মহৈ লাউথোক্লে! ইকায়খুম্নরবা ভারতকী রাস্ত্রপতি, শ্রীমতি দ্রৌপদি মুরমুনা নই দিল্লীগী বিজ্ঞান ভবন্দা হাউজিং অমসুং অর্বান এফ্যার্স (MoHUA) মন্ত্রালয়না পাঙথোকপা থৌরম অমদা স্বছ্চ সর্ভেক্সন ২০২৪-২৫ এৱার্দ্স লান্থোকখ্রে। কেন্দ্র মন্ত্রী শ্রী মনোহর লাল অমদি MoS, MoHUA, শ্রী তোখন সাহুসু শরুক য়াখিবা থৌরমদুদা সুপর স্বছ্চ লীগ সিতী ২৩ বু তরাম্না ওকখি। ভারতকী অরুবা ময়োল্লমশিংগী অনৌবা মরোল অদু অহমদবাদ, ভোপাল অমদি লখ্নৌনা মকোক থোংদুনা য়ৌরকখি। মহাকুম্ভগী অখন্নবা মনা অমগা লোয়ননা লৈবাক্কী থাক্কী মনা ৪৩ লাউথোকখি।

লেমজনিংঙাই ওইরবা স্বছ্চ সর্ভেক্সন ২০২৪-২৫ এৱার্দ সেরেমোনী অদুদা, কেন্দ্র মন্ত্রী শ্রী মনোহর লালনা বেস্ত গঙ্গা তাউনগী মনা প্রয়াগরাজতা খুৎশিন্নখি, অদুগা সিকন্দরবাদ কান্তোনমেন্তপু মাগী তোপ তোপ্পা সেনিতেসনগী থবক থৌরমশিংগীদমক বেস্ত কান্তোনমেন্ত বোর্দ ওইনা ইকায় খুম্নখি। GVMC বিসাখপত্নম, জবলপুর, অমসুং গোরখপুরবু সেনিতেসন ৱর্করশিংগী শাফনবা অমদি ইকায়খুম্নবিবদা মখোয়না তৌথোরকপা তোপ তোপ্পা থৌওংশিংগীদমক বেস্ত সফাই মিত্র সুরক্সিত সহর লাউথোকখি। য়ু.পি. লৈঙাক, প্রয়াগরাজ মেলা অধিকারী, অমদি প্রয়াগরাজ ম্যুনিসিপাল কোর্পোরেসনগী মফমদা মীওই করোর ৬৬ লোম লাকখিবা মালেমগী খ্বায়দগী চাউনা মী তিনখিবা মহাকুম্ভ মনুংদা অর্বান ৱেস্ত মেনেজমেন্তকী তোপ তোপ্পা থৌরাং পায়খৎখিবগীদমক শকখঙখি।

চহি অসিগী স্বছ্চ সর্ভেক্সন অসিনা অচৌবা ময়োল্লমশিংগী ফ্রেমৱর্কপু মওং মরিল নাইহনবখক্তা নত্তনা অপীকপা ময়োল্লমশিংগীদমকসু লায়থোকহন্দুনা, মখোয়বু লু-নানবগী কৈরাক কাখৎনবা অমদি হিদান্নহন্নবা পুক্নিং থৌগৎলি। সর্ভে অসিদা অপীকপা ময়োল্লমশিংনা অচৌবা ময়োল্লমশিংগা হিদান্ননবা থোং মান্নবা মফম ফংখি। ‘ৱন সিতী, ৱন এৱার্দ’ কী পরিং ইন্দুনা, স্তেত খুদিংমক্তগী মকোক থোংনা থবক তৌথোরকপা ময়োল্লমশিংবু প্রোমিজিং স্বছ্চ সহর হায়না শকখঙখি। স্তেত অমদি য়ু.তি.শিংদগী পুন্না ময়োল্লম ৩৪ না মনা অসি ফংদুনা অর্বান ক্লীনলিনেস অমদি সেনিতেসন এক্সেলেন্সতা মখোয়না লৈরিবা খোঙজেল উৎখি।

