ಸೃಜನಶೀಲ ಸ್ವಾತಂತ್ರ್ಯ ಮತ್ತು ಒ.ಟಿ.ಟಿ ನಿಯಂತ್ರಣ:

ಸೃಜನಶೀಲ ಸ್ವಾತಂತ್ರ್ಯ ಸೇರಿದಂತೆ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಸಂವಿಧಾನದ 19ನೇ ವಿಧಿಯಡಿ ರಕ್ಷಿಸಲಾಗಿದೆ.

ʻಒ.ಟಿ.ಟಿ’ ವೇದಿಕೆಗಳಲ್ಲಿ ಹಾನಿಕಾರಕ ಕಂಟೆಂಟ್‌ನ ನಕಾರಾತ್ಮಕ ಪರಿಣಾಮಗಳನ್ನು ನಿವಾರಿಸಲು ಸರ್ಕಾರವು ʻಮಾಹಿತಿ ತಂತ್ರಜ್ಞಾನ ಕಾಯ್ದೆ-2000ʼರ ಅಡಿಯಲ್ಲಿ ʻಮಾಹಿತಿ ತಂತ್ರಜ್ಞಾನ (ಮಧ್ಯವರ್ತಿ ಮಾರ್ಗಸೂಚಿಗಳು ಮತ್ತು ಡಿಜಿಟಲ್ ಮಾಧ್ಯಮ, ನೈತಿಕ ಸಂಹಿತೆ) ನಿಯಮಗಳು-2021ʼ ಅನ್ನು 25.02.2021 ರಂದು ಅಧಿಸೂಚನೆ ಮೂಲಕ ಜಾರಿಗೊಳಿಸಿದೆ.

● ಈ ನಿಯಮಗಳ ಭಾಗ-III ಡಿಜಿಟಲ್ ಸುದ್ದಿ ಪ್ರಕಾಶಕರು ಮತ್ತು ಆನ್‌ಲೈನ್ ಕ್ಯುರೇಟೆಡ್ ಕಂಟೆಂಟ್ (ಒ.ಟಿ.ಟಿ ವೇದಿಕೆಗಳು) ಪ್ರಸಾರಕರಿಗೆ ನೀತಿ ಸಂಹಿತೆಯನ್ನು ಒದಗಿಸುತ್ತದೆ.

● ಸದ್ಯಕ್ಕೆ ಜಾರಿಯಲ್ಲಿರುವ ಕಾನೂನಿನಿಂದ ನಿಷೇಧಿಸಲಾದ ಯಾವುದೇ ಕಂಟೆಂಟ್‌ ಪ್ರಸಾರ ಮಾಡದಿರುವ ಬಾಧ್ಯತೆಯನ್ನು ಒ.ಟಿ.ಟಿ ವೇದಿಕೆಗಳು ಹೊಂದಿವೆ.

ಈ ನಿಯಮಗಳು ಈ ಕೆಳಗಿನಂತೆ ಮೂರು ಹಂತದ ಕುಂದುಕೊರತೆ ಪರಿಹಾರ ಕಾರ್ಯವಿಧಾನವನ್ನು ಒದಗಿಸುತ್ತವೆ:

ಹಂತ I: ಕಂಟೆಂಟ್‌ ಪ್ರಸಾರಕರಿಂದ ಸ್ವಯಂ ನಿಯಂತ್ರಣ

ಹಂತ II: ಪ್ರಸಾರಕರು ರಚಿಸಿದ ಸ್ವಯಂ-ನಿಯಂತ್ರಕ ಸಮಿತಿಗಳಿಂದ ಸ್ವಯಂ ನಿಯಂತ್ರಣ

ಹಂತ III - ಕೇಂದ್ರ ಸರ್ಕಾರದ ಮೇಲ್ವಿಚಾರಣಾ ಕಾರ್ಯವಿಧಾನ

ಸಚಿವಾಲಯವು ಸ್ವೀಕರಿಸಿದ ದೂರುಗಳನ್ನು ʻಮಾಹಿತಿ ತಂತ್ರಜ್ಞಾನ ನಿಯಮಗಳು-2021ʼರ ಪ್ರಕಾರ ಪರಿಹಾರಕ್ಕಾಗಿ ಸಂಬಂಧಪಟ್ಟ ಒ.ಟಿ.ಟಿ ವೇದಿಕೆಗಳಿಗೆ ಕಳುಹಿಸಲಾಗುತ್ತದೆ.

