প্রধান মন্ত্রী শ্রী নরেন্দ্র মোদীনা ঙসি এয়র ফোর্স স্তেসন, অদমপুরদা লৈবা থৌনা ফরবা এয়র ৱারিয়রশিং অমসুং লান্মীশিংগা উনদুনা ৱারী শানখ্রে। মখোয়দা ৱা ঙাংলদুনা মহাক্না 'ভারত মাতা কী জয়' হায়বা স্লোগান অসিগী শক্তি অদু পনখি। মালেম অসিনা মসিগী শক্তি অদু উবা ফংলে হায়না মহাক্না অকনবা ৱাফম থমখি। মসি শুপ্নগী শোনবা খক নত্তে, ভারতকী ইমাগী ইকাই খুম্নবা ঙাক্নবা মখোয়গী পুন্সি কৎথোক্লিবা লান্মী খুদিংমক্না লৌরিবা শেংলবা ৱাশকনি হায়না পল্লদুনা প্রধান মন্ত্রীনা হায়খি মদুদি স্লোগান অসি লৈবাক অসিগীদমক হিংবা অমসুং অফবা মওংদা শরুক তম্বা পাম্বা নাগরিক খুদিংমক্কী খোঞ্জেলনি। মহাক্না হায়খি মদুদি 'ভারত মাতা কী জয়' অসি লানফম অমসুং মরুওইবা মিসন অনিমক্তা মমি তারি। মহাক্না হায়খি মদুদি ভারতকী লান্মীশিংনা "ভারত মাতা কী জয়" হায়রবদি, মসিনা য়েক্নবশিংগী থম্মোয়দা অকিবা পোকহল্লি। মহাক্না ভারতকী লান্মীগী শক্তিদা মরুওইবা পীদুনা হায়খি মদুদি ভারতকী দ্রোনশিংনা য়েক্নবশিংগী লানবনশিং থুগাইরকপা অমসুং মিসাইলশিংনা প্রসিজনগা লোয়ননা স্ত্রাইক তৌবা মতমদা, য়েক্নবশিংনা ৱাহৈ পরেং অমা খক্তমক তাখি: "ভারত মাতা কী জয়।" প্রধান মন্ত্রী মোদীনা হায়খি মদুদি অম্বা অহিং ফাওবদা, ভারতনা লৈবাক অসিগী অচেৎপা ৱাখল্লোন অদু য়েক্নবশিংনা উবা ফংহন্নবা, অমম্বা অদু ঙালহনবা ঙম্মী। মহাক্না হায়খি মদুদি ভারতকী লান্মীশিংনা ন্যুক্লিয়র ব্লেকমেল অদু নাচুংদবা মতমদা, মসিগী পাউজেল অসি শ্বরগর অমসুং লৈনুং য়ৌনা শন্দোক্কনি - "ভারত মাতা কী জয়।"

