ആദരണീയരായ വിശിഷ്ട വ്യക്തികളെ...!

ക്രിസ്മസ് ദിനത്തിൽ നിങ്ങൾക്കെല്ലാവർക്കും,  എല്ലാ പൗരന്മാർക്കും, പ്രത്യേകിച്ച് ലോകമെമ്പാടുമുള്ള ക്രിസ്ത്യൻ സമൂഹത്തിനും ഹൃദയം നിറഞ്ഞ ആശംസകൾ. ക്രിസ്മസ് ആശംസകൾ!

മൂന്നോ നാലോ ദിവസം മുമ്പ്, എന്റെ സഹപ്രവർത്തകനും കേന്ദ്ര മന്ത്രിയുമായ ജോർജ്ജ് കുര്യന്റെ വീട്ടിൽ നടന്ന ഒരു ക്രിസ്മസ് ആഘോഷത്തിൽ ഞാൻ പങ്കെടുത്തു. ഇന്ന്, നിങ്ങളുടെ എല്ലാവരുടെയും കൂടെ ഇവിടെ വരാൻ കഴിഞ്ഞതിൽ എനിക്ക് സന്തോഷമുണ്ട്. കാത്തലിക് ബിഷപ്പ്സ് കോൺഫറൻസ് ഓഫ് ഇന്ത്യ (സിബിസിഐ) സംഘടിപ്പിച്ച ഈ പരിപാടി ക്രിസ്മസിന്റെ സന്തോഷത്തിൽ നിങ്ങളോടൊപ്പം ചേരാൻ അവസരം നൽകുന്നു. ഈ ദിവസം നമുക്കെല്ലാവർക്കും അവിസ്മരണീയമായിരിക്കും. ഈ വർഷം സിബിസിഐ സ്ഥാപിതമായതിന്റെ 80-ാം വാർഷികം ആഘോഷിക്കുന്നതിനാൽ ഈ അവസരം പ്രത്യേകിച്ചും സവിശേഷമാണ്. ഈ സുപ്രധാന അവസരത്തിൽ, സിബിസിഐക്കും അതുമായി ബന്ധപ്പെട്ട എല്ലാവർക്കും എന്റെ ഹൃദയംഗമമായ അഭിനന്ദനങ്ങൾ അറിയിക്കുന്നു.

സുഹൃത്തുക്കളേ,

കഴിഞ്ഞ വർഷം, പ്രധാനമന്ത്രിയുടെ വസതിയിൽ നിങ്ങളോടൊപ്പം ക്രിസ്മസ് ആഘോഷിക്കാൻ എനിക്ക് അവസരം ലഭിച്ചു. ഇന്ന്, നാമെല്ലാവരും സിബിസിഐ ക്യാമ്പസിൽ ഒത്തുകൂടിയിരിക്കുകയാണ്. മുമ്പ്, ഈസ്റ്റർ സമയത്ത് ഞാൻ സേക്രഡ് ഹാർട്ട് കത്തീഡ്രൽ പള്ളി സന്ദർശിച്ചിരുന്നു. നിങ്ങളിൽ നിന്ന് എല്ലാവരിൽ നിന്നും ഇത്രയും സ്നേഹവും വാത്സല്യവും ലഭിച്ചതിൽ ഞാൻ ഭാഗ്യവാനാണ്. പരിശുദ്ധ ഫ്രാൻസിസ് മാർപാപ്പയിൽ നിന്ന് അതേ വാത്സല്യം സ്വീകരിക്കാൻ എനിക്ക് ഭാഗ്യം ലഭിച്ചിട്ടുണ്ട്. ഈ വർഷത്തിന്റെ തുടക്കത്തിൽ, ഇറ്റലിയിൽ നടന്ന ജി7 ഉച്ചകോടിക്കിടെ പരിശുദ്ധ ഫ്രാൻസിസ് മാർപാപ്പയെ കാണാൻ എനിക്ക് അവസരം ലഭിച്ചു. കഴിഞ്ഞ മൂന്ന് വർഷത്തിനിടെ ഇത് ഞങ്ങളുടെ രണ്ടാമത്തെ കൂടിക്കാഴ്ചയായിരുന്നു. ഭാരതം സന്ദർശിക്കാൻ ഞാൻ അദ്ദേഹത്തെ ക്ഷണിക്കുകയും ചെയ്തു. അതുപോലെ, സെപ്റ്റംബറിൽ ന്യൂയോർക്ക് സന്ദർശിച്ചപ്പോൾ, കർദ്ദിനാൾ പിയട്രോ പരോളിനുമായി എനിക്ക് ഒരു കൂടിക്കാഴ്ച ഉണ്ടായിരുന്നു. ഈ ആത്മീയ കൂടിക്കാഴ്ചകൾ, ഈ ആത്മീയ സംഭാഷണങ്ങൾ, സേവനത്തിനായുള്ള നമ്മുടെ ദൃഢനിശ്ചയത്തെ ശക്തിപ്പെടുത്തുന്ന ഒരു ഊർജ്ജം നൽകുന്നു.

