প্রধানমন্ত্রীগী লোইশঙ
প্রধান মন্ত্রীনা সরকারগী লুচিংবা অমা ওইনা থৌ পুবগী চহি ২৫ শুরকপদা মীয়ামদা থাগৎপা ফোংদোকখ্রে
পি.এম.না ২০০১দা গুজরাতকী মুখ্য মন্ত্রী ওইনা ৱাশক লৌখিবগী থৌরম নীংশিংখি
পি.এম.না মতম পুম্নমক্তা লায়রবশিংগীদমক থবক তৌনবা অমসুং ৱানোম শেল অমত্তা লৌদনবা হায়রদুনা মহাক্কী মমাগী পাউতাক অদুবু শেয়র তৌখি
পি.এম.না গুজরাতনা ঈকং তোইনা থোকপা রাজ্য অমা ওইরম্বদগী অফবা লৈঙাক্কী পাৱরহাউস অমা ওইরকখিবা অদু নিংশিংখি
পি.এম.না বিক্সিত ভারতকী মঙলান অসি মংফাওনহন্নবা হেন্না কন্না হোৎননবা ফিরেপ অদুবু অমুক হন্না ফোংদোকখ্রে
Posted On:
07 OCT 2025 10:52AM by PIB Imphal
প্রধান মন্ত্রী, শ্রী নরেন্দ্র মোদীনা সরকারগী লুচিংবা অমা ওইনা চহি ২৫ শুরকপা অসিদা ভারতকী মীয়ামদা থাগৎপা ফোংদোকখ্রে। ২০০১গী ঙসিগী নুমিৎ অসিদা গুজরাতকী মুখ্য মন্ত্রী ওইনা ৱাশক লৌখিবদগী মহাক্কী খোঙচৎ অদু নৌহৌনা নীংশিংলদুনা প্রধান মন্ত্রীনা হায়খি মদুদি মীয়ামগী পুন্সি মহিং ফগৎহন্নবা অমসুং লৈবাক্কী চাউখৎ থৌরাংদা শরুক য়ানবা মহাক্না লেপ্পা লৈতনা হোৎনরি।
প্রধান মন্ত্রীনা হায়খি মদুদি মহাকপু য়াম্না অৱাবা তারবা ফিভম অমদা গুজরাতকী মুখ্য মন্ত্রী ওইবগী থৌদাং অদু পীখি। রাজ্য অসি চহী অদুদা অচৌবা জুহার হাবগী থৌদোক অমা থোকখিবদগী অৱাবা মায়োক্নখি অমসুং মথংগী চহিশিংদা সুপর সাইক্লোন, থংন-থংননা থোকখিবা ঈকং অমসুং রাজনিতীগী অৱাবা কয়া অমা মায়োক্নখি। মহাক্না হায়খি মদুদি হায়রিবা শিংনবশিং অসিনা মীয়ামগী সেবা তৌনবা অমসুং গুজরাতপু অনৌবা শক্তি অমসুং আশাগা লোয়ননা অমুক হন্না শেমগৎনবা ৱারেপ অদুবু হেন্না মপাঙ্গল কনখৎহনখি।
শ্রী মোদীনা মহাক্না মুখ্য মন্ত্রী ওইনা ৱাশক লৌখিবা মতমদা মহাক্কী মমাগী ৱাহৈশিং নিংশিংখি, মহাক্না মতম পুম্নমক্তা লাইরবশিংগীদমক থবক তৌগদবনি অমসুং করিগুম্বদা ৱানোম শেল অমত্তা লৌরোইদবনি। মহাক্না মীয়ামদা থাজবা পীখি মদুদি মহাক্না তৌগদবা থবক খুদিংমক খ্বাইদগী ফবা ৱাখল্লোনগা লোয়ননা তৌগনি অমসুং ক্যু অদুদা লৈরিবা অরোইবা মীওই অদু ফাওবা মতেং পাংবগী ভিজন অদুগী ইথিল অমগা লোইনা তৌগনি।