ভারতকী লান্মীশিংগী থৌনা অমসুং পুক্নিং থৌগৎপবু থাগৎলদুনা, মখোয়না ভারত মচা মিল্লিয়ন কয়াগী থম্মোয়দা চাউথোকচবা পোকহল্লে হায়না পল্লদুনা, শ্রী মোদীনা হায়খি মদুদি ভারত মচা খুদিংমক্না মখোয়গী থোইদোক হেন্দোকপা থৌনা অমসুং পুৱারী ওইরবা মাইপাকপশিংগীদমক্তা ঙসি হেন্না ৱাংনা লেপ্লি। মহাক্না মখা তাখি মদুদি থৌনা ফরবা হেরোশিং অসি উবা ফংখিবা অসি তশেংনা য়াম্না চাউথোকচনিংঙাইনি। মহাক্না হায়খি মদুদি লৈবাক অসিগী থৌনা ফবগী মতাংদা চহি তরাগী খুজিং কয়াগী মতুংদা খন্ন-নৈনরকপা মতমদা, মিসন অসিগী লুচিংবা লান্মীশিং অসি খ্বাইদগী শক্নাইরবা মীওইশিং ওইরগনি। মহাক্না হায়খি মদুদি মখোয় অসি হৌজিক্কী মতমগীদমক্তা নত্তনা তুংগী চারোন-শুরোনগীদমক্তাসু ইথিল পীবা অমা ওইরক্লি। থৌনা ফরবা লান্মীশিংগী লমদমদগী মহাক্না আর্মদ ফোর্সতা ৱা ঙাংখি। মহাক্না এয়র ফোর্স, নেভী, আর্মদ অমসুং বোর্দর সেক্যুরিতী ফোর্স (বি.এস.এফ.) গী থৌনা ফরবা মীওইশিংদা সলাম তৌখি। মহাক্না মখোয়গী থৌনা ফরবা থবকশিংবু থাগৎপা ফোংদোকখি। মহাক্না হায়খি মদুদি ওপরেসন সিন্দুরগী ইথিল অসি লৈবাক শীনবা থুংনা ইথিল পীরি। ওপরেসন অসিগী মনুংদা, ভারত মচা খুদিংমক্না লান্মীশিংগা লোয়ননা নিংথিনা লেপখি, মখোয়গীদমক লাই খুরুমখি অমসুং মতেং পাংখি হায়না মহাক্না পনখি। মহাক্না লৈবাক শীনবা থুংনা ঐখোয়গী লান্মীশিং অমসুং ঐখোয়গী ইমুং-মনুংশিংদা মখোয়না কত্থোকপশিংবু মশক খঙবগা লোয়ননা মখোয়দা থাগৎপা ফোংদোকখি।

প্রধান মন্ত্রীনা হায়খি, "ওপরেসন সিন্দুর অসি অচম্বা লান্মীগী কেম্পেন নত্তে অদুবু মসি ভারতকী পোলিসী, ইন্তেন্ত অমসুং ৱারেপ লৌবগী মতিক্কী ত্রিনিতি অমনি।" ভারত অসি বুদ্ধ অমসুং গুরু গোবিন্দ সিংহজীগী লমদমনি হায়না মহাক্না ফোংদোকখি। মহাক্না হায়খি, "ঐহাক্না লান্মী অমবু মীওই ১২৫,০০০গী মায়োক্তা লান্থেংনবা হোৎনগনি... ঐহাক্না সেন্দ্রাংশিংনা উমাইবীশিংবু মাইথিবা পীনবা হোৎনগনি... মদুগী মতুংদা ঐহাকপু গুরু গোবিন্দ সিংহ কৌগনি।" মহাক্না হায়খি মদুদি অচুম্বা ৱায়েল-পথাপ লিংখৎনবগীদমক্তা অরানবা ৱায়েল-পথাপকী মায়োক্তা খুৎ থাবা অসি মতম পুম্নমক্তা ভারতকী চৎনবী ওইদুনা লাক্লি। মহাক্না হায়খি মদুদি তেরোরিস্তশিংনা ভারতকী মচানুপীশিংদা লান্দারকপা অমসুং খুদোংথিবা পীরকপা মতমদা, ভারতকী লান্মীশিংনা মখোয় মশানা লোৎতুনা লৈরিবা মফমশিংদা মখোয়বু মাইথিবা পীখি। মহাক্না হায়খি মদুদি এতেকরশিং অসি মখোয়না শিংনখিবা অদু, শক্তি লৈরবা ভারতকী লান্মীশিংনা কাউদুনা, মীকিথিগুম্না লোৎনা লাকখি। মহাক্না ভারতকী লান্মীশিংগী থৌনাগীদমক থাগৎপা ফোংদোকখি। মখোয়না তেরোরিস্তশিংগী মরুওইবা মফমশিংবু থুগাইদুনা হকথেংননা লান্দাখি। তেরোরিস্তকী লোৎফম মাপন থুগাইখি, অমসুং তেরোরিস্ত ১০০ হেন্না হাৎখি। প্রধান মন্ত্রীনা হায়খি মদুদি তেরোরিজমগী মাস্তরমাইন্দশিংনা হৌজিক ভারতপু মপুং ফানা মাংহন্দনবা হোৎনবা হায়বসিগী তঙাইফদবা মহৈ অমা খঙলে। ভারত্তা মীচম মীওইশিংগী ঈখেং তাহন্নবা হোৎনবা খুদিং মাং-তাকহনবতা নত্তনা অতোপ্পা করিসু ওইরোই হায়না মহাক্না ফোংদোকখি। মহাক্না হায়খি মদুদি তেরোরিস্তশিং অসিবু ঙাক-শেনখিবা পাকিস্তানগী লান্মী অসি ভারতকী লান্মী, এয়র ফোর্স অমসুং নেভীনা অকনবা মওংদা মায়থিবা পীখ্রে।  প্রধান মন্ত্রীনা হায়খি, "ইন্দিয়ন আর্মদ ফোর্সশিংনা পাকিস্তানদা ময়েক শেংনা মেসেস অমা পীখ্রে - তেরোরিস্তশিংগীদমক মফম অমত্তা লৈরোই।" মহাক্না হায়খি মদুদি ভারতকী দ্রোনশিং অমসুং মিসাইলশিংনা পাকিস্তানবু মসিগী মরমদা খনবদা নুমিৎ কয়ামরুম অহিংবা তুম্বা য়াহন্দবা মখৈ অকিবা পোকহনগনি। মহারানা প্রতাপকী মমিং লৈরবা শগোল, চেতককী মতাংদা ইখিবা ৱাহৈশিং অদু পল্লদুনা মহাক্না হায়খি মদুদি হায়রিবা ৱাহৈশিং অসি হৌজিক্তি ভারতকী অওনবা লাক্লবা মোদর্ন খুৎলায়শিংগা মপুং ফানা চান্নরে।

