কেন্দ্রগী গৃহ মন্ত্রী অমসুং কোওপরেসন মন্ত্রী, শ্রী অমিত শাহনা ঙসি আসামগী গুৱাহাতিদা লৈবা রাজ ভবনদা ব্রহ্মপুত্র ৱিং শঙ্গাখ্রে অমসুং ভর্চুএল মোদকী খুত্থাংদা লুপা করোর ৩২২গী প্রোজেক্ত ৮ শঙ্গাখ্রে। থৌরম অদুদা আসামগী রাজ্যপাল শ্রী লক্ষ্মন প্রসাদ আচার্য়, মুখ্য মন্ত্রী হিমন্ত বিশ্ব শর্ম্ম, অমসুং কেন্দ্রগী মন্ত্রী শ্রী সর্বানন্দ সোনোৱাল, অমসুং অতোপ্পা মশক নাইবা মীওইশিংসু শরুক য়াখি।

মহাক্কী ৱারোলদা, কেন্দ্রগী গৃহ মন্ত্রী অমসুং কোওপরেসন মন্ত্রী শ্রী অমিত শাহনা হায়খি মদুদি অৱাং নোংপোক লমদম অসিনা অৱা-অনা অমসুং হিংসা কয়ামরুম মায়োক্নরবসু লমদম অসিনা শান্তি, চাউখৎপা অমসুং কমপ্রিহেন্সিব গ্রোথ পুরক্নবা মাইকৈদা খুমাং চাউশিল্লি। মহাক্না হায়খি মদুদি মহারাজা প্রিথুদগী হৌরগা লাচিত বোর্ফুকন ফাওবা, অমসুং চিলারাইদগী হৌরগা ভারত ইমাগীদমক আর্মদ ফোর্সেসতা য়াওখিবা আসামগী নহাশিংনা কত্থোকখিবা ফাওবা, অৱাং-নোংপোক লমদম অসি মতম পুম্নমক্তা ভারতকী সেক্যুরিতীগী মরুওইবা য়ুম্বী অমা ওইদুনা লাক্লি। শ্রী শাহনা মখা তারদুনা হায়খি মদুদি অৱাং-নোংপোক লমদম অসি মালেমগী খ্বাইদগী লিরবা অমসুং কলচর কয়ামরুমগী য়ুম্ফম অমনি। লমদম অসিগী আর্ত, লোল, চিঞ্জাক, ফিজেৎ চাকচা, ম্যুজিক, অমসুং মহৌশাগী ফজবশিংনা মালেমগী থাক্তা অপুনবা অৱাং নোংপোক অসি তোপ-তোপ্পা ওইহল্লি।

শ্রী অমিত শাহনা হায়খি মদুদি আসাম বচাও আন্দোলনগী লান্থেং মনুংদা নহা কয়ানা কত্থোকখি অমসুং মতম অদুদা মহৈরোইশিংনা লুচিংদুনা খোঙজং চংশিনখিবগী ৱাখল্লোন অদু ঙসি প্রধান মন্ত্রী শ্রী নরেন্দ্র মোদী অমসুং মুখ্য মন্ত্রী শ্রী হিমন্ত বিশ্ব শর্ম্মীনা পুন্না মঙফাওনহনখ্রে। মহাক্না হায়খি মদুদি আসাম মুভমেন্তকী মতমদা খল্লম্বা আসাম অসি ফংবতা নত্তনা মসিদগী হেনখ্রে অমসুং চাউখৎপগী খোঙজেল অসি লেপ্পা লৈতনা মখা চত্থগনি। 

