കേന്ദ്ര മന്ത്രിമാരായ ശ്രീ ഗജേന്ദ്ര സിംഗ് ഷെഖാവത്ത് ജി, റാവു ഇന്ദർജിത് സിംഗ്, എൽ. മുരു​ഗൻ ജി, ഈ പരിപാടിയിലെ പ്രധാന വ്യക്തി, സാഹിത്യ പണ്ഡിതൻ ശ്രീ സീനി വിശ്വനാഥൻ ജി, പ്രസാധകൻ വി. ശ്രീനിവാസൻ ജി, സന്നിഹിതരായ എല്ലാ ബഹുമാന്യ വിശിഷ്ട വ്യക്തികളേ... മഹതികളേ, മാന്യരേ,

ഇന്ന്, രാഷ്ട്രം മഹാകവി സുബ്രഹ്മണ്യ ഭാരതി ജിയുടെ ജന്മദിനം ആഘോഷിക്കുകയാണ്. സുബ്രഹ്മണ്യ ഭാരതി ജിക്ക് ഞാൻ ശ്രദ്ധാഞ്ജലി അർപ്പിക്കുന്നു. ഇന്ത്യൻ സംസ്കാരത്തിനും സാഹിത്യത്തിനും, ഭാരതത്തിന്റെ സ്വാതന്ത്ര്യസമരത്തിന്റെ ഓർമ്മകൾക്കും, തമിഴ്നാടിന്റെ അഭിമാനത്തിനും ഇത് ഒരു സുപ്രധാന അവസരമാണ്. മഹാകവി സുബ്രഹ്മണ്യ ഭാരതിയുടെ കൃതികളുടെയും സൃഷ്ടികളുടെയും പ്രസിദ്ധീകരണം ഒരു മഹത്തായ സേവന പ്രവർത്തനവും ഒരു വലിയ ആത്മീയ പരിശ്രമവുമാണ്, അത് ഇന്ന് അതിന്റെ പരിസമാപ്തിയിൽ എത്തുന്നു. 21 വാല്യങ്ങളിലായി 'കാല വരിസൈയിൽ ഭാരതീയർ പടൈപ്പുഗൾ' എന്ന കൃതിയുടെ സമാഹാരം അസാധാരണവും അഭൂതപൂർവവുമായ നേട്ടമാണ്, ആറ് പതിറ്റാണ്ടുകളുടെ അക്ഷീണ പരിശ്രമത്തിന്റെയും ശ്രദ്ധേയമായ ധൈര്യത്തിന്റെയും ഫലമാണിത്. ശ്രീ സീനി വിശ്വനാഥൻ ജിയുടെ സമർപ്പണത്തിന്റെയും കഠിനാധ്വാനത്തിന്റെയും ഫലമാണ് ഈ അസാധാരണവും അഭൂതപൂർവവുമായ നേട്ടം, ഇത് ഭാവി തലമുറകൾക്ക് വളരെയധികം പ്രയോജനം ചെയ്യുമെന്ന് എനിക്ക് ഉറപ്പുണ്ട്. പലപ്പോഴും, "ഒരു ജീവിതം, ഒരു ദൗത്യം" എന്ന വാചകം നമ്മൾ കേൾക്കാറുണ്ട്, പക്ഷേ ശ്രീ സീനി ജി ഇതിന്റെ അർത്ഥം ശരിക്കും ഉദാഹരിച്ചിട്ടുണ്ട്. ഇത് ശരിക്കും ആഴത്തിലുള്ള ഒരു സമർപ്പണമാണ്. അദ്ദേഹത്തിന്റെ സ്നേഹപ്രകടനം എനിക്ക് ധർമ്മശാസ്ത്ര ചരിത്രം എഴുതുന്നതിനായി തന്റെ ജീവിതത്തിന്റെ 35 വർഷം നീക്കിവച്ച മഹാമഹോപാധ്യായ പാണ്ഡുരംഗ് വാമൻ കാനെ ഓർമ്മിപ്പിക്കുന്നു. ശ്രീ സീനി വിശ്വനാഥൻ ജിയുടെ ഈ കൃതി അക്കാദമിക് മേഖലകളിൽ ഒരു മാനദണ്ഡം സൃഷ്ടിക്കുമെന്ന് എനിക്ക് ഉറപ്പുണ്ട്. ഈ അസാധാരണ നേട്ടത്തിന് വിശ്വനാഥൻ ജി, അദ്ദേഹത്തിന്റെ സംഘം, നിങ്ങൾക്കെല്ലാവർക്കും എന്റെ ഹൃദയംഗമമായ അഭിനന്ദനങ്ങൾ.

