কেন্দ্ৰীয় গৃহ পৰিক্ৰমা আৰু সমবায় দপ্তৰৰ  মন্ত্ৰী শ্ৰীযুত অমিত শ্বাহে আজি অসমৰ গুৱাহাটীস্থিত ৰাজভৱন চৌহদত নতুনকৈ নিৰ্মিত ব্ৰহ্মপুত্ৰ উইং উদ্বোধন কৰাৰ লগতে  ৩২২ কোটি টকা ব্যয় সাপেক্ষে গ্ৰহণ কৰা  ৮টা প্ৰকল্পৰ ই-আধাৰশিলা স্থাপন আৰু উচৰ্গা কৰে। এই উপলক্ষে  আয়োজিত অনুষ্ঠানত অসমৰ ৰাজ্যপাল শ্ৰী লক্ষ্মণ প্ৰসাদ আচাৰ্য, মুখ্যমন্ত্ৰী ড° হিমন্ত বিশ্ব শৰ্মা আৰু কেন্দ্ৰীয় মন্ত্ৰী শ্ৰী সৰ্বানন্দ সোণোৱালকে ধৰি বহু বিশিষ্ট ব্যক্তি উপস্থিত থাকে।

অনুষ্ঠানত ভাষণ প্ৰদান কৰি  কেন্দ্ৰীয় গৃহ পৰিক্ৰমা আৰু সমবায় দপ্তৰৰ মন্ত্ৰী শ্ৰী অমিত শ্বাহে কয় যে বহু উত্থান-পতন আৰু হিংসাত্মক সংঘাতৰ সন্মুখীন হোৱাৰ পিছত আজি উত্তৰ-পূৰ্বাঞ্চলে শান্তি তথা সামগ্ৰিক উন্নয়নৰ দিশত আগবাঢ়িছে। তেওঁ কয় যে অসমৰ ইতিহাসত মহাৰাজ পৃথুৰ পৰা আৰম্ভ কৰি লাচিত বৰফুকন আৰু চিলাৰায়ৰ পৰা আৰম্ভ  কৰি সেনাবাহিনীত যোগদান কৰা এই এলেকাৰ যুৱক-যুৱতীসকলে মা ভাৰতীৰ বাবে যি ত্যাগ কৰিছে সেই দিশৰ পৰা  উত্তৰ-পূব সদায় ভাৰতৰ নিৰাপত্তাৰ ক্ষেত্ৰত এক গুৰুত্বপূৰ্ণ স্তম্ভ   হিচাবে পৰিগণিত হৈ আহিছে। শ্ৰী শ্বাহে কয় যে বিশ্বৰ আটাইতকৈ পুৰণি আৰু বৈচিত্ৰ্যময় সংস্কৃতি উত্তৰ-পূবত বিদ্যমান। এই ঠাইখনৰ শিল্প, ভাষা, খাদ্য, সাজ-পোছাক, সংগীত আৰু প্ৰাকৃতিক সৌন্দৰ্য্যই সমগ্ৰ উত্তৰ-পূৰ্বাঞ্চলক বিশ্বৰ ভিতৰতে অনন্য কৰি তুলিছে।

শ্ৰী অমিত শ্বাহে কয় যে অসম আন্দোলনৰ সময়ত বহু যুৱকে প্ৰাণ আহুতি দিছিল আৰু সেই সময়ত ছাত্ৰ-ছাত্ৰীসকলে যি দৃষ্টিভংগীৰে আন্দোলনটো আগবঢ়াই লৈ গৈছিল সেই দৃষ্টিভংগীক আজি প্ৰধানমন্ত্ৰী মোদী জী আৰু মুখ্যমন্ত্ৰী শ্ৰী হিমন্ত বিশ্ব শৰ্মা জীৰ যুটিয়ে বাস্তৱায়িত কৰিছে। ৰাজ্যখন অসম আন্দোলনৰ সময়ত কল্পনা কৰা অসম খনতকৈ বহু আগুৱাই গৈছে। উন্নয়নৰ এই গতি অব্যাহত থাকিব বুলিও তেওঁ কয়।

