ସୁଦର୍ଶନଧାରୀ ମୋହନ ଓ ଚକ୍ରଧାରୀ ମୋହନଙ୍କ ଦ୍ୱାରା ପ୍ରଦର୍ଶିତ ମାର୍ଗରେ ଭାରତ ସଶକ୍ତ ହେଉଛି : ପ୍ରଧାନମନ୍ତ୍ରୀ

ଯେଉଁଠି ଲୁଚିଥାନ୍ତୁ ନା କାହିଁକି ଆଜି ଆତଙ୍କବାଦୀ ଓ ମାଷ୍ଟର ମାଇଣ୍ଡମାନଙ୍କୁ ଛଡାଯାଉନି : ପ୍ରଧାନମନ୍ତ୍ରୀ

କ୍ଷୁଦ୍ର ଉଦ୍ୟୋଗପତି, ଚାଷୀ, ପ୍ରାଣୀଧନ ପାଳକମାନଙ୍କୁ କୌଣସି କ୍ଷତି ପହଂଚିବାକୁ ଦିଆଯିବ ନାହିଁ : ପ୍ରଧାନମନ୍ତ୍ରୀ

ଗୁଜରାଟ ମାଟିରେ ବିଭିନ୍ନ ପ୍ରକାର ଶିଳ୍ପ ଆଜି ବିକଶିତ ହୋଇପାରୁଛି : ପ୍ରଧାନମନ୍ତ୍ରୀ

ନୂଆ ମଧ୍ୟବିତ ଓ ମଧ୍ୟବିତଙ୍କୁ ସଶକ୍ତ କରିବା ଲାଗି ଅବିରତ ପ୍ରଚେଷ୍ଟା ଚାଲିଛି : ପ୍ରଧାନମନ୍ତ୍ରୀ

ବଣିକ ଗୋଷ୍ଠୀ ହୁଅନ୍‌ୁ କିମ୍ବା ଅନ୍ୟ ପରିବାର ଏହି ଦୀପାବଳିରେ ସମସ୍ତେ ଖୁସିର ଡବଲ ବୋନସ ପାଇବେ : ପ୍ରଧାନମନ୍ତ୍ରୀ

ଚଳିତ ପର୍ବରେ ଘର ସଜାଇବା ଲାଗି ଆଣୁଥିବା ଗିଫ୍ଟ ଓ ଅନ୍ୟାନ୍ୟ ସାମଗ୍ରୀ ସ୍ୱଦେଶୀ ହେବା ଦରକାର : ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁଜରାଟର ଅହମଦାବାଦରେ ୫୪ ଶହ କୋଟିର ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଲୋକାର୍ପଣ କରିଛନ୍ତି । ସମବେତ ଜନସଭାକୁ ଉଦବୋଧନ ଦେଇ ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ, ଗଣେଶ ପୂଜା ଲାଗି ସାରା ଦେଶ ଏବେ ଉତ୍ସବମୁଖର ରହିଛି । ଗଣପତିଙ୍କ ଆଶୀର୍ବାଦରେ ଚଳିତ ପୂଜାଠାରୁ ଗୁଜରାଟର ବିକାଶ ଲାଗି ବିଭିନ୍ନ ଉନ୍ନତିମୂଳକ କାମର ଶୁଭାରମ୍ଭ କରାଯିବ ବୋଲି ପ୍ରଧାନମନ୍ତ୍ରୀ କହିଥିଲେ ।

ଚଳିତ ମୌସୁମୀ ସମୟରେ ଗୁଜରାଟର ବିଭିନ୍ନ ଅଂଚଳରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଦେଶର କିଛି ସ୍ଥାନରେ ବି ବାଦଲଫଟା ବର୍ଷା ବି ହୋଇଛି । ଏଥିପାଇଁ ବହୁ ଧନଜୀବନ ବି ହାନି ହୋଇଛି । ସାରା ଦେଶ ଲାଗି ପ୍ରକୃତିର ଏହି ରୌଦ୍ର ରୂପ ଚ୍ୟାଲେଞ୍ଜ ସୃଷ୍ଟି କରିଛି । ରାଜ୍ୟ ସରକାରଙ୍କର ସହ ସହଭାଗିତା କ୍ରମେ କେନ୍ଦ୍ର ସରକାର ବିଭିନ୍ନ ସ୍ଥାନରେ ଭିନ୍ନ ଭିନ୍ନ ରିଲିଫ ଓ ଉଦ୍ଧାର କାର୍ଯ୍ୟ କରୁଛନ୍ତି ।