কেন্দ্রগী গৃহ মন্ত্রীনা হায়খি মদুদি প্রধান মন্ত্রী শ্রী নরেন্দ্র মোদীগী লুচিং মখাদা, অৱাং-নোংপোক লমদম অসি হৌখিবা চহি ১১ অসিদা মমাংদা অমুক্তা ওইখিদ্রিবা মওংদা চাউখৎপা উবা ফংলে। অৱাং-নোংপোক্কী পুৱারী ইরকপা মতমদা, প্রধান মন্ত্রী শ্রী নরেন্দ্র মোদীগী চহি ১১গী লৈঙাক অসি সনাগী ময়েকশিংনা ইগনি। মহাক্না হায়খি মদুদি হৌখিবা চহি ১১দা প্রধান মন্ত্রী মোদীনা লৈবাক অসিগী সেক্তর খুদিংমক্তা অহোংবা পুরকখ্রে। মপানগী অমসুং মনুংগী ঙাকশেল, ইনফ্রাস্ত্রকচর দিবেলপমেন্ত, পাৱর জেনরেসন, মীওই করোর ২৫বু লায়রবগী চৈথেংদগী পুখৎপা, নৎত্রগা মীওই করোর ৬০দা য়ুম, ইলেক্ত্রিসিতী, তোইলেত, পাইপকী ঈশিং, গ্যাস সিলিন্দর অমসুং হেল্থকেয়র কভরেজ লুপা লাখ ৫ ফাওবা ফংহনবা অসি হৌখিবা চহি ১০ অসিদা প্রধান মন্ত্রী মোদীনা পোলিসীশিং শেমখিবতা নত্তনা মখোয়শিং অদু লমদম অসিদা ইমপ্লিমেন্ত তৌনবগী থবকসু পায়খৎলি। মসিগী মহৈ ওইনা লৈবাক অসিগী সেক্তর খুদিংমক্তা খুমাং চাউশিল্লক্লি অমসুং মালেম অসিনা মসি থোইদোক হেন্দোক্না য়েংলি হায়না মহাক্না মখা তাখি।

ঙসিগী প্রোগ্রাম অসিগী মখাদা লুপা করোর ৩২২ হেন্না চংবা প্রোজেক্ত ৮ শঙ্গাখ্রে অমসুং উরেপ উয়ুংসু তমখ্রে হায়না শ্রী অমিৎ শাহনা হায়খি। মহাক্না হায়খি মদুদি মোদী সরকারনা বৃতিশনা শেমখিবা অরিবা ক্রিমিনেল লো অহুম লৌথোকখ্রে অমসুং ক্রিমিনেল জস্তিস সিস্তেমগীদমক অনৌবা ভারতকী লো অহুম হৌদোকখ্রে। অনৌবা আইনশিং অসিনা ফোরেন্সিক সাইন্স লেবোরেতরীশিংদা (এফ.এস.এল.) য়ুম্ফম ওইবা পুলিসকী থিজিনবগী থবকশিং অমসুং থুগায়বশিংবু চৈরাক পীনবা হোৎনবদা মরুওইবা মিৎয়েং থম্লি। প্রধান মন্ত্রী শ্রী নরেন্দ্র মোদীগী লুচিং মখাদা লৈবাক শীনবা থুংনা দিজিতেল ইন্দিয়াগী মঙলান অদু মংফাওনহল্লে হায়না মহাক্না মখা তাখি। শ্রী শাহনা হায়খি মদুদি সাইবর সেক্যুরিতী অসি নাগরিকশিংগীদমক য়াম্না মরু ওই। মরম অসিনা ভারত সরকারনা ২০১৯দা দিল্লীদা ১৪সি ইনিসিএতিবতা অহানবা নেস্নেল সাইবর ফোরেন্সিক লেবোরেতরী (এন.সি.এফ.এল.) হাংদোকখি। মহাক্না হায়খি মদুদি দিল্লীগী মতুংদা, অনিশুবা এন.সি.এফ.এল. অসি আসামগী গুৱাহাতিদা লিংখৎখ্রে। মসিনা অৱাং-নোংপোক্কী রাজ্য ৮ অসিদা লৈরিবা নাগরিকশিংগী শেন্থোকশিং ঙাক-শেনগনি। মসিগী মথক্তা, এন.সি.এফ.এল.না লৈবাক অসিগী ঙমখৈদা লৈরিবা গেপশিং শীজিন্নদুনা নারকোতিক্স, খুৎলাইশিং ললোন-ইতিক তৌনবা অমসুং চঙশিল্লক্নবা হোৎনবা মীওইশিং থেংনদুনা নেস্নেল সেক্যুরিতী মপাঙ্গল কনখৎহনবদা অচৌবা থৌদাং লৌগনি।

