ଜୟ ଜଗନ୍ନାଥ!

ଆଜି, ପ୍ରଭୁ ଜଗନ୍ନାଥଙ୍କ ଆଶୀର୍ବାଦରେ, ଦେଶର କୃଷକମାନଙ୍କ ପାଇଁ ଏକ ବହୁତ ବଡ଼ ଅଭିଯାନର ଶୁଭାରମ୍ଭ ହେଉଛି। 'ବିକଶିତ କୃଷି ସଂକଳ୍ପ ଅଭିଯାନ'  ଏକ ଅନନ୍ୟ ପଦକ୍ଷେପ। ମୌସୁମୀ ଆଗମନ କରୁଛି, ଖରିଫ ଋତୁ ପାଇଁ ପ୍ରସ୍ତୁତି ଚାଲିଛି ଏବଂ ଏପରି ପରିସ୍ଥିତିରେ, ଦେଶର ବୈଜ୍ଞାନିକ, ବିଶେଷଜ୍ଞ, ଅଧିକାରୀ ଏବଂ ପ୍ରଗତିଶୀଳ ଚାଷୀଙ୍କ ୨ ହଜାରରୁ ଅଧିକ ଦଳ ଆଗାମୀ ୧୨  ରୁ ୧୫  ଦିନ ପାଇଁ ଗାଁରୁ ଗାଁ ଯାଉଛନ୍ତି। ଏହି ଦଳଗୁଡ଼ିକ ଦେଶର ୭୦୦  ରୁ ଅଧିକ ଜିଲ୍ଲାର କୋଟି କୋଟି ଚାଷୀଙ୍କ ପାଖରେ ପହଞ୍ଚିବେ। ମୁଁ ଦେଶର ସମସ୍ତ ଚାଷୀଙ୍କୁ, ଏହି ଦଳଗୁଡ଼ିକରେ ସାମିଲ ସମସ୍ତ ସହକର୍ମୀଙ୍କୁ, ଏହି ମହା ଅଭିଯାନ ପାଇଁ, ଏକ ବଡ଼ ମହତ୍ୱାକାଂକ୍ଷୀ କାର୍ଯ୍ୟକ୍ରମ ପାଇଁ ଏବଂ କୃଷିର ଉଜ୍ଜ୍ୱଳ ଭବିଷ୍ୟତ ପାଇଁ ବହୁତ ବହୁତ ଶୁଭକାମନା ଜଣାଉଛି।