ଗୁଜରାଟ ଦୁଇ ଜଣ ମୋହନଙ୍କ ବାସସ୍ଥାନ ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ । ପ୍ରଥମ ହେଉଛନ୍ତି ସୁଦର୍ଶନ ଚକ୍ରଧାରୀ ଦ୍ୱାରିକାଧୀଶ ଶ୍ରୀକୃଷ୍ଣ । ଅନ୍ୟ ଜଣେ ହେଉଛନ୍ତି ଚରଖାଧାରୀ ସାବରମତିର ସନ୍ଥ ପୂଜ୍ୟ ବାପୁ । ସୁଦର୍ଶନ ଚକ୍ରଧାରୀ ମୋହନ ଓ ଚରଖାଧାରୀ ମୋହନଙ୍କ ଆଦର୍ଶକୁ ପାଥେୟ କରି ଭାରତ ଦିନକୁ ଦିନ ବିକଶିତ ହେଉଛି । ନ୍ୟାୟ ଓ ନିରାପତାର ପ୍ରତୀକ ସୁଦର୍ଶନ ଚକ୍ରଧାରୀ ମୋହନ ଦେଶ ଓ ସମାଜକୁ କିପରି ସୁରକ୍ଷା ଦେଇ ହେବ ତାହା ଶିକ୍ଷା ଦେଇଛନ୍ତି । ଅଣ୍ଡର ବାର୍ଲଡରେ ଆତ୍ମ ଗୋପନ କରିଥିବା ଆତଙ୍କବାଦୀମାନଙ୍କୁ ବି ସୁଦର୍ଶନ ଚକ୍ରଧାରୀ ମୋହନ ଦଣ୍ଡ ଦେବାର କ୍ଷମତା ରଖିଛନ୍ତି । ଏପ୍ରକାର ଭାବ ଭାରତର ନିଷ୍ପତିରେ ବି ପ୍ରତିଭାତ । ପହଲଗାମ ଆକ୍ରମଣର ପ୍ରତିଶୋଧ ସାରା ଜଗତ ଏବେ ଦେଖିଛି । ସେହିପରି ଅପରେସନ ସିନ୍ଦୂର ବି ଭାରତୀୟ ସଶସ୍ତ୍ର ସେନାର ପରାକ୍ରମର ଦ୍ୟୋତକ । ସୁଦର୍ଶନ ଚକ୍ରଧାରୀ ମୋହନଙ୍କଠାରୁ ଦେଶ ଏହି ପ୍ରେରଣା ପାଇଛି ।

ଚରଖାଧାରୀ ମୋହନଙ୍କ କଥାକୁ ବି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ । ସ୍ୱଦେଶୀ ଆନ୍ଦୋଳନର ବାର୍ତାବହ ବାପୁଙ୍କ ସାବରମତି ଆଶ୍ରମ ବର୍ଷ ବର୍ଷ ଧରି ମୂକସାକ୍ଷୀ ରହିଥିବା ସେ କହିଥିଲେ । ବାପୁଙ୍କ ନାଁରେ ଶତାବ୍ଦୀ ଶତାବ୍ଦୀ ଧରି ବିରୋଧୀ ଦଳ କ୍ଷମତା ଉପଭୋଗ କରିଥିବା ସେ ଉଲ୍ଲେଖ କରିଥିଲେ । ସ୍ୱଦେଶୀ ମନ୍ତ୍ରକୁ ବିରୋଧୀ ଦଳ କିପରି ଦୂରୁପଯୋଗ କରିଛନ୍ତି ସେକଥା ବି ପ୍ରଧାନମନ୍ତ୍ରୀ କହିଥିଲେ । ୬୦/୬୫ ବର୍ଷ ଶାସନ କରିଥିବା ବିରୋଧୀ ଦଳ ଦେଶକୁ ଅନ୍ୟ ଉପରେ ନିର୍ଭର କରିବା ଶିଖାଇଛି । କିନ୍ତୁ ଭାରତ ଏବେ ଆତ୍ମ ନିର୍ଭର ଦେଶ ଭାବରେ ପରିଗଣିତ ହୋଇପାରିଛି । ବିକଶିତ ଦେଶର ମୂଳଦୁଆ ବି ପଡିଛି । କୃଷକ, ମତ୍ସ୍ୟଜୀବୀ, ପ୍ରାଣୀଧନ ପାଳକ, ଉଦ୍ୟୋଗପତିଙ୍କ ଦ୍ୱାରା ଦେଶ ଦ୍ରୁତ ଗତିରେ ଅଗ୍ରସର ହେଉଛି । ବିପୁଳ ସଂଖ୍ୟକ ପ୍ରାଣୀଧନ ପାଳକଙ୍କ ରାଜ୍ୟ ଭାବେ ଗୁଜରାଟ ପରିଗଣିତ ବୋଲି ପ୍ରଧାନମନ୍ତ୍ରୀ କହିଥିଲେ । ଭାରତର ଡାଏରୀ ସେକ୍ଟର ଏବେ ମଜଭୂତ ହୋଇପାରିଛି ଓ ଏହି ଶକ୍ତି ପୁଞ୍ଜ ଲାଗି ଦେଶ ଆତ୍ମ ନିର୍ଭର ହୋଇପାରିଛି । ଅର୍ଥନୈତିକ ସ୍ୱାର୍ଥ ଦ୍ୱାରା ପରିଚାଳିତ ରାଜନୀତି ଏବେ ସାରା ବିଶ୍ୱରେ ବିସ୍ତାରିତ ହୋଇଥିବା ପ୍ରଧାନମନ୍ତ୍ରୀ ଚେତାଇ ଦେଇଥିଲେ । କ୍ଷୁଦ୍ର ଉଦ୍ୟୋଗପତି, ଦୋକାନୀ, ଚାଷୀ, ପ୍ରାଣୀଧନ ପାଳକଙ୍କ ଲାଗି ମଙ୍ଗଳ ବିଧାନ ତାଙ୍କ ପାଇଁ ସର୍ବୋପରି ବୋଲି ମୋଦୀ ଅଭିହିତ କରିଥିଲେ । ଏମାନଙ୍କ ସ୍ୱାର୍ଥର ସୁରକ୍ଷା ଲାଗି ତାଙ୍କ ସରକାର ପ୍ରତିବଦ୍ଧ ବୋଲି ପ୍ରଧାନମନ୍ତ୍ରୀ କହିଥିଲେ ।

