ಮಹಿಳಾ ಸಬಲೀಕರಣದತ್ತ ಒಂದು ಪ್ರಮುಖ ಹೆಜ್ಜೆಯಾಗಿ, 2025-26ರ ಹಣಕಾಸು ವರ್ಷದಲ್ಲಿ ಪ್ರಧಾನಮಂತ್ರಿ ಉಜ್ವಲ ಯೋಜನೆ (ಪಿ.ಎಂ.ಯು.ವೈ) ಅಡಿಯಲ್ಲಿ 25 ಲಕ್ಷ ಹೆಚ್ಚುವರಿ ಎಲ್.ಪಿ.ಜಿ ಸಂಪರ್ಕಗಳನ್ನು ಬಿಡುಗಡೆ ಮಾಡಲು ಸರ್ಕಾರ ಅನುಮೋದನೆ ನೀಡಿದೆ. ಈ ಸಂದರ್ಭದಲ್ಲಿ ಮಹಿಳಾ ಫಲಾನುಭವಿಗಳಿಗೆ ಶುಭಾಶಯಗಳನ್ನು ತಿಳಿಸುತ್ತಾ, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಎಕ್ಸ್ ತಾಣದ ಖಾತೆಯಲ್ಲಿ, “ನವರಾತ್ರಿಯ ಶುಭ ಸಂದರ್ಭದಲ್ಲಿ, ಉಜ್ವಲ ಕುಟುಂಬಕ್ಕೆ ಸೇರುತ್ತಿರುವ ಎಲ್ಲಾ ತಾಯಂದಿರು ಮತ್ತು ಸಹೋದರಿಯರಿಗೆ ನನ್ನ ಶುಭಾಶಯಗಳನ್ನು ಕೋರುತ್ತೇನೆ. ಈ ಹಂತವು ಈ ಪವಿತ್ರ ಹಬ್ಬದ ಸಂದರ್ಭದಲ್ಲಿ ತಮಗೆಲ್ಲಾ ಸಂತೋಷವನ್ನು ತರುವುದಲ್ಲದೆ, ಮಹಿಳಾ ಸಬಲೀಕರಣದ ಕಡೆಗೆ ನಮ್ಮ ಸಂಕಲ್ಪವನ್ನು ಬಲಪಡಿಸುತ್ತದೆ” ಎಂದು ಸಂದೇಶ ಹಂಚಿಕೊಂಡಿದ್ದಾರೆ.

ಇಂದು ಮುಂಜಾನೆ ಈ ನಿರ್ಧಾರವನ್ನು ಪ್ರಕಟಿಸಿದ ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವರಾದ ಶ್ರೀ ಹರ್ ದೀಪ್ ಸಿಂಗ್ ಪುರಿ ಅವರು, "ನವರಾತ್ರಿ ಆರಂಭದೊಂದಿಗೆ, ಉಜ್ವಲ ಯೋಜನೆಯಡಿಯಲ್ಲಿ 25 ಲಕ್ಷ ಠೇವಣಿ ರಹಿತ ಎಲ್.ಪಿ.ಜಿ. ಸಂಪರ್ಕಗಳನ್ನು ಒದಗಿಸುವ ನಿರ್ಧಾರವು, ದುರ್ಗಾ ದೇವಿಗೆ ನೀಡಿದ ಗೌರವದೊಂದಿಗೆ ಮಹಿಳೆಯರನ್ನು ನಡೆಸಿಕೊಳ್ಳುವ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ಬದ್ಧತೆಗೆ ಮತ್ತೊಂದು ಸಾಕ್ಷಿಯಾಗಿದೆ. ಇದು ತಾಯಂದಿರು ಮತ್ತು ಸಹೋದರಿಯರ ಘನತೆ ಮತ್ತು ಸಬಲೀಕರಣಕ್ಕಾಗಿ ಕೇಂದ್ರ ಸರ್ಕಾರದ ಸಂಕಲ್ಪವನ್ನು ಬಲಪಡಿಸುತ್ತದೆ. ಅಡುಗೆಮನೆಗಳನ್ನು ಪರಿವರ್ತಿಸುವುದು, ಆರೋಗ್ಯವನ್ನು ರಕ್ಷಿಸುವುದು ಮತ್ತು ದೇಶಾದ್ಯಂತ ಕುಟುಂಬಗಳ ಭವಿಷ್ಯವನ್ನು ಬೆಳಗಿಸುವುದು ಮುಂತಾದ ಪ್ರಯೋಜನಗಳೊಂದಿಗೆ ಉಜ್ವಲ ಭಾರತದಲ್ಲಿ ಅತ್ಯಂತ ಪರಿಣಾಮಕಾರಿ ಸಾಮಾಜಿಕ ಕಲ್ಯಾಣ ಯೋಜನೆಗಳಲ್ಲಿ ಒಂದಾಗಿ ಉಜ್ವಲ ಹೊರಹೊಮ್ಮಿದೆ." ಎಂದು ಮಾಹಿತಿ ನೀಡಿದರು.