কেন্দ্রগী গৃহ মন্ত্রী অমসুং কোওপরেসন মন্ত্রীনা হায়খি মদুদি লচিত বোর্ফুকন পুলিস একাদেমীদা লিংখৎপা এন.সি.এফ.এল.গী খুত্থাংদা অৱাং-নোংপোক্কী রাজ্য নিপানগী পুলিসশিংনা লৈবাক অসিগী ঙমখৈ ঙাক্নবা, দ্রগশিং অমসুং ইলিগেল স্মগ্লিংগী মায়োক্তা লান্থেংনবদা মতেং পাংনবা অমসুং নাগরিকশিংগী শেন্থোক লৈহন্নবা পুং ২৪ থবক তৌগনি। ঙসি ঐখোয়গী ঙমখৈ ঙাক্লিবা সেন্ত্রেল আর্মদ পুলিস ফোর্সেস (সি.এ.পি.এফ.) গী জৱানশিংগীদমক্তা ফেসিলিতী কয়া অমসু শঙ্গাখ্রে হায়না মহাক্না হায়খি।

রজ নিৱাসকী ব্রহ্মপুত্র ৱিং অসি লুপা করোর ৪০ হেন্না চাদিং তৌদুনা শাখিবনি অমসুং স্ক্বার মিৎর ৩৩০০ হেনবগী লমদম অসিদা কন্সতিত্যুস্নেল এক্তিবিতী কয়া অমা নীংথিনা পাংথোক্নবা ফেসিলিতীশিং লৈগনি হায়না গৃহ মন্ত্রীনা ফোংদোকখি। মহাক্না হায়খি মদুদি ফেসিলিতী অসিনা তোঙান তোঙানবা দিসিপ্লিনশিংগী মহৈরোইশিং, আর্তিস্তশিং অমসুং রিসর্চরশিংবু শকখঙনবা মফম অমা ওইনা থবক তৌগনি। মখা তানা, ৱাহন্থোক লৈবা ৱারী শানবগী থোংদা রাজ্যপালনা আসাম সরকারবু মীয়ামগী ৱাখল্লোনশিং অদু খঙহনগনি।

শ্রী অমিত শাহনা হায়খি মদুদি ঙসিদি ভারতকা লোয়ননা মালেম পুম্বদা ঐখোয়গী প্রধান মন্ত্রীগী ইকায়খুম্নবা হেনগৎলে অমসুং লৈবাক ২৭না প্রধান মন্ত্রী মোদীবু মখোয়গী খ্বাইদগী ৱাংবা সিবিলিয়ান এৱার্দকা ইকায়খুম্নবা উৎখ্রে। মসি ভারতকীদমক্তা চাউথোকচনীংঙাইনি। মহাক্না হায়খি মদুদি নাকল অমরোমদা মালেম পুম্বনা প্রধান মন্ত্রী শ্রী নরেন্দ্র মোদীবু ইকায় খুম্নৈ। অমরোমদা, মরুওইবা ওপোজিসন পার্তীগী লুচিংবা অসিনা নুংশিদবা অমসুং য়ানিংদবা ফোংদোক্নবগী নেগেতিব পোলিসী অমা হৌদোকখ্রে। শ্রী শাহনা হায়খি মদুদি বিহারগী থৌরম অমদা প্রধান মন্ত্রী মোদীগী লৈখিদ্রবা মমাগীদমক অশাওবা ৱাহৈশিং শীজিন্নদুনা মরুওইবা ওপোজিসনগী লুচিংবশিংনা খ্বাইদগী ফত্তবা থবক অমা তৌখি। গৃহ মন্ত্রীনা মসি অকনবা মওংদা য়ানিংদবা ফোংদোকখি অমসুং হায়খি মদুদি মরুওইবা ওপোজিসন পার্তীগী লুচিংবা অমনা তৌরিবা ৱাখল য়াওদবা প্রোতেস্ত, নেগেতিবিতী অমসুং হেত পোলিতিসিনা ঐখোয়গী মীয়ামগী পুন্সি অসি চাউহনদ্রি।

