা লোয়ননা গির ষনশিং পীখি, মদুদগী অতোপ্পা ইমুংশিংদা পীদুনা তুংকোইনা চৎনগদবা কম্ম্যুনিতী চেন অমা শেমখি।

শরুক য়ারিবা মীওই কয়ানা প্রধান মন্ত্রী মৎস্য সমপদা য়োজনা (PMMSY) গী পুন্সিদা অহোংবা পুরকপা ঙম্বা ইথিল অদু ফোংদোকখি। Ph.D. হোল্দর অমনা উত্তর প্রদেশতা এক্বাকলচরগী ওন্তপ্রিন্যুওর ওইরকখি। মহাক্না থবক থীরিবা অমা ওইরম্বদগী থবক পীরিবা মীশক অমদা ওন্থোকখি। মহাক্না উত্তরাখন্দগী অপীকপা খুঙ্গংশিংদগী নহা 25 রোম থবক পীখি। কাশ্মীরগী নহা অমনা সরকারগী প্রোগ্রাম অমদা PMMSYগী মরমদা তম্লবা মতুংদা এক্বাকলচর হৌরকখি। মহাক্না হৌজিক মীওই 14বু থবক পীরি অমসুং চহিগী ওইনা লুপা লাখ 15গী শেন্দোং ফংলি।  মীওই 100 থবক পীরিবা ভারতকী সমুদ্র মপালদা লৈবা নুপী লৌমী অমনা PMMSYগী মখাদা কোল্দ স্তোরেজ অমসুং আইস ফেসিলিতীশিংনা মহাক্কী ঙা য়োকপগী ললোন-ইতিক হেনগৎহনবদা মতেং পাংলি হায়না মহাক্না হায়খি। দেকোরেতিব ফিশ ফার্মিংদা থবক তৌরিবা অতোপ্পা ওন্তপ্রিন্যুওর অমনা হায়খি মদুদি PMMSYনা লৈবাক শিনবা থুংনা লৈরিবা নহা ওইরিবা এগ্রি-স্তার্তঅপশিংগীদমক আশাগী মঙাল অমা পীরি। প্রধান মন্ত্রীনা এক্বাকলচরদা লৈরিবা অপুনবা পোতেন্সিএল অদু ফোংদোকখি অমসুং নহারোল কয়াবু মসিগী খুদোংচাবা অসি শিজিন্ননবা পুক্নিং থৌগৎখি।

সখী ওর্গনাইজেসনগী মীহুৎ অমনা নুপী 20 খক্তদগী হৌরকখিবা অমসুং হৌজিক্তি দাইরী সেক্তরদা থবক তৌরিবা নুপী 90,000 য়ৌরকখিবগী মতাংদা পাউদমখি। অপুনবা খোঙথাংশিংগী খুত্থাংদা নুপী 14,00- হেন্না "লাখপতি দিদিস" ওইখ্রে হায়না মহাক্না হায়খি। "মসি অশেংবা মিরাকল অমনি", হায়না প্রধান মন্ত্রীনা সেল্ফ হেল্প গ্রুপ মোদেল অসিবু থাগৎলদুনা হায়খি।

ঝারখন্দগী সরাইকেলা জিলাগী ওন্তপ্রিন্যুওর অমনা লায়রবা ত্রাইবেলগী ইমুং 125বু এদোপ্ত তৌখি অমসুং লমদম অসিদা ইন্তিগ্রেতেদ ওর্গানিক ফার্মিং হৌদোকখি। প্রধান মন্ত্রীনা হায়খিবা ‘থবক থিবা নত্তে, থবক পীবা মীওইশিং ওইবীয়ু' হায়বসিনা মহাক্কী মিসনদা মতৌ করম্না ইথিল পীবগে হায়বদু মহাক্না শন্দোক্না তাকখি।

শরুক য়ারিবা কয়া অমনা থম্মোয় শেংনা তৌবীমল খঙবা উৎলদুনা লৌমী অমনা হায়খি, "প্রধান মন্ত্রীগা উন্নবা অসি নেচরেল থেরাপী অমা ওইনা ফাওখি। ঐহাক্না লুচিংবা অমগা ৱারী শানবগুম ফাওখিদে, অদুবু ঐহাক্কী য়ুমদগী মীওই অমগা ৱারী শানবগুম ফাওখি।”

কাশ্মীরগী অতোপ্পা নহারোল অমনা হৌজিক লৈরিবা লুচিংবা অমগী মখাদা জম্মু অমসুং কাশ্মীরদা চাউখৎ-থৌরাংগী অহোংবা লাকপশিং অদু খঙখি। মহাক্না হায়খি, "ঐহাক্না থাজৈ মদুদি অদোমগী লৈঙাক লৈত্রবদি মসি ওইথোকপা ঙম্লোই।"

