মশানা মশাবু ইকায়খুম্নবা অমসুং থবক শুবা নোম্বা কনবা বিহারগী ইনাওশিং অমসুং ইচলশিং খুরুমজরি। 

বিহারগী রাজ্যপাল অরিফ মোহমদ খান জি, মীয়ামগী চীফ মিনিষ্টর নিতিস কুমার জি, কেন্দ্রগী মন্ত্রীমন্দলগী ঐগী মরুপশিং, জিতন মানঝি জি, লাল্লান সিংহ জি, গিরিরাজ সিংহ জি, চিরাগ পাসৱান জি, নিত্যনন্দ রাই জি, সতিস চন্দ্র দুবে জি, রাজভুসন চৌধুরি জি, বিহারগী দিপুতি চীফ মিনিষ্টর সমরাত চৌধুরি জি, বিজয় কুমার সিনহা জি, অতোপ্পা মিনিষ্টরশিং, মীয়ামগী মীহুৎশিং অমসুং বিহারগী ঐগী নুংশিরবা ইনাওশিং অমসুং ইচলশিং!

ঙসি ঐনা বিহারদা লুপা করোর লিশিং ৫০ হেনবগী প্রোজেকশিং মীয়ামদা কৎথোক্লে অমসুং উরেপ-উয়ুং তম্লে। ঐখোয়দা বর পীনবা অদোম মশিং য়াম্না লাক্লে, বিহারগী মীয়ামগী নুংশিবা অসি মতম পুম্নমক্ত ঐনা লুম্না লৌরি। ঙসি মশিং য়াম্লবা ইমাশিং অমসুং ইচলশিং থুংলবা অসিমক বিহারদা পাংথোকপা ঐগী থৌরমসিংগী খ্বাইদগী মশক থোকপা থৌরমনি। ঐনা মরুওইনা ইমাশিং অমসুং ইচলশিংদা ইকায়খুম্নবা উৎচরি। ঐনা মীয়ামদা ঐগী তৌবীমল খঙবা উৎচরি।

মরুপশিং,

সাসারামগী লমদম অসিদা মসিগী মমিংদা রাম য়াাওরি, সাসারাম। সাসারামগী মীয়াম্না ভগবান রামগী চৎনবী অমসুং মহাক্কী শাগৈ, प्राण जाए पर वचन न जाई' খঙই। মসিনা ফোঙদোক্লি, ৱাশকখিবশিং, মতম পুম্নমক ঙাকই। ভগবান রামগী চৎনবী অসি হৌজিক অনৌবা ভারতকী থৌশিলনি। হন্দক জম্মু অমসুং কাস্মিরগী পাহালগামদা তেরোরিষ্টশিংনা লান্দারক্তুনা ঐখোয়গী মীচম কয়া হাৎখি। তমথিরবা থৌদোক অদুগী নোংমা লৈরগা ঐ বিহারদা লাকখি অমসুং বিহারদগী ঐনা লৈবাক অসিগী মীয়ামদা ৱাশকখি, ঐখোয়না হায়খি মদুদি তেররগী মপুশিংগী লোৎফমশিং থুগায়গনি। বিহারদগী ঐনা হায়খি মদুদি মখোয়না খল্লিবা অদুগী হেন্না শাথিনা চৈরাক অমা পীগনি। ঐগী ৱাশক অদু ঙাক্লবা মতুংদা ঙসি ঐ বিহারদা লাক্লে। পাকিস্তান্দা ফম্লিবশিং অমসুং ঐখোয়গী ইচলশিংগী সিন্দুর মুৎথৎখিবশিং, ঐখোয়গী লান্মীনা মখোয়গী লোৎফম উফুল ওনহলখ্রে। ভারতকী ইচানুপীশিংগী সিন্দুরগী শক্তি মালেম অমসুং পাকিস্তান্না উরে। পাকিস্তান লান্মীগী মখাদা লৈবদা মখোয় মশামক করি অমতা তৌররোই হায়না খঞ্জরম্বা তেরোরিষ্টশিং, অমু্ক্কী খুৎথাদা ঐখোয়গী লান্মীনা মখোয় ঐখোয়গী লান্মীগী খুয়াদা চঙজহনখি। ঐখোয়না পাকিস্তানগী এয়রবেজশিং থুগায়খি, মখোয়গী মিলিতরি লোৎফমশিং মিনিত খরগী মনুংদা থুগায়খি, মসি অনৌবা ভারতনি, মসি অনৌবা ভারতকী শক্তিনি।