থৌরমদুদা ৱা ঙাংলদুনা, ভারতকী ইকাইখুম্নরবা রাস্ত্রপতিনা রিদ্যুস, রিয়ুজ, রিসাইকল (3R) য়োকখৎপগীদমক মন্ত্রালয়বু থাগৎখি অমদি মহাক্কী মফমদা খুদোল তম্লিবা ৱেস্ত তু ৱেল্থ মেমেন্তো অদুবুসু থাগৎখি। “ৱেস্ত তু ৱেল্থ” হায়রিবা অসি লাইৱা অমনি অদুগা মসিনা শেন্মিৎলোন্দা অমুক হঞ্জিল্লক্নবা লম্বী পী,” হায়না মহাক্না হায়খি। মসিনা গ্রীন জোব পীবদা, অমদি ওন্ত্রপ্রিন্যুরগী খুদোংচাবশিং শেমগৎপদা, SHGs শরুক য়াহন্বদা লৌরিবা থৌদাং মহাক্না শিংথাখি। “ময়োল্লমশিংনা সর্কুলর ইকনমীগী ফিদম অমসুং লু-নানববু ঐখোয়গী থৌওং অমদি চৎনবীগী শরুক অমা ওইনা লৌশিল্লকপা উবদা ঐ অপেনবা পোকই,” হায়খি। ইকায়খুম্নরবা রাস্ত্রপতিনা লু-নানবগী অথোইবা থাক শেমগৎলিবা মীশিং লাখ ১ গী মখাদা লৈবা ময়োল্লমশিংবু থাগৎখি। স্কুল ইন্তরভেন্সন, সোর্স সিগ্রেগেসন স্তার্তঅপকী থৌশিল, জিরো ৱেস্ত কোলোনীনচিংবশিংনা স্বছ্চ ভারতকী ফিরেপ্পু হেন্না চেৎশিনহল্লি হায়না মহাক্না ফোঙদোকখি। “২০৪৭ গী বিক্সিত ভারত অসি মালেমগী ওইবা ফিদম্নিংঙাই ওইগনি,” হায়না ফোঙদোক্তুনা মহাক্কী ৱারোল লোইশিনখি।

স্বছ্চ সিতী পার্ত্নরসিপ ইনিসিএতিব হৌদোক্লদুনা, কেন্দ্র মন্ত্রী শ্রী মনোহর লালনা পীর লর্নিংগী মরুওইবা ৱাফমশিং থমখি। পোপুলেসন কেতগরী পুম্বদা লৈরিবা মকোক থোংবা ময়োল্লম ৭৮ মক্না মখোয় মখোয়গী স্তেতশিংদগী মমৈদা লৈবা ময়োল্লম অমমম লৌখত্তুনা লমজিং লমতাকপিগনি। “পুম্নমক পুদুনা চৎমিন্নবা মথৌ তাই,” হায়না মহাক্না মখা তাখি। “মায় পাক্লবা ময়োল্লমশিংনা অতৈবু লমজিংবিগনি, খুৎশম্ননা চৎমিন্নগনি। মমৈদা লৈরিবা ময়োল্লমশিং মকোক্তা পুখৎলকপা মতম ওইরে,” হায়না মহাক্না ফোঙদোকখি। এসেলেরেতেদ দম্পসাইত রিমিদিএসন প্রোগ্রাম লাউথোক্লদুনা, কেন্দ্র মন্ত্রীনা হায়খি, “ওগস্ত ১৫, ২০২৫ তগী হৌগদৌরিবা চহি অমগী ওইবা অখন্নবা থৌরম অসিনা হান্না লৈরম্বা ৱেস্ত রিমিদিএসন খোঙজেল য়াঙখৎহনবা অমদি য়াম্লবা অর্বানগী মফম হাঙহনবতা নত্তনা সাইন্তিফিক ৱেস্ত প্রোসেসিং কেপাসিতীবুসু হেনগৎহনগনি।”