ଆତ୍ମ ନିର୍ଭର ଭାରତ ଯୋଜନାର ସଫଳ ରୂପାୟନ ଲାଗି ଗୁଜରାଟ ପୂରା ଦମରେ କାମ କରୁଛି ବୋଲି ପ୍ରଧାନମନ୍ତ୍ରୀ ମତ ପୋଷଣ କରିଥିଲେ । ଆଉ ଏହି ସଫଳତା ଲାଗି ଦୁଇ ଶତାବ୍ଦୀର ପରିଶ୍ରମକୁ ଶ୍ରେୟ ଦିଆଯିବ ବୋଲି ମୋଦୀ କହିଥିଲେ । ଯେବେ ଏହି ଅଂଚଳରେ କର୍ଫ୍ୟୁ ଲାଗୁ ହେଉଥିଲା ସେନେଇ ଆଜିକାଲିକା ଯୁବ ପିଢି ଅବଗତ ନାହାନ୍ତି । ଅଶାନ୍ତ ବାତାବରଣ ଭିତରେ ଦିନେ ଏହି ଅଂଚଳରେ ବେପାର ବଣିଜ କରିବା କଷ୍ଟକର ଥିଲା । କିନ୍ତୁ ଏବେ ସମୟର ପରିବର୍ତନ ହୋଇ ଅହମ୍ମଦାବାଦ ଏକ ସୁରକ୍ଷିତ ସହର ଭାବରେ ପରିଣତ ହୋଇଥିବାରୁ ସେ ଅହମ୍ମଦାବାଦବାସୀଙ୍କୁ ଧନ୍ୟବାଦ ଜ୍ଞାପନ କରିଥିଲେ ।   

ଗୁଜରାଟରେ ଶାନ୍ତି ଓ ସ୍ଥିରତା ଆସିଥିବାରୁ ସାରା ରାଜ୍ୟରେ ସକରାତ୍ମକ ବାତାବରଣ ରହିଥିବା ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ । ଆଜି ସବୁପ୍ରକାର ଶିଳ୍ପ ସାରା ରାଜ୍ୟରେ ଖୋଲିପାରିଛି ବୋଲି ସେ କହିଥିଲେ । ଗୋଟିଏ ନିର୍ମାଣକାରୀ ପେଣ୍ଠ ହିସାବରେ ଗୁଜରାଟ ରାଜ୍ୟ ଏବେ ରୂପାନ୍ତରିତ ହୋଇଥିବା ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ । ଦାହୁଦର ରେଳ ଫ୍ୟାକ୍ଟ୍ରିରେ ଶକ୍ତିଶାଳୀ ଇଲେକ୍ଟ୍ରିକ ଲୋକୋମୋଟିଭ ଇଞ୍ଜିନ ପ୍ରସ୍ତୁତ ହୋଇପାରୁଥିବା ସେ କହିଥିଲେ । ଗୁଜରାଟରେ ପ୍ରସ୍ତୁତ ହେଉଥିବା ମେଟ୍ରୋ କୋଚଗୁଡିକ ଏବେ ବାହାର ଦେଶକୁ ରପ୍ତାନୀ ହୋଇପାରୁଛି । ମୋଟର ସାଇକେଲ ଓ କାର ଏହି ରାଜ୍ୟରେ ଅଧିକା ନିର୍ମାଣ କରାଯାଉଛି । ପ୍ରମୁଖ ଜାତୀୟ ଓ ଅନ୍ତର୍ଜାତୀୟ କମ୍ପାନୀଗୁଡିକ ରାଜ୍ୟରେ ବିଭିନ୍ନ ଫ୍ୟାକ୍ଟ୍ରି ବି ନିର୍ମାଣ କରୁଛନ୍ତି । ବିଭିନ୍ନ ଏୟାରକ୍ରାଫ୍ଟ ଉପାଦାନ ବି ଗୁଜରାଟରୁ ବାହାରକୁ ରପ୍ତାନୀ ହେଉଛି । ବିଭିନ୍ନ ପରିବହନ ଏୟାରକ୍ରାଫ୍ଟ ବଦୋଦରାରେ ଏବେ ନିର୍ମାଣ ହେବାକୁ ଆରମ୍ଭ କଲାଣି । ଇଲେକ୍ଟ୍ରିକ ଗାଡି ନିର୍ମାଣ କ୍ଷେତ୍ରରେ ଗୁଜରାଟ ଅଗ୍ରଗତି କରିଛି । ହଁସଲପୁର ଗସ୍ତ କରି ଇଲେକ୍ଟ୍ରିକ ଗାଡି ନିର୍ମାଣ କାରଖାନାକୁ ସେ ଲୋକାର୍ପଣ କରିବାର ରହିଛି ବୋଲି ବି ଉଲ୍ଲେଖ କରିଥିଲେ । ବିନା ସେମି କଣ୍ଡକ୍ଟରରେ କୌଣସି ଆଧୁନିକ ଇଲେକ୍ଟ୍ରୋନିକ୍ସ ଯନ୍ତ୍ରପାତି ନିର୍ମାଣ କରି ହେବନି ବୋଲି ପ୍ରଧାନମନ୍ତ୍ରୀ କହିଥିଲେ । ଆଉ ଏହି ସେମି କଣ୍ଡକ୍ଟର ନିର୍ମାଣ କ୍ଷେତ୍ରରେ ଗୁଜରାଟ ଏବେ ଖୁବ ଅଗ୍ରଗତି କରିପାରିଥିବା ସେ ଉଲ୍ଲେଖ କରିଥିଲେ । ବୟନ ଶିଳ୍ପ, ଗହଣା ଓ ଜେମ୍ସ ଲାଗି ଗୁଜରାଟ ଏବେ ନିଜସ୍ୱ ପରିଚୟ ସୃଷ୍ଟି କରିପାରିଛି । ମେଡିସିନ ଓ ଭ୍ୟାକସିନ ପରି ଫାର୍ମା କ୍ଷେତ୍ରରେ ବି ଦେଶର ଏକ ତୃତୀୟାଂଶ ରପ୍ତାନୀ ଗୁଜରାଟରୁ ହେଉଥିବା ସେ କହିଥିଲେ ।  