സുഹൃത്തുക്കളേ,

'കാല വരിസൈയിൽ ഭാരതീയർ പടൈപ്പുകൾ' എന്ന 23 വാല്യങ്ങളിൽ ഭാരതി ജിയുടെ സാഹിത്യ സൃഷ്ടികൾ മാത്രമല്ല, അവയുടെ പശ്ചാത്തലത്തെയും ദാർശനിക വിശകലനത്തെയും കുറിച്ചുള്ള ഉൾക്കാഴ്ചകളും ഉൾപ്പെടുന്നുവെന്ന് എനിക്ക് അറിയാൻ കഴിഞ്ഞു. ഓരോ വാല്യത്തിലും വ്യാഖ്യാനങ്ങൾ, വിവരണങ്ങൾ,  എന്നിവ അടങ്ങിയിരിക്കുന്നു, ഇത് ഭാരതി ജിയുടെ ചിന്തകളെ ആഴത്തിൽ മനസ്സിലാക്കുന്നതിനും ആ കാലഘട്ടത്തിന്റെ സന്ദർഭം ഗ്രഹിക്കുന്നതിനും വളരെയധികം സഹായിക്കും. ഗവേഷണ പണ്ഡിതർക്കും ചിന്തകർക്കും ഈ സമാഹാരം വിലപ്പെട്ട ഒരു വിഭവമായിരിക്കും.

സുഹൃത്തുക്കളേ,

ഇന്ന് ഗീതാ ജയന്തിയുടെ ശുഭകരമായ അവസരമാണ്. ശ്രീ സുബ്രഹ്മണ്യ ഭാരതി ജിക്ക് ഗീതയിൽ ആഴത്തിലുള്ള വിശ്വാസവും അതിന്റെ ജ്ഞാനത്തെക്കുറിച്ച് ആഴമായ ധാരണയും ഉണ്ടായിരുന്നു. അദ്ദേഹം ഗീത തമിഴിലേക്ക് വിവർത്തനം ചെയ്യുകയും അതിന് ലളിതവും എളുപ്പത്തിൽ മനസ്സിലാക്കാവുന്നതുമായ ഒരു വ്യാഖ്യാനം നൽകുകയും ചെയ്തു. യാദൃശ്ചികമായി, ഇന്ന് നമ്മൾ ഗീതാ ജയന്തി ആഘോഷിക്കുന്നു, സുബ്രഹ്മണ്യ ഭാരതി ജിയുടെ ജന്മദിനവും അദ്ദേഹത്തിന്റെ കൃതികളുടെ പ്രകാശനവും - ഒരുതരം 'ത്രിവേണി സംഗം' (സംഗമം). ഈ പരിപാടിയിലൂടെ, ഗീതാ ജയന്തി ദിനത്തിൽ നിങ്ങൾക്കും എല്ലാ ഇന്ത്യക്കാർക്കും എന്റെ ഹൃദയംഗമമായ ആശംസകൾ നേരുന്നു.

