ঙসি প্রধান মন্ত্রী শ্রী নরেন্দ্র মোদী অসামগী গুৱাহাতিদা ভারত রত্ন দোক্তর ভুপেন হজারিকাগী ১০০শুবা মপোক কুমওন থৌরমদা ৱা ঙাংখ্রে। থৌরম অদুদা প্রধান মন্ত্রীনা হায়খি ঙসিগী নুমিৎ অসি শিংথানিঙাই ওইরবা নুমিৎনি অমসুং তশেংনা তাঞ্জা অসি অতাংবনি। মহাক্না য়েংখিবা থৌরমশিং, হরাওবা অমসুং থৌরম ফজনা পাংথোকপদা অপেনবা পোকখিবা অদু মহাক্না ফোঙদোকখি। ভুপেন দাগী ঈশৈনা থৌরম মনুংদা খোন্থাং য়ৈখিবা অদু মহাক্না পনখি। ভুপেন হজারিকাগী ৱাহৈশিং লৌখৎলদুনা, প্রধান মন্ত্রীনা হায়খি মহাক্কী ঈশৈগী ৱাহৈ খর মহাক্কী কোক্ত নিন্দুনা লৈরে। ভুপেন দাগী ঈশৈগী ইথকশিং মখা তানা মফম খুদিংদা লেপ্পা লৈতনা চেন্থনবা মহাক্না পাউজেল পীখি। থৌরম অসিদা শরুক য়াখিবা কলাকার খুদিংমক প্রধান মন্ত্রীনা থাগৎপা ফোঙদোকখি। মহাক্না হায়খি মফম অসিদা পাংথোকপা অসিগুম্বা থৌরমশিংনা অনৌবা রেকোর্দ অমা থম্লে। ঙসিগী থৌরমশিং অসিদা অখন্ননা শেম-শাবগী মমি তারে। মহাক্না কলাকার খুদিংমক থাগৎপা ফোঙদোকখি।

প্রধান মন্ত্রীনা হায়খি নুমিৎ খরনিগী মমাঙদা, সেপ্তেম্বর ৮ দা, ভুপেন হজারিকা জিগী মপোক কুমওন পাংথোকখ্রে। নুমিৎ অদুদা মহাক্না, ভুপেন দা ইকায়খুম্নবা উৎপা আর্তিকল অমদা মহাক্না মহাক্কী পুক্নিংগী ইহুলশিং ফোঙদোকখি। ভুপেন দাগী চহি ১০০ শুবা মপোক কুমওন থৌরম শরুক য়াবা ফংবা অসি মহাক্কী লাইবক ফবনি। ভুপেন দা মীয়াম্না নুংশিনা “সুধা কান্থো” হায়না খঙনৈ। ভারতকী ইহুলশিং ফোঙদোকখিবা, ঈশৈগা লৈবাকমচা তাবগা শম্নহনখিবা, মহাক্কী ঈশৈগী খুৎথাংদা ভারতকী মঙলানশিং ঙাক-শেনখিবা অমসুং ইমা গঙ্গাগী খুৎথাংদা ইমা ভারতকী মীনুংশি পাউদমখিবা সুধা কান্থোগী চহি ১০০ শুবা মপোক কুমওন চহি অসিদা থোক্লে।

প্রধান মন্ত্রীনা হায়খি ভুপেন দানা শিবা নাইদ্রবা ঈশৈশিং শৈবান্দুনা মখোয়গী মেংলবা সুরনা ভারত অমতা ওইহনখি অমসুং মীরোল কয়াগী ভারতমচাশিং অমতা ওইহনখি। ভুপেন দা ঐখোয়গী ইরক্ত লৈত্রবসু, মহাক্কী ঈশৈ অমসুং খোঞ্জেলনা মখা তানা ভারতকী চাউখৎপগী খোঙচৎ উগনি অমসুং মসিগী থৌনা হাপকনি। ভুপেন দাগী চহি ১০০শুবা মপোক কুমওন থৌরম পাংথোকপদা সরকারনা চাউথোকচরি। ভুপেন হজারিকা জিগী ঈশৈশিং, পাউজেলশিং অমসুং পুন্সিগী খোঙচৎ য়ুমথোং খুদিংদা য়ৌরে। থৌরম অসিদা ভুপেন হজারিকাগী পুন্সি ৱারিগী লাইরিক ফোঙলে। থৌরম অদুদা দোক্তর ভুপেন হজারিকাগী মফমদা ইকায়খুম্নবা উৎলদুনা, ভুপেন দাগী চহি ১০০ শুবা মপোক কুমওন্দা অসামগী মীয়াম অমসুং ভারতমচা খুদিংমক্ত প্রধান মন্ত্রীনা মহাক্কী য়াইফ পাউজেল পীখি।

