ರೈಲ್ವೇ ಸಚಿವಾಲಯ
ಬುಲೆಟ್ ರೈಲು ಯೋಜನೆಯ 21 ಕಿ.ಮೀ ಸಮುದ್ರದಾಳದ ಸುರಂಗದ ಮೊದಲ ವಿಭಾಗವು ಮಹಾರಾಷ್ಟ್ರದ ಘನ್ಸೋಲಿ ಮತ್ತು ಶಿಲ್ಫಾಟಾ ನಡುವೆ ಪ್ರಾರಂಭವಾಗುತ್ತದೆ
ಭಾರತ-ಜಪಾನ್ ಸಹಭಾಗಿತ್ವದಲ್ಲಿ ಮುಂಬೈ-ಅಹಮದಾಬಾದ್ ಬುಲೆಟ್ ರೈಲಿಗೆ ಶಕ್ತಿ ತುಂಬಲಿದೆ ಮುಂದಿನ ತಲೆಮಾರಿನ ಇ-10 ಶಿಂಕಾನ್ಸೆನ್ ರೈಲುಗಳು
ಇ-10 ಶಿಂಕಾನ್ಸೆನ್ ಭಾರತ ಮತ್ತು ಜಪಾನ್ ನಲ್ಲಿ ಏಕಕಾಲದಲ್ಲಿ ಪದಾರ್ಪಣೆ ಮಾಡಲಿದೆ
ಶಿಂಕಾನ್ಸೆನ್ ತಂತ್ರಜ್ಞಾನವು ಸಂಪೂರ್ಣ 508 ಕಿ.ಮೀ ಬುಲೆಟ್ ರೈಲು ಕಾರಿಡಾರ್ ಗೆ ಶಕ್ತಿ ತುಂಬುತ್ತದೆ, ವೇಗ, ಸುರಕ್ಷತೆ ಮತ್ತು ವಿಶ್ವಾಸಾರ್ಹತೆಯನ್ನು ಮರು ವ್ಯಾಖ್ಯಾನಿಸುತ್ತದೆ
Posted On:
14 JUL 2025 4:02PM by PIB Bengaluru
ಬುಲೆಟ್ ರೈಲು ಯೋಜನೆಯು ಬಿ.ಕೆ.ಸಿ ಮತ್ತು ಥಾಣೆ ನಡುವಿನ 21 ಕಿ.ಮೀ ಸಮುದ್ರದಾಳದ ಸುರಂಗದ ಮೊದಲ ವಿಭಾಗವನ್ನು ತೆರೆಯುವ ಪ್ರಮುಖ ಮೈಲಿಗಲ್ಲನ್ನು ಸಾಧಿಸಿದೆ. ಬುಲೆಟ್ ರೈಲು ಯೋಜನೆ ಇತ್ತೀಚೆಗೆ 310 ಕಿ.ಮೀ ವಯಾಡಕ್ಟ್ ನಿರ್ಮಾಣವನ್ನು ಪೂರ್ಣಗೊಳಿಸುವ ಮೂಲಕ ಪ್ರಮುಖ ಮೈಲಿಗಲ್ಲನ್ನು ಸಾಧಿಸಿದೆ. ಹಳಿಗಳನ್ನು ಹಾಕುವುದು, ಓವರ್ ಹೆಡ್ ವಿದ್ಯುತ್ ತಂತಿಗಳು, ನಿಲ್ದಾಣಗಳು ಮತ್ತು ಸೇತುವೆಗಳ ನಿರ್ಮಾಣವು ತ್ವರಿತಗತಿಯಲ್ಲಿ ನಡೆಯುತ್ತಿದೆ. ಮಹಾರಾಷ್ಟ್ರದಲ್ಲಿ ನಿರ್ಮಾಣ ಕಾರ್ಯವೂ ವೇಗವನ್ನು ಪಡೆದುಕೊಂಡಿದೆ. ಸಮಾನಾಂತರವಾಗಿ, ಕಾರ್ಯಾಚರಣೆಗಳು ಮತ್ತು ನಿಯಂತ್ರಣಕ್ಕಾಗಿ ವ್ಯವಸ್ಥೆಗಳ ಸಂಗ್ರಹಣೆಯ ಪ್ರಗತಿಯೂ ಉತ್ತಮವಾಗಿ ನಡೆಯುತ್ತಿದೆ.
ರೋಲಿಂಗ್ ಸ್ಟಾಕ್: ಜಪಾನಿನ ಶಿಂಕಾನ್ಸೆನ್ ಪ್ರಸ್ತುತ ಇ-5 ರೈಲುಗಳನ್ನು ಓಡಿಸುತ್ತಿದೆ. ಮುಂದಿನ ತಲೆಮಾರಿನ ರೈಲುಗಳು ಇ-10. ಜಪಾನ್ ಮತ್ತು ಭಾರತದ ನಡುವಿನ ಕಾರ್ಯತಂತ್ರದ ಸಹಭಾಗಿತ್ವದ ಸ್ಫೂರ್ತಿಯಲ್ಲಿ, ಮುಂಬೈ-ಅಹಮದಾಬಾದ್ ಬುಲೆಟ್ ರೈಲು ಯೋಜನೆಯಲ್ಲಿ ಇ-10 ಶಿಂಕಾನ್ಸೆನ್ ರೈಲುಗಳನ್ನು ಪರಿಚಯಿಸಲು ಜಪಾನ್ ಸರ್ಕಾರ ಒಪ್ಪಿಕೊಂಡಿದೆ. ಇ-10 ಅನ್ನು ಭಾರತ ಮತ್ತು ಜಪಾನ್ ನಲ್ಲಿ ಏಕಕಾಲದಲ್ಲಿ ಪರಿಚಯಿಸಲಾಗುವುದು ಎಂಬುದು ಗಮನಾರ್ಹವಾಗಿದೆ.