ବନ୍ଧୁଗଣ,

ଆମ ଦେଶରେ ପାରମ୍ପରିକ ଭାବରେ କୃଷି ଏକ ରାଜ୍ୟର  ବିଷୟ ହୋଇଆସିଛି। ଏହା ସରକାରୀ ବ୍ୟବସ୍ଥା ଅଧୀନରେ ଏକ ରାଜ୍ୟର  ବିଷୟ। ପ୍ରତ୍ୟେକ ରାଜ୍ୟ ନିଜସ୍ୱ କୃଷି ନୀତି ପ୍ରଣୟନ କରନ୍ତି ଏବଂ ଚାଷୀଙ୍କ ସ୍ୱାର୍ଥ ପାଇଁ ପଦକ୍ଷେପ ନିଅନ୍ତି କିନ୍ତୁ ଆଜି, ଏହି ଦ୍ରୁତ ଗତିର ପରିବର୍ତ୍ତନଶୀଳ ସମୟରେ, ଭାରତୀୟ କୃଷିରେ ଏକ ବ୍ୟାପକ ପରିବର୍ତ୍ତନ ଆଣିବାର ଆବଶ୍ୟକତା ରହିଛି। ଆମର ଚାଷୀମାନେ ରେକର୍ଡ ସଂଖ୍ୟକ ଖାଦ୍ୟଶସ୍ୟ ଉତ୍ପାଦନ କରି  ଭଣ୍ଡାର ପୂରଣ କରିଛନ୍ତି, କିନ୍ତୁ ଏବେ ବଜାର ମଧ୍ୟ ପରିବର୍ତ୍ତନ ହେଉଛି ଏବଂ ଗ୍ରାହକଙ୍କ ପସନ୍ଦ ମଧ୍ୟ ବଦଳିଛି। ଏପରି ପରିସ୍ଥିତିରେ, କୃଷକ ଏବଂ ରାଜ୍ୟ ସରକାରଙ୍କ ସହିତ ମିଶି କୃଷି ବ୍ୟବସ୍ଥାରେ ପରିବର୍ତ୍ତନ ଆଣିବା ଆମର ବିନମ୍ର ପ୍ରୟାସ, ଭାରତୀୟ କୃଷି କିପରି ଅଧିକ ଆଧୁନିକ ହୋଇପାରିବ? ଚାଷୀଙ୍କ ସହିତ ଏହା ଉପରେ ଆଲୋଚନା ହେବା ଉଚିତ, ତେଣୁ ଏହି ଅଭିଯାନ ଅଧୀନରେ, ଆମର ବୈଜ୍ଞାନିକ ଦଳ ପ୍ରୟୋଗଶାଳାରୁ ଜମି ପର୍ଯ୍ୟନ୍ତ ଏକ ମହାନ ଅଭିଯାନ ସହିତ ଆଗକୁ ବଢ଼ୁଛନ୍ତି। ସମସ୍ତ ତଥ୍ୟ ସହିତ, ଏହା ଚାଷୀମାନଙ୍କୁ ଆଧୁନିକ କୃଷି ବିଷୟରେ ସୂଚନା ଦେବ ଏବଂ ଋତୁ ଆରମ୍ଭ ହେବା ପୂର୍ବରୁ ଚାଷୀମାନଙ୍କୁ ସାହାଯ୍ୟ କରିବା ପାଇଁ ଠିଆ ହେବ।

ବନ୍ଧୁଗଣ,

ବିଗତ ଦଶନ୍ଧିରେ, ଆମର କୃଷି ବୈଜ୍ଞାନିକମାନେ ଅନେକ କ୍ଷେତ୍ରରେ ଭଲ ଗବେଷଣା କରିଛନ୍ତି ଏବଂ ଉତ୍ତମ ଫଳାଫଳ ଦେଖାଇଛନ୍ତି। ଅନ୍ୟପକ୍ଷରେ, ଆମ ଦେଶର ପ୍ରଗତିଶୀଳ ଚାଷୀମାନେ ମଧ୍ୟ ନିଜସ୍ୱ ପରୀକ୍ଷଣ କରି କୃଷି କ୍ଷେତ୍ରରେ ବହୁତ ପରିବର୍ତ୍ତନ ଆଣିଛନ୍ତି, ଅମଳ ମଧ୍ୟ ବୃଦ୍ଧି କରିଛନ୍ତି ଏବଂ ଅନେକ ସଫଳ ପରୀକ୍ଷଣ କରିଛନ୍ତି। ବୈଜ୍ଞାନିକମାନଙ୍କ ସଫଳ ଗବେଷଣା ଏବଂ ପ୍ରଗତିଶୀଳ ଚାଷୀଙ୍କ ସଫଳ ପରୀକ୍ଷଣ ବିଷୟରେ ସର୍ବାଧିକ ସୂଚନା ଆମ ଚାଷୀଙ୍କ ପାଖରେ ପହଞ୍ଚିବା ସମାନ ଭାବରେ ଗୁରୁତ୍ୱପୂର୍ଣ୍ଣ। ଆପଣମାନେ ସମସ୍ତେ ପୂର୍ବରୁ ଏହି ଦିଗରେ ଚେଷ୍ଟା କରିଆସୁଛନ୍ତି, କିନ୍ତୁ ଏବେ ନୂତନ ଶକ୍ତି ସହିତ ଏହି କାମ କରିବାର ଆବଶ୍ୟକତା ଅଛି। ବିକଶିତ କୃଷି ସଂକଳ୍ପ ଅଭିଯାନ ମାଧ୍ୟମରେ ଆପଣଙ୍କୁ ଏଥିପାଇଁ ପ୍ରଚୁର ସୁଯୋଗ ମିଳିବ।

