কেন্দ্ৰীয় গৃহ মন্ত্ৰী তথা সমবায় মন্ত্ৰী শ্ৰী অমিত শ্বাহে ২০২৫ চনৰ ২৪ জুলাইত নতুন দিল্লীৰ অটল অক্ষয় উৰ্জা ভৱনত আয়োজিত এক অনুষ্ঠানত ৰাষ্ট্ৰীয় সমবায় নীতি ২০২৫ ঘোষণা কৰিব। ৰাষ্ট্ৰীয় সমবায় নীতিৰ খচৰা সমিতিৰ সদস্যসকল, সকলো ৰাষ্ট্ৰীয় সমবায় সংঘৰ অধ্যক্ষ আৰু পৰিচালন সঞ্চালক, মন্ত্ৰালয়ৰ জ্যেষ্ঠ বিষয়াসকল, ৰাষ্ট্ৰীয় সমবায় উন্নয়ন নিগম (এনচিডিচি), ৰাষ্ট্ৰীয় সমবায় প্ৰশিক্ষণ পৰিষদ (এনচিচিটি) আৰু বৈকুণ্ঠ মেহতা ৰাষ্ট্ৰীয় সমবায় ব্যৱস্থাপনা প্ৰতিষ্ঠান (ভ্যামনিকম) ৰ জ্যেষ্ঠ বিষয়াসকল অনুষ্ঠানত উপস্থিত থাকিব।

২০২৫-৪৫ৰ পৰা অহা দুটা দশকৰ বাবে ভাৰতৰ সমবায় আন্দোলনৰ ক্ষেত্ৰত নতুন সমবায় নীতি এক মাইলৰ খুঁটি হিচাপে প্ৰমাণিত হ 'ব। প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত আৰু কেন্দ্ৰীয় গৃহ মন্ত্ৰী তথা সমবায় মন্ত্ৰী শ্ৰী অমিত শ্বাহৰ দক্ষ নিৰ্দেশনাত, নতুন সমবায় নীতি ২০২৫-ৰ লক্ষ্য হৈছে সমবায় খণ্ডক পুনৰুজ্জীৱিত কৰা আৰু আধুনিকীকৰণ কৰাৰ লগতে তৃণমূল পৰ্যায়ত এক ৰূপৰেখা সৃষ্টি কৰি সহযোগিতাৰ জৰিয়তে সমৃদ্ধিৰ দৃষ্টিভংগী উপলব্ধি কৰা। ইয়াৰ পূৰ্বে ২০০২চনত দেশৰ প্ৰথমখন ৰাষ্ট্ৰীয় সমবায় নীতি জাৰি কৰা হৈছিল, যিয়ে সমবায় প্ৰতিষ্ঠানসমূহৰ অৰ্থনৈতিক কাৰ্যকলাপৰ উন্নত ব্যৱস্থাপনাৰ বাবে এক মৌলিক পৰিকাঠামো প্ৰদান কৰিছিল। যোৱা ২০ বছৰত বিশ্বায়ন আৰু প্ৰযুক্তিগত উন্নতিৰ ফলত সমাজ, দেশ আৰু বিশ্বত বহুতো গুৰুত্বপূৰ্ণ পৰিৱৰ্তন ঘটিছে। এই পৰিৱৰ্তনবোৰৰ পৰিপ্ৰেক্ষিতত এক নতুন নীতি প্ৰস্তুত কৰাটো প্ৰয়োজনীয় হৈ পৰিছিল, যাতে বৰ্তমানৰ অৰ্থনৈতিক পৰিস্থিতিত সমবায় প্ৰতিষ্ঠানসমূহক অধিক সক্ৰিয় আৰু উপযোগী কৰি তুলিব পাৰি আৰু "বিকশিত ভাৰত ২০৪৭" ৰ লক্ষ্যত উপনীত হ'বলৈ সমবায় খণ্ডৰ ভূমিকা শক্তিশালী কৰিব পাৰি।

ৰাষ্ট্ৰীয় সমবায় নীতিৰ উদ্দেশ্য হৈছে সমবায় প্ৰতিষ্ঠানসমূহক অন্তৰ্ভুক্তিমূলক কৰা, সেইবোৰ পেছাদাৰীভাৱে পৰিচালনা কৰা, ভৱিষ্যতৰ বাবে প্ৰস্তুত কৰা আৰু বিশেষকৈ গ্ৰাম্য ভাৰতত বৃহৎ হাৰত নিযুক্তি আৰু জীৱিকাৰ সুযোগ সৃষ্টি কৰিবলৈ সক্ষম হোৱা।

প্ৰাক্তন কেন্দ্ৰীয় মন্ত্ৰী শ্ৰী সুৰেশ প্ৰভাৰকৰ প্ৰভুৰ নেতৃত্বত ৪৮জনীয়া ৰাষ্ট্ৰীয় পৰ্যায়ৰ কমিটীয়ে নতুন ৰাষ্ট্ৰীয় সমবায় নীতি প্ৰস্তুত কৰিছে। এই সমিতিত ৰাষ্ট্ৰীয়/ৰাজ্যিক সমবায় ফেডাৰেচন, সকলো স্তৰৰ আৰু খণ্ডৰ সমবায় সমিতিৰ সদস্য, সংশ্লিষ্ট কেন্দ্ৰীয় আৰু ৰাজ্য চৰকাৰৰ মন্ত্ৰালয়/বিভাগৰ প্ৰতিনিধি আৰু শিক্ষাবিদসকল অন্তৰ্ভুক্ত আছিল। এক অংশগ্ৰহণমূলক আৰু সামগ্ৰিক দৃষ্টিভংগী নিশ্চিত কৰিবলৈ কমিটীয়ে আহমেদাবাদ, বেংগালুৰু, গুৰুগ্ৰাম আৰু পাটনাত ১৭খন বৈঠক আৰু ৪খন আঞ্চলিক কৰ্মশালা অনুষ্ঠিত কৰিছিল। অংশীদাৰসকলৰ পৰা লাভ কৰা ৬৪৮টা মূল্যৱান পৰামৰ্শসমূহ গুৰুত্ব সহকাৰে মূল্যায়ন কৰা হৈছিল আৰু সেইবোৰ নতুন সমবায় নীতিত অন্তৰ্ভুক্ত কৰা হৈছে।

*****

RK/VV/HS/PR/PS/HS