സുഹൃത്തുക്കളേ,

അടുത്തിടെ, കർദ്ദിനാൾ ജോർജ്ജ് കൂവക്കാടിനെ കാണാനും അദ്ദേഹത്തെ ആദരിക്കാനും എനിക്ക് അവസരം ലഭിച്ചു. ഏതാനും ആഴ്ചകൾക്ക് മുമ്പ്, പരിശുദ്ധ ഫ്രാൻസിസ് മാർപാപ്പ കർദ്ദിനാൾ ജോർജ്ജ് കൂവക്കാടിന് കർദ്ദിനാൾ പദവി നൽകി. ഈ അവസരത്തിൽ, കേന്ദ്രമന്ത്രി ജോർജ്ജ് കുര്യന്റെ നേതൃത്വത്തിൽ ഇന്ത്യാ ​ഗവൺമെന്റ് രാജ്യത്തെ പ്രതിനിധീകരിക്കുന്നതിനായി ഒരു ഉന്നതതല പ്രതിനിധി സംഘത്തെ ഔദ്യോഗികമായി അയച്ചു. ഒരു ഭാരതപുത്രൻ വിജയത്തിന്റെ ഉന്നതിയിലെത്തുമ്പോൾ, മുഴുവൻ രാജ്യത്തിനും അഭിമാനം തോന്നുക സ്വാഭാവികമാണ്. ഒരിക്കൽ കൂടി, കർദ്ദിനാൾ ജോർജ് കൂവക്കാടിന് എന്റെ അഭിനന്ദനങ്ങളും ആശംസകളും നേരുന്നു.

സുഹൃത്തുക്കളേ,

ഇന്ന് നിങ്ങൾക്കിടയിൽ ഇവിടെ നിൽക്കുമ്പോൾ ഒരുപാട് ഓർമ്മകൾ തിരികെ കൊണ്ടുവരുന്നു. ഒരു പതിറ്റാണ്ട് മുമ്പ് യുദ്ധക്കെടുതിയിൽ അകപ്പെട്ട അഫ്ഗാനിസ്ഥാനിൽ നിന്ന് ഫാദർ അലക്സിസ് പ്രേം കുമാറിനെ സുരക്ഷിതമായി തിരികെ കൊണ്ടുവന്ന നിമിഷങ്ങൾ ഞാൻ വളരെ സംതൃപ്തിയോടെ ഓർക്കുന്നു. എട്ട് മാസത്തോളം അദ്ദേഹം അവിടെ വലിയ അപകടത്തിൽ കുടുങ്ങി ബന്ദിയാക്കപ്പെട്ടു. ആ സാഹചര്യത്തിൽ നിന്ന് അദ്ദേഹത്തെ രക്ഷിക്കാൻ നമ്മുടെ ​ഗവൺമെന്റ് സാധ്യമായ എല്ലാ ശ്രമങ്ങളും നടത്തി. അഫ്ഗാനിസ്ഥാനിലെ ആ സാഹചര്യങ്ങളിൽ അത് എത്ര വെല്ലുവിളി നിറഞ്ഞതായിരിക്കുമെന്ന് നിങ്ങൾക്ക് ഊഹിക്കാൻ കഴിയും. എന്നിട്ടും, ഞങ്ങൾ വിജയിച്ചു. ആ സമയത്ത് അദ്ദേഹത്തോടും കുടുംബാംഗങ്ങളോടും സംസാരിച്ചത് ഞാൻ ഇപ്പോഴും ഓർക്കുന്നു - അവരുടെ വാക്കുകൾ, അവരുടെ സന്തോഷം, എനിക്ക് ഒരിക്കലും മറക്കാൻ കഴിയാത്ത നിമിഷങ്ങളാണ്. അതുപോലെ, യെമനിൽ ഫാദർ ടോമിനെ ബന്ദിയാക്കപ്പെട്ടപ്പോൾ, അദ്ദേഹത്തെ സുരക്ഷിതമായി വീട്ടിലേക്ക് തിരികെ കൊണ്ടുവരാൻ നമ്മുടെ ഗവൺമെന്റ് സാധ്യമായ എല്ലാ ശ്രമങ്ങളും നടത്തി. അദ്ദേഹം തിരിച്ചെത്തിയ ശേഷം ഞാൻ അദ്ദേഹത്തെ എന്റെ വസതിയിലേക്ക് ക്ഷണിച്ചു. ഗൾഫ് രാജ്യങ്ങളിലെ പ്രതിസന്ധി ഘട്ടങ്ങളിൽ നമ്മുടെ നഴ്‌സ് സഹോദരിമാർ കുടുങ്ങിയപ്പോൾ, മുഴുവൻ രാജ്യവും അവരുടെ സുരക്ഷയെക്കുറിച്ച് വളരെയധികം ആശങ്കാകുലരായിരുന്നു. അവരെ തിരികെ നാട്ടിലേക്ക് കൊണ്ടുവരാനുള്ള ഞങ്ങളുടെ നിരന്തരമായ ശ്രമങ്ങളും ഫലം കണ്ടു. ഞങ്ങളെ സംബന്ധിച്ചിടത്തോളം ഇവ വെറും നയതന്ത്ര ദൗത്യങ്ങളല്ല; വൈകാരിക പ്രതിബദ്ധതകളായിരുന്നു. നമ്മുടെ കുടുംബാംഗങ്ങളെ രക്ഷിക്കാനുള്ള ദൗത്യങ്ങളായിരുന്നു ഇവ. ഒരു ഇന്ത്യക്കാരൻ ലോകത്ത് എവിടെയായിരുന്നാലും, അവർ എന്ത് ബുദ്ധിമുട്ടുകൾ നേരിട്ടാലും, എല്ലാ പ്രതിസന്ധികളിൽ നിന്നും അവരെ സുരക്ഷിതമായി തിരികെ കൊണ്ടുവരേണ്ടത് ഇന്നത്തെ ഭാരതത്തിന്റെ കടമയായി കാണുന്നു.

