য়োর এক্সিলেন্সী প্রধান মন্ত্রী ৱোং,

লৈবাক অনিমক্কী দেলিগেৎশিং,

মীদিয়াগী মরূপশিং,

নমস্কার!

ওফিস পায়রবা মতুংদগী ভারতকী অহানবা ওফিসিএল খোংচৎ ওইনা লেঙবীরক্লিবা প্রধান মন্ত্রী ৱোংবু থম্মোয় শেংনা তরাম্না ওকচবদা ঐহাক নুংঙাইবা ফাওই। চহি অসিদা ঐখোয়না ঐখোয়গী দিপ্লোমেতিক ওইবা মরীগী চহি ৬০শুবা মপোক কুমওন পাংথোক্কদৌরিবনা খোংচৎ অসি য়াম্না মরু ওই।

মরুপশিং,

মমাং চহিদা ঐহাক্কী সিঙ্গাপুর খোংচৎ মনুংদা, ঐখোয়না ঐখোয়গী মরী অসি কমপ্রিহেন্সিব স্ত্রেতেজিক পার্তনরশিপকী থাক্তা পুখৎখি। চহী অসিগী মনুংদা, ঐখোয়গী ৱারী শানবগী থৌওং অমসুং মতেং পীনবগী মওং অসি হেন্না মপাঙ্গল কনখৎলক্লি অমসুং হেন্না চেৎশিল্লক্লি।

ঙসি, খা-নোংপোক এসিয়া লমদমদা, সিঙ্গাপুর অসি ঐখোয়গী খ্বাইদগী চাউবা ত্রেদ পার্তনর অমা ওইরে। সিঙ্গাপুরনা ভারত্তা চাউনা ইনবেস্তমেন্ত তৌখ্রে। ঐখোয়গী ঙাকশেলগী মরীশিং অসি মখা তানা মপাঙ্গল কনখৎলক্লি, অমসুং ঐখোয়গী মীয়ামগী মরক্তা লৈনরিবা মরীশিং অসি অচেৎপা অমসুং থোইদোক হেন্দোকপা ওইরি।

ঙসি, ঐখোয়না ঐখোয়গী পার্তনরশিপকী তুংলমচৎকীদমক অকুপ্পা রোদমেপ অমা শেম্লে। ঐখোয়না পাংনরিবা মতেং অসি ত্রেদিস্নেল এরিয়াশিংদা য়ুম্ফম ওইদুনা লৈরোই। অহোংবা মতমগী মথৌ তাবশিংগা লোয়ননা, এদভান্স মেন্যুফেকচরিং, গ্রীন শিপ্পিং, স্কিল্লিং, সিভিল ন্যুক্লিয়র ইনর্জী অমসুং অর্বান ৱাতর মেনেজমেন্ত অসিসু ঐখোয়গী মপাং অসিগী চিংশিনফম  ওইনা থোরক্কনি।

ঐখোয়গী বাইলেতরেল ত্রেদ মখা তানা খুমাং চাউশিলহন্নবা, ঐখোয়গী কমপ্রিহেন্সিব ইকোনোমিক কোওপরেসন এগ্রীমেন্ত, অমদি ASEAN গা লোইননা ঐখোয়গী ফ্রী ত্রেদ এগ্রীমেন্ত অসি মতম চানা অমুক হন্না য়েংশিনবা  হায়না ঐখোয়না ৱারেপ লৌরে।

ঐখোয়গী রাজ্যশিংনা ভারত অমসুং সিঙ্গাপুরগী মরক্তা লৈনরিবা মরী অসি মপাঙ্গল কনখৎহনবদা মরু ওইবা থৌদাং লৌগনি। জনুৱারীদা, রাস্ত্রপতি থরমনগী ভারত খোংচৎ মনুংদা, মহাক্না ওরিশাদা চৎখি। হৌখিবা চহি অমদা, ওরিশা, তেলঙ্গনা, অসম অমসুং আন্ধ্র প্রদেশকী মুখ্য মন্ত্রীশিংনা সিঙ্গাপুরদা চৎখ্রে। গুজরাতকী গিফ্ত সিতী অসি হৌজিক্তি ঐখোয়গী স্তোক মার্কেতশিংগা শম্নহল্লিবা অতোপ্পা লিঙ্ক অমা ওইরক্লি।

মরুপশিং,

হৌখিবা চহিদা লোইশিনখিবা সেমিকন্দক্তর ইকোসিস্তেম পার্তনরশিপ এগ্রীমেন্তনা রিসর্স অমসুং দিবেলপমেন্তদা অনৌবা ইনোৎ অমা পীরি। সেমিকোন ইন্দিয়া কনফরেন্সতা সিঙ্গাপুরগী কম্পেনীশিংনা থৱাই য়াওনা শরুক য়াবা অসি মশামক্কী ওইনা য়াম্না মরু ওই।

চেন্নাইদা, সিঙ্গাপুরনা নেস্নেল সেন্তর ওফ এক্সেলেন্স ফোর স্কিলিং লিংখৎপদা মতেং পাংগনি। সেন্তর অসিনা এদভান্স মেন্যুফেকচরিংগী লমদা স্কিল লৈরবা ৱার্কফোর্স অমা শেমগৎপদা মীৎয়েং থমগনি।