প্রধান মন্ত্রীনা হায়খি ভুপেন হজারিকা জিনা ঈশৈগীদমক মহাক্কী পুন্সি কৎথোকখি। ঈশৈনা অধ্যাতিক্কী থবক্কী শক্তম ওইরকপদা, মসিনা থৱায়গা শম্নহল্লি অমসুং ঈশৈনা ৱাশক অমা ওইরকপদা, মসিনা খুন্নাই লমজিংনবা পাম্বৈ অমা ওইরকই। মসিনা মরম ওইদুনা ভুপেন দাগী ঈশৈ অসুক্কী মতিক অখন্নবা ওইরিবনি। ভুপেন দাগী অচুম্বা ফিদমশিং অমসুং মহাক্না থেংনখিবশিং মহাক্কী ঈশৈশিংদা মমি তাখি। ভুপেন দাগী ঈশৈদা ইমা ভারত নুংশিবগী মমি তারিবা অসি “এক ভারত, শ্রেস্থা ভারত” গী ৱাখল্লোন্দা মহাক্না থাজবদগী হৌরকখিবনি। ভুপেন দা অৱাং-নোংপোক্ত পোকখি অমসুং ব্রাহ্মপুত্রগী শেংলবা ইথকশিংনা মহাক্কী মফমদা ঈশৈ তম্বীখি। তুংদা ভুপেন দা গ্রেজুয়েদ তম্নবা কাসিদা চৎখি। ব্রাহ্মপুত্রদগী হৌরকখিবা তুংদা ভুপেন দাগী ঈশৈগী খোঙচৎ, গঙ্গাগী ইচেলগী তান্থাদা মপুংফাহনখি। কাসিগী ফজবনা মহাক্কী পুন্সি লেপ্তনা চেন্থহনখি। ভুপেন দা ভারত শীনবা থুংনা চৎপা লমকোয়বা মীওই অমনি অমসুং মহাক্কী পি.ঐচ.দিগীদমক মহাক য়ু.এসদা চৎখি। পুন্সিগী তাঙ্কক খুদিংমক্ত, অশেংবা মপারি অমা ওইনা ভুপেন দানা অসামগী লৈহাওগা শম্নখি। মরম অদুনা ভুপেন দা ভারত্ত অমুক হল্লকখি অমসুং সেনিমাগী খুৎথাংদা মীচম মীয়ামগী খোল্লাউ ওইরকখি।

প্রধান মন্ত্রীনা মখা তানা হায়খি ভুপেন দানা মীচম মীয়ামগী অৱাবশিং ফোঙদোকখি অমসুং খোঞ্জেল অদু হৌজিক ফাওবা লৈবাক অসিদা নিল্লি। ভুপেন দাগী ঈশৈ পল্লদুনা, প্রধান মন্ত্রীনা ৱাহন্থোক পীখি: করিগুম্বা মীওইবনা অতোপ্পগী হরাওবা অমসুং অৱাবশিং, চৈনা অমসুং চৈথেংগী মরমদা খন্দ্রবদি- মালেম অসিনা কনানা কনা য়েংশিনবীগনি? মসিগী ৱাখল অসিনা কমদৌনা ইথিল পীবগে হায়বা মীওই খুদিংমক্না খনগদবনি হায়না প্রধান মন্ত্রীনা ফোঙদোকখি। প্রধান মন্ত্রীনা হায়খি মসিগী অনৌবা ৱাখল অসিনা লায়রবা, তোল্লবা, দলিতশিং অমসুং ত্রাইবেলশিংগী ফিবম ফগৎনবা লৈবাক অসিনা পায়খৎলিবা থবকশিংদা ভারত লমজিংলি। 

প্রধান মন্ত্রীনা হায়খি ভুপেন দা ভারতকী অপুনবা অমসুং ঙমখৈগী অপুনবগী লুচিংবা অমনি। চহি কয়া অৱাং-নোংপোক মীরাইদুনা লাকখি অমসুং হিংশা অমসুং তোখাই তাবগী ৱাখল্লোন্না য়োমখি। ভুপেন দানা মখা তানা ভারতকী অপুনবগী লাউখি। ভুপেন দানা নুংঙাই য়াইফবা অৱাং-নোংপোক অমগী মঙ মঙখি অমসুং লমদম অসিগী মহৌশাগী ফজবা শৈথাখি। অসামগীদমক ভুপেন দাগী ঈশৈগী পরে খর পল্লদুনা, প্রধান মন্ত্রীনা হায়খি ঐখোয়না ঈশৈ অসি ঙংবা মতমদা, অসামগী খেন্নবা, মপাঙ্গল অমসুং তৌবা ঙম্বগীদমক ঐখোয় চাউথোকচৈ।