ବନ୍ଧୁଗଣ,

ଏକ ବିକଶିତ ଭାରତ ପାଇଁ, ଭାରତୀୟ କୃଷି ମଧ୍ୟ ବିକଶିତ ହେବାକୁ ପଡିବ। ଏପରି ଅନେକ ବିଷୟ ଅଛି ଯାହା ଉପରେ କେନ୍ଦ୍ର ସରକାର ନିରନ୍ତର ଧ୍ୟାନ ଦେଉଛନ୍ତି। ଯେପରିକି ଚାଷୀ କିପରି ତାଙ୍କ ଫସଲର ସଠିକ୍ ମୂଲ୍ୟ ପାଇପାରିବେ? କୃଷି ଅର୍ଥନୀତିକୁ କିପରି ମଜବୁତ କରାଯାଇପାରିବ? ଦେଶର ଆବଶ୍ୟକତା ଅନୁସାରେ ଫସଲ କିପରି ଉତ୍ପାଦନ କରାଯାଇପାରିବ? ଭାରତ କିପରି ନିଜସ୍ୱ ଆବଶ୍ୟକତା ସହିତ ବିଶ୍ୱର ଆବଶ୍ୟକତା ପୂରଣ କରିପାରିବ? ଏହା କିପରି ବିଶ୍ୱର ଖାଦ୍ୟ ଭଣ୍ଡାର  ହୋଇପାରିବ? ଜଳବାୟୁ ପରିବର୍ତ୍ତନର ସମସ୍ୟାର  ମୁକାବିଲା ଆମେ କିପରି କରିପାରିବା? କମ୍ ପାଣିରେ ଆମେ କିପରି ଅଧିକ ଶସ୍ୟ ଉତ୍ପାଦନ କରିପାରିବା? ପୃଥିବୀ ମାତାକୁ ବିପଦଜନକ ରାସାୟନିକ ପଦାର୍ଥରୁ କିପରି ରକ୍ଷା କରିପାରିବା? କୃଷିକୁ କିପରି ଆଧୁନିକୀକରଣ କରିବା? କୃଷିକୁ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା କିପରି ଆଣିବା? ଗତ ୧୦ ରୁ ୧୧ ବର୍ଷ ମଧ୍ୟରେ ଏହିପରି ଅନେକ ବିଷୟ ଉପରେ ଆମର ସରକାର ବହୁତ କାମ କରିଛନ୍ତି। ଏବେ ଏହି ଅଭିଯାନ ଅଧୀନରେ, ଆମର ଚାଷୀମାନଙ୍କୁ ଯଥାସମ୍ଭବ ସଚେତନ କରାଇବାକୁ ପଡିବ।

ବନ୍ଧୁଗଣ,

ଏକ ଗୁରୁତ୍ୱପୂର୍ଣ୍ଣ ବିଷୟ ହେଉଛି ଚାଷୀମାନଙ୍କୁ ଅତିରିକ୍ତ ଆୟର ଉତ୍ସ ଯୋଗାଇବା ଯେପରିକି କୃଷି ସୀମାରେ ସୌର ପ୍ୟାନେଲ ସ୍ଥାପନ କରିବା; ଦେଶରେ ଘଟୁଥିବା ମଧୁର ବିପ୍ଳବ (ମହୁମାଛି ପାଳନ) ସହିତ ଅଧିକ ଚାଷୀଙ୍କୁ ଯୋଡ଼ିବା; ଫସଲ ଅବଶିଷ୍ଟାଂଶ ବ୍ୟବହାର କରି, ଯାହାକୁ ପ୍ରାୟତଃ ଅପଚୟ ଭାବରେ ପରିତ୍ୟାଗ କରାଯାଏ, ଶକ୍ତି ଉତ୍ପାଦନ କରିବା - ଅପଚୟରୁ ସମ୍ପତ୍ତି ସୃଷ୍ଟି କରିବା; କେଉଁ ଜମି ପାଇଁ କେଉଁ ବାଜରା (ଶ୍ରୀ ଅନ୍ନ) ସର୍ବୋତ୍ତମ ଉପଯୁକ୍ତ ତାହା ଚିହ୍ନଟ କରିବା; ବିଭିନ୍ନ କୃଷି ଉତ୍ପାଦ ପାଇଁ ମୂଲ୍ୟ ବୃଦ୍ଧି ଅନୁସନ୍ଧାନ କରିବା ଇତ୍ୟାଦି। ଆଜି, ଗୋବରଧନ ଯୋଜନା ମାଧ୍ୟମରେ କ୍ଷୀର ଦେଉନଥିବା ଗାଈ ମଧ୍ୟ ଆୟର ଉତ୍ସ ହୋଇପାରୁଛନ୍ତି। ଆମକୁ ଏହି ସମସ୍ତ ବିଷୟରେ ଆମର ଚାଷୀ ଭାଇ ଭଉଣୀମାନଙ୍କ ସହିତ ଆଲୋଚନା କରିବାକୁ ପଡିବ, ସେମାନଙ୍କ ସହିତ ବସିବାକୁ ପଡିବ ଏବଂ ସେମାନଙ୍କୁ ବିସ୍ତୃତ ସୂଚନା ପ୍ରଦାନ କରିବାକୁ ପଡିବ।