ಜಪಾನಿನ ತಂತ್ರಜ್ಞಾನ: ಸಂಪೂರ್ಣ 508 ಕಿ.ಮೀ ಕಾರಿಡಾರ್ ಅನ್ನು ಜಪಾನಿನ ಶಿಂಕಾನ್ಸೆನ್ ತಂತ್ರಜ್ಞಾನದೊಂದಿಗೆ ಅಭಿವೃದ್ಧಿಪಡಿಸಲಾಗುತ್ತಿದೆ. ಇದು ವೇಗ, ಸುರಕ್ಷತೆ ಮತ್ತು ವಿಶ್ವಾಸಾರ್ಹತೆಗೆ ಹೊಸ ಮಾನದಂಡಗಳನ್ನು ನಿಗದಿಪಡಿಸುತ್ತದೆ. ಇದು ಭಾರತ ಮತ್ತು ಜಪಾನ್ ನಡುವಿನ ಆಳವಾದ ಕಾರ್ಯತಂತ್ರ ಮತ್ತು ತಾಂತ್ರಿಕ ಸಹಕಾರವನ್ನು ಪ್ರತಿಬಿಂಬಿಸುತ್ತದೆ.
ತ್ವರಿತಗತಿಯಲ್ಲಿ ನಿರ್ಮಾಣ: ಜೋಡಣೆಯುದ್ದಕ್ಕೂ ಸಿವಿಲ್ ಕಾಮಗಾರಿಗಳು ತ್ವರಿತಗತಿಯಲ್ಲಿ ಪ್ರಗತಿಯಲ್ಲಿವೆ. 310 ಕಿ.ಮೀ ವಯಾಡಕ್ಟ್ ನಿರ್ಮಿಸಲಾಗಿದೆ. 15 ನದಿ ಸೇತುವೆಗಳು ಪೂರ್ಣಗೊಂಡಿವೆ ಮತ್ತು 4 ನಿರ್ಮಾಣದ ಮುಂದುವರಿದ ಹಂತದಲ್ಲಿವೆ. 12 ನಿಲ್ದಾಣಗಳಲ್ಲಿ, 5 ಪೂರ್ಣಗೊಂಡಿದೆ ಮತ್ತು ಇನ್ನೂ 3 ನಿಲ್ದಾಣಗಳು ಈಗ ಪೂರ್ಣಗೊಳ್ಳುವ ಹಂತವನ್ನು ತಲುಪುತ್ತಿವೆ. ಬಿ.ಕೆ.ಸಿಯಲ್ಲಿರುವ ನಿಲ್ದಾಣವು ಇಂಜಿನಿಯರಿಂಗ್ ಅದ್ಭುತವಾಗಿದೆ. ಈ ನಿಲ್ದಾಣವು ನೆಲದಿಂದ 32.5 ಮೀಟರ್ ಆಳದಲ್ಲಿದೆ ಮತ್ತು ನೆಲದಿಂದ 95 ಮೀಟರ್ ಎತ್ತರದ ಕಟ್ಟಡದ ನಿರ್ಮಾಣವನ್ನು ಬೆಂಬಲಿಸಲು ಅಡಿಪಾಯವನ್ನು ವಿನ್ಯಾಸಗೊಳಿಸಲಾಗಿದೆ.
ಪೈಪ್‌ಲೈನ್‌ನಲ್ಲಿ ಭವಿಷ್ಯದ ಕಾರಿಡಾರ್‌ಗಳು: ಮುಂಬೈ-ಅಹಮದಾಬಾದ್ ಹೈಸ್ಪೀಡ್ ರೈಲು (ಎಂ.ಎ.ಎಚ್.ಎಸ್.ಆರ್) ಯೋಜನೆಯ ಯಶಸ್ಸು ಭಾರತದಲ್ಲಿ ಭವಿಷ್ಯದ ಬುಲೆಟ್ ರೈಲು ಕಾರಿಡಾರ್ ಗಳಿಗೆ ಅಡಿಪಾಯ ಹಾಕುತ್ತಿದೆ. ಭವಿಷ್ಯದ ಕಾರಿಡಾರ್ ಗಳು ಸಹ ಸಕ್ರಿಯ ಪರಿಗಣನೆಯಲ್ಲಿವೆ.
ಅಭಿವೃದ್ಧಿಯ ಈ ಗಮನಾರ್ಹ ವೇಗವು ಅತ್ಯಾಧುನಿಕ ಜಾಗತಿಕ ತಂತ್ರಜ್ಞಾನವನ್ನು ಬಳಸಿಕೊಂಡು ವಿಶ್ವದರ್ಜೆಯ ಮೂಲಸೌಕರ್ಯವನ್ನು ಕಾರ್ಯಗತಗೊಳಿಸುವ ಭಾರತದ ಸಾಮರ್ಥ್ಯವನ್ನು ಪ್ರದರ್ಶಿಸುತ್ತದೆ, ಈ ಪರಿವರ್ತನಾತ್ಮಕ ಪ್ರಯಾಣದಲ್ಲಿ ಜಪಾನ್ ವಿಶ್ವಾಸಾರ್ಹ ಪಾಲುದಾರರಾಗಿ ಪ್ರಮುಖ ಪಾತ್ರ ವಹಿಸುತ್ತದೆ.
*****
(Release ID: 2144699)