ਕੇਂਦਰੀ ਸੰਚਾਰ ਮੰਤਰੀ ਸ਼੍ਰੀ ਜਯੋਤੀਰਾਦਿੱਤਿਆ ਐਮ. ਸਿੰਧੀਆ ਨੇ ਨਵੀਂ ਦਿੱਲੀ ਵਿੱਚ ਭਾਰਤ ਸੰਚਾਰ ਨਿਗਮ ਲਿਮਟਿਡ (ਬੀਐਸਐਨਐਲ) ਦੇ ਚੀਫ ਜਨਰਲ ਮੈਨੇਜਰਾਂ (ਸੀਜੀਐਮ) ਨਾਲ ਇੱਕ ਸਮੀਖਿਆ ਮੀਟਿੰਗ ਦੀ ਪ੍ਰਧਾਨਗੀ ਕੀਤੀ। ਉੱਚ-ਪੱਧਰੀ ਮੀਟਿੰਗ ਵਿੱਚ ਬੀਐਸਐਨਐਲ ਦੀ ਸੰਚਾਲਨ ਪ੍ਰਗਤੀ ਦੀ ਸਮੀਖਿਆ ਕੀਤੀ ਗਈ, ਖੇਤਰੀ ਚੁਣੌਤੀਆਂ ਦਾ ਹੱਲ ਕੀਤਾ ਗਿਆ ਅਤੇ ਕੰਪਨੀ ਦੇ ਨੈੱਟਵਰਕ ਅਤੇ ਸੇਵਾ ਪ੍ਰਦਾਨ ਕਰਨ ਲਈ ਅੱਗੇ ਦੀ ਰਣਨੀਤੀ ਦੀ ਰੂਪ-ਰੇਖਾ ਤਿਆਰ ਕੀਤੀ ਗਈ। ਸੰਚਾਰ ਰਾਜ ਮੰਤਰੀ ਸ਼੍ਰੀ ਪੇੱਮਾਸਾਨੀ ਚੰਦਰਸ਼ੇਖਰ ਅਤੇ ਦੂਰਸੰਚਾਰ ਵਿਭਾਗ ਦੇ ਹੋਰ ਸੀਨੀਅਰ ਅਧਿਕਾਰੀ ਵੀ ਮੀਟਿੰਗ ਵਿੱਚ ਮੌਜੂਦ ਸਨ। ਸੈਸ਼ਨਾਂ ਵਿਚਕਾਰ ਇੱਕ ਮੀਡੀਆ ਬ੍ਰੀਫਿੰਗ ਵਿੱਚ, ਸ਼੍ਰੀ ਸਿੰਧੀਆ ਨੇ ਦੱਸਿਆ ਕਿ ਮੀਟਿੰਗ ਵਿੱਚ ਦੂਰਸੰਚਾਰ ਖੇਤਰ ਵਿੱਚ ਬੀਐਸਐਨਐਲ ਦੀ ਭੂਮਿਕਾ ਨੂੰ ਮਜ਼ਬੂਤ ਕਰਨ, ਬੁਨਿਆਦੀ ਢਾਂਚੇ ਦੇ ਨਿਰਮਾਣ ਨੂੰ ਤੇਜ਼ ਕਰਨ ਅਤੇ ਨਾਗਰਿਕ-ਕੇਂਦ੍ਰਿਤ ਸੇਵਾ ਪ੍ਰਦਾਨ ਕਰਨ ਨੂੰ ਵਧਾਉਣ ਬਾਰੇ ਚਰਚਾ ਕੀਤੀ ਗਈ।