ସୌର ଶକ୍ତି, ବାୟୁ ଶକ୍ତି ଓ ଆଣବିକ ଶକ୍ତି କ୍ଷେତ୍ରରେ ବି ଗୁଜରାଟ ବେଶ ଅଗ୍ରଗତି କରିପାରିଥିବା ପ୍ରଧାନମନ୍ତ୍ରୀ କହିଥିଲେ । ଗ୍ରୀନ ଏନର୍ଜି ଓ ପେଟ୍ରୋ କେମିକାଲ୍ସ କ୍ଷେତ୍ରରେ ବି ଏହି ରାଜ୍ୟ ଖୁବ ଆଗେଇ ପାରିଥିବା ସେ କହିଥିଲେ । ଗୁଜରାଟ ଦେଶର ପେଟ୍ରୋ କେମିକାଲ୍ସ ଆବଶ୍ୟକତାକୁ ପରିପୂର୍ଣ୍ଣ କରିପାରୁଛି । ପ୍ଲାଷ୍ଟିକ ଶିଳ୍ପ, ସିନ୍ଥେଟିକ ଫାଇବର, ସାର, ଔଷଧ, ରଙ୍ଗ ଶିଳ୍ପ ଓ କସମେଟିକ ବଜାର ସବୁ ପେଟ୍ରୋ କେମିକାଲ ସେକ୍ଟର ଉପରେ ନିର୍ଭରଶୀଳ ବୋଲି ସେ କହିଥିଲେ । ଗୁଜରାଟରେ ପାରମ୍ପରିକ ଶିଳ୍ପ ବିସ୍ତାରିତ ହେଉଥିବା ବେଳେ ନୂଆ ନୂଆ ଶିଳ୍ପ ବି ପ୍ରତିଷ୍ଠିତ ହେଉଛି । ଏସବୁ ପ୍ରଚେଷ୍ଟା ଫଳରେ ଆତ୍ମ ନିର୍ଭର ଭାରତ ଅଭିଯାନକୁ ଆଗକୁ ନିଆଯାଇ ପାରୁଛି । ଏହି ବିକାଶ ଫଳରେ ଗୁଜୁରାଟର ଯୁବକମାନେ ଆତ୍ମ ନିର୍ଭର ହୋଇପାରୁଥିବା ପ୍ରଧାନମନ୍ତ୍ରୀ କହିଥିଲେ ।