സുഹൃത്തുക്കളേ,

ഭാരതം അതിന്റെ വിദേശനയത്തിൽ ദേശീയ താൽപ്പര്യത്തിന് മാത്രമല്ല, മനുഷ്യ താൽപ്പര്യത്തിനും മുൻഗണന നൽകുന്നു. കോവിഡ്-19 മഹാമാരി സമയത്ത് ലോകം ഇതിന് സാക്ഷ്യം വഹിക്കുകയും അനുഭവിക്കുകയും ചെയ്തു. ഇത്രയും വലിയ ഒരു മഹാമാരി ഉണ്ടായപ്പോൾ, മനുഷ്യാവകാശങ്ങളെയും മാനവികതയെയും കുറിച്ച് പലപ്പോഴും സംസാരിക്കുകയും, ചിലപ്പോൾ ഈ തത്വങ്ങൾ നയതന്ത്ര ഉപകരണങ്ങളായി ഉപയോഗിക്കുകയും ചെയ്ത പല രാജ്യങ്ങളും ദരിദ്രരും ചെറുതുമായ രാജ്യങ്ങളെ സഹായിക്കുന്നതിൽ നിന്ന് പിന്മാറി. ആ നിർണായക സമയങ്ങളിൽ, അവർ സ്വന്തം താൽപ്പര്യങ്ങളിൽ മാത്രം ശ്രദ്ധ കേന്ദ്രീകരിച്ചു. മറുവശത്ത്, ഭാരതം അതിന്റെ കഴിവുകൾക്കപ്പുറം പോയി നിരവധി രാജ്യങ്ങൾക്ക് കാരുണ്യത്തിന്റെ ആത്മാവോടെ സഹായം നൽകി. 150-ലധികം രാജ്യങ്ങളിലേക്ക് ഞങ്ങൾ മരുന്നുകൾ അയയ്ക്കുകയും നിരവധി രാജ്യങ്ങൾക്ക് വാക്സിനുകൾ നൽകുകയും ചെയ്തു. ഇത് ലോകമെമ്പാടും അഗാധമായ പോസിറ്റീവ് സ്വാധീനം ചെലുത്തി. അടുത്തിടെ, ഗയാനയിലേക്കും പിന്നീട് കുവൈറ്റിലേക്കും ഞാൻ നടത്തിയ സന്ദർശന വേളയിൽ, ഭാരതത്തോടുള്ള വ്യാപകമായ പ്രശംസ ഞാൻ കേട്ടു. ഭാരതം നൽകിയ സഹായത്തിന്, പ്രത്യേകിച്ച് വാക്സിനുകൾ വഴി, അവിടത്തെ ആളുകൾ അഗാധമായ നന്ദി പ്രകടിപ്പിച്ചു. അത്തരം വികാരങ്ങളുള്ള ഒരേയൊരു രാഷ്ട്രം ഗയാന മാത്രമല്ല. പല ദ്വീപ് രാഷ്ട്രങ്ങളും, പസഫിക് രാഷ്ട്രങ്ങളും, കരീബിയൻ രാഷ്ട്രങ്ങളും ഭാരതത്തെ പരസ്യമായി അഭിനന്ദിക്കുന്നു. ഈ മനുഷ്യത്വ മനോഭാവം, എല്ലാവരുടെയും ക്ഷേമത്തിനായുള്ള നമ്മുടെ സമർപ്പണം, നമ്മുടെ മാനുഷിക കേന്ദ്രീകൃത സമീപനം എന്നിവ 21-ാം നൂറ്റാണ്ടിലെ ലോകത്തെ പുതിയ ഉയരങ്ങളിലേക്ക് കൊണ്ടുപോകുന്നതിൽ നിർണായകമാകും.