ಸಂಬಂಧಿತ ಸಚಿವಾಲಯಗಳೊಂದಿಗೆ ಸೂಕ್ತ ಸಮಾಲೋಚನೆಯ ನಂತರ, ಅಶ್ಲೀಲ ಕಂಟೆಂಟ್‌ ಪ್ರದರ್ಶಿಸಿದ್ದಕ್ಕಾಗಿ ಸರ್ಕಾರವು 43 ಒ.ಟಿ.ಟಿ ವೇದಿಕೆಗಳನ್ನು ಈಗಾಗಲೇ ನಿರ್ಬಂಧಿಸಿದೆ.

ಸರ್ಕಾರಿ ಜಾಹೀರಾತುಗಳು:

ಪತ್ರಿಕೆಗಳು, ಟಿವಿ / ರೇಡಿಯೋ, ಹೊರಾಂಗಣ, ಡಿಜಿಟಲ್ ಮಾಧ್ಯಮ ಸೇರಿದಂತೆ ವಿವಿಧ ಮಾಧ್ಯಮ ವೇದಿಕೆಗಳಲ್ಲಿ ಭಾರತ ಸರ್ಕಾರದ ಜಾಹೀರಾತುಗಳನ್ನು ಸೆಂಟ್ರಲ್ ಬ್ಯೂರೋ ಆಫ್ ಕಮ್ಯುನಿಕೇಷನ್ (ಸಿ.ಬಿ.ಸಿ) ನೀಡುತ್ತದೆ.

ಉದ್ದೇಶಿತ ಸಂದೇಶದ ವ್ಯಾಪಕ ಪ್ರಸಾರವನ್ನು ಖಚಿತಪಡಿಸಿಕೊಳ್ಳಲು, ಮುದ್ರಣ, ದೃಶ್ಯ-ಶ್ರಾವ್ಯ, ಡಿಜಿಟಲ್, ಹೊರಾಂಗಣ ಪ್ರಚಾರ ಮುಂತಾದ ವಿವಿಧ ಮಾಧ್ಯಮಗಳಿಗೆ ಸಂಬಂಧಿಸಿದಂತೆ ವಿವರವಾದ ನೀತಿ ಮಾರ್ಗಸೂಚಿಗಳನ್ನು ಹೊರಡಿಸಲಾಗಿದೆ. ಈ ಮಾರ್ಗಸೂಚಿಗಳು http://cbcindia.gov.in ಸಿ.ಬಿ.ಸಿ ವೆಬ್‌ತಾಣದಲ್ಲಿ ಲಭ್ಯವಿವೆ.

ಎ.ವಿ.ಜಿ.ಸಿ-ಎಕ್ಸ್.ಆರ್ ವಲಯದ ಉತ್ತೇಜನ:

ʻಎ.ವಿ.ಜಿ.ಸಿ-ಎಕ್ಸ್.ಆರ್ʼ - ಇದು ಅನಿಮೇಷನ್, ವಿಷುಯಲ್ ಎಫೆಕ್ಟ್ಸ್, ಗೇಮಿಂಗ್, ಕಾಮಿಕ್ಸ್ ಮತ್ತು ಎಕ್ಸ್‌ಟೆಂಡೆಡ್ ರಿಯಾಲಿಟಿ ವಲಯವನ್ನು ಒಳಗೊಂಡಿದೆ.

ಭಾರತ ಸರ್ಕಾರವು ʻಎ.ವಿ.ಜಿ.ಸಿ-ಎಕ್ಸ್.ಆರ್ʼ ವಲಯವನ್ನು ಭಾರತದ ಸೃಜನಶೀಲ ಪರಿಸರ ವ್ಯವಸ್ಥೆಯ ಪ್ರಮುಖ ಅಂಶಗಳಲ್ಲಿ ಒಂದಾಗಿ ಗುರುತಿಸಿದೆ. ಏಪ್ರಿಲ್ 2022ರಲ್ಲಿ ರಚಿಸಲಾದ ʻರಾಷ್ಟ್ರೀಯ ಎ.ವಿ.ಜಿ.ಸಿ-ಎಕ್ಸ್.ಆರ್ ಕಾರ್ಯಪಡೆಯು ಈ ವಲಯದ ಉತ್ತೇಜನಕ್ಕಾಗಿ ಕಾರ್ಯತಂತ್ರದ ಮಾರ್ಗಸೂಚಿಯನ್ನು ರೂಪಿಸಿದೆ.