ଶିଳ୍ପ, କୃଷି, ପର୍ଯ୍ୟଟନ ପରି କ୍ଷେତ୍ରରେ ସମନ୍ୱୟର ଆବଶ୍ୟକତା ରହିଥିବା ପ୍ରଧାନମନ୍ତ୍ରୀ କହିଥିଲେ । ଗତ ୨୦/୨୫ ବର୍ଷ ଭିତରେ ଗୁଜରାଟର ପରିବହନ କ୍ଷେତ୍ରରେ ଉଲ୍ଲେଖନୀୟ ପରିବର୍ତନ ହୋଇଛି । ଏହାରି ଭିତରେ ବିଭିନ୍ନ ସଡକ ଓ ରେଳ ପ୍ରକଳ୍ପକୁ ଲୋକାର୍ପଣ ଓ ଶିଳାନ୍ୟାସ କରାଯାଇଛି । ଛଅ ଲେନ ବିଶିଷ୍ଟ ରାସ୍ତାରେ ପରିଣତ ହୋଇଥିବା ସର୍ଦ୍ଦାର ପଟେଲ ରିଂ ରାସ୍ତା ବା ସର୍କୁଲାର ରାସ୍ତା ଏବେ ଅଧିକା ପ୍ରଶସ୍ତ ହୋଇପାରିଛି । ଫଳରେ ସହରର ଅନେକ ଜନଗହଳିପୂର୍ଣ୍ଣ ରାସ୍ତାରେ ଭିଡ କମିବ । ବୀରମଗାମ-ଖୁଦ୍ରଦ-ରାମପୁରା ରାସ୍ତାର ପ୍ରଶସ୍ତିକରଣ ଲାଗି ଚାଷୀ ଓ ଶିଳ୍ପ ସୁଫଳ ପାଉଛନ୍ତି । ନବ ନିର୍ମିତ ଅଣ୍ଡରପାସ ଓ ରେଲୱେ ଓଭରବ୍ରିଜ ସହର ଭିତରେ ଯୋଗାଯୋଗକୁ ବଢାଇ ପାରିଛି ।

ଦିନେ ସମୟ ଥିଲା ରାସ୍ତାରେ ନାଲି ପୁରୁଣା କାଳିଆ ବସ ଚଳାଚଳ କରୁଥିଲା । ବିଆରଟିଏସ ଜନମାର୍ଗ ଓ ଶୀତତାପ ନିୟନ୍ତ୍ରିତ ଇଲେକ୍ଟ୍ରିକ ବସ ଏବେ ଚାଲୁ ରହିଛି । ସେହିପରି ମେଟ୍ରୋ ରେଳ ନେଟୱାର୍କ ବି ଦ୍ରୁତ ଗତିରେ ବିକଶିତ ହେବାରେ ଲାଗିଛି । ଏହା ଅହମ୍ମଦାବାଦରେ ପରିବହନ ବ୍ୟବସ୍ଥାକୁ ସୁଧାରି ପାରିଛି । ପ୍ରମୁଖ ଶିଳ୍ପ କରିଡର ଦ୍ୱାରା ରାଜ୍ୟର ପ୍ରାୟ ସହର ଆଚ୍ଛାଦିତ ହୋଇରହିଛି । ଦଶ ବର୍ଷ ଯାଏ ବିଭିନ୍ନ ବନ୍ଦର ଓ ଶିଳ୍ପ ପୁଞ୍ଜ ଗୁଡିକ ଭିତରେ ରେଳ ଯୋଗାଯାଗ ନଥିଲା । ୨୦୧୪ରେ ପ୍ରଧାନମନ୍ତ୍ରୀ ହେବା ପରେ ରାଜ୍ୟର ଏପରି ବିକାଶ କରିବାକୁ ସେ ଲକ୍ଷ୍ୟ ରଖିଥିଲେ । ଗତ ୧୧ ବର୍ଷ ଭିତରେ ପ୍ରାୟ ତିନି ହଜାର କିଲୋମିଟର ରାସ୍ତାର ରେଳପଥ ବିକଶିତ ହୋଇପାରିଛି । ଗୁଜରାଟର ସବୁ ରେଲୱେ ନେଟୱାର୍କକୁ ଏବେ ବିଦ୍ୟୁତିକରଣ କରାଯାଇଛି । ଆଜି ଘୋଷିତ ହୋଇଥିବା ରେଳବାଇ ପ୍ରକଳ୍ପ ଦ୍ୱାରା ଗୁଜରାଟର ଚାଷୀ, ଶିଳ୍ପ ଓ ତୀର୍ଥଯାତ୍ରୀ ଉପକୃତ ହେବେ ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ।

ସହରାଂଚଳରେ ବସବାସ କରୁଥିବା ଗରିବମାନେ ଏକ ମର୍ଯ୍ୟାଦାପୂର୍ଣ୍ଣ ଜୀବନ ବିତାଇବା ପାଇଁ ତାଙ୍କ ସରକାର କାମ କରୁଥିବା ସେ ଉଲ୍ଲେଖ କରିଥିଲେ । ରାମାପୀର ନୋ ଟେକ୍ରୋ ଏହାର ଜ୍ୱଳନ୍ତ ଉଦାହରଣ । ସାବରମତି ଆଶ୍ରମ ପାଖରେ ଗଢି ଉଠିଥିବା ନୂଆ ଘର ପୂଜ୍ୟ ବାପୁଙ୍କର ସ୍ୱପ୍ନକୁ ଚରିତାର୍ଥ କରିଛି । ଗରିବମାନଙ୍କ ଲାଗି ପ୍ରାୟ ଦେଢ ହଜାର ନୂଆ ସ୍ଥାୟୀ ଘର ନିର୍ମାଣ କରାଯାଇଛି । ନବରାତ୍ର ଓ ଦୀପାବଳିରେ ଏହି ଗରିବମାନଙ୍କ ମୁହଁରେ ପୁଣି ଖୁସି ଖେଳିବ । ପୂଜ୍ୟ ବାପୁଙ୍କୁ ଶ୍ରେଷ୍ଠ ଶ୍ରଦ୍ଧାଞ୍ଜଳି ଦେବା ଲାଗି ବାପୁଙ୍କ ଆଶ୍ରମ କାମ ଏବେ ହାତକୁ ନିଆଯାଇଛି ।