লৌমী অমনা 2014দা য়ুনাইতেদ স্তেৎসতা শেল য়াম্না ফংবা কেরিয়র থাদোক্লগা ভারত্তা হল্লকখি অমসুং খুঙ্গংগী খুন্নাইশিংদা শক্তি পীনবা হোৎনখি। একর 10 খক্তগী লমদগী হৌরগা, মহাক্না হৌজিক একর 300 হেনবগী লৌউ-শিংউ, হেৎচরীশিং তৌরি অমসুং একর 10,000 হেনবগী মরুশিং পুথোক্লি। ফিসরিজ এন্দ এক্বাকলচর ইনফ্রাস্ত্রকচর দিবেলপমেন্ত ফন্দ (FIDF) না মতেং পাংদুনা মহাক্না চাদা 7 খক্তগী শেন্দোইদা ফাইনান্সিং ফংখি, মসিনা মহাক্কী ওপরেসনশিং অসিগীদমক মীওই 200 হেন্না থবক পীবা ঙমহনখি। "পি.এম. মোদীনা ঐখোয়গী মায়কৈদা লাকপা উবদা য়াম্না নুংঙাইবা ফাওখি", হায়না লৌমী অদুনা ফোংদোকখি।

গুজরাতকী অমরেলি জিলাগী ধারীদা লৈবা FPOগী মীহুৎ অমনা হায়খি মদুদি মহাক্কী লৌমী 1700গী ওর্গনাইজেসন অসিনা একর 1500দা লৌ উরি অমসুং হৌখিবা চহি মরিদগী চহিগী ওইনা 20%গী দিভিদেন্ত ফংদুনা লাক্লি। FPOনা কোলেতরেল য়াওদবা সরকারগী লোন করোর 2গী কান্নবা ফংখি, মসিনা থবকশিং অসি চাউনা পাকথোক চাউথোকহনবদা মতেং পাংখি। “ভারত সরকারগী ক্রেদিৎ গেরেন্তী স্কিমনা ঐখোয়না করিসু লৈত্রিঙৈদা ঐখোয়দা শক্তি পীখি", হায়না মহাক্না ফোংদোকখি।

রাজস্থানগী জয়সলমরদা লৈবা FPO অমনা লৌমী 1,000 হেনবগা লোয়ননা ইন্তিগ্রেতেদ পেস্ত মেনেজমেন্ত (IPM) তেক্নিকশিং শীজিন্নদুনা ওর্গানিক কুমিন অমসুং ইসবগোল (পিসিলিয়ম হস্ক) পুথোক্লি। পোত্থোক অসি গুজরাত্তা য়ুম্ফম ওইবা এক্সপোর্তরশিংগী খুত্থাংদা এক্সপোর্ত তৌই। প্রধান মন্ত্রীনা ইসবগোলদা য়ুম্ফম ওইবা আইস ক্রিম ‌এক্সপ্লোর তৌনবা হায়রকপা মতমদা, মসিনা প্রদক্ত ইন্নোভেসনগীদমক লৌমীশিংগী মরক্তা খুদক্তা পুক্নিং চীংশিনখি।

বরানসীগী মনাক্তা লৈবা মির্জাপুরগী লৌমী অমনা, প্রোসেসিং, পেকেজিং অমসুং ব্রান্দিং য়াওনা মিল্লেৎকী মতাংদা মহাক্কী থবকশিং শন্দোক্না তাকখি। মহাক্কী পোত্থোকশিং অসি দিফেন্স অমসুং NDRF পর্সনেলদা ফোর্মেল MoU অমগী মখাদা সপ্লাই তৌরি। মসিনা ন্যুত্রিসনেল ভেল্যু অমসুং শেন্মিৎলোনগী ওইথোকপা য়াবা অনিমক ফংহল্লি।

কাশ্মীরগী এপল কন্ত্রিব্যুতর অমনা রেল কনেক্তিবিতীনা মতৌ করম্না এপল ত্রান্সপোর্তেসনদা অহোংবা পুরক্কদগে হায়বদু শন্দোক্না তাকখি। উহৈশিং অমসুং মনা-মশিং তন 60,000 হেন্না দিল্লী অমসুং মসিগী মপান্দা হকথেংননা ত্রান্সপোর্ত তৌখ্রে। মসিনা ত্রেদিস্নেল রোদৱেশিংগা চাংদম্নবদা মতম অমসুং শেল হন্থহনখ্রে।

মধ্য প্রদেশকী জবলপুরগী নহা ওইরিবা ওন্তপ্রিন্যুওর অমনা মহাক্কী এয়রোপোনিক বেজ পোতেতো সিদ ফার্মিং, মফম অদুদা লৈবাক য়াওদনা ভর্তিকেল স্ত্রকচরদা অলুশিং থাবগী থৌওং উৎখি। প্রধান মন্ত্রীনা মসিবু “জেন পোতেতো” হায়না ফাগী ওইনা কৌখি, মরমদি অসিগুম্বা পোত্থোক অসি জেনশিংগী ধর্মগী ওইবা দাইতরীগী অথিংবশিংগা চুনবা য়াই, মখোয়না মরা তাবা মনা-মশিং চাদে।

রাজস্থানগী বরান জিলাগী লৌমী অমনা মহাক্কী তীমনা মতৌ করম্না পাউদর অমসুং পেস্ত পুথোক্তুনা গার্লিক ভেল্যু এদিসনদা থবক তৌরি অমসুং হৌজিক এক্সপোর্ত লাইসেন্সকীদমক এপ্লাই তৌরি হায়বদু শন্দোক্না তাকখি।

প্রধান মন্ত্রীনা লৈবাক শিনবা থুংনা লৈরিবা লৌমীশিংবু থাগৎলদুনা মীফম অদু লোইশিনখি।

***