কেন্দ্রগী গৃহ মন্ত্রী অমসুং কোওপরেসন মন্ত্রীনা হায়খি মদুদি শ্রী নরেন্দ্র মোদীনা গুজরাতকী মুখ্য মন্ত্রী ওইরকপদগী হৌরগা, মরুওইবা ওপোজিসন পার্তীগী লুচিংবা কয়ানা প্রধান মন্ত্রীদা অশাওবা ফোংদোকখি। মহাক্না হায়খি মদুদি মরুওইবা ওপোজিসন পার্তীনা অসিগুম্বা লোল শীজিন্নদুবনা মীয়ামদগী থাগৎ ৱাহৈ তাবা ফংবা ঙম্লোই। শ্রী শাহনা হায়খি মদুদি ওপোজিসন্না মীখল খুদিংদা প্রধান মন্ত্রীগী মায়োক্তা অশাওবা পোক্লি অমসুং মাইথিবা অদুমক নংলি অদুবু করিগুম্বা অমত্তা মসিদগী তমশিনবা ঙমদ্রি। মহাক্না হায়খি মদুদি মীখল অসি দেমোক্রেতিক ওইবা লৈবাক্কী থৱায়নি অমসুং করিগুম্বা ইনফিলত্রেতরশিংনা ভোতর লিস্ততা চংদুনা মীখল অদুদা অশোই-অঙাম থোকহল্লবদি লৈবাক অমত্তনা শাফবা ওইরোই। মহাক্না হায়খি মদুদি লৈবাক শীনবা থুংনা মীয়াম্না মরুওইবা ওপোজিসন পার্তীনা হৌদোকখিবা ফত্তবা থৌওংশিং অদুদা অৱাবা অমসুং নুংঙাইতবা ফোংদোক্লি অমসুং মখোয়গী থৌওংশিং অদু মীয়াম্না শৌগৎপা ফংলোই।

শ্রী অমিত শাহনা হায়খি মদুদি নুমিৎ নিনিগী মমাংদা থোকখিবা থৌদোক অসিনা ঙমখৈ পুম্নমক কোকখ্রে। মহাক্না হায়খি মদুদি মোদী জীগী মমানা লায়রবা ইমুং অমদা লৈরবসু, মহাক্কী মচাশিংবু মালেমগী লুচিংবা অমা ওইহনবগী থাক অমদা পুখৎলে। শ্রী শাহনা হায়খি মদুদি ভারতকী মীয়াম্না অসিগুম্বা মীওই অমগী মায়োক্তা অসিগুম্বা অশাওবা ৱাহৈশিং অসি কৈদৌঙৈদা শীজিন্নবা খাংদুনা লৈরোই, অমসুং রাজনিতী অমসুং পব্লিক লাইফতা মখা তানা অকাইবা পীবা য়ারোই। শ্রী শাহনা মরুওইবা ওপোজিসন পার্তীগী লুচিংবা অদুদা হায়খি মদুদি মহাক্না প্রধান মন্ত্রী, মহাক্কী লৈখিদ্রবা মমা অমসুং লৈবাক অসিগী মীয়ামদা ঙাকপীনবা হায়জগদবনি।

*****