মরুপশিং,

তেক্নোলোজী অমসুং ইন্নোবেসন অসিনা ঐখোয়গী মপাংগী মপাঙ্গল কনবা য়ুম্বীনি। ঐখোয়না এ.আই., ক্বান্তম অমসুং অতোপ্পা দিজিতেল তেক্নোলোজীশিংদা ঐখোয়গী কোলাবোরেসন পাকথোক চাউথোকহন্নবা য়ানরে। স্পেস সেক্তরদা ঙসি খুৎয়েক পীনখিবা এগ্রীমেন্ত অসিনা স্পেস সাইন্সতা ঐখোয়গী কোওপরেসনদা অনৌবা পথাপ অমা হৌরে। ঐখোয়গী নহারোলশিংগী হৈশিংবশিংবু শম্নহন্নবা অমসুং শীজিন্ননবা, চহি অসিগী অরোইবা শরুক্তা ইন্দিয়া-সিঙ্গাপুর হেক্কাথোনগী মথংগী রাউন্দ পাংথোক্নবা ঐখোয়না ৱারেপ লৌখ্রে।

 'UPI 'অমসুং 'PayNow' অসি ঐখোয়গী মায় পাকপা দিজিতেল কনেক্তিবিতীগী ময়েক লারবা খুদম্নি। অনৌবা ভারতকী বেঙ্ক ১৩না খোঙথাং অসিদা য়াওরকপা অসি তশেংনা নুংঙাইবা অমনি।

ঙসি গ্রীন অমসুং দিজিতেল শিপ্পিং কোরিদোরশিংগী মতাংদা য়ানখিবা অসিনা মেরিতাইম সেক্তরদা গ্রীন ফ্যুল সপ্লাই চেন অমসুং দিজিতেল পোর্ত ক্লিয়রেন্সদা চাউনা ইনোৎ পীরগনি। ভারতনা মসিগী পোর্ত ইনফ্রাস্ত্রকচর মপাঙ্গল কনখৎহন্নবা খোঙজেল য়াঙনা থবক পায়খৎলি অমসুং হীরম অসিদা সিঙ্গাপুরগী এক্সপর্তিস অসি য়াম্না মরু ওই। ঙসি অঙনবদা, ঐখোয়না সিঙ্গাপুরগী এস.পি.এ. ইন্তরনেস্নেলনা শেমগৎপা ভারত মুম্বাই কন্তেনর তর্মিনেল ফেজ-২গী উরেপ উয়ুং তমখ্রে। মাইলস্তোন অসিনা ঐখোয়গী কন্তেনর হেন্দলিং কেপাসিতী হেন্না হেনগৎহনগনি।

মরুপশিং,

সিঙ্গাপুর অসি ঐখোয়গী এক্ত ইস্ত পোলিসীগী মরুওইবা য়ুম্বী অমনি। ঐখোয় পুন্না, ঐখোয়না ASEAN গা লোইননা তেংবাং পীনবা মখা তানা খুমাং চাউশিলহল্লগনি অমসুং ইন্দো-পেসিফিক লমদমদা শান্তি অমসুং তংদু লৈতাবগীদমক ঐখোয়গী জোইন্ত ভিজনবু মাংলোমদা পুখৎহল্লগনি।

ঐখোয়না তেরোরিজমগা মরী লৈননা মান্নবা ৱাখল্লোনশিং লৈ। মীওইবা খুন্নাইবু ইকাই খুম্নরিবা লৈবাক খুদিংমক্না মসিগী খুদোংথীবা অসি মাইয়োকমিন্ননবা পুন্না হোৎনমিন্নবা অসিনা মখোয়গী থৌদাংনি হায়না ঐখোয়না চেৎনা থাজৈ। পহলগামদা তেরোরিস্তশিংনা লান্দারকপদগী প্রধান মন্ত্রী ৱোং অমসুং সিঙ্গাপুর সরকারনা ভারতকী মীয়ামদা অৱাবা ফোংদোকপীরকপগীদমক অমসুং তেরোরিজমগী মায়োক্তা ঐখোয়গী লান্থেং অসিদা লেপ্পা লৈতনা মতেং পাংবীবগীদমক ঐহাক্না থমোই শেংনা থাগৎপা ফোংদোকচরি।

ইক্সিলেন্সী,

ঐখোয়গী মরীশিং অসি দিপ্লোমেতিক্কী ৱাংমদা শান্না চৎলি।

মসি পান্দম অমগা লোইননা চৎমিন্নরিবা মপাং অমনি,

শরুক য়ামিন্নরিবা ভেল্যুশিংদা য়ুম্ফম ওইবা,

মান্নবা অপাম্বশিংনা লমজিংবা,

অমসুং, শান্তি, খুমাং চাউশিনবা অমসুং চাউখৎপগী মান্নবা মিৎয়েং অমনা লমজিংবা মপাং অমনি।

ঐহাক্না পার্তনরশিপ অসিদা অদোম্না লৌবীরিবা থৌদাং অদুগীদমক্তা ঐহাক্কী ইফমদগী থাগৎপা ফোংদোকচরি।

অদোমবু য়াম্না থাগৎচরি।

***