মরুপশিং,

বিহার বীর কুনৱার সিংহগী লমদমনি। লৈবাক্কী সেকুরিতিগীদমক লমদম অসিগী নহারোল লিশিং কয়া মখোয়গী নহা ওইবগী পুন্সি লান্মীদা কৎথোক্লি। ওপরেসন সিন্দুরদা, মালেম্না ঐখোয়গী বি.এস.এফকী মাইথিবা পীবা ঙমদবা থৌনা উখ্রে। ঐখোয়গী ঙমখৈশিংদা থম্লিবা থৌনা ফরবা বি.এস.এফ লান্মীশিং সেকুরিতিগী নমখায়বা ঙমদ্রবা ফক্লাংনি, ইমা ভারত ঙাক-শেনবা হায়বসি  ঐখোয়গী বি.এস.এফ লান্মীশিংগী মরুওইবনি। ইমা লৈবাক্কী মথৌ পাংথোক্লিঙৈদা, মে ১০ দা বি.এস.এফকী সব ইন্সপেক্তর ইমতিয়াজ থৱায় কৎখি। বিহারগী থৌনা ফরবা মপারি অসিগী মফমদা ঐনা ইকায়খুম্নবা উৎচরি। ঙসি, বিহারগী লৈহাওদগী ঐনা অমুক হন্না হায়নিংলি মদুদি ওপরেসন সিন্দুরদা য়েক্নবনা ভারতকী মপাঙ্গল খঙলে, অদুবু মসি ঐখোয়গী তেন্দোংগী তেঞ্জৈ অমা খক্তনি। ভারতনা তেরোরিজমগী মায়োক্ত লান্দারিবা অসি কৈদৌঙৈদা তোক্লোই। করিগুম্বা তেরোরিজমগী মরৈ অমুক তিংথোক্লক্লবদি, ভারতনা মসি মকোলদগী চিংথোক্কনি অমসুং ককথৎকনি।

মরুপশিং,

ঙমখৈ ৱাংমদা ওইগেরা নত্ত্রগা লৈবাক মনুং ওইগেরা, ঐখোয়না লান্থেংনরিবা অসি লৈবাক অসিগী য়েক্নবগী মথক্তনি। হৌখিবা চহি কয়াদা অহিংশা অমসুং লৈতাবা শন্দোক্লিবশিং কমদৌনা ঐখোয়না মাঙহনবগে হায়বা বিহারগী মীয়াম্না উরে। চহি খরগী মমাঙদা সসারাম, কাইমুর অমসুং য়ুম্লোন্নবা জিলাশিংদা করি ফিবম ওইরম্বগে হায়বা অদোম নিংশিংগনি। কমদৌনা নেক্সলিজম্না পানখিবা, মাইখুম উপতুনা অমসুং মখোয়গী মখুত্ত নোংমৈশিং পায়দুনা করম্বা মতমদা অমসুং কদাইদা নেক্সলাইতশিং লাক্কদগে হায়বগী মীওই খুদিংমক কিনখি। সরকারগী স্কিমশিং পায়খৎলবসু, মখোয় মীয়ামদা য়ৌখিদে। নেক্সালনা শোকহল্লবা খুঙ্গংশিংদা হোস্পিতাল নত্ত্রগা মোবাইল তৱার অমতা লৈখিদে। করিগুম্বা মতমদা স্কুলশিং মৈ থাখি, করিগুম্বা মতমদা লম্বী শেম্বা মীওইশিং হাৎখি। মীওইশিং অসিনা বাবা সাহেব অম্বেদকারগী সংবিধান থাজখিদে। ফিবমশিং অসিদা ফাওবা রাজ্য অসি চাউখৎনবা নিতিস জিনা কন্না হোৎনখি। ২০১৪ গী মতুংদা, ঐখোয়না মাইকৈ অসিদা য়াংনা চঙশিল্লে। ঐখোয়না মাওইষ্টশিং চৈরাক পীবা হৌরে। ঐখোয়না নহারোলশিং চাউখৎপগী ইচেলদা পুরক্লে। ঙসিদি লৈবাক অসিনা চহি ১১ গী অকনবা থবক্কী মহৈ চাবা হৌরে। ২০১৪ গী মমাঙদা জিলা ১২৫ হেন্না নেক্সালনা শোকহনখি, হৌজিক জিলা ১৮ খক নেক্সালনা শোকহল্লে। হৌজিক সরকরনা লম্বীশিং শেমগৎলে অমসুং থবক ফংহল্লে। মাওইষ্টকী হিংশা মপুংফানা মুৎথৎকদবা মতম অদু কুইরক্ত্রে, অপনবা অমতা লৈতনা খুঙ্গং খুদিংমক্ত শান্তি, সেকুরিতি, লাইরিক-লাইশু অমসুং চাউখৎপা য়ৌরক্লগনি।