സുഹൃത്തുക്കളേ,

കർത്താവായ ക്രിസ്തുവിന്റെ പഠിപ്പിക്കലുകൾ സ്നേഹം, ഐക്യം, സാഹോദര്യം എന്നിവ ആഘോഷിക്കുന്നു. ഈ ആത്മാവിനെ കൂടുതൽ ശക്തമാക്കാൻ നാമെല്ലാവരും പ്രവർത്തിക്കേണ്ടത് പ്രധാനമാണ്. എന്നാൽ, അക്രമം പ്രചരിപ്പിക്കാനും സമൂഹത്തിൽ അസ്വസ്ഥത സൃഷ്ടിക്കാനും ശ്രമങ്ങൾ നടക്കുമ്പോൾ എന്റെ ഹൃദയം വേദനിക്കുന്നു. കുറച്ച് ദിവസങ്ങൾക്ക് മുമ്പ്, ജർമ്മനിയിലെ ഒരു ക്രിസ്മസ് മാർക്കറ്റിൽ എന്താണ് സംഭവിച്ചതെന്ന് നമ്മൾ കണ്ടു. 2019 ലെ ഈസ്റ്റർ സമയത്ത് ശ്രീലങ്കയിലെ പള്ളികൾ ആക്രമിക്കപ്പെട്ടു. ബോംബാക്രമണത്തിൽ നമുക്ക് നഷ്ടപ്പെട്ടവർക്ക് ശ്രദ്ധാഞ്ജലി അർപ്പിക്കാൻ ഞാൻ കൊളംബോയിലേക്ക് പോയി.  എല്ലാവരും ഒത്തുചേർന്ന് അത്തരം വെല്ലുവിളികളെ നേരിടേണ്ടത് പ്രധാനമാണ്.

സുഹൃത്തുക്കളേ,

നിങ്ങൾക്കെല്ലാവർക്കും പ്രത്യേക പ്രാധാന്യമുണ്ടെന്ന് അറിയാവുന്ന ജൂബിലി വർഷം ആരംഭിക്കുമ്പോൾ ഈ ക്രിസ്മസ് കൂടുതൽ സവിശേഷമാകുകയാണ്. ജൂബിലി വർഷത്തിനായുള്ള വിവിധ സംരംഭങ്ങൾക്ക് നിങ്ങൾക്കെല്ലാവർക്കും ഞാൻ ആശംസകൾ നേരുന്നു. ഇത്തവണ, ജൂബിലി വർഷത്തിനായി, നിങ്ങൾ പ്രത്യാശയെ ചുറ്റിപ്പറ്റിയുള്ള ഒരു പ്രമേയം തിരഞ്ഞെടുത്തു. വിശുദ്ധ ബൈബിൾ പ്രത്യാശയെ ശക്തിയുടെയും സമാധാനത്തിന്റെയും ഉറവിടമായി കാണുന്നു. അതിൽ പറയുന്നു: "നിങ്ങൾക്ക് തീർച്ചയായും ഒരു ഭാവി പ്രത്യാശയുണ്ട്, നിങ്ങളുടെ പ്രത്യാശ വിച്ഛേദിക്കപ്പെടില്ല." പ്രത്യാശയും പോസിറ്റീവിറ്റിയും നമ്മെ നയിക്കുന്നു. മാനവികതയ്ക്കായി പ്രത്യാശിക്കാം, മെച്ചപ്പെട്ട ലോകത്തിനായി പ്രത്യാശിക്കാം, സമാധാനം, പുരോഗതി, സമൃദ്ധി എന്നിവയ്ക്കായി പ്രത്യാശിക്കാം.