তিল্লিবা মীথুংশিংবু তরাম্না ওক্লদুনা, শ্রী স্রিনিবাস কাতিকিথলা, সেক্রেতরী, হাউজিং অমসুং অর্বান এফ্যার্স মন্ত্রালয় (MoHUA) না হৌখিদা দেকেদ অসিদা স্বছ্চ ভারত মিসন্না লাক্লিবা অওনবা পুরকপগী খোঙচৎকী মতাঙদা ৱাঙাংখি। মতৌ করম্না সেনিতেসন অমদি হায়জিন্না মরুওইবা ৱাফম ওইরক্তুনা মীয়ামগী ৱাখল্লোন অমদি নুংতিগী পুন্সিগী তৎন-থানবা য়াদ্রবা শরুক অমা ওইরক্তুনা চৎনবী অমা ওইরকখি হায়বগী মতাঙদা মহাক্না ফোঙদোকখি। শ্রী কাতিকিথলানা স্বছ্চ সর্ভেক্সনবু ময়োল্লমশিংবু হেন্না ফবা মওংদা থবক তৌরক্নবা মতিক লৈবা খুৎলায় অমা ওইনা ফোঙদোকখি। মহাক্না নৌনা শেমদোক্লবা ফ্রেমৱর্কশিং – অনৌবা পেরামিতর ১০ অমদি তোপ তোপ্পা মীশিংগী কাঙলুপ মঙা – অসিনা অপীকপা ময়োল্লমশিংবু থোং মান্নবা থাক অমদা অচৌবা ময়োল্লমশিংগা হিদান্নবা ঙমহন্দুনা পুম্নমক শুপ্পা অমদি পাক শন্না চাওখৎপা পুরকহল্লে হায়খি। “স্বছ্চ ভারত মিসন চহি ১০ মায় পাক্না মপুং ফারকপগা লোয়ননা, হৌজিক মথঙগী দেকেদকীখক্তা নত্তনা, ২০৪৭ ফাওবদা চাওখৎপা ভারত অমা ওইহন্নবা লম্বী অমা য়াৎপা মতম ওইরে,” হায়রদুনা মহাক্কী ৱারোল লোইশিনখি।

ইকায়খুম্নরবা রাস্ত্রপতিনা ময়ায় তাঙবলদা লেঙশিল্লকপগা লোয়ননা, মহাক্কী মফমদা কেন্দ্র মন্ত্রীনা তৌবিমল খঙবা উৎপা ওইনা নীংথিরবা সারঙ্গি অমা খুদোল তমখি। মেমেন্তো অসিনা হুন্দোক্তুনা থম্লবা পোৎলমশিংবু ৱাহন্থোক লৈবা, কলাগী পোৎশক ওইনা শেমদুনা, সস্তেনেবিলিতী অমসুং ক্রাফ্তসমেনসিপ পুনশিন্দুনা ‘ৱেস্ত তু ৱেল্থ’ কী ৱাখল্লোন চেৎশিনহল্লি।

স্বছ্চ সর্ভেক্সন ২০২৪-২৫ রিজল্তস দেসবোর্দ থৌরমদুদা দিজিতেল ওইনা হৌদোক্লদুনা রেঙ্কিং অমসুং এচীবমেন্তশিংগী ইন্তরেক্তিব ওভরভিউ অমা পীখি। স্বছ্চ সর্ভেক্সন ২০২৪-২৫ গী মরুওইবা ৱাফমশিং অমদি সুপর স্বছ্চ লীগ সিতিজগী মায় পাক্লবশিং ওদিও-ভিজুএল প্রেজেন্তেসনগী খুত্থাঙদা উত্তুনা লৈবাক পুম্বগী ওইবা ক্লীনলিনেস মুবমেন্তকী ৱাখল্লোন অমদি পাক চাউবা উৎখি।

ৱিন্নর লিস্ত, GFC & ODF রিজল্ত দেসবোর্দ মফমসিদা য়েংবিয়ু।

ইকায়খুম্নরবা রাস্ত্রপতি শ্রিমতি দ্রৌপতি মুরমুগী মপুং ফাবা ৱারোলগীদমক মসিদা নম্বিয়ু।

এৱার্দীশিংগী মপুং ফাবা লিস্তকীদমক মসিদা নম্বিয়ু।

***