কেন্দ্ৰীয় গৃহমন্ত্ৰীগৰাকীয়ে লগতে কয় যে প্ৰধানমন্ত্ৰী শ্ৰীযুত নৰেন্দ্ৰ মোদীৰ নেতৃত্বত বিগত ১১ বছৰত উত্তৰ-পূৰ্বাঞ্চলৰ অভূতপূৰ্ব উন্নয়ন সাধন হৈছে। যেতিয়াই উত্তৰ-পূৰ্বাঞ্চলৰ ইতিহাস লিখা হ’ব তেতিয়াই প্ৰধানমন্ত্ৰী শ্ৰী নৰেন্দ্ৰ মোদীৰ এই ১১ বছৰীয়া শাসনকালৰ কথা  সোণালী আখৰেৰে লিখা হ’ব। কেন্দ্ৰীয় গৃহমন্ত্ৰীগৰাকীয়ে কয়  যে বিগত ১১ বছৰত প্ৰধানমন্ত্ৰী মোদীয়ে দেশৰ প্ৰতিটো খণ্ডতে আমূল পৰিৱৰ্তন সাধন কৰিবলৈ সক্ষম হৈছে। দেশৰ বহিঃ আৰু আভ্যন্তৰীণ নিৰাপত্তাই হওক, আন্তঃগাঁথনিৰ  নিৰ্মাণ, বিদ্যুৎ উৎপাদন, ২৫ কোটি লোকক দৰিদ্ৰ সীমাৰেখাৰ পৰা উন্নত কৰাই হওক বা দেশৰ ৬০ কোটি লোকক ঘৰ, বিদ্যুৎ, শৌচাগাৰ, টেপৰ পানী, গেছ চিলিণ্ডাৰ আৰু ৫ লাখ টকা পৰ্যন্ত স্বাস্থ্য সম্পৰ্কীয় খৰচৰ ব্যৱস্থা কৰাই হওক, প্ৰধানমন্ত্ৰী মোদীয়ে এনেবোৰ ক্ষেত্ৰত কেৱল নীতি নিৰ্ধাৰণ কৰাই নহয়,সেইবোৰৰ ক্ষিপ্ৰ কাৰ্যকৰীকৰণৰ  বাবেও কাম কৰিছে। সেইবাবেই সমগ্ৰ দেশৰ প্ৰতিটো খণ্ডতে লক্ষ্যণীয়  অগ্ৰগতি হৈছে । এনে অগ্ৰগতিসমূহৰ  বাবেই সমগ্ৰ  বিশ্বই বিস্মিত নয়নেৰে ভাৰতলৈ চাই আছে বুলিও তেওঁ কয়।

শ্ৰী অমিত শ্বাহে কয় যে আজিৰ কাৰ্যসূচীৰ সময়তে  ৩২২ কোটিতকৈ অধিক মূল্যৰ ৮টা প্ৰকল্প উদ্বোধন আৰু  আধাৰশিলা স্থাপন কৰা হৈছে। মোদী চৰকাৰে ব্ৰিটিছে প্ৰৱৰ্তন কৰি থৈ যোৱা  তিনিখন পুৰণি অপৰাধমূলক আইন বিলুপ্ত কৰি অপৰাধমূলক ন্যায় ব্যৱস্থাৰ অধীনত তিনিখন নতুন ভাৰতীয় আইন প্ৰণয়ন কৰিছে। এই নতুন আইনসমূহত ফৰেনছিক ছায়েন্স লেবৰেটৰী (এফ এছ এল)ৰ সহায়ত আৰক্ষীৰ তদন্ত ক্ষিপ্ৰতৰ কৰি তোলা আৰু দোষীক শাস্তি প্ৰদানৰ বিষয়ত বিশেষভাবে  গুৰুত্ব আৰোপ কৰা  হৈছে। তেওঁ কয় যে আজি প্ৰধানমন্ত্ৰী মোদীৰ নেতৃত্বত সমগ্ৰ দেশে ডিজিটেল ইণ্ডিয়াৰ সপোন বাস্তৱায়িত কৰিছে। শ্ৰী শ্বাহে লগতে কয় যে চাইবাৰ সুৰক্ষা নাগৰিকৰ বাবে অতি গুৰুত্বপূৰ্ণ ।  সেইবাবেই ভাৰত চৰকাৰে ২০১৯ চনত দিল্লীত আই ৪ চিৰ অধীনত প্ৰথমটো ৰাষ্ট্ৰীয় চাইবাৰ ফৰেনছিক লেবৰেটৰী (এন চি এফ এল) স্থাপন কৰিছিল, যিয়ে নাগৰিকসকলক তেওঁলোকৰ কষ্টোপাৰ্জিত ধন চাইবাৰ অপৰাধীৰ পৰা ৰক্ষা কৰাত সহায় কৰিব। তেওঁ কয় যে দিল্লীৰ পাছত অসমৰ গুৱাহাটীত   দ্বিতীয়টো এন চি এফ এল স্থাপন  কৰা হৈছে। ইয়াৰ ফলত উত্তৰ-পূৰ্বাঞ্চলৰ আটাইকেইখন ৰাজ্যৰ নাগৰিকৰ উপাৰ্জনৰ ধন আদি সুৰক্ষিত হৈ থকাটো  নিশ্চিত হ’ব। কেৱল এয়াই নহয়, ভাৰতৰ সীমান্তৰে সুৰুঙা  বিচাৰি উলিয়াই নিচাযুক্ত দ্ৰব্য, অস্ত্ৰ-শস্ত্ৰ সৰবৰাহ কৰা তথা  অনুপ্ৰৱেশ কৰিবলৈ অপচেষ্টা কৰা সকলৰ বিৰুদ্ধে পদক্ষেপ গ্ৰহণতো  এন চি এফ এল সহায়ক হৈ উঠিব  বুলি  কেন্দ্ৰীয় গৃহমন্ত্ৰীগৰাকীয়ে আশা প্ৰকাশ কৰে।