ʻಎ.ವಿ.ಜಿ.ಸಿʼ ವಲಯಕ್ಕಾಗಿ ಸರ್ಕಾರದ ಪ್ರಮುಖ ಉಪಕ್ರಮಗಳು ಈ ಕೆಳಗಿನಂತಿವೆ:

ವಿಶ್ವ ದೃಶ್ಯ-ಶ್ರಾವ್ಯ ಮತ್ತು ಮನರಂಜನಾ ಶೃಂಗಸಭೆ 2025

● ಭಾರತವನ್ನು ಮಾಧ್ಯಮ ಮತ್ತು ಮನರಂಜನೆಯ ಜಾಗತಿಕ ಕೇಂದ್ರವನ್ನಾಗಿ ಮಾಡಲು 2025ರ ಮೇ 1 ರಿಂದ 4 ರವರೆಗೆ ಮುಂಬೈನಲ್ಲಿ ಈ ಕಾರ್ಯಕ್ರಮ ನಡೆಯಿತು.

● ಕ್ರಿಯೇಟ್ ಇನ್ ಇಂಡಿಯಾ ಚಾಲೆಂಜ್: ಅನಿಮೇಷನ್, ಗೇಮಿಂಗ್, ಎ.ಆರ್ / ವಿ.ಆರ್ ಮತ್ತು ಸಂಗೀತದಂತಹ 34 ಸೃಜನಶೀಲ ವಿಭಾಗಗಳಲ್ಲಿ ರಾಷ್ಟ್ರವ್ಯಾಪಿಯಾಗಿ ಮುಂದಿನ ಪೀಳಿಗೆಯ ಪ್ರತಿಭಾನ್ವೇಷಣೆ. ಇದು ಪ್ರಪಂಚದಾದ್ಯಂತದ ಕಂಟೆಂಟ್‌ ಸೃಷ್ಟಿಕರ್ತರಿಂದ 1 ಲಕ್ಷಕ್ಕೂ ಹೆಚ್ಚು ನೋಂದಣಿಗಳನ್ನು ಆಕರ್ಷಿಸಿತು.

● ವೇವ್ಸ್ ಬಜಾರ್, ʻವೇವ್ ಎಕ್ಸ್ʼ ಆಕ್ಸಿಲರೇಟರ್ ನಂತಹ ವಿಶೇಷ ಉಪಕ್ರಮಗಳು ಕಂಟೆಂಟ್‌ ಸೃಷ್ಟಿಕರ್ತರನ್ನು ಹೂಡಿಕೆದಾರರಿಗೆ ಸಂಪರ್ಕಿಸುತ್ತವೆ ಮತ್ತು ಮಾರುಕಟ್ಟೆಗಳಿಗೆ ವ್ಯಾಪಕ ಪ್ರವೇಶ ಮತ್ತು ಮಾರ್ಗದರ್ಶನವನ್ನು ಸಾಧ್ಯವಾಗಿಸುತ್ತವೆ.

● ಕಥೆ ಹೇಳುವುದು, ಕೃತಕ ಬುದ್ಧಿಮತ್ತೆ(ಎ.ಐ), ʻಎಕ್ಸ್.ಆರ್ʼ ಮತ್ತು ಡಿಜಿಟಲ್ ಕಂಟೆಂಟ್‌ ಸೃಷ್ಟಿಯಲ್ಲಿ ʻಮಾಸ್ಟರ್ ಕ್ಲಾಸ್ʼಗಳು ಮತ್ತು ಮಾರ್ಗದರ್ಶನಗಳನ್ನು ಈ ಕಾರ್ಯಕ್ರಮವು ಒದಗಿಸಿತು.