মরুপশিং,

সেকুরিতি অমসুং শান্তি লৈরবা মতমদা চাউখৎপগী অনৌবা খুদোংচাবশিং লাকই। নিতিস জিগী লমজিং মখাদা জঙ্গল রাজ সরকার লৌথোক্লবা মতুংদা, বিহার চাউখৎপগী লম্বীদা চঙশিনবা হৌরক্লে। অকায়বা হাবৱেশিং, ফত্তবা রেলৱেশিং, ফ্লাইত খর খক লৈবা মতম অদু হৌজিক পুৱারি ওইহৌরে, মসি লৈহৌরগনি।

মরুপশিং,

মতম অমদা, বিহারদা এয়রপোর্ত অমা খক্ত লৈরমখি-পাতনা। ঙসিদি ধরভঙ্গা এয়রপোর্তসু থবক হৌরে। হৌজিক মফম অদুদগী দিল্লি, মুম্বাই অমসুং বেঙ্গালারুগুম্বা সহরশিংদা চৎপা য়ারে। পাতনা এয়রপোর্তকী তর্মিনেল মতমগা চুনবা মওংদা শেমগৎনবা বিহারগী মীয়াম্না মতম কয়াগী মমাঙদগী তকশিন্দুনা লাকখিবনি, হৌজিক মখোয়না তাল্লকপা অদু ফংলে। ঙরাং ঐনা পাতনা এয়রপোর্তকী অনৌবা তর্মিনেল শঙ্গাখ্রে। অনৌবা তর্মিনেল অসিনা হৌজিক পেসেঞ্জর করোর ১ চনগনি। মসিদা লুপা করোর ১৪০০ থাদখি।

মরুপশিং,

ঙসিদি, বিহারগী মফম খুদিংমক্ত লেন মরি অমসুং লেন তরুক্কী লম্বীশিং লৈরে। পাতনাগী বুক্সার ফাওবা, গয়াজিদগী দোভি ফাওবা, পাতনাদগী বোধ গয়া ফাওবা, পাতন-অরা-সসারাম গ্রিন কোরিদোর য়াওনা মফম খুদিংমক য়াংনা শেমগৎলি। গঙ্গা, সোন, গানদক অমসুং কোসি য়াওনা অচৌবা তুরেলশিংদা অনৌবা থোঙশিং শাগৎলি। অসিগুম্বা লুপা করোর লিশিং কয়াগী প্রোজেকশিংনা বিহারদা অনৌবা খুদোংচাবশিং পীরে। প্রোজেকশিং অসিনা নহারোল লিশিং কয়াদা থবক ফংহনগনি। বিহারগী তুরিজম অমসুং ললোন-ইতিক অনিমক কান্নবা ফংগনি।