কেন্দ্ৰীয় গৃহ আৰু সমবায় দপ্তৰৰ  মন্ত্ৰীগৰাকীয়ে লগতে কয় যে লাচিত বৰফুকন আৰক্ষী একাডেমীত স্থাপিত এন চি এফ এলৰ জৰিয়তে উত্তৰ-পূৰ্বাঞ্চলৰ আটাইকেইখন ৰাজ্যৰ আৰক্ষীয়ে ২৪ ঘণ্টাই দেশৰ সীমান্ত সুৰক্ষিত কৰাৰ লগতে নিচাযুক্ত দ্ৰব্য আৰু অবৈধ সামগ্ৰীৰ সৰবৰাহৰ বিৰুদ্ধে যুঁজ দিয়াত সহায় লাভ কৰিব । ইয়াৰ ফলত  নাগৰিকৰ উপাৰ্জন সুৰক্ষিত হৈ পৰিব। তেওঁ কয় যে আজি আমাৰ সীমান্তত অতন্দ্ৰ প্ৰহৰীৰ ৰূপত থকা  কেন্দ্ৰীয় সশস্ত্ৰ আৰক্ষী বাহিনীৰ জোৱানসকলৰ বাবেও বহু সুবিধা উদ্বোধন কৰা হৈছে।

গৃহমন্ত্ৰীগৰাকীয়ে কয় যে ৪০ কোটি টকাৰো অধিক ধনৰ ব্যয়ৰে  তথা ৩৩০০ বৰ্গমিটাৰতকৈও অধিক এলেকাত নিৰ্মাণ কৰা ৰাজ ভৱনৰ ব্ৰহ্মপুত্ৰ উইঙত বহু সাংবিধানিক কাম-কাজ সুচাৰুৰূপে চলাব পৰাৰ ব্যৱস্থা ৰখা হৈছে।  তেওঁ কয় যে ইয়াত ছাত্ৰ-ছাত্ৰী, শিল্পী, গৱেষক আদিক  স্বীকৃতি দিয়াৰ বাবে কাম কৰা হ’ব আৰু এক অৰ্থপূৰ্ণ ব্যৱস্থাৰ মাজেৰে  ৰাজ্যপালগৰাকীয়ে অসম চৰকাৰক জনসাধাৰণৰ আবেগৰ বিষয়ে অৱগত কৰি চৰকাৰক সচেতন কৰি তুলিব পাৰিব।

শ্ৰী অমিত শ্বাহে কয় যে আজি ভাৰতৰ লগতে  সমগ্ৰ বিশ্বতে আমাৰ প্ৰধানমন্ত্ৰীৰ সন্মান বৃদ্ধি পাইছে আৰু ২৭খন দেশে প্ৰধানমন্ত্ৰী মোদীক সৰ্বোচ্চ অসামৰিক বঁটাৰে সন্মানিত কৰিছে । যি কথা ভাৰতৰ বাবে গৌৰৱৰ বিষয়। তেওঁ কয় যে এফালে সমগ্ৰ বিশ্বই প্ৰধানমন্ত্ৰী শ্ৰী নৰেন্দ্ৰ মোদীক সন্মান  জনাইছে আৰু আনপিনে মূল বিৰোধী দলৰ নেতাই ঘৃণা তথা অৱজ্ঞাৰ নেতিবাচক ৰাজনীতি আৰম্ভ কৰিছে। শ্ৰী শ্বাহে কয় যে বিহাৰৰ এক কাৰ্যসূচীত প্ৰধানমন্ত্ৰী মোদীৰ প্ৰয়াত মাতৃৰ বিৰুদ্ধে   মঞ্চৰ পৰাই আমাৰ্জিত শব্দ ব্যৱহাৰ কৰি মূল বিৰোধী নেতাসকলে এক অতি ঘৃণনীয় কাম কৰিছে। এই কথাক  গৃহমন্ত্ৰীগৰাকীয়ে তীব্ৰ গৰিহণা দি কয় যে মূল বিৰোধী দলৰ নেতাই যেনে  ধৰণে  কোনো  বিষয় নোহোৱাকৈ প্ৰতিবাদ কৰিছে, নেতিবাচক আৰু ঘৃণাৰ ৰাজনীতি আৰম্ভ কৰিছে,  এনে ধৰণৰ ৰাজনীতিয়ে আমাৰ জনজীৱনক অন্ধকাৰ দিশলৈ  লৈ যাব।