ಈ ವಿಸ್ತರಣೆಯೊಂದಿಗೆ, ಒಟ್ಟು ಪಿ.ಎಂ.ಯು.ವೈ. ಸಂಪರ್ಕಗಳ ಸಂಖ್ಯೆ 10.58 ಕೋಟಿಗೆ ಏರಲಿದೆ. ಈ ಸಂಪರ್ಕಗಳ ಅನುಷ್ಠಾನ ನಿಟ್ಟಿನಲ್ಲಿ ಬಿಡುಗಡೆಗಾಗಿ ಕೇಂದ್ರ ಸರ್ಕಾರ ₹676 ಕೋಟಿ ವೆಚ್ಚವನ್ನು ಅನುಮೋದಿಸಿದೆ, ಇದರಲ್ಲಿ ಪ್ರತಿ ಸಂಪರ್ಕಕ್ಕೆ ₹2,050 ದರದಲ್ಲಿ 25 ಲಕ್ಷ ಠೇವಣಿ-ಮುಕ್ತ ಸಂಪರ್ಕಗಳನ್ನು ಒದಗಿಸಲು ₹512.5 ಕೋಟಿ, 14.2 ಕೆಜಿ ದೇಶೀಯ ಅಡುಗೆ ಅನಿಲ ಸಿಲಿಂಡರ್ ಗೆ ₹300 ಗುರಿಯ ವಿಶೇಷ ಸಬ್ಸಿಡಿಗಾಗಿ ₹160 ಕೋಟಿ (ವರ್ಷಕ್ಕೆ ಒಂಬತ್ತು ಮರುಪೂರಣಗಳಿಗೆ, 5 ಕೆಜಿ ಸಿಲಿಂಡರ್ ಗಳಿಗೆ ಅನುಗುಣವಾಗಿ ಅನುಪಾತದಲ್ಲಿ), ಮತ್ತು ಯೋಜನಾ ನಿರ್ವಹಣಾ ವೆಚ್ಚಗಳು, ವಹಿವಾಟು ಮತ್ತು ಎಸ್.ಎಂ.ಎಸ್.‌ ಸಂದೇಶಗಳ ಶುಲ್ಕಗಳು, ಮಾಹಿತಿ, ಶಿಕ್ಷಣ ಮತ್ತು ಸಂವಹನ (ಐಇಸಿ) ಚಟುವಟಿಕೆಗಳು ಮತ್ತು ಆಡಳಿತಾತ್ಮಕ ವೆಚ್ಚಗಳಿಗಾಗಿ ₹3.5 ಕೋಟಿ ಸೇರಿವೆ.

ಪಿ.ಎಂ.ಯು.ವೈ. ಯೋಜನೆಯಡಿಯಲ್ಲಿ, ಫಲಾನುಭವಿಗಳು ಸಿಲಿಂಡರ್, ಅನಿಲ ಒತ್ತಡ ನಿಯಂತ್ರಕ, ಸುರಕ್ಷಾ ಮೃದು ಕೊಳವೆ, ದೇಶೀಯ ಅನಿಲ ಗ್ರಾಹಕ ಕಾರ್ಡ್ (ಡಿಜಿಸಿಸಿ) ಕಿರುಪುಸ್ತಕ ಮತ್ತು ಅನುಸ್ಥಾಪನಾ ಶುಲ್ಕಗಳ ಭದ್ರತಾ ಠೇವಣಿಯನ್ನು ಒಳಗೊಂಡಿರುವ ಠೇವಣಿ-ಮುಕ್ತ ಅಡುಗೆ ಅನಿಲ ಸಂಪರ್ಕವನ್ನು ಪಡೆಯುತ್ತಾರೆ. ಇದರ ಜೊತೆಗೆ, ಮೊದಲ ಮರುಪೂರಣ ಮತ್ತು ಅಡುಗೆ ಅನಿಲ ಸ್ಟೌವ್ ಅನ್ನು ಸಹ ಉಚಿತವಾಗಿ ನೀಡಲಾಗುತ್ತದೆ. ಫಲಾನುಭವಿಗಳು ಅಡುಗೆ ಅನಿಲ ಸಂಪರ್ಕ, ಮೊದಲ ಮರುಪೂರಣ ಅಥವಾ ಸ್ಟೌವ್ ಗಳಿಗಾಗಿ ಯಾವುದೇ ಶುಲ್ಕ ಪಾವತಿ ಮಾಡುವ ಅಗತ್ಯವಿಲ್ಲ, ಏಕೆಂದರೆ ಈ ವೆಚ್ಚಗಳನ್ನು ಭಾರತ ಸರ್ಕಾರ ಮತ್ತು ತೈಲ (ಅಡುಗೆ ಅನಿಲ) ಮಾರುಕಟ್ಟೆ ಕಂಪನಿಗಳು (ಒಎಂಸಿ ಸಂಸ್ಥೆಗಳು) ಭರಿಸುತ್ತವೆ. ಫಲಾನುಭವಿಗಳು 14.2 ಕೆಜಿ ಸಿಂಗಲ್ ಬಾಟಲ್ ಸಂಪರ್ಕ, 5 ಕೆಜಿ ಸಿಂಗಲ್ ಬಾಟಲ್ ಸಂಪರ್ಕ ಅಥವಾ 5 ಕೆಜಿ ಡಬಲ್ ಬಾಟಲ್ ಸಂಪರ್ಕದಿಂದ ತಮ್ಮ ಅಗತ್ಯಗಳಿಗೆ ಅನುಗುಣವಾಗಿ ಸೂಕ್ತ ಬಾಟಲ್ ಸಂಪರ್ಕ ಆಯ್ಕೆ ಮಾಡುವ ಅವಕಾಶವನ್ನು ಹೊಂದಿರುತ್ತಾರೆ.