സുഹൃത്തുക്കളേ,

നമ്മുടെ സംസ്കാരത്തിൽ, വാക്കുകൾ വെറും ആവിഷ്കാര ഉപാധിയല്ല. 'ശബ്ദ ബ്രഹ്മ'ത്തെക്കുറിച്ച് (ദിവ്യവചനം) സംസാരിക്കുകയും അവയുടെ അനന്തമായ ശക്തിയെ അംഗീകരിക്കുകയും ചെയ്യുന്ന ഒരു സംസ്കാരത്തിന്റെ ഭാഗമാണ് നാം. അതിനാൽ, ഋഷിമാരുടെയും ചിന്തകരുടെയും വാക്കുകൾ അവരുടെ ചിന്തകൾ മാത്രമല്ല; അവ അവരുടെ ധ്യാനത്തിന്റെയും അനുഭവങ്ങളുടെയും ഭക്തിയുടെയും സത്തയാണ്. അത്തരം അസാധാരണ ആത്മാക്കളുടെ ജ്ഞാനം ഭാവി തലമുറകൾക്കായി സംരക്ഷിക്കേണ്ടത് നമ്മുടെ കടമയാണ്. അത്തരമൊരു സമാഹാരത്തിന്റെ ഇന്നത്തെ പ്രാധാന്യം നമ്മുടെ പാരമ്പര്യത്തിലെന്നപോലെ ആധുനിക സാഹചര്യത്തിലും പ്രസക്തമാണ്. ഉദാഹരണത്തിന്, ഭഗവാൻ വ്യാസന്റെതായി പറയപ്പെടുന്ന പല കൃതികളും ഇന്നും നമുക്ക് ലഭ്യമാണ്, കാരണം അവ വ്യവസ്ഥാപിതമായി പുരാണങ്ങളിൽ സമാഹരിക്കപ്പെട്ടതാണ്. അതുപോലെ, സ്വാമി വിവേകാനന്ദൻ, ഡോ. ബാബാസാഹേബ് അംബേദ്കർ എന്നിവരുടെ സമ്പൂർണ്ണ കൃതികൾ: രചനകളും പ്രസംഗങ്ങളും, ദീൻ ദയാൽ ഉപാധ്യായ സമ്പൂർണ വാങ്മയ തുടങ്ങിയ ആധുനിക സമാഹാരങ്ങൾ സമൂഹത്തിനും അക്കാദമിക് മേഖലയ്ക്കും വിലമതിക്കാനാവാത്തതായി തെളിഞ്ഞിട്ടുണ്ട്. തിരുക്കുറൾ വിവിധ ഭാഷകളിലേക്ക് വിവർത്തനം ചെയ്യാനുള്ള ശ്രമങ്ങളും തുടരുകയാണ്. കഴിഞ്ഞ വർഷം, പാപുവ ന്യൂ ഗിനിയയിൽ തിരുക്കുറലിന്റെ ടോക് പിസിൻ വിവർത്തനം പുറത്തിറക്കാനുള്ള ഭാഗ്യം എനിക്ക് ലഭിച്ചു, അതിനുമുമ്പ്, ലോക് കല്യാൺ മാർഗിൽ വെച്ച് തിരുക്കുറലിന്റെ ഗുജറാത്തി വിവർത്തനവും ഞാൻ ഇവിടെ പുറത്തിറക്കിയിരുന്നു.