സുഹൃത്തുക്കളേ,

കഴിഞ്ഞ 10 വർഷത്തിനിടയിൽ, നമ്മുടെ രാജ്യത്തെ 25 കോടി ജനങ്ങൾ ദാരിദ്ര്യത്തെ അതിജീവിച്ചു. ദരിദ്രർ ഒരു പ്രതീക്ഷ വളർത്തിയെടുത്തതിനാലാണ് ഇത് സാധ്യമായത് - അതെ, ദാരിദ്ര്യത്തിനെതിരായ പോരാട്ടം നാം വിജയിക്കുമെന്ന് പ്രതീക്ഷിക്കുന്നു. അതേ കാലയളവിൽ, ലോകത്തിലെ പത്താമത്തെ വലിയ സമ്പദ്‌വ്യവസ്ഥയിൽ നിന്ന് അഞ്ചാമത്തെ വലിയ സമ്പദ്‌വ്യവസ്ഥയിലേക്ക് ഭാരതം ഉയർന്നു. നമ്മൾ സ്വയം വിശ്വസിച്ചതിനാലും, പ്രതീക്ഷ നഷ്ടപ്പെടാത്തതിനാലും, ദൃഢനിശ്ചയത്തിലൂടെ ഈ ലക്ഷ്യം നേടിയതിനാലുമാണ് ഇത് സംഭവിച്ചത്. ഭാരതത്തിന്റെ 10 വർഷത്തെ വികസന യാത്ര നമുക്ക് വരും വർഷങ്ങളിലും നമ്മുടെ ഭാവിയിലും പുതിയ പ്രതീക്ഷകളും എണ്ണമറ്റ അഭിലാഷങ്ങളും നൽകി. ഈ ദശകത്തിൽ, നമ്മുടെ യുവാക്കൾക്ക് വിജയത്തിലേക്കുള്ള പുതിയ പാതകൾ തുറന്നിട്ട അവസരങ്ങൾ ലഭിച്ചു. സ്റ്റാർട്ടപ്പുകളിലായാലും, ശാസ്ത്രത്തിലായാലും, കായികരംഗത്തായാലും, സംരംഭകത്വത്തിലായാലും, നമ്മുടെ ആത്മവിശ്വാസമുള്ള യുവാക്കൾ രാജ്യത്തെ പുരോഗതിയുടെ പുതിയ പാതകളിലേക്ക് നയിക്കുന്നു. 'വികസിത ഭാരതം' എന്ന സ്വപ്നം നിസ്സംശയമായും യാഥാർത്ഥ്യമാകുമെന്ന ആത്മവിശ്വാസവും പ്രതീക്ഷയും നമ്മുടെ യുവാക്കൾ നമ്മിൽ പകർന്നു. കഴിഞ്ഞ ദശകത്തിൽ, നമ്മുടെ രാജ്യത്തെ സ്ത്രീകൾ ശാക്തീകരണത്തിന്റെ പുതിയ അധ്യായങ്ങൾ രചിച്ചു. സംരംഭകത്വം മുതൽ ഡ്രോണുകൾ, സായുധ സേനയിലെ ഉത്തരവാദിത്തങ്ങൾ ഏറ്റെടുത്ത് പറക്കും വിമാനങ്ങൾ വരെ, സ്ത്രീകൾ അവരുടെ വ്യക്തിമുദ്ര പതിപ്പിക്കാത്ത ഒരു മേഖലയുമില്ല. ലോകത്തിലെ ഒരു രാജ്യത്തിനും സ്ത്രീകളുടെ പുരോഗതിയില്ലാതെ മുന്നോട്ട് പോകാൻ കഴിയില്ല. ഇന്ന്, നമ്മുടെ തൊഴിൽ ശക്തിയിലും, പ്രൊഫഷണൽ മേഖലകളിലും സ്ത്രീകളുടെ പങ്കാളിത്തം വർദ്ധിക്കുന്നത് കാണുമ്പോൾ, അത് നമ്മുടെ പ്രതീക്ഷകളെ കൂടുതൽ ശക്തിപ്പെടുത്തുകയും നമ്മുടെ രാജ്യത്തിന്റെ ശോഭനമായ ഭാവിക്കായി പുതിയ അഭിലാഷങ്ങൾ സൃഷ്ടിക്കുകയും ചെയ്യുന്നു.

കഴിഞ്ഞ 10 വർഷത്തിനിടയിൽ, പര്യവേക്ഷണം ചെയ്യപ്പെടാത്തതോ പര്യവേക്ഷണം ചെയ്യാനാകാത്തതോ ആയ നിരവധി മേഖലകളിൽ ഭാരതം ഗണ്യമായ മുന്നേറ്റം നടത്തിയിട്ടുണ്ട്. മൊബൈൽ നിർമ്മാണമായാലും സെമികണ്ടക്ടർ നിർമ്മാണമായാലും, ആഗോള ഉൽ‌പാദന മേഖലയിൽ ഭാരതം അതിവേഗം അതിന്റെ സ്ഥാനം ഉറപ്പിച്ചുവരികയാണ്. സാങ്കേതികവിദ്യ മുതൽ ഫിൻ‌ടെക് വരെ, ഈ പുരോഗതികളിലൂടെ ഭാരതം ദരിദ്രരെ ശാക്തീകരിക്കുക മാത്രമല്ല, ഒരു ആഗോള ടെക് ഹബ്ബായി സ്വയം സ്ഥാപിക്കുകയും ചെയ്യുന്നു. അടിസ്ഥാന സൗകര്യ വികസനത്തിന്റെ വേഗതയും അഭൂതപൂർവമാണ്. ആയിരക്കണക്കിന് കിലോമീറ്റർ എക്സ്പ്രസ് വേകൾ ഞങ്ങൾ നിർമ്മിക്കുക മാത്രമല്ല, നമ്മുടെ ഗ്രാമങ്ങളെ ഗ്രാമീണ റോഡുകളുമായി ബന്ധിപ്പിക്കുകയും ചെയ്യുന്നു. ഗതാഗതം മെച്ചപ്പെടുത്തുന്നതിനായി, നൂറുകണക്കിന് കിലോമീറ്റർ മെട്രോ റൂട്ടുകൾ നിർമ്മിക്കപ്പെടുന്നു. ഈ നേട്ടങ്ങൾ ഭാരതത്തിന് അവിശ്വസനീയമായ വേഗതയിൽ അതിന്റെ ലക്ഷ്യങ്ങൾ കൈവരിക്കാൻ കഴിയുമെന്ന് നമുക്ക് വളരെയധികം പ്രതീക്ഷയും ശുഭാപ്തിവിശ്വാസവും നൽകുന്നു. ഈ നേട്ടങ്ങൾ നമ്മിൽ മാത്രം ഒതുങ്ങുന്നില്ല; മുഴുവൻ ലോകവും ഭാരതത്തെ ഒരേ പ്രതീക്ഷയോടെയും ശുഭാപ്തിവിശ്വാസത്തോടെയും നോക്കുന്നു.

