وزیر اعظم جناب نریندر مودی نے 11؍ستمبر 2025 کو دہرادون کا دورہ کیا اور اتراکھنڈ  میں  سیلاب کی صورتحال  نیزبادل پھٹنے ، بارش اور لینڈ سلائیڈنگ سے ہونے والے نقصان کا جائزہ لیا ۔

وزیر اعظم نے دہرادون میں راحت رسانی اور بحالی سے متعلق  اقدامات کا جائزہ لینے کے ساتھ ساتھ اتراکھنڈ میں ہونے والے نقصان کا جائزہ لینے کے لیے ایک سرکاری میٹنگ کی ۔  انہوں نے اتراکھنڈ کے لیے 1200 کروڑ روپے کی مالی امداد کا اعلان کیا۔

وزیر اعظم نے پورے خطے اور اس کے لوگوں کی بحالی میں مدد کے لیے کثیر جہتی نقطہ نظر کی ضرورت پر زور دیا۔  اس میں پی ایم آواس یوجنا کے تحت گھروں کی تعمیر نو ، قومی شاہراہوں کی بحالی ، اسکولوں کی تعمیر نو ، پی ایم این آر ایف کے ذریعے ریلیف فراہم کرنے اور مویشیوں کے لیے منی کٹس تقسیم کرنے جیسے اقدامات شامل ہیں۔

پردھان منتری آواس یوجنا-گرامین کے تحت ، حکومت اتراکھنڈ کی طرف سے دیہی علاقوں میں مکانات کی تعمیر نو کے لیے پیش کردہ ‘‘خصوصی پروجیکٹ’’ کے تحت ان اہل گھرانوں کو مالی مدد فراہم کی جائے گی جن کے مکانات سیلاب کی وجہ سے تباہ ہو چکے ہیں ۔

مرکزی حکومت پہلے ہی بین وزارتی مرکزی ٹیموں کو اتراکھنڈ کا دورہ کرنے کے لیے بھیج چکی ہے، تاکہ نقصان کی حد کا جائزہ لینے کے لیے متاثرہ علاقوں کا دورہ کیا جا سکے ۔ ان کی تفصیلی رپورٹ کی بنیاد پر مزید مدد پر غور کیا جائے گا۔

وزیر اعظم نے قدرتی آفت میں جان گنوانے والوں کے اہل خانہ سے تعزیت کا اظہار کیا اور کہا کہ مرکزی حکومت اس مشکل وقت میں ریاستی حکومتوں کے ساتھ مل کر کام کرے گی اور ہر ممکن مدد فراہم کرے گی۔

وزیر اعظم نے اتراکھنڈ کے ان خاندانوں سے ملاقات کی جو لینڈ سلائیڈنگ اور سیلاب سمیت حالیہ قدرتی آفات سے متاثر ہوئے ہیں۔  انہوں نے ان تمام لوگوں کے ساتھ اظہار یکجہتی کیا، جنہوں نے تکلیف اٹھائی اور ان خاندانوں سے دلی تعزیت کا اظہار کیا، جنہوں نے اپنے پیاروں کو کھو دیا۔

وزیر اعظم مودی نے مرنے والوں کے لواحقین کے لیے 2 لاکھ روپے اور سیلاب اور متعلقہ آفات میں شدید زخمی ہونے والوں کے لیے 50,000 روپے کی امداد کا بھی اعلان کیا۔

وزیر اعظم نے اعلان کیا کہ حالیہ سیلاب اور لینڈ سلائیڈنگ سے یتیم ہونے والے بچوں کو پی ایم کیئرز فار چلڈرن اسکیم کے ذریعے امداد ملے گی ، جس سے ان کی طویل مدتی دیکھ بھال اور فلاح و بہبود کو یقینی بنایا جائے گا۔

وزیر اعظم نے یہ بھی کہا کہ ڈیزاسٹر مینجمنٹ ایکٹ اور متعلقہ ضابطوں کے دائرہ کار کے تحت اس مرحلے پر ریاستوں کو پیشگی ادائیگی سمیت جن امداد کا اعلان کیا گیا ہے وہ عبوری مدت کے لیے ہے۔  مرکزی حکومت ریاست کے میمورنڈم کے ساتھ ساتھ مرکزی ٹیموں کی رپورٹ کی بنیاد پر تشخیص کا مزید جائزہ لے گی۔  انہوں نے فوری امداد اور ردعمل  کے طورپر کوششیں کرنے کے لیے این ڈی آر ایف ، ایس ڈی آر ایف ، فوج ، ریاستی انتظامیہ اور دیگر خدمت پر مبنی تنظیموں کے اہلکاروں کی کوششوں کو سراہا ۔

وزیر اعظم نے صورتحال کی سنگینی کو تسلیم کیا اور یقین دلایا کہ مرکزی حکومت صورتحال سے نمٹنے کے لیے ہر ممکن کوشش کرے گی ۔

********

ش ح۔م م۔ن ع

U-5906