സുഹൃത്തുക്കളേ,

രാജ്യത്തിന്റെ ആവശ്യങ്ങൾക്കനുസരിച്ച് പ്രവർത്തിച്ച ഒരു ദീർഘവീക്ഷണമുള്ളയാളായിരുന്നു സുബ്രഹ്മണ്യ ഭാരതി. ആ കാലഘട്ടത്തിൽ രാജ്യത്തിന് ആവശ്യമായ എല്ലാ ദിശകളിലും അദ്ദേഹം പ്രവർത്തിച്ച ദർശനം വളരെ വിപുലമായിരുന്നു. അദ്ദേഹം തമിഴ്‌നാടിന്റെയും തമിഴ് ഭാഷയുടെയും അഭിമാനം മാത്രമല്ല; ഓരോ ശ്വാസവും ഭാരതമാതാവിനെ സേവിക്കുന്നതിനായി സമർപ്പിച്ച ഒരു ചിന്തകനാണ് അദ്ദേഹം. ഭാരതത്തിന്റെ ഉയർച്ചയും മഹത്വവുമായിരുന്നു ഭാരതി ജിയുടെ സ്വപ്നം. ഭാരതി ജിയുടെ സംഭാവനകൾ ജനങ്ങളിലേക്ക് എത്തിക്കാൻ നമ്മുടെ ​ഗവൺമെന്റ് സ്ഥിരമായ ശ്രമങ്ങൾ നടത്തിയിട്ടുണ്ട്. 2020-ൽ കോവിഡ് വെല്ലുവിളികൾക്കിടയിലും, ഭാരതി ജിയുടെ  100-ാം ചരമവാർഷികം ഞങ്ങൾ ഗംഭീരമായി ആഘോഷിച്ചു. ഞാൻ അന്താരാഷ്ട്ര ഭാരതി ഉത്സവത്തിൽ പങ്കെടുത്തു.ചുവപ്പു കോട്ടയിൽ നിന്ന് രാജ്യത്തെ അഭിസംബോധന ചെയ്താലും അന്താരാഷ്ട്ര സമൂഹവുമായി ഇടപഴകിയാലും, ഭാരതി ജിയുടെ ചിന്തകളിലൂടെ ഭാരതത്തിന്റെ ദർശനം ഞാൻ നിരന്തരം എടുത്തുകാണിച്ചിട്ടുണ്ട്. ശ്രീ സീനി ജി പറഞ്ഞതുപോലെ, ഞാൻ ലോകത്തിന്റെ വിവിധ ഭാഗങ്ങളിൽ പോയിരുന്നിടത്തെല്ലാം ഭാരതി ജിയെക്കുറിച്ച് സംസാരിച്ചു, സീനി ജി അഭിമാനത്തോടെ ഇത് എടുത്തുകാണിച്ചിട്ടുണ്ട്. നിങ്ങൾക്കറിയാമോ, എനിക്കും സുബ്രഹ്മണ്യ ഭാരതി ജിക്കും ഇടയിൽ ഒരു ജീവസ്സുറ്റ ആത്മീയ ബന്ധമുണ്ട്, അതാണ് നമ്മുടെ കാശി. കാശിയുമായുള്ള അദ്ദേഹത്തിന്റെ ബന്ധം, അവിടെ ചെലവഴിച്ച സമയം, കാശിയുടെ പൈതൃകത്തിന്റെ അവിഭാജ്യ ഘടകമായി മാറിയിരിക്കുന്നു. അറിവ് തേടി അദ്ദേഹം കാശിയിലെത്തി അതിനോട് ചേർന്നു. അദ്ദേഹത്തിന്റെ കുടുംബത്തിലെ പലരും ഇപ്പോഴും കാശിയിൽ താമസിക്കുന്നു, അവരുമായി ഒരു ബന്ധം ഉണ്ടായിരിക്കാൻ എനിക്ക് ഭാഗ്യമുണ്ട്. കാശിയിൽ താമസിക്കുമ്പോൾ ഭാരതിയാർ തന്റെ മീശ വളർത്താൻ പ്രചോദനം നൽകിയതായി പറയപ്പെടുന്നു. കാശിയിൽ താമസിച്ചിരുന്ന സമയത്ത് ഗംഗാ തീരത്താണ് ഭാരതിയാർ തന്റെ നിരവധി കൃതികൾ എഴുതിയത്. അതുകൊണ്ടാണ്, കാശിയിൽ നിന്നുള്ള പാർലമെന്റ് അംഗം എന്ന നിലയിൽ, അദ്ദേഹത്തിന്റെ രചനകൾ സമാഹരിക്കുന്ന ഈ പുണ്യകൃതിയെ ഞാൻ പൂർണ്ണഹൃദയത്തോടെ സ്വാഗതം ചെയ്യുകയും ആഘോഷിക്കുകയും ചെയ്യുന്നത്. ബനാറസ് ഹിന്ദു സർവകലാശാലയിൽ (BHU) മഹാകവി ഭാരതിയാറിന്റെ സംഭാവനകൾക്കായി സമർപ്പിച്ചിരിക്കുന്ന ഒരു ചെയർ സ്ഥാപിച്ചത് നമ്മുടെ ​ഗവൺമെന്റിന് ലഭിച്ച പദവിയാണ്.