মরুপশিং,

বিহারদা রেলৱেজশিংগী ফিবম হৌজিক য়াংনা হোংলে। ঙসিদি বিহারদা মালেম থাক্কী বন্দে ভারত ত্রেনশিং চেল্লে, রেলৱে লাইনশিং দবল অমসুং ত্রিপল ওইরে, ছাপ্রা, মুজফরপুর, কাতিহারদা থবক য়াংনা পায়খৎলি। সোন নগর অমসুং অন্দালগী মরক্ত মল্তিত্রেক্কিং থবক য়াংনা পায়খৎলি, মসিনা ত্রেনশিংগী খোঙজেল য়াংখৎহনগনি। হৌজিক ত্রেন ১০০ হেন্না সসারামদা খামলে। ঐখোয়না অরিবা খুদোংচাদবশিং কোকহল্লে অমসুং রেলৱেজশিং মতমগা চুন্না শেমগৎলে।

মরুপশিং,

হায়রিবা থবকশিং অসি মমাঙদা পাংথোক্লম্বা য়াবনি। অদুবু বিহারদা অনৌবা ত্রেনশিং চেনহলগদৌরিবা মীওইশিং অদুনা, রেলৱেদা থবক হাপ্পগী মিংদা অদোমগী লমশিং মুনখি, লায়রবগী লম মখোয়গী মিং পানখি, থবক অসি খুন্নাইগী অচুম্বা পুরক্নবা মখোয়গী থবকশিংনি, লায়রবা শগুন তৌবা, মখোয়গী থকশিং মৎপা, মখোয়গী উপায় লৈজদবা অদুগী খুদোংচাবা লৌবা অমসুং মখোয়না নিংথৌগুম্না হিংবা। জঙ্গল রাজগী মীওইশিংগী নমথাকশিং অমসুং ওইদবা ঙাংবশিংদগী বিহারগী মীয়াম চেকশিনবা য়াম্না মরুওই।

মরুপশিং,

মৈ য়াওদনা চাউখৎপা মপুংফাদে। ইলেক্ত্রিসিতি ফংবা মফমদা, উদ্যোগ চাউখৎলি, মৈ ফংবা মফমদা, হিংবদা লাইহল্লি। ২১শুবা চহিচা অসি তেক্নোলোজিগী মপান তাংবা চহিচা অমনি। মরম অদুনা থবক খুদিংমক্ত ইলেক্ত্রিসিত দরকার ওই। হৌখিবা চহিশিংদা বিহারদা মৈ পুথোক্নবা অকনবা থবক পায়খৎলে। মমাংগী চহি ১০ গা চাংদম্নবদা ঙসিদি বিহারদা মৈ পুথোকপা শরুক ৪ হেনগৎলে। নাবিনগরদা লুপা করোর লিশিং ৩০ চঙনা এন.তি.পি.সি পৱার প্রোজেক অমা পায়খৎলে। মসিনা বিহারদা মৈ মেগাৱাত ১৫০০ ফংহনগনি। বুজার অমসুং পিরপান্তিদা অনৌবা থর্মেল পৱার প্লান্তশিংসু পায়খৎপা হৌরে।

মরুপশিং,

হৌজিক ঐখোয়না তুংলমচত্ত মীৎয়েং থম্লে। ঐখোয়না বিহার গ্রিন ইনর্জিগী মাইকৈদা পুরগনি। মরম অদুনা, কাজরাদা সোলার পার্ক অমসু শেমগৎলে। পি.এম-কুসুম য়োজনাগী মখাদা, নুমিৎ মঙালদগী শেন তান্নবা খুদোংচাবশিং লৌমীশিংদা পীরে। রিন্যুএবল এগ্রিকলচর ফিদরশিংদগী হৌজিক লৌবুকশিং মৈ ফংলে। ঐখোয়না পায়খৎলিবা থবকশিং অসিনা মীয়ামগী ফিবম ফগৎলে। নুপীশিং অকিবা ফাওদ্রে।