ବନ୍ଧୁଗଣ,

ଭାରତୀୟ କୃଷିକୁ ବିକଶିତ ଭାରତର ମୁଖ୍ୟ ଆଧାର କରିବା ପାଇଁ ଏହା ଏକ ବିରାଟ ସଂକଳ୍ପ। ମୁଁ ମୋର କୃଷକ ଭାଇ ଓ ଭଉଣୀମାନଙ୍କୁ କହିବାକୁ ଚାହୁଁଛି ଯେ ଆପଣଙ୍କ ଗାଁକୁ ଆସୁଥିବା ବୈଜ୍ଞାନିକମାନଙ୍କୁ ବହୁତ ପ୍ରଶ୍ନ ପଚାରନ୍ତୁ ଏବଂ ମୁଁ ବୈଜ୍ଞାନିକ ଏବଂ ଅନ୍ୟାନ୍ୟ କର୍ମଚାରୀମାନଙ୍କୁ ମଧ୍ୟ କହିବାକୁ ଚାହୁଁଛି ଯେ ଆପଣଙ୍କ ସମ୍ମୁଖରେ ଏକ ବିରାଟ ମିଶନ ଅଛି। ଆପଣ ଯେଉଁ କାର୍ଯ୍ୟ ଗ୍ରହଣ କରୁଛନ୍ତି ତାହା କେବଳ ସରକାରୀ କାମ ଭାବରେ ବିଚାର କରି କରାଯିବା ଉଚିତ୍ ନୁହେଁ। ଏହା ଦେଶ ସେବା କରିବାର ମନୋଭାବ ସହିତ କରାଯିବା ଉଚିତ୍। ଆପଣଙ୍କୁ ଚାଷୀଙ୍କ ପ୍ରତ୍ୟେକ ଜିଜ୍ଞାସାକୁ ପୂରଣ କରିବାକୁ ପଡିବ। ଏହା ସହିତ, ଚାଷୀଙ୍କ ମୂଲ୍ୟବାନ ପରାମର୍ଶଗୁଡ଼ିକୁ ମଧ୍ୟ ରେକର୍ଡ କରାଯିବା ଉଚିତ। 'ବିକଶିତ କୃଷି ସଂକଳ୍ପ ଅଭିଯାନ' ଆମର ଖାଦ୍ୟ ଯୋଗାଣକାରୀଙ୍କ ପାଇଁ ପ୍ରଗତିର ଏକ  ନୂତନ ଦ୍ୱାର ଖୋଲିବ। ଏହି କାମନା ସହିତ, ସମଗ୍ର ଦଳକୁ, ସମସ୍ତ ଚାଷୀଙ୍କୁ ଶୁଭକାମନା ଜଣାଉଛି ।

ଧନ୍ୟବାଦ!

****

SPD