സുഹൃത്തുക്കളേ,

നൂറ്റാണ്ടുകളിൽ ഒരിക്കൽ മാത്രം പ്രത്യക്ഷപ്പെടുന്ന വ്യക്തിത്വമായിരുന്നു സുബ്രഹ്മണ്യ ഭാരതി. അദ്ദേഹത്തിന്റെ ചിന്ത, ബുദ്ധി, ബഹുമുഖ വ്യക്തിത്വം എന്നിവ ഇന്നും എല്ലാവരെയും അത്ഭുതപ്പെടുത്തിക്കൊണ്ടിരിക്കുന്നു. വെറും 39 വർഷത്തെ ജീവിതത്തിൽ, പണ്ഡിതന്മാർ അവരുടെ ജീവിതം മുഴുവൻ അത് വിശദീകരിക്കാൻ ശ്രമിക്കത്തക്കവിധം ഭാരതി ജി നമുക്ക് ധാരാളം നൽകി. 39 വർഷം മാത്രമേ അദ്ദേഹം ജീവിച്ചിരുന്നുള്ളൂവെങ്കിലും, ആറ് പതിറ്റാണ്ടുകളായി അദ്ദേഹത്തിന്റെ പ്രവർത്തനങ്ങൾ വ്യാപിച്ചു. കളിക്കാനും പഠിക്കാനും വേണ്ടിയുള്ള പ്രായത്തിൽ, അദ്ദേഹം ദേശീയബോധം വളർത്തിക്കൊണ്ടിരുന്നു. ഒരു വശത്ത്, അദ്ദേഹം ആത്മീയതയെ അന്വേഷിക്കുന്നയാളും മറുവശത്ത്, ആധുനികതയുടെ പിന്തുണക്കാരനുമായിരുന്നു. അദ്ദേഹത്തിന്റെ കൃതികൾ പ്രകൃതിയോടുള്ള സ്നേഹത്തെയും മെച്ചപ്പെട്ട ഭാവിക്കായുള്ള പ്രചോദനത്തെയും പ്രതിഫലിപ്പിക്കുന്നു. സ്വാതന്ത്ര്യസമരകാലത്ത്, അദ്ദേഹം സ്വാതന്ത്ര്യം ആവശ്യപ്പെടുക മാത്രമല്ല, സ്വതന്ത്രരാകേണ്ടതിന്റെ ആവശ്യകതയിലേക്ക് ഇന്ത്യൻ ജനതയെ ഉണർത്താൻ അവരുടെ ഹൃദയങ്ങളെ ഇളക്കിമറിക്കുകയും ചെയ്തു. ഇത് വളരെ പ്രധാനപ്പെട്ട ഒരു കാര്യമാണ്! അദ്ദേഹം തന്റെ നാട്ടുകാരോട് പറഞ്ഞിരുന്നു, ഞാൻ തമിഴിൽ സംസാരിക്കാൻ ശ്രമിക്കുകയാണ്. ഉച്ചാരണത്തിലെ എന്തെങ്കിലും തെറ്റുകൾ ഉണ്ടെങ്കിൽ ദയവായി എന്നോട് ക്ഷമിക്കൂ. മഹാകവി ഭാരതിയാർ ഇങ്ങനെ പറഞ്ഞിരുന്നു:  एन्रु तणियुम्, इन्द सुदन्तिर,दागम्। एन्रु मडियुम् एंगळ् अडिमैयिऩ्मोगम्।