ಪಾರದರ್ಶಕತೆ ಮತ್ತು ಪ್ರವೇಶದ ಸುಲಭತೆಯನ್ನು ಮತ್ತಷ್ಟು ಹೆಚ್ಚಿಸಲು, ಪಿ.ಎಂ.ಯು.ವೈ. ಯೋಜನೆಯಡಿಯಲ್ಲಿ, ಅಡುಗೆ ಅನಿಲ ಸಂಪರ್ಕವನ್ನು ಪಡೆಯುವ ಪ್ರಕ್ರಿಯೆಯನ್ನು ಸಂಪೂರ್ಣವಾಗಿ ಸುವ್ಯವಸ್ಥಿತಗೊಳಿಸಲಾಗಿದೆ ಮತ್ತು ತಂತ್ರಜ್ಞಾನ-ಸಕ್ರಿಯಗೊಳಿಸಲಾಗಿದೆ. ತಮ್ಮ ಕುಟುಂಬದಲ್ಲಿ ಪ್ರಸ್ತುತ ಅಡುಗೆ ಅನಿಲ ಸಂಪರ್ಕ ಅಸ್ತಿತ್ವದಲ್ಲಿರದ ಬಡ ಮನೆಗಳ / ಕುಟುಂಬಗಳ ಅರ್ಹ ವಯಸ್ಕ ಮಹಿಳೆಯರು http://www.pmuy.gov.in ಮೂಲಕ ಆನ್ ಲೈನ್ ನಲ್ಲಿ ಅಥವಾ ಸಾರ್ವಜನಿಕ ವಲಯದ ಅಡುಗೆ ಅನಿಲ  ಸಂಸ್ಥೆಗಳ ಯಾವುದೇ ಅಡುಗೆ ಅನಿಲ ವಿತರಕರ ಮಳಿಗೆಯಲ್ಲಿ ಸರಳೀಕೃತ ಕೆ.ವೈ.ಸಿ ಅರ್ಜಿ ನಮೂನೆ ಭರ್ತಿ ಮಾಡಿ ಮಾಹಿತಿ ನೀಡುವ ಮೂಲಕ ಮತ್ತು ವಂಚಿತ ಘೋಷಣೆ ಅರ್ಜಿಯ ಜೊತೆಗೆ ಸಲ್ಲಿಸುವ ಮೂಲಕ ಪೂರ್ಣ ಭರಿತ ಅರ್ಜಿ ಸಲ್ಲಿಸಬಹುದು. ನಂತರ ಚಂದಾದಾರಿಕೆ ವೋಚರ್ ಪ್ರತಿ  ನೀಡುವ ಮೊದಲು, ಮತ್ತು ಅರ್ಜಿದಾರರ ನಿವಾಸದಲ್ಲಿ ಅಡುಗೆ ಅನಿಲ  ಸಂಪರ್ಕವನ್ನು ಸ್ಥಾಪಿಸುವ ಮೊದಲು, ಅರ್ಜಿಗಳು ಸಿಸ್ಟಮ್-ಚಾಲಿತ ಡಿ-ಡೂಪ್ಲಿಕೇಶನ್ ಪರಿಶೀಲನೆಗಳಿಗೆ ಒಳಗಾಗುತ್ತವೆ, ನಂತರ ಅಡುಗೆ ಅನಿಲ  ಸಂಸ್ಥೆಗಳ ಅಧಿಕಾರಿಗಳಿಂದ ಭೌತಿಕ ಪರಿಶೀಲನೆಗೆ ಒಳಗಾಗುತ್ತವೆ, ಬಾಕಿ ಇರುವ ಅರ್ಜಿಗಳನ್ನು ಹೊಂದಿರುವ ಅಸ್ತಿತ್ವದಲ್ಲಿರುವ ಅರ್ಜಿದಾರರು ಪರಿಷ್ಕೃತ ಇ-ಕೆ.ವೈ.ಸಿ ಪ್ರಕ್ರಿಯೆಗೆ ಒಳಗಾಗಬೇಕಾಗುತ್ತದೆ ಮತ್ತು ನವೀಕರಿಸಿದ ಪ್ರೊಫಾರ್ಮಾ ಪ್ರಕಾರ ವಿವರಗಳನ್ನು ಸಲ್ಲಿಸಬೇಕಾಗುತ್ತದೆ.