ਵਿਕਾਸ ਅਤੇ ਆਧੁਨਿਕੀਕਰਣ 'ਤੇ ਜ਼ੋਰ

ਸਮੀਖਿਆ ਦੌਰਾਨ BSNL ਦੀ ਵਿਕਾਸ ਰਣਨੀਤੀ, ਨੈੱਟਵਰਕ ਪ੍ਰਦਰਸ਼ਨ ਸੁਧਾਰ, ਗ੍ਰਾਹਕ ਸੇਵਾ ਵੰਡ ਅਤੇ ਸੰਗਠਨਾਤਮਕ ਆਧੁਨਿਕੀਕਰਣ 'ਤੇ ਵਿਆਪਕ ਚਰਚਾ ਹੋਈ। ਇਸ ਵਿਆਪਕ ਚਰਚਾ ਨੇ ਬੀਐਸਐਨਐਲ ਦੀ ਇੱਕ ਉਪਭੋਗਤਾ –ਕੇਂਦ੍ਰਿਤ ਟੈਲੀਕੌਮ ਸਰਵਿਸ ਪ੍ਰੋਵਾਈਡਰ ਵਜੋਂ ਸਥਿਤੀ ਨੂੰ ਹੋਰ ਮਜ਼ਬੂਤ ਕੀਤਾ, ਜਿਸ ਦਾ ਸਪਸ਼ਟ ਟੀਚਾ ਸਾਰੀਆਂ ਵਪਾਰਕ ਇਕਾਈਆਂ ਵਿੱਚ "ਸਭ ਤੋਂ ਪਹਿਲਾਂ ਮਾਲੀਆ" ਹੈ। ਇਸ ਫੋਰਮ ਨੇ ਬੀਐਸਐਨਐਲ ਦੇ ਉੱਚ ਪ੍ਰਬੰਧਨ ਨੂੰ ਹਰ ਪੱਧਰ 'ਤੇ ਇਹਨਾਂ ਤਰਜੀਹਾਂ ਨੂੰ ਅੱਗੇ ਵਧਾਉਣ ਵਿੱਚ ਮਦਦ ਕੀਤੀ ਅਤੇ ਨਤੀਜਿਆਂ ਲਈ ਜਵਾਬਦੇਹੀ 'ਤੇ ਜ਼ੋਰ ਦਿੱਤਾ।

ਗ੍ਰਾਹਕ-ਪ੍ਰਥਮ ਪਰਿਵਰਤਨ

ਬੀਐਸਐਨਐਲ ਆਪਣੇ ਸਾਰੇ ਸਰਕਲਾਂ, ਵਪਾਰਕ ਖੇਤਰਾਂ ਅਤੇ ਇਕਾਈਆਂ ਵਿੱਚ ਸੇਵਾਵਾਂ ਵਿੱਚ ਇੱਕ ਵੱਡੇ ਬਦਲਾਅ ਦੇ ਦੌਰ ਵਿੱਚੋਂ ਲੰਘ ਰਿਹਾ ਹੈ। ਆਪਣੇ "ਗ੍ਰਾਹਕ ਸਭ ਤੋਂ ਪਹਿਲਾਂ" ਫਲਸਫੇ ਨੂੰ ਅੱਗੇ ਰੱਖਣ ਲਈ, ਬੀਐਸਐਨਐਲ ਗ੍ਰਾਹਕ ਦੀ ਸਰਗਰਮ ਸ਼ਮੂਲੀਅਤ, ਬਿਹਤਰ ਸੇਵਾ ਜਵਾਬਦੇਹੀ ਅਤੇ ਤੁਰੰਤ ਸ਼ਿਕਾਇਤ ਨਿਵਾਰਣ 'ਤੇ ਜ਼ੋਰ ਦੇ ਰਿਹਾ ਹੈ।

ਮੁੱਖ ਫੋਕਸ ਖੇਤਰ ਅਤੇ ਨਤੀਜੇ

ਸੀਜੀਐਮ ਮੀਟਿੰਗ ਦੌਰਾਨ, ਬੀਐਸਐਨਐਲ ਦੇ ਸਰਕਲ ਮੁਖੀਆਂ ਨੂੰ ਗ੍ਰਾਹਕਾਂ ਦੀ ਪਹੁੰਚ ਅਤੇ ਸੇਵਾ ਦੀ ਗੁਣਵੱਤਾ ਨੂੰ ਵਧਾਉਣ ਲਈ ਕਈ ਤਰਜੀਹੀ ਖੇਤਰਾਂ ਬਾਰੇ ਜਾਣਕਾਰੀ ਦਿੱਤੀ ਗਈ। ਪਛਾਣੇ ਗਏ ਖਾਸ ਫੋਕਸ ਖੇਤਰਾਂ ਵਿੱਚ ਸ਼ਾਮਲ ਹਨ:

