Ka Sorkar ha ka 01.07.2025 ka la mynjur ia ka Skhim Employment Linked Incentive (ELI) kaba la tip kum ka Pradhan Mantri Viksit Bharat Rojgar Yojna ban kyrshan ia ka jingpynmih lad ioh kam, ban kyntiew ia ka jinglah ban ioh kam bad ka jingshngain ha ka imlang sahlang ha baroh ki bynta, da kaba phaikhmat kyrpang halor ka kam shna tiar.

Ia kane ka skhim la thaw hadien ba la iamir jingmut bha bad baroh ki nongshim bynta, kynthup ia ki Tnad kiba bun ka kam, ki seng jong ki nongkhaii, ki seng ba iadei bad ki kam karkhana bad ki riew shemphang. La thaw ia ka Steering Committee kaba kynthup ia ki nongmihkhmat na ki Tnad sorkar pdeng/ ki Tnad kiba bun ka kam. Nalor kata, la thaw ruh ia ka Executive Committee ban pynthikna ia ka jingpyntreikam kaba paka, ka jingpeit bniah, bad ka jingpeit bniah man ka por ia ka skhim.

Kane ka skhim ka don ka samoi pynrung kyrteng kaba ar snem naduh ka 01.08.2025 haduh ka 31.07.2027 bad ka jingmang pisa ka long T. 99,446 Klur na ka bynta ka samoi mang tyngka 2025-26 haduh u snem mang tyngka 2031-32. Ka skhim ka don ar bynta, kata ka bynta A bad ka bynta B, bad ka pynleit jingmut ha kaba ai jingkyrshan ia ki nongtrei bad ki nongpyntreikam da kaba ai ia ki jingmyntoi. Ka skhim ka ai ia ki jingmyntoi na ka bynta 1.92 klur ngut ki nongtrei ba dei hok hapoh ka bynta A. Ka jingai jingmyntoi na ka bynta ban thaw shuh shuh kumba sa 2.59 klur tylli ki kam sha ki nongaikam ka dei kaba la pynbiang hapoh ka bynta B jong ka skhim.

Ha kaba iadei bad ka jingthmu jong ka Jingpynbna Mang Tyngka 2024-25 halor ka jingpynwandur ïa ka e-Shram kum ka One-Stop-Solution na ka bynta ki nongtrei bym pat skhem ban ïoh ïa ki skhim bapher bapher ba iadei bad ka jingshngain ha ka imlang sahlang, ka Tnad Labour and Employment ka la pyllait paidbah ïa ka e-Shram– “One-Stop-Solution” ha ka 21 tarik Risaw 2024. Ka e-Shram - “One-Stop-Solution” ka kynthup ia ka jingpyniasoh lang ia ki skhim ba iadei bad ka jingshngain ha ka imlang sahlang/ ki skhim na ka bynta ka bha ka miat ha kawei ka rynsan. Kane ka iarap ia ki nongtrei bym pat skhem kiba la pynrung kyrteng ha ka e-Shram ban ioh ia ki skhim ba iadei bad ka jingshngain ha ka imlang sahlang bad ban sakhi ia ki jingmyntoi ba ki ioh haduh mynta, lyngba ka e-Shram.

Haduh mynta, la dep pyniasoh/ pynkhreh ia khatsaw (14) tylli ki skhim jong ki Tnad/ tnad bapher bapher jong ka sorkar pdeng bad ka e-Shram ban pyniar ia ki jingmyntoi bad ka jingioh ia ki prokram ai jingiada ha ka imlang sahlang, ka insurance lane ki prokram kyntiew ia ki sap treikam na ka bynta kiba don ia ka card e-Shram ba kynthup ia ka Pradhan Mantri Street Vendors Atmanirbhar Nidhi (PMSVANidhi), Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY), National Family Benefit Scheme (NFBS), Mahatma Gandhi National Rural Employment Guarantee scheme (MGNREGS), Pradhan Mantri Awas Yojana – Gramin (PMAY-G), Ayushman Bharat – Pradhan Mantri Jan Arogya Yojana (AB-PMJAY), Pradhan Mantri Awas Yojana – Urban (PMAY-U), Pradhan Mantri Matsya Sampada Yojana (PMMSY), Pradhan Mantri Kisan Maan Dhan Yojana (PM-KMY), One Nation One Ration Card (ONORC) bad ka Pradhan Mantri Matru Vandana Yojana (PMMVY).

Nalor kine ki skhim ba la kdew haneng, ka e-Shram ka dei ruh kaba la pyniasoh lang bad ka Pradhan Mantri Shram Yogi Maan-dhan (PM-SYM), National Career Service (NCS), Skill India Digital Hub (SIDH), Unified Mobile Application for New-age Governance (UMANG), Digital Locker (DigiLocker), myScheme bad ka Open Government Data Platform (OGD).

Ban kyntiew shuh shuh ia ka jingdon bad jinglah ban ioh ia ka e-Shram bad ki jingshakri kiba iadei bad ka na ka bynta ki nongtrei bym pat skhem, ka Tnad Labour and Employment ka la pyllait paidbah ia ka e-Shram mobile application ha ka 24 tarik u Rymphang 2025. Kane ka application ka pynsuk ia ka jinglah ban ioh ha ka por ia ki skhim jingiarap ba la pyniasoh bad ka rynsan e-Shram, da kaba pynkhlain ia ka jinglah ban ioh bad ka jingsuk jong ki nongpyndonkam.

Ka Sorkar, ha ka Jingpynbna Mang Tyngka jong ka na ka bynta u snem Mang Tyngka 2025-26, ka la pynbna ïa ki katto katne ki sienjam ba kongsan na ka bynta ka bha ka miat jong ki nongtrei Gig jong ki rynsan online (ki nongtrei platform), kata, ka jingpynrung kyrteng ïa ki ha ka rynsan e-Shram, ka jingai ïa ki kot jingithuh bad ka jingpynjlan ïa ka jingïoh jingmyntoi ba iadei bad ka koit ka khiah hapoh ka Ayushman Bharat-Pradhan Mantri Jan Aarogya Yojana (AB-PMJAY).

Ia kane ka jingtip la ai da ka Myntri Khynnah ba dei khmih ia ka Tnad Labour and Employment ka Sushri Shobha Karandlaje ha ka jubab ba shu thoh ia ka jingkylli ha Rajya Sabha mynta ka sngi.

*****