ସର୍ଦ୍ଦାର ବଲ୍ଲଭ ଭାଇ ପଟେଲଙ୍କର ଏକ ବୃହତ ପ୍ରତିମୂର୍ତି ନିକଟରେ ନିର୍ମାଣ କରାଯାଇଛି । ପ୍ରଧାନମନ୍ତ୍ରୀ ହେବା ପରେ ସାବରମତି ଆଶ୍ରମର ପୁନରୁଦ୍ଧାର କାମ ସେ ହାତକୁ ନେଇଛନ୍ତି । ଦେଶ ଓ ବିଶ୍ୱ ଲାଗି ଯେପରି ଷ୍ଟାଚ୍ୟୁ ଅଫ ୟୁନିଟି ସାରା ଦେଶ ଲାଗି ପ୍ରେରଣାଦାୟୀ ହୋଇପାରିଛି ସେହିପରି ସାବରମତି ଆଶ୍ରମ କାମ ସରିଲେ ଏହା ବିଶ୍ୱର ସବୁଠାରୁ ବଡ ଶାନ୍ତିସ୍ଥଳରେ ପରିଣତ ହୋଇପାରିବ । ଥରେ ପୁନରୁଦ୍ଧାର କାମ ସରିଲେ ଶାନ୍ତି ଲାଗି ଏହି ଆଶ୍ରମ ଏକ ପ୍ରେରଣାଦାୟୀ କେନ୍ଦ୍ର ଭାବରେ ପ୍ରତିଷ୍ଠିତ ହୋଇପାରିବ ।

ଶ୍ରମିକମାନଙ୍କ ପରିବାରର ସର୍ବକୁଶଳତା ତାଙ୍କ ସରକାରର ପ୍ରମୁଖ ମିଶନ ବୋଲି ପ୍ରଧାନମନ୍ତ୍ରୀ ଅଭିହିତ କରିଥିଲେ । ବହୁ ବର୍ଷ ପୂର୍ବେ ଗରିବମାନଙ୍କୁ ଥଇଥାନ କରିବା ଲାଗି ଗୁଜରାଟ ସରକାର ସ୍ୱପ୍ନ ଦେଖିଥିଲେ । ସେମାନେ ମର୍ଯ୍ୟାଦାପୂର୍ଣ୍ଣ ଜୀବନ ଅତିବାହିତ କରିବା ଲାଗି ଅନେକ ବର୍ଷ ତଳୁ ସ୍ଥାୟୀ ବାସପଯୋଗୀ ପ୍ରକଳ୍ପ ଗଠନ କରାଯାଇଥିବା ସେ କହିଥିଲେ ।

ସମାଜର ଗରିବ ଶ୍ରେଣୀର ନିଷ୍ପେସିତ ଜନତାଙ୍କୁ ସେ ପୂଜା କରନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ । ସେମାନଙ୍କର ଜୀବନ ଧାରଣର ମାନକୁ ଉନ୍ନତ କରିବା ଲାଗି ତାଙ୍କ ସରକାର ଚେଷ୍ଟା କରିଆସୁଥିବା ସେ ଉଲ୍ଲେଖ କରିଥିଲେ । ରାସ୍ତାକଡ ବିକ୍ରେତା ଓ ଫୁଟପାଥ ଶ୍ରମିକମାନେ ଆଗରୁ ଅବହେଳିତ ଥିଲେ । ସେମାନଙ୍କ ସ୍ୱାର୍ଥର ସୁରକ୍ଷା ଲାଗି ସରକାରଙ୍କ ପକ୍ଷରୁ ପିଏମ ଏସଭିଏ ନିଧି ଯୋଜନା ଆରମ୍ଭ କରାଯାଇଥିବା ସେ ଉଲ୍ଲେଖ କରିଥିଲେ । ଏହି ଯୋଜନା ଅଧୀନରେ ପ୍ରାୟ ସତୁରୀ ଲକ୍ଷ ରାସ୍ତାକଡ ବିକାଳି ଓ ବଳଦ ଗାଡି ଟାଣୁଥିବା ବ୍ୟକ୍ତି ବିଭିନ୍ନ ବ୍ୟାଙ୍କରୁ ଋଣ ନେବାକୁ ଏବେ ସମର୍ଥ ହୋଇଛନ୍ତି । ଏହି ଯୋଜନାରେ ଗୁଜରାଟର ଲକ୍ଷାଧିକ ହିତାଧିକାରୀ ଉପକୃତ ହୋଇଥିବା ପ୍ରଧାନମନ୍ତ୍ରୀ କହିଥିଲେ ।