സുഹൃത്തുക്കളേ,

"പരസ്പരം ഭാരങ്ങൾ വഹിക്കുക" എന്ന് ബൈബിൾ പറയുന്നു, അതായത് നമ്മൾ പരസ്പരം പരിപാലിക്കുകയും പരസ്പരം ക്ഷേമത്തിന്റെ മനോഭാവം വളർത്തുകയും വേണം. ഈ മനോഭാവത്തോടെയാണ് നമ്മുടെ സ്ഥാപനങ്ങളും സംഘടനകളും സാമൂഹിക സേവനത്തിൽ ഒരു പ്രധാന പങ്ക് വഹിക്കുന്നത്. വിദ്യാഭ്യാസ മേഖലയിൽ പുതിയ സ്കൂളുകൾ സ്ഥാപിക്കുക, വിദ്യാഭ്യാസത്തിലൂടെ ഓരോ സമൂഹത്തെയും സമൂഹത്തിലെ എല്ലാ വിഭാഗങ്ങളെയും ഉയർത്താൻ ശ്രമിക്കുക, അല്ലെങ്കിൽ ആരോഗ്യ സംരക്ഷണ മേഖലയിൽ സാധാരണക്കാരെ സേവിക്കാൻ പ്രതിജ്ഞാബദ്ധമാക്കുക എന്നിവയാണെങ്കിലും, ഈ ശ്രമങ്ങളെ ഞങ്ങളുടെ പൊതുവായ ഉത്തരവാദിത്തമായി ഞങ്ങൾ കണക്കാക്കുന്നു.

സുഹൃത്തുക്കളേ,

യേശുക്രിസ്തു ലോകത്തിന് കാരുണ്യത്തിന്റെയും നിസ്വാർത്ഥ സേവനത്തിന്റെയും പാത കാണിച്ചുതന്നു. ഈ മൂല്യങ്ങൾ നമ്മുടെ ജീവിതത്തിൽ ഉൾപ്പെടുത്താനും നമ്മുടെ കടമകൾക്ക് എപ്പോഴും മുൻഗണന നൽകാനും വേണ്ടി നാം ക്രിസ്മസ് ആഘോഷിക്കുകയും യേശുവിനെ ഓർമ്മിക്കുകയും ചെയ്യുന്നു. ഇത് നമ്മുടെ വ്യക്തിപരമായ ഉത്തരവാദിത്തം മാത്രമല്ല, ഒരു സാമൂഹിക ബാധ്യതയും ഒരു രാഷ്ട്രമെന്ന നിലയിൽ നമ്മുടെ കടമയും കൂടിയാണെന്ന് ഞാൻ വിശ്വസിക്കുന്നു. ഇന്ന്, "എല്ലാവർക്കുമൊപ്പം എല്ലാവരു‌ടെയും വികസനം കൂട്ടായ പരിശ്രമം" എന്ന ദൃഢനിശ്ചയത്തിൽ ഉൾച്ചേർന്ന ഈ ആത്മാവോടെയാണ് ഇന്ത്യ മുന്നേറുന്നത്. മുമ്പ് ഒരിക്കലും പരിഗണിക്കപ്പെടാത്തതും എന്നാൽ മാനുഷിക വീക്ഷണകോണിൽ നിന്ന് നിർണായകവുമായ നിരവധി വിഷയങ്ങളുണ്ടായിരുന്നു. ഞങ്ങൾ അവയെ ഞങ്ങളുടെ മുൻഗണനയാക്കി. കർശനമായ നിയമങ്ങളിൽ നിന്നും ഔപചാരികതകളിൽ നിന്നും ഭരണത്തെ ഞങ്ങൾ മോചിപ്പിക്കുകയും സംവേദനക്ഷമത ഒരു പ്രധാന മാനദണ്ഡമായി നിശ്ചയിക്കുകയും ചെയ്തു. എല്ലാ ദരിദ്രർക്കും ഒരു പക്ക (സ്ഥിരമായ) വീട് ഉറപ്പാക്കുന്നതിലോ, ഇരുട്ട് അകറ്റാൻ എല്ലാ ഗ്രാമങ്ങളിലും വൈദ്യുതി എത്തിക്കുന്നതിലോ, എല്ലാ വീടുകളിലും ശുദ്ധമായ കുടിവെള്ളം എത്തിക്കുന്നതിലോ, പണത്തിന്റെ അഭാവം മൂലം ആർക്കും ചികിത്സ നിഷേധിക്കപ്പെടുന്നില്ലെന്ന് ഉറപ്പാക്കുന്നതിലോ ആകട്ടെ,  അത്തരം സേവനങ്ങൾ ഉറപ്പുനൽകുന്നതുമായ ഒരു സംവിധാനം ഞങ്ങൾ സൃഷ്ടിച്ചു.