ഇതിനർത്ഥം, "സ്വാതന്ത്ര്യത്തിനായുള്ള ദാഹം എപ്പോൾ ശമിക്കും? നമ്മുടെ അടിമത്ത മനോഭാവം എപ്പോൾ അവസാനിക്കും?" അക്കാലത്ത്, അടിമത്ത മനോഭാവമുള്ള ഒരു വിഭാഗം ആളുകളുണ്ടായിരുന്നു, അദ്ദേഹം അതിന് അവരെ  ശാസിച്ചു. "അടിമത്തത്തോടുള്ള ഈ ആസക്തി എപ്പോൾ അവസാനിക്കും?" ആത്മപരിശോധനയ്ക്കുള്ള ധൈര്യവും വിജയിക്കാനുള്ള ആത്മവിശ്വാസവുമുള്ള ഒരാളിൽ നിന്ന് മാത്രമേ അത്തരമൊരു ആഹ്വാനം ഉണ്ടാകൂ! ഇതായിരുന്നു ഭാരതിയാറിന്റെ അതുല്യമായ സ്വഭാവം. അദ്ദേഹം തുറന്നുപറയുകയും സമൂഹത്തിന് ശരിയായ ദിശ കാണിച്ചുകൊടുക്കുകയും ചെയ്തു. പത്രപ്രവർത്തന മേഖലയിലും അദ്ദേഹം ശ്രദ്ധേയമായ പ്രവർത്തനങ്ങൾ ചെയ്തു. 1904-ൽ അദ്ദേഹം തമിഴ് പത്രമായ 'സ്വദേശമിത്രൻ'-ൽ ചേർന്നു. പിന്നീട്, 1906-ൽ അദ്ദേഹം ചുവന്ന പേപ്പറിൽ 'ഇന്ത്യ' എന്ന വാരിക പ്രസിദ്ധീകരിക്കാൻ തുടങ്ങി. തമിഴ്‌നാട്ടിൽ രാഷ്ട്രീയ കാർട്ടൂണുകൾ അച്ചടിച്ച ആദ്യത്തെ പത്രമായിരുന്നു ഇത്. ദുർബലരെയും പാർശ്വവൽക്കരിക്കപ്പെട്ടവരെയും സഹായിക്കാൻ ഭാരതി ജി സമൂഹത്തെ പ്രചോദിപ്പിച്ചു. 'കണ്ണൻ പാട്ട്' എന്ന കവിതാസമാഹാരത്തിൽ, അദ്ദേഹം 23 രൂപങ്ങളിൽ ശ്രീകൃഷ്ണനെ സങ്കൽപ്പിച്ചു. അദ്ദേഹത്തിന്റെ ഒരു കവിതയിൽ, ദരിദ്ര കുടുംബങ്ങൾക്ക് വസ്ത്രങ്ങൾ ദാനം ചെയ്യാൻ അദ്ദേഹം ആവശ്യപ്പെടുന്നു, അത് നൽകാൻ കഴിയുന്നവരിലേക്ക് എത്തിച്ചേരുന്നു. മനുഷ്യസ്‌നേഹത്തിനുള്ള പ്രചോദനം നിറഞ്ഞ അദ്ദേഹത്തിന്റെ കവിതകൾ ഇന്നും നമ്മെ പ്രചോദിപ്പിക്കുന്നു.

സുഹൃത്തുക്കളേ,

ഭാരതിയാർ ഒരു ക്രാന്തദർശിയായിരുന്നു, തന്റെ കാലത്തിനപ്പുറത്തേക്ക് കാണാനും ഭാവി മനസ്സിലാക്കാനും അദ്ദേഹത്തിന് കഴിഞ്ഞു. സമൂഹം വിവിധ പോരാട്ടങ്ങളിൽ കുടുങ്ങിപ്പോയ ഒരു കാലഘട്ടത്തിൽ പോലും, യുവാക്കളുടെയും സ്ത്രീകളുടെയും ശാക്തീകരണത്തിനായുള്ള ശക്തമായ വക്താവായിരുന്നു ഭാരതിയാർ. ശാസ്ത്രത്തിലും നവീകരണത്തിലും ഭാരതിയാർക്ക് വലിയ വിശ്വാസമുണ്ടായിരുന്നു. ദൂരങ്ങൾ പാലിച്ചുകൊണ്ട് മുഴുവൻ രാജ്യത്തെയും ഒന്നിപ്പിക്കുന്ന ഒരു ആശയവിനിമയ സംവിധാനം അദ്ദേഹം തന്റെ കാലഘട്ടത്തിൽ വിഭാവനം ചെയ്തു. ഇന്ന്, നമ്മൾ ജീവിക്കുന്ന സാങ്കേതികവിദ്യയാണ് ഭാരതിയാർ അന്ന് വിഭാവനം ചെയ്തത്. അദ്ദേഹം പറഞ്ഞു: "काशी नगर,पुलवर पेसुम्,उरै तान् ॥ कांचियिल्, केट्पदर्कोर्,करुवि चेय्वोम ॥