শ্রী মোদীনা হায়খি, ওপরেসন সিন্দুরগী মাইপাকপা অসিনা লৈবাক অসিগী ৱারেপ মপাঙ্গল কনখৎহনখি, লৈবাক অসিবু অমত্তা ওইনা পুনশিনখি, ভারতকী ঙমখৈ ঙাকখি অমসুং ভারতকী ইকাই খুম্নবা অসি অনৌবা অৱাংবা থাক্তা পুখৎখি। মহাক্না আর্মদ ফোর্সেসকী অখন্নবা হোৎনবশিংবু থাগৎপা ফোংদোক্লদুনা মখোয়গী থবকশিং অসি মমাংদা অমুক্তা ওইখিদ্রিবা, খল্লোইদবা অমসুং শিংথানিংঙাইনি হায়না ফোঙদোকখি। মহাক্না ইন্দিয়ন এয়র ফোর্সনা চত্থখিবা স্ত্রাইকশিংগী অকুপ্পা মরোলশিং পনখি। মখোয়না পাকিস্তানগী মনুং চন্না লৈবা তেরোরিস্তশিংগী মফমশিং মায় পাক্না তার্গেৎ তৌখি হায়না মহাক্না পনখি। শ্রী মোদীনা হায়খি মদুদি মিনিত ২০-২৫ খক্তগী মনুংদা, ভারতকী লান্মীশিংনা মপুং ফানা পান্দম থমদুনা এক্যুরেৎ ওইনা লান্দাখি। মহাক্না হায়খি মদুদি অসিগুম্বা ওপরেসনশিং অসি মোদর্ন, তেক্নোলোজিকেল্লী ইক্বিপ তৌরবা অমসুং অৱাংবা থাক্কী প্রোফেস্নেল ফোর্স খক্তনা পাংথোকপা ঙম্মি। মহাক্না ভারতকী লান্মীগী খোঙজেল য়াঙখৎপা অমসুং ময়েক শেংনা পাঙথোকখিবা থবকশিংবু থাগৎপা ফোংদোকখি। মখোয়গী খোঙজেল য়াঙখৎপা অমসুং মপুং ফানা পাঙথোকখিবা থবকশিং অদুনা য়েক্নববু মপুং ফানা অঙকপা পোকহনখি। মহাক্না হায়খি মদুদি মখোয়গী স্ত্রোংহোল্দশিং অদু উফুন তাহনখি হায়বদু কমদৌননো হায়বা মীওইশিং অসিনা খঙলমদে।