প্রধান মন্ত্রীনা হায়খি ভুপেন দানা অরুনাচল প্রদেস নুংশিখি। অরুনাচল প্রদেসকী মরমদা পনখিবা ভুপেন দাগী ঈশৈগী পরেং খর প্রধান মন্ত্রীনা পনখি। মহাক্না হায়খি অশেংবা মরৈবাক নুংশিবা মীওই অমগী থম্মোয়দগী পোক্লকপা খোঞ্জেল অমা কৈদৌঙৈদা লেম্না মাঙলোই। অৱাং-নোংপোক্কীদমক ভুপেন দাগী মঙলানা মঙফাওনবা ঙম্নবা সরকারনা অহিং অমসুং নুংথিল থবক পায়খৎলি। ভুপেন দাদা ভারত রত্ন পীখিবা অসি অৱাং-নোংপোক্কী অনিংবশিং অমসুং চাউথোকচবদা সরকারনা ইকায়খুম্নবা উৎপনি অমসুং লমদম অসি লৈবাক অসিগী মরুওইবা মফম অমা ওইহল্লে। লৈবাক অসিগী খ্বাইদগী শাংবা থোঙনা অসাম অমসুং অরুনাচল প্রদেস শম্নহল্লে অমসুং মসি ভুপেন হজারিকা থোঙ হায়না মমিং থোল্লে। অসাম অমসুং অৱাং-নোংপোক শীনবা থুংনা য়াংনা চাউখৎলক্লি। চাউখৎপগী হিরম খুদিংমক্ত অনৌবা রেকোর্দশিং থম্লে। হায়রিবা মাইপাকপশিং অসি লৈবাক অসিনা ভুপেন দাগী মফমদা পীবা অশেংবা ইকায়খুম্নবনি।

প্রধান মন্ত্রীনা হায়খি অসাম অমসুং অৱাং-নোংপোক্না মতম পুম্নমক্ত ভারতকী নাৎকী খেন্নবদা শিংথাবা য়ানা মতেং পাংলি। লমদম অসিগী ইনাকখুল্লবা পুৱারি, কুহ্মৈশিং অমসুং থৌরমশিং, লমদম অসিগী কলা অমসুং নাৎ, লমদম অসিগী মহৌশাগী ফজবা অমসুং ঈশ্বরগী মঙাল লৈরি। পুম্নমক অসিগা লোয়ননা, ইমা ভারতকী ইকায়খুম্নবা অমসুং লৈবাক ঙাকথোক্নবা লমদম অসিগী মীয়ামগী কৎথোকপশিং য়াম্না মরুওই। হায়রিবা থবকশিং অসি য়াওদনা, ঐখোয়গী অচৌবা ভারত অমা ঐখোয়না ৱাখলনা শাগৎপা ঙম্লোই। লৈবাক অসিগী অহানবা নুমিৎ থোকপা লমদম অসিদগীনি। মসিগী ৱাখল অসি মহাক্কী ঈশৈদা ভুপেন দানা ফোঙদোকখি। ঐখোয়না অসামগী পুৱারি পল্লকপদা, মতম অদু খক্তদা ভারতকী পুৱারি মপুংফাই-মতম অদু খক্তদা ভারতকী হরাওবা মপুংফাই অমসুং মসিগী পুৱারি অসিগী চাউথোকচবা ঐখোয়না মাঙলোমদা পুখৎকদবনি।