അത്തരമൊരു ഗ്യാരണ്ടി ലഭിക്കുമ്പോൾ ഒരു ദരിദ്ര കുടുംബത്തിന്റെ ചുമലിൽ നിന്ന് എത്രമാത്രം ഭാരം നീക്കപ്പെടുമെന്ന് നിങ്ങൾക്ക് ഊഹിക്കാവുന്നതേയുള്ളൂ. കുടുംബത്തിലെ ഒരു സ്ത്രീയുടെ പേരിൽ പി എം ആവാസ് യോജന പ്രകാരം ഒരു വീട് നിർമ്മിക്കുമ്പോൾ, അത് സ്ത്രീകളെ വളരെയധികം ശാക്തീകരിക്കുന്നു. സ്ത്രീ ശാക്തീകരണം ശക്തിപ്പെടുത്തുന്നതിനുള്ള ഒരു ചുവടുവയ്പ്പായ നാരി ശക്തി വന്ദൻ അധിനിയം വഴി പാർലമെന്റിൽ സ്ത്രീകളുടെ കൂടുതൽ പങ്കാളിത്തം ഞങ്ങൾ ഉറപ്പാക്കിയിട്ടുണ്ട്. അതുപോലെ, മുൻകാലങ്ങളിൽ, 'ദിവ്യാം​ഗ്' (ഭിന്നശേഷിക്കാർ) സമൂഹത്തിൽ നിന്നുള്ള ആളുകൾ കാര്യമായ ബുദ്ധിമുട്ടുകൾ നേരിട്ടത് നിങ്ങൾ ശ്രദ്ധിച്ചിരിക്കാം. അവരെ പലപ്പോഴും മനുഷ്യത്വരഹിതവും അവരുടെ അന്തസ്സിന് വിരുദ്ധവുമായ പദങ്ങൾ ഉപയോഗിച്ചിരുന്നു. ഒരു സമൂഹമെന്ന നിലയിൽ ഞങ്ങൾക്ക് ഇത് ഖേദകരമായ കാര്യമായിരുന്നു. നമ്മുടെ ​ഗവൺമെന്റ് ഈ തെറ്റ് തിരുത്തി. ബഹുമാനവും ആദരവും നൽകുന്ന "ദിവ്യാം​ഗ്" എന്ന ഐഡന്റിറ്റി ഞങ്ങൾ അവർക്ക് നൽകി. ഇന്ന്, പൊതു അടിസ്ഥാന സൗകര്യങ്ങൾ മുതൽ തൊഴിൽ വരെ എല്ലാ മേഖലകളിലും രാജ്യം '"ദിവ്യാം​ഗ്' സമൂഹത്തിന് മുൻഗണന നൽകുന്നു.

സുഹൃത്തുക്കളേ,

ഒരു രാജ്യത്തിന്റെ സാമ്പത്തിക വികസനത്തിന് ഗവൺമെന്റിലെ സംവേദനക്ഷമത ഒരുപോലെ നിർണായകമാണ്. ഉദാഹരണത്തിന്, നമ്മുടെ രാജ്യത്ത് ഏകദേശം മൂന്ന് കോടി മത്സ്യത്തൊഴിലാളികളും മത്സ്യ കർഷകരും ഉണ്ട്. എന്നിരുന്നാലും, ഈ ദശലക്ഷക്കണക്കിന് ആളുകൾക്ക് മുൻകാലങ്ങളിൽ അർഹിക്കുന്ന ശ്രദ്ധ ലഭിച്ചിരുന്നില്ല. മത്സ്യബന്ധനത്തിനായി ഞങ്ങൾ ഒരു പ്രത്യേക മന്ത്രാലയം രൂപീകരിക്കുകയും കിസാൻ ക്രെഡിറ്റ് കാർഡ് പോലുള്ള ആനുകൂല്യങ്ങൾ മത്സ്യത്തൊഴിലാളികൾക്ക് നൽകാൻ തുടങ്ങുകയും ചെയ്തു. മത്സ്യസമ്പദ യോജന ആരംഭിച്ചു, കടലിൽ മത്സ്യത്തൊഴിലാളികളുടെ സുരക്ഷ ഉറപ്പാക്കാൻ നിരവധി ആധുനിക സംരംഭങ്ങൾ നടപ്പിലാക്കി. ഈ ശ്രമങ്ങൾ ദശലക്ഷക്കണക്കിന് ആളുകളുടെ ജീവിതത്തെ മാറ്റിമറിക്കുക മാത്രമല്ല, രാജ്യത്തിന്റെ സമ്പദ്‌വ്യവസ്ഥയെ ശക്തിപ്പെടുത്തുകയും ചെയ്തു.