পাকিস্তানগী মপান্দা লৈবা তেরোরিস্তশিংগী হেদক্বার্তরশিং লান্দাবা অমসুং তেরোরিস্তশিংগী মরুওইবা থৌমীশিং মুত্থৎপা অসি ভারতকী পান্দমনি হায়না পল্লদুনা প্রধান মন্ত্রীনা হায়খি মদুদি পাকিস্তাননা সিভিল এয়রক্রাফ্তশিং কভর ওইনা শীজিন্নদুনা মখোয়গী থবক থৌরমশিং ঙাকথোক্নবা হোৎনরবসু, ভারতকী লান্মীশিংনা য়াম্না চেকশিন্না অমসুং নীংথিজনা পাউখুম পীখি। মহাক্না আর্মদ ফোর্সশিংবু মখোয়গী মিসন মায় পাক্না পাংথোকপগীদমক থাগৎপা ফোংদোকখি। ভারতকী লান্মীশিংনা মখোয়গী পান্দমশিং অদু মপুং ফানা চুম্না অমসুং খোঙফম চেৎনা মপুং ফাহনখি হায়না মহাক্না চাউথোক্না ফোংদোকখি। মহাক্না হায়খি মদুদি ওপরেসন অসিনা পাকিস্তানগী মনুংদা লৈবা তেরোরিস্তশিংগী মফমশিং অমসুং এয়রবেজশিং থুগাইবতা নত্তনা মখোয়গী ফত্তবা ৱাখল্লোনশিং অমসুং অকিবা লৈতবা থৌনাশিং অদুসু মুত্থৎখি।

শ্রী মোদীনা হায়খি মদুদি ওপরেসন সিন্দুরগী মতুংদা, য়েক্নবা শাওবদগী ভারতকী এয়রবেজ কয়াদা পান্দম থমদুনা লান্দারকখি। অদুম ওইনমক, পাকিস্তননা লান্দারক্নবা হোৎনখিবা খুদিংমক অরেম্বা তাহনখি। মহাক্না হায়খি মদুদি পাকিস্তানি দ্রোনশিং, য়ু.এ.ভি.শিং, এয়রক্রাফশিং অমসুং মিসাইলশিং অসি ভারতকী শক্তি লৈরবা এয়র দিফেন্স সিস্তেমগী মমাংদা মায় পাকখিদে। ভারতকী শেম-শারিবা অমসুং তেক্নোলোজিকেলগী পাঙ্গলনা য়েক্নবশিংগী থ্রেদশিং মপুং ফানা থিংবা ঙম্লে হায়না মহাক্না অকনবা ৱাফম থমখি। মহাক্না লৈবাক অসিগী এয়রবেজশিং য়েংশিনখিবা লুচিংবশিংবু থাগৎপা ফোংদোকখি অমসুং ইন্দিয়ন এয়র ফোর্সকী এয়র ৱারিয়র খুদিংমক্তা থাগৎপা ফোংদোকখি। মহাক্না মখোয়গী শিংথানীংঙাই ওইরবা থবকশিং অমসুং লৈবাক ঙাকপদা থাজবা থম্বা অমসুং কৎথোকপা অদু থাগৎখি।

