ঙসি সেপ্তেম্বর ১১, ২০২৫ দা প্রধান মন্ত্রী শ্রী নরেন্দ্র মোদী দেহরাদুন্দা চৎখ্রে অমসুং উত্তরখন্দদা ঈশিং ইচাউ ফিবম অমসুং নোং কা হেন্না কন্না চুবা অমসুং চীং নিংখায়বদগী থোকহনখিবা মফমশিংগী অমাং-অতাগী ফিবম য়েংশিনখ্রে।

মতেং পাংনবা অমসুং খুন্দা-লৈতানবা অমসুং উত্তরখন্দগী থোকখিবা অমাং-অতাগী ফিবম য়েংশিন্নবা প্রধান মন্ত্রীনা ওফিসিএল ওইবা মীফম অমা পাংথোকখ্রে। উত্তরখন্দগীদমক লুপা করোর ১২০০ গী শেনগী মতেং পীরগনি হায়না প্রধান মন্ত্রীনা লাউথোকখ্রে।

প্রধান মন্ত্রীনা হায়খি লমদম অসি শীনবা থুংনা মতেং পাংনবা অমসুং মসিগী মীয়াম মহৌশাগী পুন্সিদা হল্লক্নবা মাইকৈ কয়াদগী মতেং পাংবা দরকার ওই। মসিগী মনুংদা পি.এম অৱাস য়োজনাগী মখাদা য়ুমশিং অমুক হন্না শাবা, নেসনেল হায়ৱেশিং শেমজিনবা, স্কুলশিং অমুক শাবা, পি.এম.এন.আর.এফকী মখাদা মতেং পাংবা অমসুং শা-ষনশিংগী মিনি কিতশিং য়েন্থোকপা য়াওরি।

খুঙ্গংগী লমদা ঈশিং ইচাউনা শোকহনখ্রবা য়ুমশিং অমুক হন্না শানবা উত্তরখন্দ সরকারনা পীরকপা “স্পিসিএল প্রোজেক”কী মখাদা প্রধান মন্ত্রী অৱাস য়োজনা-গ্রামিনগী মখাদা শেন্থং পীগনি।

অমাং-অতা থোকখিবগী ফিবমশিং য়েংশিন্নবা কেন্দ্র সরকারনা মাঙজৌননা উত্তরখন্দদা ইন্তর-মিনিষ্টরিয়েল সেন্ত্রেল তিমশিং থাখ্রে অমসুং মখোয়না পীরকপা অকুপ্পা মরোলশিংদা য়ুম্ফম ওইরগা মখা তানা মতেং পাংনবা খন্নগনি।

মহৌশাগী ওইবা খুদোংথিবা অসিদা লৈখিদ্রবা মীওইশিংগী ইমুং-মনুংগী মীওইশিংগী অৱাবদা প্রধান মন্ত্রীনা শরুক য়াখ্রে অমসুং অৱাবা তানফম অসিদা কেন্দ্র সরকারনা রাজ্য সরকারগা য়াম্না নক্না থবক তৌমিন্নগনি অমসুং পাংবা য়াবা মতেং খুদিংমক পাংগনি হায়না ফোঙদোকখি।

হন্দক উত্তরখন্দদা ঈশিং ইচাউ অমসুং চীঙ নিংখায়বদা শোকহল্লবা ইমুংশিংগা প্রধান মন্ত্রীগা উনখি। অৱাবা তারবশিং অমসুং মখোয়গী নুংশিরবা মীওইশিং লৈখিদ্রবা ইমুংশিংগী অৱাবদা মহাক্না শরুক য়াখি অমসুং অমতা ওইনা লেপখি।

ঈশিং ইচাউ অমসুং মরী লৈনবা অমাং-অতাশিংদা লৈখিদ্রবশিংগী ইমুংশিংদা লুপা লাখ ২ গী এক্স-গ্রেসিয়া অমসুং অমসুং অশোকপশিংদা লুপা ৫০,০০০ পীনবা প্রধান মন্ত্রীনা লাউথোক্লে।

হন্দক্কী ঈশিং ইচাউ অমসুং চীং নিংখায়বদা মমা-মপা লৈখিদ্রবা অঙাংশিংদা পি.এম কিয়ারস ফোর চিন্দ্রেন স্কিমগী মখাদা মতেং পাংনবা প্রধান মন্ত্রীনা লাউথোক্লে।

প্রধান মন্ত্রীনা হায়খি মদুদি তাঙ্কক অসিদা মরক্কী ওইনা মতেং লাউথোকপগা লোয়ননা দিজাষ্টর মেনেজমেন্ত এক্ত অমসুং রুলশিংগী মখাদা রাজ্যশিংদা মতেং পাংলি। রাজ্যনা পীরকপা মেমোরেন্দম অমসুং সেন্ত্রেল তিমশিংগী পাউদমদা য়ুম্ফম ওইদুনা কেন্দ্র সরকারনা মখা তানা অমুক হন্না খন্নগনি। খুদক্কী ওইনা মতেং পাংনবা পায়খৎখিবা থবকশিংগীদমক মহাক্না এন.দি.আর.এফ, এস.দি.আর.এফ অমসুং আপদা মিত্রা ভোলুন্তিয়ারশিংগা থাগৎপা ফোঙদোকখ্রে।

প্রধান মন্ত্রীনা অরুবা ফিবম অসি খঙখি অমসুং ফিবম অসি লাকশিন্নবা কেন্দ্র সরকারনা পাংবা য়াবা মতেং পাংগনি হায়না থাজবা পীখি।

***