কেন্দ্ৰীয় গৃহ আৰু সমবায় দপ্তৰৰ মন্ত্ৰীগৰাকীয়ে কয় যে শ্ৰী নৰেন্দ্ৰ মোদী গুজৰাটৰ মুখ্যমন্ত্ৰী হোৱাৰ পিছৰে পৰা প্ৰধান বিৰোধী দলৰ বহু নেতাই প্ৰধানমন্ত্ৰীৰ বিৰুদ্ধে অমাৰ্জিত ভাষা ব্যৱহাৰ কৰিবলৈ লৈছিল। এনে ভাষা ব্যৱহাৰ কৰি মূল বিৰোধী দলটোৱে জন সমৰ্থন লাভ কৰিব নোৱাৰে বুলিও তেওঁ কয়। শ্ৰী শ্বাহে কয় যে বিৰোধীয়ে প্ৰতিটো নিৰ্বাচনতে প্ৰধানমন্ত্ৰীৰ বিৰুদ্ধে অমাৰ্জিত শব্দ ব্যৱহাৰ কৰি নিজেই অপমানৰ সন্মুখীন হৈছে যদিও এতিয়াও তেওঁলোকে তাৰ পৰা একো শিকিব পৰা নাই। তেওঁ কয় যে যিকোনো গণতান্ত্ৰিক দেশতে  নিৰ্বাচন গণতন্ত্ৰৰ আত্মা আৰু যদি অনুপ্ৰৱেশকাৰীয়ে ভোটাৰ তালিকাত প্ৰৱেশ কৰি নিৰ্বাচন ব্যৱস্থাটোক  প্ৰদূষিত কৰে , তেন্তে কোনো দেশ সুৰক্ষিত হৈ থাকিব নোৱাৰে। মূল বিৰোধী দলটোৱে আৰম্ভ কৰা কুৎসিত প্ৰচেষ্টাক সমগ্ৰ দেশৰ জনসাধাৰণে বেদনাহত হৃদয়েৰে প্ৰত্যক্ষ কৰি আছে আৰু তেওঁলোকৰ এনে অপচেষ্টাসমূহে কেতিয়াও  জনসমৰ্থন লাভ নকৰে বুলিও শ্ৰী শ্বাহে দৃঢ়তাৰে কয়। 

শ্ৰী অমিত শ্বাহে লগতে কয় যে দুদিন পূৰ্বে যি ঘটিছিল সেই কথাই  সকলো সীমা অতিক্ৰম কৰিছে। তেওঁ কয় যে মোদী জীৰ মাতৃয়ে দুখীয়া ঘৰৰ হৈয়ো সংস্কাৰৰ শিক্ষাৰে সকলো সন্তানক এনে এক স্তৰলৈ নিব পৰাকৈ ডাঙৰ-দীঘল কৰিছে যে তেওঁৰ পুত্ৰ আজি  বিশ্ব নেতা হৈ পৰিছে। শ্ৰী  শ্বাহে কয় যে ভাৰতৰ জনসাধাৰণে এনে এগৰাকী ব্যক্তিক  কৰা অপমান কেতিয়াও সহ্য কৰিব নোৱাৰে আৰু ৰাজনীতিত ইয়াতকৈ বেছি অধঃপতন আৰু একো থাকিব নোৱাৰে । শ্ৰী শ্বাহে মূল বিৰোধী দলৰ নেতাসকলক উদ্দেশ্যি  কয় যে এনে কৰ্মৰ  বাবে প্ৰধানমন্ত্ৰী ডাঙৰীয়া , তেওঁৰ প্ৰয়াত মাতৃ ডাঙৰীয়ানী  আৰু দেশৰ জনসাধাৰণৰ ওচৰত তেওঁলোকে ক্ষমা বিচাৰিব লাগে।

*****

RK/VV/PS/PR/DM