സുഹൃത്തുക്കളേ,

ചുവപ്പുകോട്ടയുടെ കൊത്തളത്തിൽ നിന്ന് ഞാൻ സബ്ക പ്രയാസിനെക്കുറിച്ച് സംസാരിച്ചു.   ഇത് കൂട്ടായ പരിശ്രമം എന്നാണ് അർത്ഥമാക്കുന്നത്. രാജ്യത്തിന്റെ ഭാവിയിൽ നമുക്കോരോരുത്തർക്കും ഒരു പ്രധാന പങ്ക് വഹിക്കാനുണ്ട്. ആളുകൾ ഒത്തുചേരുമ്പോൾ നമുക്ക് അത്ഭുതങ്ങൾ സൃഷ്ടിക്കാൻ കഴിയും. ഇന്ന്, സാമൂഹിക ബോധമുള്ള ഇന്ത്യക്കാർ നിരവധി ബഹുജന പ്രസ്ഥാനങ്ങൾക്ക് ശക്തി പകരുന്നു. ശുചിത്വമുള്ള ഒരു ഇന്ത്യ കെട്ടിപ്പടുക്കാൻ സ്വച്ഛ് ഭാരത് സഹായിച്ചു. ഇത് സ്ത്രീകളുടെയും കുട്ടികളുടെയും ആരോഗ്യ ഫലങ്ങളെയും സ്വാധീനിച്ചു. നമ്മുടെ കർഷകർ വളർത്തുന്ന മില്ലറ്റ് അല്ലെങ്കിൽ ശ്രീ അന്ന നമ്മുടെ രാജ്യത്തും ലോകമെമ്പാടും സ്വാഗതം ചെയ്യപ്പെടുന്നു. കരകൗശല വിദഗ്ധരെയും വ്യവസായങ്ങളെയും പ്രോത്സാഹിപ്പിക്കുന്നതിനായി ആളുകൾ തദ്ദേശീയർക്ക് വേണ്ടി ശബ്ദമുയർത്തുന്നു. 'അമ്മയ്ക്കുള്ള ഒരു വൃക്ഷം' എന്നർത്ഥം വരുന്ന एक पेड़ माँ के नाम ജനങ്ങൾക്കിടയിൽ പ്രചാരത്തിലുണ്ട്. ഇത് പ്രകൃതി മാതാവിനെയും നമ്മുടെ അമ്മയെയും ആഘോഷിക്കുന്നു. ക്രിസ്ത്യൻ സമൂഹത്തിൽ നിന്നുള്ള നിരവധി ആളുകളും ഈ സംരംഭങ്ങളിൽ സജീവമാണ്. അത്തരം സംരംഭങ്ങളിൽ നേതൃത്വം നൽകിയതിന് ക്രിസ്ത്യൻ സമൂഹത്തിൽ നിന്നുള്ളവർ ഉൾപ്പെടെയുള്ള നമ്മുടെ യുവാക്കളെ ഞാൻ അഭിനന്ദിക്കുന്നു. വികസിത ഇന്ത്യ കെട്ടിപ്പടുക്കുക എന്ന ലക്ഷ്യം നിറവേറ്റുന്നതിന് അത്തരം കൂട്ടായ ശ്രമങ്ങൾ പ്രധാനമാണ്.

സുഹൃത്തുക്കളേ,

നമ്മുടെ കൂട്ടായ ശ്രമങ്ങൾ നമ്മുടെ രാജ്യത്തെ മുന്നോട്ട് നയിക്കുമെന്ന് എനിക്ക് ഉറപ്പുണ്ട്. ഒരു 'വികസിത ഭാരതം' നമ്മുടെ പൊതുവായ ലക്ഷ്യമാണ്, അത് നമ്മൾ ഒരുമിച്ച് നേടിയെടുക്കണം. ഭാവി തലമുറകൾക്കായി ഒരു ശോഭനമായ ഭാരതം അവശേഷിപ്പിക്കേണ്ടത് നമ്മുടെ കടമയാണ്. ഒരിക്കൽ കൂടി, നിങ്ങൾക്കെല്ലാവർക്കും എന്റെ ഹൃദയംഗമമായ ക്രിസ്മസ്, ജൂബിലി വർഷ ആശംസകൾ നേരുന്നു.

വളരെ നന്ദി.

ഡിസ്ക്ലൈമർ: പ്രധാനമന്ത്രിയുടെ പ്രസംഗത്തിന്റെ ഏകദേശ വിവർത്തനമാണിത്. യഥാർത്ഥ പ്രസംഗം ഹിന്ദിയിലും ചില ഭാഗങ്ങൾ ഇംഗ്ലീഷിലുമായിരുന്നു.

-SK-