• ਪੇਂਡੂ, ਸ਼ਹਿਰੀ, ਉੱਦਮ ਅਤੇ ਰਿਟੇਲ ਖੇਤਰਾਂ ਦੇ ਗ੍ਰਾਹਕਾਂ ਨਾਲ ਮੁੜ ਤੋਂ ਜੁੜਨਾ

• ਮੋਬਾਈਲ ਨੈੱਟਵਰਕਾਂ ਅਤੇ ਫਾਈਬਰ-ਟੂ-ਦ-ਹੋਮ (FTTH) ਵਿੱਚ ਸੇਵਾ ਦੀ ਗੁਣਵੱਤਾ (QoS) ਵਿੱਚ ਸੁਧਾਰ

• ਬਿਲਿੰਗ, ਪ੍ਰੋਵਿਜ਼ਨਿੰਗ ਅਤੇ ਨੈੱਟਵਰਕ ਅਪਟਾਈਮ ਵਿੱਚ ਗ੍ਰਾਹਕਾਂ ਦੀਆਂ ਸ਼ਿਕਾਇਤਾਂ ਦਾ ਹੱਲ ਕਰਨਾ

• ਹਰ ਸੰਚਾਲਨ ਪੱਧਰ 'ਤੇ "ਮਾਲੀਆ-ਪਹਿਲਾਂ" ਟੀਚਿਆਂ ਨਾਲ ਜਵਾਬਦੇਹੀ ਨੂੰ ਉਤਸ਼ਾਹਿਤ ਕਰਨਾ

• ਕਨੈਕਟੀਵਿਟੀ, ਵੀਪੀਐਨ ਹੱਲ, ਲੀਜ਼ਡ ਲਾਈਨ ਸੇਵਾਵਾਂ ਅਤੇ ਹੋਰ ਨਵੇਂ ਵਪਾਰਕ ਮੌਕਿਆਂ ਵਰਗੀਆਂ ਐਂਟਰਪ੍ਰਾਈਜ਼ ਸੇਵਾਵਾਂ ਦਾ ਵਿਸਤਾਰ ਕਰਨਾ।

ਸ਼੍ਰੀ ਸਿੰਧੀਆ ਨੇ ਬੀਐਸਐਨਐਲ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ ਅਤੇ ਗ੍ਰਾਹਕਾਂ ਦੀ ਸਹੂਲਤ ਅਤੇ ਮਾਲੀਆ ਪੈਦਾ ਕਰਨ ਵਿੱਚ ਜ਼ਿਕਰਯੋਗ ਸੁਧਾਰ ਲਿਆਉਣ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ।

ਨਵੀਆਂ ਸੇਵਾ ਪਹਿਲਕਦਮੀਆਂ

ਸਮੀਖਿਆ ਦੌਰਾਨ, ਬੀਐਸਐਨਐਲ ਦੁਆਰਾ ਹਾਲ ਹੀ ਵਿੱਚ ਸ਼ੁਰੂ ਕੀਤੀਆਂ ਗਈਆਂ ਕਈ ਨਵੀਆਂ ਪਹਿਲਕਦਮੀਆਂ ਨੂੰ ਉਜਾਗਰ ਕੀਤਾ ਗਿਆ, ਜਿਨ੍ਹਾਂ ਦਾ ਉਦੇਸ਼ ਸੇਵਾਵਾਂ ਦੀਆਂ ਪੇਸ਼ਕਸ਼ਾਂ ਅਤੇ ਗ੍ਰਾਹਕ ਮੁੱਲ ਵਿੱਚ ਵਾਧਾ ਕਰਨਾ ਹੈ। ਇਨ੍ਹਾਂ ਪਹਿਲਕਦਮੀਆਂ ਵਿੱਚ ਸ਼ਾਮਲ ਹਨ:

• ਕਈ ਟੈਲੀਕੌਮ ਸਰਕਲਾਂ ਵਿੱਚ 4G ਦਾ ਵਿਸਥਾਰ ਅਤੇ ਰੋਲਆਊਟ

• ਅਗਲੀ ਪੀੜ੍ਹੀ ਦੇ ਇਨਫੋਟੇਨਮੈਂਟ ਲਈ ਮੋਬਾਈਲ ਗ੍ਰਾਹਕਾਂ ਲਈ FTTH ਅਤੇ BITV ਪਲੈਟਫਾਰਮ ਲਈ IFTV ਦੀ ਸ਼ੁਰੂਆਤ