মরুপশিং,

রাজ্য অসিদা অনৌবা ইনফ্রাষ্ট্রকচরশিং লাকপা মতমদা, খুঙ্গংশিং, লায়রবা, লৌমীশিং অমসুং অপীকপা উদ্যোগশিং খ্বাইদগী কান্নবা ফংলে। মখোয়না লৈবাক অসিগী অমসুং মপানগী অচৌবা কৈথেলশিংগা শম্নবা ঙমহল্লে। রাজ্য অসিদা নৌনা শেন থাদরকপা মতমদা, অনৌবা খুদোংচাবশিং পীরে। হৌখিবা চহিদা বিহারদা পাংথোকখিবা বিহার বিজিনেস সম্মিৎতা, রাজ্য অসিদা শেন থাদনবা মশিং য়াম্লবা কম্পেনিশিং লাকখিবা অদু অদোম উখ্রে, রাজ্য অসিদা উদ্যোগশিং লাকপা মতমদা, মীয়াম থবক থিনবা অতোপ্পা মফমশিংদা চৎলরোই, লৌমীশিংগী অনৌবা থবকশিং ফংলগনি। পোৎ-চৈ পুথোক-পুশিনগী খুদোংচাবশিং ফগৎলকপদগী, মখোয়গী পোৎথোকশিং অরাপ্পা মফমশিংদা য়ৌহনবা ঙম্লগনি।

মরুপশিং,

বিহারগী লৌমীশিংগী শেন্থোক হেনগৎহন্নবা ঐখোয়গী সরকারনা মখা তানা থবকশিং পায়খৎলি। বিহারগী লৌমী লাখ ৭৫ হেন্না পি.এম কিষান সম্মান নিধিগী মখাদা কান্নবশিং ফংলে। ঐখোয়গী সরকারনা মখানা বোর্দ লিংখৎলে। ঐখোয়না বিহারগী মখানাশিংদা জি.আই তেগ পীরে। মসিনা থাংজিং থাবা লৌমীশিংদা কান্নবা পীরে। চহি অসিগী বজেত্ত, ঐখোয়না বিহারদা ফুদ প্রোসেসিংগী ইন্সতিতুৎ অমা লিংখৎনবা লাউথোক্লে। হন্দক কেবিনেতনা কালেন লৌরোক্কী ওইনা ফৌ য়াওনা মহৈ-মরোং ১৪ গী এম.এস.পি হেনগৎপদা অয়াবা পীখ্রে। মসিদা লৌমীশিংনা মখোয়গী মহৈ-মরোংগী মমল হেন্না য়োনবা ঙম্লগনি অমসুং মখোয়গী শেন্থোকসু হেনগৎলগনি।

মরুপশিং,

বিহারগী লায়রবা অমসুং তোল্লবা কাংলুপকী মথক্ত পানবা মতমদা বিহারগী মীয়াম খ্বাইদগী চাউনা নমথাক তৌখিবা মীওইশিং বিহার থাদোক্কদবনি, ঙসিদি হায়রিবা মীওইশিং অদুনা শক্তি পায়নবা খুন্নাইগী অচুম্বগী মরমদা ওইদবা কয়া ঙাংলি। চহি কয়া, বিহারগী দলিতশিং, তোল্লবা কাংলুপশিং অমসুং ত্রাইবেলশিং তোইলেতশিং ফাওবা লৈরমদে, চহি কয়া হায়রিবা ইনাওশিং অমসুং ইচলশিং মখোয়গী বেঙ্ক একাউন্তশিং হাংলমদে। মখোয় বেঙ্কশিংদা চঙবা য়ারমদে। দলিত অমসুং তোল্লবা কাংলুপকী মীওই অয়াম্বা শ্লমশিংদা লৈখি। মখোয়গী চপ চাবা য়ুমশিং লৈতে, মখোয় য়ুম লৈতবা মীওইশিংনি, মীওই করোর কয়া মখোয়গী কোকথক্ত মথক কুপ্পা য়ুম অমা ফাওবা লৈরমদে। ঐনা হংলি, বিহারগী মীয়ামগী অৱাবা অসি, কংগ্রেস অমসুং আর.জে.দিগী খুন্নাইগী অচুম্বরা? মসিদগী হেনবা অরানবা অমা লৈতে, লায়রবশিং নমদুনা অসিগুম্বা উপায় লৈতবা ফিবম অমদা হিংনবা হায়রিবা মীওইশিং অদুনা থৌশিলশিং শেমখি। দলিতশিং অমসুং তোল্লবা মীয়ামগী অৱাবশিং কংগ্রেস অমসুং আর.জে.দিনা কৈদৌঙৈদা খনখিদে। হায়রিবা মীওইশিং অসিনা বিহারগী লায়রবা উৎনবা মপান লৈবাক্কী মীওইশিং পুরকখি। মসিগী পাপশিং অসিনা হৌজিক দলিতশিং, তোল্লবা কাংলুপশিং অমসুং লায়রবনা কংগ্রেস থাদোক্লে, মখোয় মশা কঞ্জনবা মখোয়না অমুক হন্না খুন্নাইগী অচুম্বগী মরমদা ৱা ঙাংলি।