ଗତ ୧୧ ବର୍ଷ ଭିତରେ ୨୫ କୋଟି ଲୋକ ଗରିବୀରୁ ମୁକ୍ତି ପାଇଛନ୍ତି । ଏହା ଦେଶ ଲାଗି ଗର୍ବର ବିଷୟ । ବିଶ୍ୱର ପ୍ରମୁଖ ଅର୍ଥନୈତିକ ଅନୁଷ୍ଠାନରେ ଏହା ଏବେ ଚର୍ଚ୍ଚାର ବିଷୟବସ୍ତୁ ଭାବରେ ପରିଗଣିତ ହୋଇପାରିଛି । ଏପରି ଜନତା ଦେଶରେ ନୂଆ ମଧ୍ୟବିତ ବର୍ଗ ସୃଷ୍ଟି କରିପାରିଛନ୍ତି । ଉଭୟ ନୂଆ ମଧ୍ୟବିତ ଓ ପୁରୁଣା ମଧ୍ୟବିତମାନଙ୍କ ଲାଗି ତାଙ୍କ ସରକାର କାମ କରୁଥିବା ସେ ଉଲ୍ଲେଖ କରିଥିଲେ । ବାର୍ଷିକ ୧୨ ଲକ୍ଷ ଟଙ୍କା ଯାଏ ଆୟକର ସୀମା କୋହଳ କରାଯାଇଥିବା ବି ସେ ସୂଚନା ଦେଇଥିଲେ । ଜିଏସଟି ଶୈଳୀରେ ସଂସ୍କାର ଆଣିବା ପାଇଁ ତାଙ୍କ ସରକାର କାମ କରୁଥିବା ସେ ବି କହିଥିଲେ । କ୍ଷୁଦ୍ର ଉଦ୍ୟୋଗପତିମାନଙ୍କୁ ସରକାରଙ୍କ ଏହି ସଂସ୍କାରିତ କାର୍ଯ୍ୟକ୍ରମ ଅନେକ ସୁଫଳ ଦେବ ବୋଲି ମୋଦୀ କହିଥିଲେ ।

ସୂର୍ଯ୍ୟ ଘର ମାଗଣା ବିଜୁଳି ଯୋଜନା କଥା ଉଲ୍ଲେଖ କରି ମୋଦୀ କହିଥିଲେ ଯେ, ବିଦ୍ୟୁତ ବିଲ ଏବେ ଶୂନ ଅବସ୍ଥାକୁ ଆସିଯାଇଛି । ଛଅ ଲକ୍ଷ ପରିବାର ଏହି ଯୋଜନାର ସୁଫଳ ପାଉଥିବା ସେ ଉଲ୍ଲେଖ କରିଥିଲେ । ଏଭଳି ପରିବାରକୁ କେବଳ ଗୁଜରାଟରେ ୩ ହଜାର କୋଟି ଟଙ୍କାରୁ ଅଧିକା ଦିଆ ଯାଇଥିବା ସେ କହିଥିଲେ । ଏହା ହିତାଧିକାରୀମାନଙ୍କ ବିଜୁଳି ଦେୟକୁ ବହୁ ପରିମାଣରେ ହ୍ରାସ କରିପାରିଛି ।

ଅହମ୍ମଦାବାଦ ସହର ଏବେ ସ୍ୱପ୍ନ ଓ ସମ୍ଭାବନାର ସହର ଭାବରେ ପ୍ରତିଭାତ ହେବାକୁ ଯାଉଛି । ଧୂଳି ଧୂସରିତ ଆଗରୁ ଗରଦାବାଦ ସହର ଭାବରେ ଲୋକଙ୍କ ମୁହଁରେ ଖ୍ୟାତ ଥିବା ଏହି ସହରର ରୂପ ଏବେ ବଦଳିବାରେ ଲାଗିଛି । ଏବେ ପରିଷ୍କାର ଓ ପରିଚ୍ଛନ୍ନତା ଲାଗି ଏହି ସହର ଚର୍ଚ୍ଚାରେ ରହିଥିବା ପ୍ରଧାନମନ୍ତ୍ରୀ କହିଥିଲେ । ଏଥିଲାଗି ଅହମ୍ମଦାବଦର ନାଗରିକଙ୍କୁ ସେ ଧନ୍ୟବାଦ ଜ୍ଞାପନ କରିଥିଲେ ।