প্রধান মন্ত্রীনা হায়খি ঐখোয়না লম্বী-থোঙগী মরমদা ৱারি শারকপা মতমদা, ঐখোয়না রেল, লম্বী নত্ত্রগা মথক্কী চৎথোক-চৎশিনগী মরমদা তোইনা ঙাংনৈ। লৈবাক্কী অপুনবগী শক্তমগীদমক,অতোপ্পা মওং অমগী কন্নেক্তিবিতি তঙাইফদে-নাৎকী কন্নেক্তিবিতি। হৌখিবা চহি ১১ দা, অৱাং-নোংপোক্কী চাউখৎ-থৌরাংগা লোয়ননা নাৎকী মরী শেমগৎনবা লৈবাক অসিনা মরুওইবা থবকশিং পায়খৎলে। মসিগী খোঙজং অসি হৌজিক পায়খৎলি। ঙসিগী থৌরম অসিদা খোঙজং অসিগী মমি তারে। হন্দক জাতিগী থাক্ত বীর লচিত বোরফুকানগী ৪০০ শুবা মপোক কুমওন পাংথোকখ্রে। নিংতম লালহৌ মনুংদা অসাম অমসুং অৱাং-নোংপোক্কী থৌনা ফরবা মীওই কয়া থৱায় কৎখি। অজাদি কা অমৃত মহোৎসব মনুংদা সরকারনা অৱাং-নোংপোক্কী নিংতম লান্মীশিংগী পুৱারি অমুক হিঙ্গৎহনখ্রে। ঙসি লৈবাক শীনবা থুংনা অসামগী পুৱারি অমসুং রাজ্য অসিনা পাংথোকখিবা থবকশিং খঙলে। হন্দক দিল্লিদা অষ্টলক্ষ্মী মহোৎসব পাংথোকখ্রে। থৌরম অদুদা অসামগী মপাঙ্গল অমসুং হৈথোই-শিংথোইবা উৎখ্রে।

প্রধান মন্ত্রীনা হায়খি খুদোংচাদবা ফিবম কয়া থেংনরবশু, মতম পুম্নমক্ত অসামনা লৈবাক অসিগী চাউথোকচবা পোকহল্লি। মসিগী ৱাখল্লোন ভুপেন দাগী ঈশৈশিংদা মমি তারে। ১৯৬২ গী লাল মনুংদা, অসামনা লাল অদু হকথেংননা উখি অমসুং মতম অদুদা, মহাক্কী ঈশৈগী খুৎথাংদা ভুপেন দানা লৈবাক অসিগী ৱাশক অৱাংবা থাক্ত পুখৎখি।  মতম অদুদা ভারতকী মীয়ামদা অনৌবা থৌনা পীখিবা ভুপেন দানা ইবা ঈশৈ অমগী ৱাহৈ পরেং খর শ্রী মোদীনা লৌখৎখি।

প্রধান মন্ত্রীনা হায়খি ভারতকী মীয়ামগী থৌনা অমসুং লেংদবা ৱাশক ওপরেসন সিন্দুর মনুংদা উবা ফংলে। পাকিস্তানগী তেরোরিষ্টশিংগী থবকশিংদা ভারতনা অকনবা পাউখুম অমা পীখ্রে অমসুং লৈবাক অসিগী মপাঙ্গল মালেম শীনবা থুংনা খোন্থাং য়ৈরে। লৈবাক অসিগী য়েক্নবা মফম অমতদা ফজনা লৈবা ঙম্লোই হায়বা ভারতনা উৎলে। অনৌবা ভারতনা লৈবাক অসিগী সেকুরিতি নত্ত্রগা ইকায়খুম্নবদা কৈদৌঙৈদা য়াশিন্নবা তৌরোই।

প্রধান মন্ত্রীনা হায়খি অসামগী নাৎ অমসুং চৎনবীশিং তোপ-তোপ্পনি। অসামগী নাৎ, ইকায়খুম্নবা অমসুং চাউথোকচবা অসি খুদোংচাবা কয়াগী হৌরকফম অমনি। অসামগী নাৎকী ফিজোল, ইন্সাং মথেলশিং, তুরিজম অমসুং পোৎথোকশিং, ইনাকখুল্লবা হেরিতেচ অমসুং খুদোংচাবা কয়া লৈরি। হায়রিবা মচাকশিং অসি ভারত মনুং খক্ত নত্তনা মালেম শীনবা থুংনা মশক তাকপা দরকার ওই। মহাক মশামক্না অসামগী গমোচা মশক তাক্লি। অসামগী পোৎথোক খুদিংমক মালেমগী মফম খুদিংমক্ত য়ৌহনগদবনি।

প্রধান মন্ত্রীনা মখা তানা হায়খি লৈবাক্কী পান্দমশিংগীদমক ভুপেন দাগী পুন্সি কৎথোকখি। ভুপেন দাগী চহি ১০০ শুবা মপোক কুমওন থৌরম অসিদা, লৈবাক অসি অত্মনির্ভর ওইনবগীদমক ঐখোয়না ৱাশক লৌগদবনি। “ভোকেল ফোর লোকল” ইহৌগী ব্রান্দ এম্বেসেদরশিং ওইনবা মহাক্না অসামগী ইনাওশিং অমসুং ইচলশিংদা হায়জখি। মহাক্না হায়খি লমদম অসিদা শাজবা পোৎথোকশিংগীদমক চাউথোকচবা ফাওগদবনি। মীওই খুদিংমক লমদম অসিগী পোৎথোকশিং লৈগদবনি অমসুং য়োনগদবনি। মসিগী খোঙজং অসি ঐখোয়না হেন্না য়াংনা পায়খৎলিবমখৈ, অথুবা মতমদা চাউখৎলবা ভারত অমগী মঙলান মঙফাওনবা ঙমগনি।