കാഞ്ചിയിൽ ഇരിക്കുമ്പോൾ ബനാറസിലെ സന്യാസിമാർ പറയുന്നത് കേൾക്കാൻ നമ്മെ അനുവദിക്കുന്ന ഒരു ഉപകരണം ഉണ്ടായിരിക്കണം." ഇന്ന്, ഡിജിറ്റൽ ഇന്ത്യ ഈ സ്വപ്നങ്ങളെ യാഥാർത്ഥ്യമാക്കി മാറ്റുന്നത് നമ്മൾ കാണുന്നു. ‘ഭാഷിണി’ പോലുള്ള ആപ്പുകൾ നിരവധി ഭാഷാ തടസ്സങ്ങൾ ഇല്ലാതാക്കിയിട്ടുണ്ട്. ഭാരതത്തിലെ എല്ലാ ഭാഷകളോടും ആദരവ് തോന്നുമ്പോൾ, എല്ലാ ഭാഷകളിലും അഭിമാനം ഉണ്ടാകുമ്പോൾ, ഓരോ ഭാഷയും സംരക്ഷിക്കാനുള്ള ആത്മാർത്ഥമായ ഉദ്ദേശ്യം ഉണ്ടാകുമ്പോൾ, ഓരോ ഭാഷയ്ക്കും യഥാർത്ഥ സേവനം ലഭിക്കുന്നു.

സുഹൃത്തുക്കളേ,

മഹാകവി ഭാരതിയുടെ സാഹിത്യം ലോകത്തിലെ ഏറ്റവും പഴക്കമുള്ള തമിഴ് ഭാഷയ്ക്ക് ഒരു നിധിയാണ്. നമ്മുടെ തമിഴ് ഭാഷ ലോകത്തിലെ ഏറ്റവും പുരാതനമായ ഭാഷയാണെന്ന വസ്തുതയിൽ നമുക്ക് അഭിമാനിക്കാം. അദ്ദേഹത്തിന്റെ സാഹിത്യം പ്രചരിപ്പിക്കുമ്പോൾ, നമ്മൾ തമിഴ് ഭാഷയെയും സേവിക്കുകയാണ്. തമിഴിനെ സേവിക്കുമ്പോൾ, ഈ രാജ്യത്തിന്റെ ഏറ്റവും പുരാതനമായ പൈതൃകത്തെയും സേവിക്കുകയാണ്.

സഹോദരീ സഹോദരന്മാരേ,

കഴിഞ്ഞ 10 വർഷമായി, തമിഴ് ഭാഷയുടെ മഹത്വത്തിനായി രാജ്യം സമർപ്പണത്തോടെ പ്രവർത്തിച്ചിട്ടുണ്ട്. ഐക്യരാഷ്ട്രസഭയിൽ ഞാൻ ലോകത്തിന് മുഴുവൻ തമിഴിന്റെ മഹത്വം അവതരിപ്പിച്ചിരുന്നു. ലോകമെമ്പാടും തിരുവള്ളുവർ സാംസ്കാരിക കേന്ദ്രങ്ങളും ഞങ്ങൾ ആരംഭിക്കുന്നു. 'ഏക ഭാരതം, ശ്രേഷ്ഠ ഭാരതം' എന്നതിന്റെ ആത്മാവ് സുബ്രഹ്മണ്യ ഭാരതിയുടെ ചിന്തകളെ പ്രതിഫലിപ്പിക്കുന്നു. രാജ്യത്തിന്റെ വൈവിധ്യമാർന്ന സംസ്കാരങ്ങളെ ബന്ധിപ്പിക്കുന്നതിനുള്ള പ്രത്യയശാസ്ത്രത്തെ ഭാരതിയാർ എപ്പോഴും ശക്തിപ്പെടുത്തി. ഇന്ന്, കാശി തമിഴ് സംഗമം, സൗരാഷ്ട്ര തമിഴ് സംഗമം പോലുള്ള പരിപാടികൾ ഒരേ പ്രവർത്തനം നടത്തുന്നു. ഈ സംരംഭങ്ങൾ രാജ്യത്തുടനീളം തമിഴിനെക്കുറിച്ച് പഠിക്കാനും അറിയാനുമുള്ള ആളുകളുടെ ജിജ്ഞാസ വർദ്ധിപ്പിക്കുന്നു. തമിഴ്‌നാടിന്റെ സംസ്കാരവും പ്രോത്സാഹിപ്പിക്കപ്പെടുന്നു. രാജ്യത്തെ ഓരോ പൗരനും രാജ്യത്തെ എല്ലാ ഭാഷകളെയും അവരുടേതായി സ്വീകരിക്കുകയും ഓരോ ഭാഷയിലും അഭിമാനിക്കുകയും ചെയ്യണമെന്നതാണ് ഞങ്ങളുടെ ദൃഢനിശ്ചയം. തമിഴ് പോലുള്ള ഇന്ത്യൻ ഭാഷകളെ പ്രോത്സാഹിപ്പിക്കുന്നതിന് യുവാക്കൾക്ക് അവരുടെ മാതൃഭാഷയിൽ ഉന്നത വിദ്യാഭ്യാസത്തിനുള്ള അവസരവും ഞങ്ങൾ നൽകിയിട്ടുണ്ട്.