গুজরাত্তা মহাক্না থৌ পুরিঙৈ মতম অদুগী মতাংদা পল্লদুনা প্রধান মন্ত্রীনা হায়খি মদুদি মতম অদুদা মীয়াম্না রাজ্য অসি অমুক হন্না হৌগৎলকপা ঙম্লরোই হায়না থাজরম্মি। লৌমীশিংনা মৈ অমসুং ঈশিং ফংদবগী মতাংদা ৱাকৎখি, লৌউ-শিংউবগী থবক অসি তপ্না-তপ্না হন্থরকখি অমসুং ইন্দস্ত্রীগী চাউখৎপা অসি লেপ্তুনা লৈখি। মহাক্না হায়খি মদুদি পুন্না হোৎনমিন্নবদগী গুজরাত অসি অফবা লৈঙাক্কী পৱারহাউস অমা ওইরকখি। মতম অমদদি ঈকং তোইনা থোকপা মফম অমা ওইরম্বা রাজ্য অসি হৌজিক্তি লৌউ-শিংউদা মকোক থোংবা অমা ওইরকখি, লাল্লোন-ইতিক্তগী মেনুফেকচরিং অমসুং ইন্দস্ত্রীয়েল কেপাসিতীশিংদা ওইনা পাকথোক চাউথোকখি। অমসুং সোসিয়ল অমসুং ফিজিকেল ইনফ্রাস্ত্রকচরদা ঈনোৎ লাকখি।
প্রধান মন্ত্রীনা হায়খি মদুদি ২০১৩দা, লৈবাক অসিনা থাজবা অমসুং লৈঙাক্কী অৱাবা অমা মায়োক্নরিঙৈদা, মহাকপু ২০১৪গী লোক সভা মীখলগীদমক প্রধান মন্ত্রীগী কেন্দিদেৎ ওইনবগী থৌদাং অসি পীখি। মহাক্না হায়খি মদুদি ভারতকী মীয়াম্না মহাক্কী এল্লাইন্সতা অয়াম্বা অমসুং মহাক্কী পার্তীদা মপুং ফাবা মেজোরিতী পীদুনা অনৌবা থাজবা অমসুং পান্দমগী মতম অমা হৌদোকখি।
প্রধান মন্ত্রীনা হায়খি মদুদি হৌখিবা চহি ১১ অসিদা ভারতনা অহোংবা কয়া অমা পুরকখ্রে হায়না প্রধান মন্ত্রীনা ফোংদোকখি। মীওই করোর ২৫ হেন্না লাইরবদগী কোকহল্লে অমসুং লৈবাক অসি মালেমগী মরুওইবা শেন্মিৎলোনশিংগী মরক্তা মঙাল থোকপা মফম অমা ওইরক্লি। মহাক্না হায়খি মদুদি ভারত শিনবা থুংবগী মীওইশিং, মরু ওইনা নারী শক্তি, য়ুভা শক্তি অমসুং কন্না হোৎনরিবা অন্নদাতাশিংনা, অহোংবা পুরক্নবা হোৎনবা অমসুং রিফোর্মশিংগী খুত্থাংদা মপাঙ্গল কনখৎহল্লে।
মহাক্না মখা তাখি মদুদি ঙসি মীয়ামগী ৱাখল্লোনদি ভারত অসি সেক্তর খুদিংমক্তা আত্মনির্ভর ওইহনবা হায়বসিনি। মসি ‘গর্ভ সে কাহো, য়ে স্বদেশী হে’গী খোল্লাওদা ময়েক শেংনা উৎলি।
ভারতকী মীয়াম্না লেপ্পা লৈতনা থাজবা অমসুং নুংশিজবগীদমক মহাক্কী থাগৎপা অমুক্কা ফোংদোক্লদুনা, প্রধান মন্ত্রীনা হায়খি মদুদি লৈবাক অসিগী সেবা তৌবা হায়বসি খ্বাইদগী ৱাংবা ইকাই খুম্নবা অমনি। সংবিধানগী মগুনশিংনা লমজিংদুনা, মহাক্না বিক্সিত ভারতকী অপুনবা মঙলান অদু মংফাওনহন্নবা হেন্না কন্না হোৎননবা মহাক্কী ফিরেপ অদু অমুক হন্না ফোংদোকখি।
Xতা থাগৎলকপা পোস্তকী পরিং অমদা, প্রধান মন্ত্রীনা হায়খি;