তেরোরিজমগী মায়োক্তা ভারতকী ফিরেপ অসি হৌজিক ময়েক শেংলে হায়না ফোংদোক্লদুনা, ভারতকী মায়োক্তা অতোপ্পা তেরোরিস্ত এতেক অমা থোক্লবদি, লৈবাক অসিনা অকনবা অমসুং মপাঙ্গল কনবা মওংদা পাউখুম পীরগনি হায়না প্রধান মন্ত্রীনা ফোংদোকখি। মমাংগী সর্জিকেল স্ত্রাইকশিং অমসুং এয়র স্ত্রাইকশিংগী মতমদা ভারতকী অচেৎপা খোঙথাংশিং মহাক্না নিংশিংখি। ওপরেসন সিন্দুর অসি হৌজিত্তি লৈবাক অসিনা থ্রেদশিং থেংনবদা ন্যু নোর্মেলগা মান্নরে হায়না মহাক্না ফোংদোকখি। মহাক্না ঙরাং নুমিদাং লৈবাক মীয়ামদা ৱা ঙাংবদা ফোঙদোকখিবা মরুওইবা প্রিন্সিপল অহুম অদু নৌহৌনা নীংশিংখি। অহানবদা, করিগুম্বা ভারত অসি তেরোরিস্ত এতেক অমনা তার্গেৎ তৌরক্লবদি, পাউখুম অসি মশাগী তর্ম অমসুং কন্দিসনগী মতুং ইন্না পীগনি। অনিশুবদা, ভারতনা ন্যুক্লিয়র ব্লেকমেলগী মওং অমত্তবু তুমিন্না খাংদুনা লৈথোক্লোই। অহুমশুবদা, ভারতনা তেরোরিস্ত মাস্তরমাইন্দশিং অমসুং মখোয়বু চংজফম পীরিবা সরকারশিংগী মরক্তা খেন্নবা থম্লোই। প্রধান মন্ত্রীনা হায়খি মদুদি মালেম অসিনা অনৌবা অমসুং অচেৎপা ভারত অসিবু মশক খঙলে, মসিনা নেস্নেল সেক্যুরিতী অমসুং তেরোরিজম থেংনবদা অচেৎপা ফিরেপ লৌরি।

শ্রী মোদীনা হায়খি, "ওপরেসন সিন্দুরগী মীকুপ খুদিংমক অসি ভারতকী লান্মীশিংগী শক্তি অমসুং তৌবা ঙম্বগী খুদম অমনি।" মহাক্না আর্মী, নেভি অমসুং এয়র ফোর্সকী মরক্তা লৈরিবা অখন্নবা কোওর্দিনেসন অদু থাগৎখি। মহাক্না সমুদ্রশিংদা নেভীগী দোমিনেন্স, ঙমখৈদা আর্মীগী মপাঙ্গল কনখৎহনবা অমসুং এরেফোর্সকী এতেক অমসুং দিফেন্সকী দবল রোলদা পুক্নিং থৌগৎখি। মহাক্না বোর্দর সেক্যুরিতী ফোর্স (বি.এস.এফ.) অমসুং অতৈ সেক্যুরিতী ফোর্সশিংবু মখোয়গী শিংথানিংঙাই ওইবা থবকশিংগীদমক থাগৎপা ফোংদোকখি। মহাক্না ভারতকী ইন্তিগ্রেতেদ এয়র অমসুং লেন্দ কোম্বেৎ সিস্তেমশিংগী ইফেক্তিবনেস অদু পল্লদুনা মহাক্না হায়খি মদুদি জোইন্তনেসকী থাক অসি হৌজিক্তি ভারতকী মিলিতরী পাৱরগী মশক থোকপা মগুন অমা ওইরে।

ওপরেসন সিন্দুরগী মনুংদা মেনপাৱর অমসুং এদভান্স মিলিতরী তেক্নোলোজীগী মরক্তা অচেৎপা কোওর্দিনেসন লৈখিবগী মতাংদা পল্লদুনা, প্রধান মন্ত্রীনা হায়খি মদুদি লান কয়া থেংনখ্রবা ভারতকী ত্রেদিস্নেল এয়র দিফেন্স সিস্তেমশিং অসি অকাসগুম্বা লমদমসিগী প্লেৎফোর্মশিং অমসুং এস-৪০০গুম্বা মোদর্ন, শক্তি লৈরবা সিস্তেমশিংনা মপাঙ্গল কনখৎহনখি। ভারতকী মপাঙ্গল কনবা সেক্যুরিতী শিল্দ অসি মশক তাকপা শক্তি অমা ওইরে হায়না মহাক্না অকনবা ৱাফম থমখি। পাকিস্তান্না হন্না হন্না হোৎনরবসু, ভারতকী এয়রবেজশিং অমসুং মরুওইবা দিফেন্স ইনফ্রাস্ত্রকচর অসি মপুং ফানা সেক্যুর ওইদুনা লৈখি। প্রধান মন্ত্রীনা মসিগী মাইপাকপা অসি ঙমখৈদা লৈরিবা লান্মী খুদিংমক্কী অমসুং ওপরেসন অসিদা শরুক য়াখিবা মীওই খুদিংমক্কী থৌনা অমসুং মতিংগীদমক থাগৎপা ফোংদোকখি। মহাক্না মখোয়গী অচেৎপা ফিরেপ অসি ভারতকী অচেৎপা নেস্নেল দিফেন্সকী য়ুম্ফম্নি হায়না শকখঙখি।