സുഹൃത്തുക്കളേ,

ഭാരതി ജിയുടെ സാഹിത്യ സമാഹാരം തമിഴ് ഭാഷയുടെ വ്യാപനവുമായി ബന്ധപ്പെട്ട ഞങ്ങളുടെ ശ്രമങ്ങളെ കൂടുതൽ പ്രോത്സാഹിപ്പിക്കുമെന്ന് എനിക്ക് പൂർണ്ണ വിശ്വാസമുണ്ട്. ഒരുമിച്ചു, നമുക്ക് ഒരു 'വികസിത ഭാരതം' എന്ന ലക്ഷ്യത്തിലെത്താനും ഭാരതിയാറിന്റെ സ്വപ്നങ്ങൾ സാക്ഷാത്കരിക്കാനും കഴിയും. ഈ സമാഹാരത്തിനും പ്രസിദ്ധീകരണത്തിനും നിങ്ങളെയെല്ലാം ഞാൻ വീണ്ടും അഭിനന്ദിക്കുന്നു. ജീവിതത്തിന്റെ ഈ ഘട്ടത്തിൽ, തമിഴ്‌നാട്ടിൽ താമസിച്ച് ഡൽഹിയുടെ തണുപ്പ് സഹിച്ചുകൊണ്ട്, അദ്ദേഹം വളരെ സമർപ്പണബോധമുള്ള ഒരു ജീവിതം നയിച്ചിരിക്കണമെന്ന് ഞാൻ നിരീക്ഷിക്കുകയായിരുന്നു. അദ്ദേഹത്തിന്റെ കൈയ്യക്ഷര കുറിപ്പുകളും ഞാൻ നോക്കുകയായിരുന്നു - എത്ര മനോഹരമായ കൈയക്ഷരം! ഈ പ്രായത്തിൽ, ഒപ്പിടുമ്പോൾ പോലും നമ്മൾ വിറയ്ക്കുന്നു, പക്ഷേ അദ്ദേഹത്തിന്റെ കൈയക്ഷരം യഥാർത്ഥത്തിൽ അദ്ദേഹത്തിന്റെ ഭക്തിയുടെയും തപസ്സിന്റെയും പ്രതീകമാണ്. ആത്മാർത്ഥമായ ആദരവോടെ ഞാൻ നിങ്ങളെ വണങ്ങുന്നു. നിങ്ങളെയെല്ലാം  ഊഷ്മളമായ വണക്കത്തോടെ ഞാൻ അഭിവാദ്യം ചെയ്യുന്നു, വളരെ നന്ദി!

ഡിസ്ക്ലൈമർ: പ്രധാനമന്ത്രിയുടെ പ്രസംഗത്തിന്റെ ഏകദേശ വിവർത്തനമാണിത്. യഥാർത്ഥ പ്രസംഗം ഹിന്ദിയിലായിരുന്നു.

-SK-