U Myntri Kam pohiing jong ka sorkar pdeng uba dei ruh u Myntri ka Tnad treilang un pynbna ia ka National Cooperative Policy 2025 ha ka jingialang kaba la pynlong ha Atal Akshay Urja Bhawan, New Delhi ha ka 24 tarik u Naitung 2025. Ki dkhot jong ka drafting committee jong ka National Cooperative Policy, ki Chairman bad ki Managing Director jong baroh ki National Cooperative Union, ki heh ophisar jong ka Tnad, ki heh ophisar jong ka National Cooperative Development Corporation (NCDC), ka National Council of Cooperative Training (NCCT) bad ka Vaikunth Mehta National Institute of Cooperative Management (NCCT) kin iadonlang ha kane ka jingialang.

Ka cooperative policy kaba thymmai kan pyni ba kan long u mawmer ha ka jingïaid lynti ki kam cooperative jong ka ri India ha kine ki arphew snem ban wan naduh u snem 2025-45. Hapoh ka jingïalam jong u Myntri Rangbahduh ka ri u Narendra Modi bad ka jingïalam ba tbit jong u Myntri kam pohïing ka sorkar pdeng bad u Myntri ka Tnad treilang u Amit Shah, ka cooperative policy 2025 kaba thymmai ka thmu ban pynim biang bad pynthymmai ïa ka kam cooperative bad kumjuh ruh ban pynurlong ïa ka jingthmu jong ka roi ka par lyngba ka jingïatreilang da kaba pynbiang ia ki rukom treikam ha ki jaka nongkyndong. Ha kaba sdang jong u snem 2002, la pynmih ia ka National Cooperative Policy kaba nyngkong eh jong ka ri, kaba la ai ia ka nongrim kaba kongsan na ka bynta ban pyniaid ryntih ia ki kam ba iadei bad ka ioh ka kot jong ki jaka treikam cooperative. Ha kine ki 20 snem ba la leit noh, bun ki jingkylla kiba khraw ki la jia ha ka imlang sahlang, ka ri bad ka pyrthei namar ka jingiasoh ha kylleng ka pyrthei bad ka jingkiew jong ka teknoloji. Da kaba buh jingmut ia kine ki jingkylla, ka la long kaba donkam ban thaw ia ka polisi kaba thymmai, khnang ba ki jaka treikam cooperative kin lah ban kham treikam bad kham myntoi ha ka jinglong jingman jong ka ioh ka kot kaba mynta bad ban pynkhlain ia ka bynta jong ka kam cooperative ha kaba pynurlong ia ka thong jong ka "Viksit Bharat 2047".

Ka jingthmu jong ka National Cooperative Policy ka long ban pynlong ia ki jaka treikam cooperative kiba kynthup lang, ban pyniaid ia ki ha ka rukom kaba tbit, ban pynkhreh ia ki na ka bynta ka lawei bad ban lah ban plie shibun ki lad ioh kam bad ki lad kamai kajih khamtam ha ki jaka nongkyndong jong ka India.

Ka national level committee kaba don 48 ngut ki dkhot ba la khlieh da u Myntri barim ka sorkar pdeng u Suresh Prabhakar Prabhu ka la pynkhreh ia ka National Cooperative Policy kaba thymmai. Kane ka Committee ka kynthup ia ki dkhot na ki seng treilang jong ka ri/jylla, ki cooperative society jong baroh ki kyrdan bad ki bynta, ki nongmihkhmat jong ka tnad sorkar pdeng bad sorkar jylla ba iadei khmih bad ki riewshemphang. Ban pynthikna ia ka rukom treikam kaba iashim bynta bad kynthup lang, ka Committee ka la pynlong 17 tylli ki jingialang bad 4 tylli ki regional workshop ha Ahmedabad, Bengaluru, Gurugram bad Patna. 648 tylli ki jingai jingmut kiba kordor ba la ioh na ki nongshim bynta la bishar bniah bad pynrung ha ka cooperative policy ba thymmai.

*****