“২০০১গী ঙসিগী নুমিত্তা ঐহাক্না অহানবা ওইনা গুজরাতকী মুখ্য মন্ত্রী ওইনা ৱাশক লৌখি। ঐহাক্কী ভারত মচাশিংগী লেপ্পা লৈতনা থৌজাল পীনবীবদুগী মপালনা ঐহাক্না সরকার অমগী মকোক ওইদুনা থবক তৌরকপা চহি ২৫ শুরক্লে। ভারতকী মীয়ামদা ঐহাক্না থাগৎপা ফোংদোকচরি। চহিশিং অসিদগী ঐহাক্না ঐখোয়গী মীয়ামগী পুন্সি মহিং ফগৎহন্নবা অমসুং ঐখোয় পুম্নমকপু য়োকপী-নাওকোনবীরকখিবা অচৌবা লৈবাক অসিগী চাউখৎ থৌরাংদা শরুক য়ানবা লেপ্পা লৈতনা হোৎনদুনা লাক্লি।”
“য়াম্না অৱাবা চাংয়েংগী ফিভম অমদা ঐহাকপু গুজরাতকী সি.এম. ওইবগী থৌদাং অসি ঐহাক্কী পার্তীনা ঐঙোন্দা খুৎশিন্নরকখি। চহী অসিমক্তদা রাজ্য অসি অচৌবা জুহার হাবগী থৌদোক অমনা মরম ওইদুনা অৱাবা মায়োক্নখি। মমাংগী চহিশিংদা সুপর সাইক্লোন অমা, থংন-থংননা থোরকখিবা ঈকং অমসুং রাজনিতীগী অৱাবা কয়া অমা থেংনখি। হায়রিবা শিংনবশিং অসিনা মীয়ামগী সেবা তৌনবা অমসুং গুজরাতপু অনৌবা থৌনা অমসুং আশাগা লোয়ননা অমুক হন্না শেমগৎনবগী ফিরেপ অদুবু হেন্না মপাঙ্গল কনখৎহনখি।”
“ঐহাক্না মুখ্য মন্ত্রী ওইনা ৱাশক লৌরকপা মতমদা, ঐহাক্কী ইমানা ঐঙোন্দা হায়রম্বা অদু ঐহাক্না নীংশিংলি - ঐহাক্না নহাক্কী থবকশিং অদু য়াম্নদি খঙদে অদুবু ঐহাক্না ৱাফম অনি খক্তমক পাম্মি। অহানবদা, নহাক্না মতম পুম্নমক্তা লায়রবশিংগীদমক থবক তৌগনি অমসুং অনিশুবদা, নহাক্না করিগুম্বা অমত্তদা ৱানোম শেল লৌরোই। ঐহাক্না মীয়ামদা মসিসু হায়জরি মদুদি ঐহাক্না তৌবা খুদিংমক খ্বাইদগী ফবা ৱাখল্লোনগা লোয়ননা তৌগনি অমসুং ক্যুদা লৈরিবা খ্বাইদগী অরোইবদা লৈরিবা মীওই ফাওবা মতেং পাংনবা ভিজন অমনা ইথিল পীগনি।”
“চহী ২৫ অসিদা এক্সপরিয়েন্স কয়া অমা ফংখি। ঐখোয় পুন্না, ঐখোয়না চাউনা খুমাং চাউশিল্লে। ঐহাক্না হৌজিক ফাওবা নীংশিংলি মদুদি, ঐহাক্না সি.এম. ওইরকপা মতমদা, গুজরাত অসি অমুক হন্না হৌগৎলকপা ঙম্লরোই হায়না থাজবা লৈখি। লৌমীশিং য়াওনা মীচম প্রজাশিংনা মৈ অমসুং ঈশিং ফংদবগী মতাংদা ৱাকৎখি। লৌউ-শিংউগী লম অসি অৱাবা কয়া মায়োক্নখি অমসুং ইন্দস্ত্রীগী গ্রোথ অসি লেপ্পগা লৈখি। মদুদগী ঐখোয়না গুজরাতপু অফবা লৈঙাক্কী পৱারহাউস অমা ওইহন্নবা পুন্না হোৎনমিন্নরকখি।”
“গুজরাত অসি ঈকং তোইনা থোকপা রাজ্য অমা ওইরম্বদগী লৌউ-শিংউদা খ্বাইদগী ফবা রাজ্য অমা ওইরক্লি। ললোন-ইতিক্কী চৎনবী অসি মপাঙ্গল কনবা ইন্দস্ত্রী অমসুং মেন্যুফেকচরিং কেপাসিতীদা পাকথোক চাউথোকখি। কর্ফ্যু তৌইনা থোকপা মতম অদু হৌখিবা মতমগী ৱাফম অমা ওইখ্রে। সোসিয়ল অমসুং ফিজিকেল ইনফ্রাস্ত্রকচরদা চাউনা ঈনোৎ লাকখি। মসিগী মহৈশিং অসি ফংনবগীদমক্তা মীয়ামগা লোয়ননা থবক তৌমিন্নবা ঙমখিবা অসি য়াম্না পেনজখি।”