প্রধান মন্ত্রীনা হায়খি মশাগী চহি ১৩ শুবদা ভুপেন দা ঈশৈ অমা ইখি। ঈশৈ অদুদা ভুপেন দা মশামক মৈগী মৈরিক অমা ওইনা উখি অমসুং অনৌবা ভারত অমা শেমগৎনবা ৱাশকখি। তোল্লবা অমসুং নৈহৎপীরবা মীওই খুদিংমক মখোয়গী হকশিং ফংবা লৈবাক অমগী মঙ মহাক্না মঙখি। মতম অদুদা ভুপেন দানা উখিবা অনৌবা ভারত অমগী মঙলান অদু হৌজিক লৈবাক অসিগী অপুনবা ৱাশক অমা ওইরে। মসিগী ৱাশক অসিগা লোয়ননা মীওই খুদিংমক থবক পাংথোক্কদবনি। থবক খুদিংমক অমসুং ৱাশক খুদিংমক্কী ময়াইদা ২০৪৭ দা বিকসিত ভারত অমা ওইহন্নবা পান্দম থম্নবা মতম অদু হৌজিক ওইরে। মসিগী পান্দম অসিগী ইথিল ভুপেন দাগী ঈশৈ অমসুং মহাক্কী পুন্সিদগী ফংগনি। হায়রিবা ৱাশকশিং অসিনা ভুপেন হজারিকা জিগী মঙলানশিং মঙফাওনবা ঙমগনি অমসুং ভুপেন দাগী চহি ১০০ শুবা মপোক কুমওন থৌরমদা লৈবাক অসিগী মীয়াম অমুক হন্না য়াইফ পাউজেল পীজরি। 

থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা অসামগী রাজ্যপাল শ্রী লক্ষমন প্রসাদ অচার্য়া, অসামগী চীফ মিনিষ্টর শ্রী হিমান্ত বিশ্বা শর্মা, অরুনাচল প্রদেসকী চীফ মিনিষ্টর শ্রী পেমা খান্দু, য়ুনিয়ন মিনিষ্টর শ্রী সর্বনন্দ সোনোৱাল য়াওখি।

নুঙগীৱারোল

অসামগী গুৱাহাতিদা পাংথোকপা ভারত রত্ন দোক্তর  ভুপেন হজারিকাগী ১০০শুবা মপোক কুমওন থৌরমদা প্রধান মন্ত্রী মোদী শরুক য়াখ্রে। থৌরম অসিদা দাক্তর হজারিকাগী পুন্সি অমসুং  অসামগী ঈশৈ-নোংমাই, সাহিত্য অমসুং কলচরদা মহাক্না লৌরম্বা থৌদাংশিং ইকায়খুম্নবা উৎখি।

Through his music, Bhupen Da made India's culture resonate worldwide. Addressing a programme on his birth centenary in Guwahati. https://t.co/VAX8tjU0k8

— Narendra Modi (@narendramodi) September 13, 2025

Bhupen Da's music united India and inspired generations. pic.twitter.com/YSPVfJrC3C

— PMO India (@PMOIndia) September 13, 2025

Bhupen Da's life reflected the spirit of 'Ek Bharat, Shreshtha Bharat'. pic.twitter.com/jjFCzGQw7y

— PMO India (@PMOIndia) September 13, 2025

Bhupen Da always gave voice to India's unity. pic.twitter.com/wlyV97gbuR

— PMO India (@PMOIndia) September 13, 2025

Bharat Ratna for Bhupen Da reflects our government's commitment to the North East. pic.twitter.com/aTCdd5JJNZ

— PMO India (@PMOIndia) September 13, 2025

Cultural connectivity is vital for national unity. pic.twitter.com/VuyW1RrX91

— PMO India (@PMOIndia) September 13, 2025

New India will never compromise on its security or dignity. pic.twitter.com/hkye7iyGr2

— PMO India (@PMOIndia) September 13, 2025

Let us be brand ambassadors of Vocal for Local.

Let us take pride in our Swadeshi products. pic.twitter.com/7SAPflLj5Q

— PMO India (@PMOIndia) September 13, 2025

***