ʻಇಂಡಿಯನ್ ಇನ್ಸ್‌ಟಿಟ್ಯೂಟ್ ಆಫ್ ಕ್ರಿಯೇಟಿವ್ ಟೆಕ್ನಾಲಜೀಸ್ʼ(ಐ.ಐ.ಸಿ.ಟಿ) ಸ್ಥಾಪನೆ

ಸೃಜನಶೀಲ ತಂತ್ರಜ್ಞಾನಗಳ ಪ್ರಧಾನ ಸಂಸ್ಥೆಯಾಗಿ ʻಐ.ಐ.ಸಿ.ಟಿʼಯನ್ನು ಸ್ಥಾಪಿಸಲಾಗಿದೆ. ಉದ್ಯಮ ಆಧಾರಿತ ಪಠ್ಯಕ್ರಮ ಮತ್ತು ಜಾಗತಿಕ ಉತ್ತಮ ಕಾರ್ಯವಿಧಾನಗಳ ಮೇಲೆ ಇದು ಗಮನ ಕೇಂದ್ರೀಕರಿಸಿದೆ.

● ʻಐ.ಐ.ಸಿ.ಟಿʼಯ ಅಭಿವೃದ್ಧಿ ಮತ್ತು ಕಾರ್ಯಾಚರಣೆಗೆ 392.85 ಕೋಟಿ ರೂ. ಒದಗಿಸಲಾಗಿದೆ.

● ಐ.ಐ.ಟಿ ಮತ್ತು ಐ.ಐ.ಎಂಗಳ ಮಾದರಿಯಲ್ಲಿ ಸೃಜನಶೀಲ ತಂತ್ರಜ್ಞಾನಗಳಿಗಾಗಿ ʻಐ.ಐ.ಸಿ.ಟಿʼಯನ್ನು ರೂಪಿಸಲಾಗಿದೆ.

● ಶೈಕ್ಷಣಿಕ ಸಹಯೋಗಕ್ಕಾಗಿ ಗೂಗಲ್, ಮೆಟಾ, ಎನ್‌ವಿಡಿಯಾ, ಮೈಕ್ರೋಸಾಫ್ಟ್, ಆಪಲ್, ಅಡೋಬ್, ಡಬ್ಲ್ಯೂ.ಪಿ.ಪಿ ಸೇರಿದಂತೆ ಪ್ರಮುಖ ಜಾಗತಿಕ ಕಂಪನಿಗಳೊಂದಿಗೆ ಒಡಂಬಡಿಕೆಗಳಿಗೆ ಸಹಿ ಹಾಕಲಾಗಿದೆ.

● ʻಎ.ವಿ.ಜಿ.ಸಿ-ಎಕ್ಸ್.ಆರ್ʼ ವಲಯದಲ್ಲಿ ವೃತ್ತಿಪರರು ಮತ್ತು ತರಬೇತುದಾರರಿಗೆ ಸುಧಾರಿತ ತರಬೇತಿಯನ್ನು ʻಐ.ಐ.ಸಿ.ಟಿʼ ಒದಗಿಸುತ್ತದೆ.

● ಗೇಮಿಂಗ್‌ನಲ್ಲಿ ನಾಲ್ಕು ವಿಶೇಷ ಕೋರ್ಸ್‌ಗಳು, ಪೋಸ್ಟ್ ಪ್ರೊಡಕ್ಷನ್‌ನಲ್ಲಿ ನಾಲ್ಕು ಕೋರ್ಸ್‌ಗಳು ಮತ್ತು ಅನಿಮೇಷನ್, ಕಾಮಿಕ್ಸ್ ಮತ್ತು ʻಎಕ್ಸ್.ಆರ್ʼನಲ್ಲಿ ಒಂಬತ್ತು ಕೋರ್ಸ್‌ಗಳು ಸಂಸ್ಥೆಯ ಆರಂಭಿಕ ಶೈಕ್ಷಣಿಕ ಕೊಡುಗೆಗಳಲ್ಲಿ ಸೇರಿವೆ.

● ಹೆಚ್ಚಿನ ವಿವರಗಳು https://theiict.in ವೆಬ್ ತಾಣದಲ್ಲಿ ಲಭ್ಯವಿವೆ .

ಕೇಂದ್ರ ವಾರ್ತಾ ಮತ್ತು ಪ್ರಸಾರ ಖಾತೆ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರು ಇಂದು ಲೋಕಸಭೆಗೆ ಈ ಮಾಹಿತಿಯನ್ನು ಸಲ್ಲಿಸಿದರು.

*****