• ਬੀਐਸਐਨਐਲ ਨੈਸ਼ਨਲ ਵਾਈ-ਫਾਈ ਰੋਮਿੰਗ (ਗ੍ਰਾਹਕਾਂ ਲਈ ਦੇਸ਼ ਵਿਆਪੀ ਵਾਈ-ਫਾਈ ਰੋਮਿੰਗ ਸੇਵਾ)

• ਐਂਟਰਪ੍ਰਾਈਜ਼ ਅਤੇ ਸਰਕਾਰੀ ਗ੍ਰਾਹਕਾਂ ਲਈ ਅਨੁਕੂਲਿਤ ਬੀਐਸਐਨਐਲ ਵੀਪੀਐਨ ਸੇਵਾਵਾਂ ਅਤੇ ਬੰਡਲ ਪੈਕੇਜ

• ਮਿਸ਼ਨ-ਨਾਜ਼ੁਕ ਬੁਨਿਆਦੀ ਢਾਂਚੇ ਵਿੱਚ ਉੱਚ-ਭਰੋਸੇਯੋਗਤਾ ਕਨੈਕਟੀਵਿਟੀ ਲਈ ਸੀਐਨਪੀਐਨ ਪ੍ਰੋਜੈਕਟ (ਪ੍ਰਾਈਵੇਟ ਨੈੱਟਵਰਕ ਪਹਿਲਕਦਮੀ)

• ਸਪੈਮ-ਮੁਕਤ ਨੈੱਟਵਰਕ - ਘੋਟਾਲੇ ਅਤੇ ਸਪੈਮ ਸੰਚਾਰਾਂ ਨੂੰ ਤੁਰੰਤ ਖਤਮ ਕਰਨ ਲਈ ਆਪਣੀ ਕਿਸਮ ਦਾ ਪਹਿਲਾ ਹੱਲ

• ਬੀਬੀਏ (BSNL ਬਿਜ਼ਨੇਸ ਐਸੋਸੀਏਟ) ਲਈ ਔਨਲਾਈਨ ਪੋਰਟਲ ਲਾਂਚ ਕੀਤਾ ਗਿਆ, ਜਿਸ ਨਾਲ ਪੜ੍ਹੇ-ਲਿਖੇ ਨੌਜਵਾਨ ਬੀਐਸਐਨਐਲ ਵਿਕਰੀ ਚੈਨਲ ਨੂੰ ਮਜ਼ਬੂਤ ਕਰਨ ਅਤੇ ਵਿਕਰੀ ਕਮਿਸ਼ਨ ਹਾਸਲ ਕਰਨ ਦੇ ਯੋਗ ਬਣਨਗੇ।

ਇੱਕ ਡਿਜੀਟਲ ਤੌਰ 'ਤੇ ਸਸ਼ਕਤ ਭਾਰਤ ਵੱਲ

ਬੀਐਸਐਨਐਲ ਹੁਣ ਇੱਕ ਡਿਜੀਟਲ ਤੌਰ 'ਤੇ ਸਸ਼ਕਤ, ਸੇਵਾ-ਮੁਖੀ ਅਤੇ ਵਿੱਤੀ ਤੌਰ 'ਤੇ ਟਿਕਾਊ ਟੈਲੀਕੌਮ ਆਪਰੇਟਰ ਬਣਨ ਲਈ ਨਵੇਂ ਸਿਰ੍ਹੇ ਤੋਂ ਯਤਨ ਕਰ ਰਿਹਾ ਹੈ, ਜਿਸ ਵਿੱਚ ਲਾਗੂਕਰਨ 'ਤੇ ਵਿਸ਼ੇਸ਼ ਧਿਆਨ ਦਿੱਤਾ ਜਾ ਰਿਹਾ ਹੈ। ਕੰਪਨੀ ਦੇਸ਼ ਭਰ ਵਿੱਚ ਆਧੁਨਿਕ ਦੂਰਸੰਚਾਰ ਸੇਵਾਵਾਂ ਅਤੇ ਬੁਨਿਆਦੀ ਢਾਂਚੇ ਦਾ ਵਿਸਤਾਰ ਕਰਕੇ "ਭਾਰਤ" ਨੂੰ ਜੋੜਨ ਅਤੇ ਸਸ਼ਕਤ ਬਣਾਉਣ ਲਈ ਵਚਨਬੱਧ ਹੈ।

************

ਸਮਰਾਟ/ਐਲਨ