ಮೇ 2016ರಲ್ಲಿ ಪ್ರಾರಂಭಿಸಲಾದ ಪಿ.ಎಂ.ಯು.ವೈ. ಯೋಜನೆ ಆರಂಭದಲ್ಲಿ 8 ಕೋಟಿ ಠೇವಣಿ ರಹಿತ ಅಡುಗೆ ಅನಿಲ  ಸಂಪರ್ಕಗಳನ್ನು ಗುರಿಯಾಗಿರಿಸಿಕೊಂಡಿತ್ತು, ಇದನ್ನು ಸೆಪ್ಟೆಂಬರ್ 2019 ರಲ್ಲಿ ಸಾಧಿಸಲಾಯಿತು. ಉಳಿದ ಬಡ ಕುಟುಂಬಗಳನ್ನು ಒಳಗೊಳ್ಳಲು, ಉಜ್ವಲ 2.0 ಅನ್ನು ಆಗಸ್ಟ್ 2021ರಲ್ಲಿ ಪ್ರಾರಂಭಿಸಲಾಯಿತು ಮತ್ತು ಜನವರಿ 2022ರ ವೇಳೆಗೆ 1 ಕೋಟಿ ಹೆಚ್ಚುವರಿ ಸಂಪರ್ಕಗಳ ಗುರಿಯನ್ನು ಸಾಧಿಸಲಾಯಿತು. ತರುವಾಯ, ಸರ್ಕಾರವು ಉಜ್ವಲ 2.0 ಅಡಿಯಲ್ಲಿ ಡಿಸೆಂಬರ್ 2022 ರಲ್ಲಿ ಸಾಧಿಸಲಾದ 60 ಲಕ್ಷ ಹೆಚ್ಚುವರಿ ಸಂಪರ್ಕಗಳನ್ನು ಮತ್ತು ಜುಲೈ 2024 ರ ವೇಳೆಗೆ ಸಾಧಿಸಲಾದ 75 ಲಕ್ಷ ಸಂಪರ್ಕಗಳನ್ನು ಅನುಮೋದಿಸಿತು. ಜುಲೈ 2025 ರ ಹೊತ್ತಿಗೆ, ದೇಶಾದ್ಯಂತ 10.33 ಕೋಟಿ ಪಿ.ಎಂ.ಯು.ವೈ. ಯೋಜನೆಯಡಿಯಲ್ಲಿ ಸಂಪರ್ಕಗಳನ್ನು ಬಿಡುಗಡೆ ಮಾಡಲಾಗಿದೆ, ಇದು ಜಾಗತಿಕವಾಗಿ ಅತಿದೊಡ್ಡ ಶುದ್ಧ ಇಂಧನ ಉಪಕ್ರಮಗಳಲ್ಲಿ ಒಂದಾಗಿದೆ.

ಹೆಚ್ಚಿನ ವಿವರಗಳಿಗಾಗಿ, ಫಲಾನುಭವಿಗಳು ಅಧಿಕೃತ ಪಿ.ಎಂ.ಯು.ವೈ. ಯೋಜನೆ ಪೋರ್ಟಲ್ www.pmuy.gov.in ಜಾಲತಾಣಕ್ಕೆ ಭೇಟಿ ನೀಡಬಹುದು ಅಥವಾ ಸಾರ್ವಜನಿಕ ವಲಯದ ಅಡುಗೆ ಅನಿಲ ಸಂಸ್ಥೆಗಳ ಹತ್ತಿರದ ಅಡುಗೆ ಅನಿಲ ವಿತರಕರನ್ನು ಸಂಪರ್ಕಿಸಬಹುದು.

*****