 ଆଗରୁ ଶୁଷ୍କ ଡ୍ରେନରେ ପରିଣତ ହୋଇଥିବା ସାବରମତି ନଦୀର ବିକାଶ ସାଧିତ କରାଯାଇଛି । ସାବରମତି ରିଭରଫ୍ରଂଟ ଏବେ ସାରା ଦେଶ ଲାଗି ଏହି ଗର୍ବ ଓ ଆକର୍ଷଣୀୟ ସ୍ଥାନରେ ପରିଣତ ହୋଇପାରିଛି । କଙ୍କରିଆ ହ୍ରଦ ଆଗରୁ ଦଳି ଗାଡିଆରେ ପରିପୂର୍ଣ୍ଣ ଥିଲା ଓ ଏହାର ଆଖପାଖ ଅଂଚଳରେ ଯାତାୟାତ କରିବା ଦ୍ୱାରା ଦୁର୍ଗନ୍ଧରେ ନାକ ଫାଟି ପଡୁଥିଲା । ଅସାମାଜିକ ଲୋକଙ୍କ ଆଡ୍ଡାସ୍ଥଳୀରେ ଏହା ଆଗରୁ ପରିଣତ ଥିଲା । କିନ୍ତୁ ଏବେ ଏହାର ଆମୁଳଚୂଳ ପରିବର୍ତନ କରାଯାଇ ଏହାକୁ ଏକ ମନୋରମ ପରିଭ୍ରମଣ ସ୍ଥାନରେ ପରିଣତ କରାଯାଇ ପାରିଛି । ଜଳ କ୍ରୀଡା, ବୋଟିଂ ଓ ଶିଶୁମାନଙ୍କ ଲାଗି ଏହା ଏବେ ଆରାମଦାୟକ ଓ ଆକର୍ଷଣୀୟ ସ୍ଥାନରେ ପରିଣତ ହୋଇପାରିଛି । କଙ୍କରିଆ କାର୍ନିଭାଲ ଏବେ ସହରର ନୂଆ ପରିଚୟ ସୃଷ୍ଟି କରିଛି ।

ଅହମ୍ମଦାବାଦ ଏବେ ୟୁନେସ୍କୋ ଦ୍ୱାରା ଅନୁମୋଦିତ ଏକ ପ୍ରମୁଖ ପର୍ଯ୍ୟଟନ ସ୍ଥଳୀରେ ପରିଣତ ହୋଇପାରିଛି । ବିଶ୍ୱ ପର୍ଯ୍ୟଟନ ମାନଚିତ୍ରରେ ଏହା ଏକ ସ୍ୱତନ୍ତ୍ର ସ୍ଥାନ ଗ୍ରହଣ କରିଛି । କନସର୍ଟ ଅର୍ଥନୀତି ଲାଗି ଅହମ୍ମଦାବାଦ ପରିଚୟ ସୃଷ୍ଟି କରିପାରିଛି । ନିକଟରେ ସହରରେ ସରିଥିବା କୋଲ୍ଡ ପ୍ଲେ କନସର୍ଟ ବିଶ୍ୱର ଆକର୍ଷଣ ପାଲଟିଥିଲା । ଏକ ଲକ୍ଷ ଆସନ ବିଶିଷ୍ଟ ଅହମ୍ମଦାବାଦ ଷ୍ଟାଡିୟମ ଏକ ପ୍ରମୁଖ ଆକର୍ଷଣ ସ୍ଥଳୀ । ବଡ ବଡ କନସର୍ଟ ଓ କ୍ରୀଡା ଆୟୋଜନ କରିବା ଲାଗି ଅହମ୍ମଦାବାଦର ଦକ୍ଷତାକୁ ଏହା ପ୍ରତିପାଦିତ କରୁଛି ।

ନବରାତ୍ରି, ବିଜୟା ଦଶମୀ, ଧନତେରାସ, ଦୀପାବଳି ପରି ପର୍ବ ଆଗକୁ ଆସୁଛି । ଏହା କେବଳ ସାଂସ୍କୃତିକ ଉତ୍ସବ ନୁହେଁ ବରଂ ଆତ୍ମ ନିର୍ଭରଶୀଳତାର ଗୋଟିଏ ଗୋଟିଏ ପର୍ବ । ଏହି ସମୟରେ ସମସ୍ତ ସ୍ୱଦେଶୀ ସାମଗ୍ରୀ ଜନତା କିଣିବା ଉଚିତ ବୋଲି ପ୍ରଧାନମନ୍ତ୍ରୀ କହିଥିଲେ । ଦୋକାନୀମାନେ ବି ଅନୁରୂପ ଭାବରେ ସ୍ୱଦେଶୀ ସାମଗ୍ରୀ ବିକ୍ରି କରିବା ଉଚିତ । ଏହି ଛୋଟିଆ ପଦକ୍ଷେପ ଦ୍ୱାରା ଦେଶକୁ ସମୃଦ୍ଧି ପଥରେ ଜନତା ନେଇପାରିବେ ବୋଲି ପ୍ରଧାନମନ୍ତ୍ରୀ କହିଥିଲେ ।

ଗୁଜରାଟ ରାଜ୍ୟପାଳ ଆଚାର୍ଯ୍ୟ ଦେବବ୍ରତ, ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ଭାଇ ପଟେଲ, କେନ୍ଦ୍ର ମନ୍ତ୍ରୀ ସି.ଆର.ପାଟିଲ ପ୍ରମୁଖ ଅନ୍ୟ ମାନ୍ୟ ଗଣ୍ୟ ଅତିଥିଙ୍କ ମଧ୍ୟରେ ଉପସ୍ଥିତ ଥିଲେ ।   

PBD