ঙসি প্রধান মন্ত্রী শ্রী নরেন্দ্র মোদীনা সাইপ্রসকী রাষ্ট্রপতি নিকোস খৃষ্টোদৌলিদেসগা ৱারি শানখ্রে। রাষ্ট্রপতিগী কোনুংদা থুংলবগা, সাইপ্রসকী রাষ্ট্রপতি নিকোস খৃষ্টোদৌলিদেসনা প্রধান মন্ত্রী তরাম্না ওকখি অমসুং চৎনবীগী মতুংইন্না তরাম্না ওকপগী থৌরম অমা পাংথোকখি। ঙরাং, অখন্নবা অমা ওইনা, এয়রপোর্ততা সাইপ্রসকী রাষ্ট্রপতি নিকোস খৃষ্টোদৌলিদেসনা প্রধান মন্ত্রী তরাম্না ওকখি, লৈবাক অনিগী মরক্ত লৈনরিবা থাজনবা অমসুং মরুপ-মপাং ওইবা মরী অদু মমি তাখি।

২. লুচিংবা অনিনা ভারত-সাইপ্রস শরুক য়ামিন্নরিবা গুনশিং অমুক হন্না পনখি। অমনা অমগী মনিংতম্বা অমসুং ঙমখৈগী অপুনবা শক্তম ইকায়খুম্ননবা মখোয়না অমুক হন্না ফোঙদোকখি। এপ্রিল ২০২৫ দা তেরোরিস্তশিংনা পেহালগামদা চৎথখিবা তমথিরবা থৌদোক অকনবা মওংদা য়ানিংদবা ফোঙদোকখিবা অমসুং ভারতনা তেরোরিজিমগী মায়োক্ত পায়খৎলিবা থবকশিং শৌগৎপগীদমক প্রধান মন্ত্রীনা সাইপ্রস থাগৎপা ফোঙদোকখি। মসিনা লৈবাক অনিনা তেরোরিজমগী মায়োক্ত লৈরিবা অদু মশক তাক্লে। সাইপ্রসকী অপুনবদা ভারতনা শৌগৎপা প্রধান মন্ত্রীনা অমুক হন্না ফোঙদোকখি অমসুং য়ু.এন সেকুরিতি কাউন্সিলগী ৱারেপশিং, মালেমগী আইন অমসুং ই.য়ু এক্কুইজদা য়ুম্ফম ওইদুনা সাইপ্রসকী মতাংদা শান্তি ওইনা ৱারোইশিন পুরক্নবা প্রধান মন্ত্রীনা ফোঙদোকখি।

৩. ললোন-ইতিক, শেন থাদবা, সাইন্স অমসুং থিজিনবা, নাৎকী মতেং পাংনবা অমসুং মীগা মীগা লৈনবা মরীশিং য়াওনা তোঙান তোঙানবা হিরমশিংদা হৌজিক লৈবাক অনি মতেং পাংনরিবা অসিগী ফিবম লুচিংবা অনিনা য়েংশিনখ্রে অমসুং ফিনতেক, ষ্টার্দ-অপশি, দিফেন্স ইন্দস্ত্রি, চৎথোক-চৎশিন, ইন্নোবেসন, দিজিতাইজেসন, এ.আই অমসুং মোবিলিতিগী অনৌবা হিরমশিংদা পুন্না থবক তৌমিন্নবগী খুদোংচাবশিং খঙদোকখি। মরুওইবা হিরমশিংদা মতেং পাংনবা হেনগৎহন্নবা চহি মঙাগী লম্বী অমা শেম্বদা নাকল অনিনা য়ানরে। সাইবর অমসুং মেরিতাইম সেকুরিতি দাইলোগশিং পাংথোকপা অমসুং তেরোরিজম, দ্রগশিং অমসুং খুৎলায়শিং পুথোক-পুশিন তৌবগী মতাংদা খুদক্ত ই-পাউ পীনবগী মতাংদা মখোয়না য়ানরে। লৈবাক অনিগী মরক্ত দিফেন্সকী লমদা থবক তৌমিন্ননবা জনুৱারি২০২৫ দা বাইলেতরেল দিফেন্স কোওপরেসন প্রোগ্রাম খুৎয়েক পীনখিবদা লুচিংবশিংনা থাগৎপা ফোঙদোকখ্রে। শেন-থুমগী থবকশিং হেন্না ফগৎনবা ইন্দিয়া-গ্রিস- সাইপ্রস ব্যুজিনেস এন্দ ইনভেস্তমেন্ত কাউন্সিল লিংখৎপদা মখোয়না তরাম্না ওকখ্রে। ললোন-ইতিক, তুরিজম অমসুং লৌশিং অমসুং অনৌবা থবকশিংগী মরীশিং ফগৎনবা নোংথক্ত চৎথোক-চৎশিনগী থবকশিং ফগৎহন্নবশু মখোয়না খন্নখি। লমদম অসিদা শান্তি অমসুং নুংঙাইবা পুরকপদা ইন্দিয়া মিদল ইষ্ট য়ুরোপ ইকোনোমিক কোরিদোরনা মতেং পাংগনি হায়না প্রধান মন্ত্রীনা তকশিনখি।

৪. য়ু.এন সেকুরিতি কাউন্সিল য়াওনা মালেমগী লুপশিং অমসুং মালেমগী লৈঙাক শেমদোক্নবা লুচিংবশিংনা অমুক হন্না ফোঙদোকখ্রে। ভারতনা য়ু.এন.এস.সিগী লেংদ্রবা মেম্বর ওইবদা সাইপ্রসনা শৌগৎপগীদমক প্রধান মন্ত্রীনা রাষ্ট্রপতি নিকোস খৃষ্টোদৌলিদেস থাগৎপা ফোঙদোকখি। মখোয়না হৌজিক নোংচুপ এসিয়া অমসুং য়ুরোপতা চৎথরিবা লাল য়াওনা মালেমগী মরুওইবা থৌদোকশিংগী মতাংদা খন্নখি।

৫. রাষ্ট্রপতি নিকোস খৃষ্টোদৌলিদেস ভারত্ত লাক্নবা প্রধান মন্ত্রীনা চেবাউ পীখি। খোঙচৎ অসিদা য়ুনিভর্সিতি ওফ নিকোসিয়াদা ভারতকী মরমদা তম্নবা আই.সি.সি.আর চিয়ার অমা লিংখৎনবা এম.ও.য়ু অমা খুৎয়েক পীনখি। মীফম মতুংদা ইন্দিয়া-সাইপ্রস পার্তনরশিপকী মতাংদা অপুনবা ৱারোল অমা ফোঙখি।

***