মরুপশিং,

এন.দি.এগী মতমদা লৈবাক অসিদা অমসুং বিহারদা খুন্নাইগী অচুম্বগী অনৌবা যুগ অমা লাক্লে। ঐখোয়না লায়রবশিংদা তঙাইফদ্রবা পোৎলমশিং ফংহল্লে। বেনিফিসরি চাদা ১০০ দা হায়রিবা খুদোংচাবশিং অদু ফংহন্নবা ঐখোয়না থবক পায়খৎলি। অনৌবা য়ুম করোর ৪, লাখপতি দিদি করোর ৩ শেমগৎনবা পান্দম, ইমুং করোর ১২ হেনবদা তোতি ঈশিং ফংহনবা, চহি ৭০ গী মথক্ত লৈবা অহলশিং লুপা লাখ ৫ ফাওবগী লেম্না লায়য়েংবা, থা খুদিংগী লেম্না চেঙ পীবা, লায়রবা মীওই খুদিংমক্কী ঐখোয়গী সরকারনা লেপ্লি।

মরুপশিং,

খুঙ্গং খুদিংমক, ইমুং খুদিংমক সরকারগী স্কিমশিংগী কান্নবশিং ফংহনবা ঐখোয়না পাম্মী। থবক অসি বিহার সরকারনা হৌবদা ঐ হরাওই। বিহার সরকারনা দোক্তর ভিমরাও অম্বেদকার সমাগ্রা সেবা অভিয়ান হৌদোক্লে। অভিয়ান অসিনা মরুওইবা স্কিম ২২ পুনশিন্দুনা খুঙ্গং অমসুং লৈকায় খুদিংদা য়ৌহল্লে। ঐখোয়গী পান্দমদি দলিত, মহাদলিত, তোল্লবা অমসুং খ্বাইদগী লায়রবা মীওই খুদিংমক্কী থোঙজিলদা য়ৌহনবনি। সরকার মশামক বেনিফিসিরিশিংগা উনরে, মীচং মীখাই নাইবা অমসুং শেঞ্জা-থুম অমতা লৈত্রে। মতম অসিদা খুন্নাইগী অচুম্বা পুরক্কনি।

মরুপশিং,

বাবা সাহেব অম্বেদকার, কারপুরি থাকুর, বাবু জগজিবন রাম অমসুং জে.পিগী মঙলানশিংগী বিহার ঐখোয়না শেমগৎলে। ঐখোয়গী পান্দমদি বিকসিত বিহার, বিকসিত ভারতনি। মরম অদুনা বিহার চাউখৎলকপা মতমদা,মালেমদা ভারতনা মকোক থোংগনি। ঐখোয়না মখা তানা চাউখৎপগী খোঙজেল য়াংখৎহনগনি হায়না ঐনা থাজৈ। চাউখৎ-থৌরাংগী থবকশিং অসিগীদমক ঐনা অমুক হন্না মীয়ামদা হরাওবা ফোঙদোকচরি। অদোমগী খুৎশিং থাঙ্গৎপীয়ু, অদোমগী খুৎতুম তাশিনবীয়ু অমসুং ঐগা লোয়ননা লাউমিন্নসি-

ভারত মাতা কি জয়!

লাপ্না য়ৌনবা ঐখোয় লাউগদবনি। ঙমখৈদা লৈরিবা ঐখোয়গী লান্মীশিং চাউথোকচবা পোক্কনি।

ভারত মাতা কি জয়!

ভারত মাতা কি জয়!

ভারত মাতা কি জয়!

অদোম থাগৎচরি।

****