“২০১৩দা ঐহাকপু ২০১৪গী লোক সভা মীখলগীদমক প্রধান মন্ত্রীগী কেন্দিদেৎ ওইনবগী থৌদাং পীখি। মতম অদুদা, লৈবাক অসিনা থাজবা অমসুং লৈঙাক্কী অৱাবা অমা থেংনখি। মতমদুগী য়ু.পি.এ. সরকার অসি খ্বাইদগী ফত্তবা মওংদা কোরপ্সন, ক্রোনিজম অমসুং পোলিসী পেরলাইজ তৌবগী মশক ওইখি। ভারত অসি মালেমগী থাক্তা অশোনবা লিঙ্ক অমা ওইনা উরম্মি। অদুবু, ভারতকী মীয়ামগী ৱাখল্লোন অসিনা ঐখোয়গী এল্লাইন্সপু মশিং য়াম্লবা মেজোরিতী অমা পীখি অমসুং ঐখোয়গী পার্তীনা দেকেদ ৩গী মতুংদা অহানবা ওইনা মপুং ফাবা মেজোরিতী অমা ফংহনখি।”
“হৌখিবা চহি ১১ অসিদা, ঐখোয় ভারতকী প্রজাশিংনা পুন্না থবক তৌমিন্নদুনা অহোংবা কয়া অমা পুরকখ্রে। ঐখোয়গী খোঙথাং অসিনা ভারত শিনবা থুংনা লৈরিবা মীওইশিং, মরুওইনা ঐখোয়গী নারী শক্তি, য়ুভা শক্তি অমসুং কন্না হোৎনরিবা অন্নদাতাশিংদা শক্তি পীরি। মীওই কোতি ২৫ হেন্না লায়রবগী খুবামনুংদগী লৌথোকখ্রে। মালেমগী মরুওইবা শেন্মিৎলোনশিংগী মরক্তা ভারত অসি থোইদোক-হেন্দোক্না ঙানথোইরবা মফম অমা ওইনা উরি। ঐখোয়দা মালেমগী খ্বাইদগী চাউবা হেল্থকেয়র অমসুং সোসিয়ল সেক্যুরিতী স্কিমশিংগী মনুংদা অমা লৈ। ঐখোয়গী লৌমীশিংনা অনৌবা কয়া পুথোক্লি অমসুং ঐখোয়গী লৈবাক অসি মশানা-মরোমদোম লেপচবা ঙম্নবা হোৎনরি। ঐখোয়না পাক চাউরবা রিফোর্মশিং পায়খৎখ্রে অমসুং মীয়ামগী খ্বাইদগী পাম্বা ৱাখল্লোনদি ভারত অসি সেক্তর খুদিংমক্তা আত্মনির্ভর ওইহন্নবা হোৎনবনি, মসিনা “গর্ভ সে কাহো, য়ে স্বদেশী হে”গী খোললাও অসিবু ময়েক শেংনা ফোংদোক্লি।”
“ভারতকী মীয়াম্না লেপ্পা লৈতনা থাজবা অমসুং নুংশিবীবগীদমক ঐহাক্না অমুক্কা হন্না থাগৎপা ফোংদোকচরি। ঐখোয়গী নুংশিজরবা লৈবাক অসিবু সেবা তৌবা হায়বসিনা খ্বাইদগী ৱাংবা ইকাই খুম্নবা অমনি, মসি ঐঙোন্দা চাউথোকচহনবা অমসুং পান্দম অমা ফাওহনবা থৌদাং অমনি। ঐখোয়গী সংবিধানগী মগুনশিং অসিনা ঐহাকপু লেপ্পা লৈতনা লমজিং-লমতাকপীদুনা, লাক্কদৌরিবা মতমশিংদা বিক্সিত ভারতকী ঐখোয়গী অপুনবা মঙলান অসি মংফাওনহন্নবা ঐহাক্না হেন্না কন্না হোৎনগনি।”
***
(Release ID: 2175754)
Visitor Counter : 8
Read this release in:
English
,
Urdu
,
Hindi
,
Nepali
,
Marathi
,
Bengali
,
Punjabi
,
Gujarati
,
Odia
,
Tamil
,
Kannada
,
Malayalam