ভারতনা হৌজিক্তি পাকিস্তানগা মান্নদবা অৱাংবা থাক্কী তেক্নোলোজী লৈরে হায়না ফোংদোক্লদুনা শ্রী মোদীনা হায়খি মদুদি হৌখিবা চহি তরা অসিদা, ইন্দিয়ন এয়র ফোর্স অমসুং অতোপ্পা মিলিতরী ব্রাঞ্চশিংনা মালেমগী খ্বাইদগী অৱাংবা থাক্কী দিফেন্স তেক্নোলোজীশিং ফংখ্রে। অনৌবা তেক্নোলোজীগা লোয়ননা অচৌবা শিংনবশিং লাকই অমসুং কমপ্লেক্স ওইবা অমসুং অরুবা সিস্তেমশিংবু মেনতেন্ত তৌবা অমসুং ইফিসিএন্ত ওইনা ওপরেৎ তৌবা হায়বসিদা অচৌবা স্কিল অমসুং প্রিসিজন মথৌ তাই হায়না মহাক্না খঙখি। তেক্নোলোজীবু তেক্তিকেল এক্সপর্তিসকা লোয়ননা অমত্তা ওইনা পুনশিনবগীদমক ভারতকী আর্মদ ফোর্সপু থাগৎলদুনা, মোদর্ন ৱারফেয়রদা মখোয়গী মগুন অদু উৎলদুনা, শ্রী মোদীনা হায়খি মদুদি ইন্দিয়ন এয়র ফোর্সনা হৌজিক্তি খুৎলাইশিং খক্তা নত্তনা দেতা অমসুং দ্রোনশিংগা লোয়ননা য়েক্নবশিংবু থেংন্ননবগী স্কিল অদু লৈরে।

পাকিস্তানগী আপিলগী পাউখুম ওইনা ভারতকী লানগী থবক অসি মতম খরগী ওইনা লেপখ্রে হায়না পল্লদুনা, প্রধান মন্ত্রীনা পাকিস্তান্না মখা তানা তেরোরিস্তকী থবক থৌরমশিং নৎত্রগা লানগী থৌওং য়াওরবদি, ভারতনা মপুং ফানা পাউখুম পীরগনি হায়না অকনবা ৱাফম থমখি। মহাক্না ভারতকী পাউখুম অসি মশাগী ৱাহন্থোক অমসুং কন্দিসনগী মতুং ইন্না খক্তমক লেপকনি হায়না ফোঙদোকখি। মহাক্না মসিগী ৱারেপ লৌবা ঙম্বগীদমক লৈবাক অসিগী লান্মীশিংগী থৌনা, মতিং অমসুং চেকশিন থৌরাংগীদমক থাগৎপা ফোংদোকখি। লান্মীশিংদা মখোয়গী অখাং কনবা, থৱায় য়াওবা অমসুং শেম-শারিবা অদু লেপহন্দনা থম্নবা তকশিল্লদুনা, ভারতনা মতম পুম্নমক্তা চেকশিন্না অমসুং শেম-শাদুনা লৈগদবনি হায়না ফোংদোকখি। প্রধান মন্ত্রীনা লোইশিনবদা হায়খি মদুদি মসি শান্তি পাম্বা অনৌবা ভারত অমনি। ভারতনা শান্তি পাম্মি অদুবু মীওইবা জাতিদা খুদোংথীবা পীরক্লবদি শীংনবশিংবু মাংহনবদা খন্থবা তৌরোই।

*****